Luuk 3
3
Jɔɔn Kɔraawiizi Niisɔɔri wia
(Mat 3:1-12; Maak 1:1-8; Jɔɔn 1:19-28)
1Room Koorizeŋ Taibiriɔs Siiza kora dii binni fidaanuehiŋ biini, a saŋa, di Pɔntiɔs Pailɔt ge dɔɔ Juda hɛri fɔŋŋa. Hɛrɔd ge ɛɛ Galilii hɛri nabɔma, u niwee Filip ge ɛɛ Ituria ni Trakonaitis hɛssi nabɔma. Laisenias ɛɛ Abilini hɛri nabɔma. 2Annas ni Kaifas ge ɛɛ Kɔraawiizi Kizeehina Maa Nabɔnzi la, a saŋaa Kɔraawiizi kpa u wiŋɔɔlii tɛɛ Zɛkaria biibaal Jɔɔn n faa du hɛribɔduma biini. 3Awia, u faa gaagi Jɔɔdan muu barii maa, di ra ŋɔ dí, nɛra gil ba biine chɔgi dikuu ba wichɔgaa wia di gilaa ta, ka Kɔ́raawiizi gil ba wichɔgaa tɛɛ baa, ka ba ú sɔ baa Kɔraawiizi nii. 4Kɔraawiizi dɔgtɛɛ Aizaaya faa sɛbi u wiarɛ guŋ u hɔŋ biini, di ŋɔ,
“Ba daŋ nuu nɛbɛl n na sii hɛribɔduma biini,
di ra ŋɔ,
‘Yaa Dɔɔri ra bau.
Ií ra ɛɛ sirya ú ra ba!
Ií ra ɛɛ wia á ra deŋli
ni a ŋmɛnizi. #Aiza 40:3-5
5Kɔraawiizi daŋ tɔ walli maa,
di kaa bul giŋgimee
ni bɔra la n la chiŋ.
U daŋ wa kuari ŋmɛnigolgaa la á deŋli,
di kaa kuari
ŋmɛninyirmanyirmazi la
á du kpantalaŋ.
6Denii newea maa na gunla Kɔraawiizi nɛra lɛɛi n duwɛɛ.’ ”
7Denii nɛkpila lii ba Jɔɔn be ú sɔ baa Kɔraawiizi nii la. U ŋɔ ba be, “Hɛrikuna biizi! Anɛɛ n kali ia lugɔ ií ra chɔ, Kɔ́raawiizi baaŋ gilɛɛ waa fuuh ii ninɛi? 8Ií gil ii wiɛɛlaa ra bagli lugɔ ii biine chɔkkɔɔ dikuu ii wichɔgaa wia. Ií gilɛɛ ra chɔli iihinaa di ra ŋɔ dɔŋa be lugɔ ii ɛɛ Abraham naannaa. Ií gil n ŋɔ ii be. Di Kɔraawiizi vii sɛɛwɔ, u daŋ vii wer kpa bia naa birgi Abraham naanna. 9Ii ɛɛwɔɔ lugɔ daazi Kɔraawiizi n kpa kpaŋfɔ di ɛɛ sirya ú chi a lunne maga di ŋmɛnnaa ha. Daa la maa nɔna n waa wer, u daŋ ŋmɛnuu ha di kpau ha niŋ biini ú fuuh.”
10Nɛkpila la jaa pɛɛzi Jɔɔn, “Ka ɛrɛɛ ya ɛɛ naanɛi?”
11U ŋɔ, “Nɛr la n dɔɔ tagtazi anɛɛ, ú kpa bɛl tɛɛ nɛr la n waa bɛl maa dɔɔwɛ. Gunnɛ nɛr la n dɔɔ diwee, ú bɔnni tɛɛ banla n waa dɔɔwɛ la.”
12Lampolɛɛra gba ba u be ú sɔ baa a nii, di pɛɛzuu, “Yaa Nabɔma, ɛrɛɛ ya ge ɛɛi?”
