Luglaa 20
20
Abraham ni Abimɛlɛk wia
1Abraham faa izi di la Nɛgɛv, di ga so Kadɛs ni Suur baambaaŋ. Aŋ wa ɛɛ hɔpizaa anɛɛ di u du Gɛra la, 2u ŋɔ lugɔ u haaŋ Saara ɛɛ u niuhambiere. Guŋ wia, de Koori Abimɛlɛk faa hum u bɔr, ba ga kpogluu wa tɛu. 3Ka a hɔl bɛl Kɔraawiizi ba Koori Abimɛlɛk be hamuŋa ni, u deeza biini, di wa ŋɔ u be, “I daŋ siu, dikuubɛɛwiai, haaŋ la hiŋ kpawɛɛ la ɛɛ nɛbɛl haannɛ.”
4Koori Abimɛlɛk nuu faa haa waa chɔɔwɛ. Awia, u ŋɔ, “N Dɔɔri Kɔraawiizi, i daŋ sɛɛ kpu n ni n nɛra n waa wiimaa zummɛa? 5Abraham ŋɔ n benii lugɔ u niuhambiere, a haaŋ gba himmaa kaa sɛɛ dí u kpɛɛmaa, wibii maa. Gunnɛ miŋwaa nuu di kpa a haaŋ, maa kaa zum wiimaa jaa.”
6Denii Kɔraawiizi ŋɔ u be a deeza biini, “N zummɔ lugɔ haa guŋ zummɛ, wibii maa. Awiarɛ maa gillɛ i ɛɛ wichɔgaa zuu n ni la. Maa sɛɛwɛ gil i gbɔgzi a haaŋ gba. 7Awia, gil a haaŋ bir kaali u jaari be. Di i ɛɛ guŋ, u jaari hiŋ daŋ suŋŋiŋ tɛi, dikuubɛɛwiai, u ɛɛ n dɔgtɛɛrɛ. Di i ɛɛ guŋwaa, hàá kaa siu. Ka di i vɛɛwɔ ge, i ni i nɛra maanii niŋ siu.”
8Hɔɔŋ wa pizɛɛ chɔɔzimpikke ni, Koori Abimɛlɛk feli yir u nabɔnzi maa, ba chaali, u kpa gunla n ɛɛwɛ bagli tɛɛ baa. Ɔnsii lau baa werge maa. 9Denii Koori Abimɛlɛk yir Abraham di ŋɔ, “Ɛrɛɛ i ɛɛ yaa kennei? Ɛrɛɛ n ɛɛi, i kpa a keŋ wichɔgii sag n ni n hɛri hina maa ni gunnɛi? A waa dɛkkɛ hiŋ vii ɛɛ a keŋ widɔŋ naa hiŋ ɛɛwɛ naa. 10Ɛrɛɛ i ɛɛ yaa gunnɛi?”
11Abraham ŋɔ, “N fɛwɔɔrɛ lugɔ bɔnnaa hina waa Kɔraawiizi ra ɔm. Di maa guŋ ɛɛwɛ, ba daŋ kuu a haaŋ wia di kpuŋ, ka kpau. 12Wibii maa genii n ŋɔ lugɔ n niuhambiere. Yaa mɛɛ ɛɛ kpannɛ ka yaa maawaa kurgi, ka n kpau di ɛɛ n haaŋ. 13Kɔraawiizi n ŋɔ ya lii n mɛɛ bol di la hɛhjaŋa la, n ŋɔ u benii lugɔ di yaa ɔɔ wa la bɔr la maa, di u dɔɔ n bila, ú ɔɔ ŋɔ lugɔ u ɛɛ n niuhambiere.”
14Denii Koori Abimɛlɛk lau u yoma baŋhina, baala ni haana, peeza ani nauna maa di tɛɛ Abraham, di kaa bir kpa u haaŋ ge di tɛu. 15Uŋ wa ɛɛ guŋ tuŋ, u ŋɔ Abraham be, “Binni hɛri naa maa di bagli u bɔr la n parii, di ga so de.” 16Denii u ŋɔ Saara be, “Na, n daŋ kpa saliŋhuŋŋa kebisau#20:16 A saliŋhuŋŋu kebisau sɔnnɛ sɛkɛl Boronizi biini. Ba faa kpaabuu di ra yau gɛɛ di ra yoo kuna gɛɛ di ra mɛgzi kuna tɔgzi. kagboŋ, di matti i niubambie, guŋ ɛɛ daansɛɛ di tɛɛ nɛr la maa n du i be, bá na. Gunnɛ niŋ bagli lugɔ haa bilchɔg maa dɔɔwɛ.” 17Denii Abraham suŋŋi wiizi, Kɔraawiizi chaa Koori Abimɛlɛk ni u haaŋ ani u yoŋhaana maa, ba kaa wer di ra lul biizi. 18Kɔraawiizi faa lau haana la maa n du Koori Abimɛlɛk dia lulaarɛ, dikuu Abraham haaŋ Saara wia.
Currently Selected:
Luglaa 20: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