13U ŋɔ, “Ií gilɛɛ waa lɛɛ nɛra kebee di ra kaali gunla baŋ ŋɔ ii be lugɔ ií ra lɛɛ la.” 14Denii soojazi baŋhina ge pɛɛzuu, “Ɛrɛɛ ya ge ɛɛi?”
U ŋɔ, “Ií gilɛɛ ra foozi nɛra kebee, di kanni kara ra chug baa. Ií gil ii kinturgaa kukki ia.”
15Nɛra maa dɔɔ Jɔɔn tamiirɛ, di ra fɛ lugɔ u nii ɛɛ Kristo#3:15 Kristo zɛɛ bɛllɛ Mɛsia, waabuu Kɔraawiizi ŋɔ nua lugɔ u daŋ humuu, ú wa lɛɛ yaa la. la n niŋ ba labuu. 16Jɔɔn ŋɔ ba maa be, “Miŋwaa n kpa nii ra sɔ ia naa, ka unla n tɔ n har di ra ba la ɛɛ nabɔmaa n ni werge maa. Maa dɛg min niŋ lizi u gawa gba tɛu. Kɔraawiizi Dumnanii ni ninne waabuu wa kpa ra sɔ ia.#Wiɛɛ 1:5 17Ii kaa ɛɛu lugɔ mia ge Kɔraawiizi n ɛɛ sirya ú hɛl a zɔga ha, ka paa a bii du u kaporo biini, ka kpa zɔga lawaa du niŋ la n waa dimaa dɔɔwɛ la biini, á fuuh.”#Mala 4:1 18Jɔɔn la kaa ŋɔ wikpila ra bagli nɛra la, di lizi amaniyesuma la ra tɛɛ baa.
19Denii Hɛrɔd la n dɔɔ fɔŋŋa Galilii hɛri la, faa foozi u himmaa niwee haaŋ, banna yir Hɛrɔdias, ka kaa ɛɛ wichɔgaa aŋhina di jaa. Awia, Jɔɔn faa nyɛg Hɛrɔd ni.#Mat 14:3-4 20Guŋ gil Hɛrɔd kaa ɛɛ wichɔgii bɛl di jaa anla ni, di lau Jɔɔn tɔ dia.
Baŋ sɔ Yeesu Kɔraawiizi nii wia
(Mat 3:13-17; Maak 1:9-11)
21Mɔɔ ka Hɛrɔd lau Jɔɔn tɔ dia la, a saŋa, di Jɔɔn faa sɔ nɛra maa Kɔraawiizi nii la tuŋ. Denii Yeesu ba u be u sɔ u ge a nii. Yeesu n na jaami Kɔraawiizi la, baama yaa chiŋ, 22Kɔraawiizi Dumnanii ga de tuu wa togni u ni alugɔ komma. Denii ba nuu loobii bɛl n lii chiŋ di ŋɔ, “Hinuu n biinɔŋŋii. I wia parimbuu werge.”#Aiza 11:2-3; Luuk 9:35
Yeesuu naabaala wia
(Mat 1:1-17)
23Yeesu di binni tokko ni kpɔrgɔɔ mɔɔ, ka haa faari u huma. Nɛra faa zumɔɔ lugɔ u ɛɛ Joosɛf biere.
A Joosɛf ge mɛɛrɛ Hɛli, 24Hɛli ge mɛɛrɛ Mattat,
Mattat ge mɛɛrɛ Levi, Levi ge mɛɛrɛ Mɛlki,
Mɛlki ge mɛɛrɛ Jannai, Jannai la ge mɛɛrɛ Joosɛf.
25Joosɛf mɛɛrɛ Matatias,
Matatias ge mɛɛrɛ Emɔs,
Emɔs ge mɛɛrɛ Nahum, Nahum ge mɛɛrɛ Ɛsli,
Ɛsli ge mɛɛrɛ Nagai, 26Nagai ge mɛɛrɛ Maaf,
Maaf ge mɛɛrɛ Matatias, Matatias ge mɛɛrɛ Sɛmɛin,
Sɛmɛin naa ge mɛɛrɛ Josɛk, Josɛk mɛɛrɛ Jɔda,
27Jɔda ge mɛɛrɛ Joanan, Joanan ge mɛɛrɛ Rɛsa,
Rɛsa ge mɛɛrɛ Zɛrubabɛl, Zɛrubabɛl ge mɛɛrɛ Sɛɛltiɛl,
Sɛɛltiɛl ge mɛɛrɛ Nɛri, 28Nɛri ge mɛɛrɛ Mɛlki,
Mɛlki ge mɛɛrɛ Adi, Adi ge mɛɛrɛ Kɔsam,
Kɔsam ge mɛɛrɛ Ɛlmadam, Ɛlmadam ge mɛɛrɛ Ɛr,
29Ɛr ge mɛɛrɛ Josua, Josua ge mɛɛrɛ Ɛliɛza,
Ɛliɛza naa ge mɛɛrɛ Jɔrim, Jɔrim ge mɛɛrɛ Mattat,
Mattat ge mɛɛrɛ Levi, 30Levi ge mɛɛrɛ Simɛɔn,
Simɛɔn ge mɛɛrɛ Juda, Juda ge mɛɛrɛ Joosɛf,
Joosɛf ge mɛɛrɛ Jɔnam, Jɔnam ge mɛɛrɛ Ɛliakim,
31Ɛliakim ge mɛɛrɛ Mɛlia, Mɛlia ge mɛɛrɛ Mɛnna,
Mɛnna ge mɛɛrɛ Matata, Matata ge mɛɛrɛ Netan,
Netan ge mɛɛrɛ Deevid, 32Deevid ge mɛɛrɛ Jɛssɛ,
Jɛssɛ ge mɛɛrɛ Ɔbɛd, Ɔbɛd ge mɛɛrɛ Bɔaz,#Ruf 4:17
Bɔaz ge mɛɛrɛ Salmɔn, Salmɔn ge mɛɛrɛ Nasɔn,
33Nasɔn ge mɛɛrɛ Aminadab, Aminadab ge mɛɛrɛ Admin,
Admin ge mɛɛrɛ Aani, Aani ge mɛɛrɛ Hɛzrɔn,
Hɛzrɔn ge mɛɛrɛ Pɛrɛz, Pɛrɛz ge mɛɛrɛ Juda,
34Juda ge mɛɛrɛ Jekɔb, Jekɔb ge mɛɛrɛ Aizik,
Aizik ge mɛɛrɛ Abraham, Abraham ge mɛɛrɛ Tɛra,
Tɛra ge mɛɛrɛ Nahɔ,#Lug 11:10-26 35Nahɔ ge mɛɛrɛ Sɛrug,
Sɛrug ge mɛɛrɛ Riu, Riu ge mɛɛrɛ Pɛlɛg,
Pɛlɛg ge mɛɛrɛ Ɛba,#Lug 10:25 Ɛba ge mɛɛrɛ Sɛla,
36Sɛla ge mɛɛrɛ Kenan, Kenan ge mɛɛrɛ Aafagzad,
Aafagzad ge mɛɛrɛ Sɛm, Sɛm ge mɛɛrɛ Noowa,
Noowa ge mɛɛrɛ Lamɛk, 37Lamɛk ge mɛɛrɛ Mɛtusɛla,
Mɛtusɛla ge mɛɛrɛ Ɛnɔk, Ɛnɔk ge mɛɛrɛ Jarɛd,
Jarɛd ge mɛɛrɛ Mahalalɛl, Mahalalɛl ge mɛɛrɛ Kɛnan,
38Kɛnan ge mɛɛrɛ Ɛnɔs, Ɛnɔs ge mɛɛrɛ Sɛf,
Sɛf ge mɛɛrɛ Andama,
ka Andama ge mɛɛ jaa ɛɛ Kɔraawiizi.
Currently Selected:
Luuk 3: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
