Лука 2

2‑нҗи бап

Иса догуляр

(Матта 1:18-25)

1Шол гүнлерде Рим императоры Август тутуш империяда илат язувыны гечирмек барада перман чыкарды. 2Бу илкинҗи илат язувы болуп, ол Кириниусың Сирия хөкүмдарлык эден дөврүнде гечирилди. 3Илат язувындан гечмек үчин, хер ким өз шәхерине гитди.

4Шейлеликде, Юсуп хем Җелиледәки Насыра шәхеринден чыкып, Давудың Яхудыядакы Бейтуллахам шәхерине гитди, себәби ол Давудың уругындан болуп, онуң неслине дегишлиди. 5Юсуп язылмак үчин ол ере гөврели адаглысы Меръеми хем алып гитди. 6-7Олар Бейтуллахамдакалар, Меръемиң айы-гүни долуп, новбахар оглуны догурды. Меръем Оны гундага долады-да, бир ахырда ятырды, себәби олар мыхманханадан ер тапмандылар.

Чопанлар ве перишделер

8Шол гиҗе Бейтуллахамың голайында кәбир чопанлар сүрүлерини гораярдылар. 9Бирденкә оларың өңүнде Реббиң бир перишдеси пейда болды ве Реббиң ялкымы даш-төвереги ягтылтды. Чопанлар гаты горкдулар. 10Перишде олара: «Горкмаң! Мен сизе әхли халкы бегендирҗек шатлыклы Хош Хабары ыглан эдйәрин: 11Шу гүн Давудың шәхеринде сизиң үчин Халасгәр догулды. Ол Реббимиз Месихдир. 12Ине, бу сизе бир аламат болар: сиз гундага долангы, ахырда ятан бир Чаганы тапарсыңыз» дийди. 13Бирденкә перишде билен бирликде гөгүң сан-саҗаксыз гошуны гөрүнди. Олар Худайы өвүп шөхратландырдылар:

14«Гөклер гөгүнде Худая шөхрат болсун!

Худайдан мерхемет тапан ердәки ынсанлара парахатлык болсун!#2:14 Худайдан… парахатлык болсун! – бу җүмле кәбир голязмаларда Ер йүзүнде парахатлык, ынсанлар арасында хошниетлилик болсун! дийип душ гелйәр.» диййәрдилер.

15Перишделер чопанларың янындан айрылып, гөге гөтериленлеринде, чопанлар бири-бирлерине: «Йөрүң, Бейтуллахама гиделиң. Реббиң бизе аян эден бу вакасыны гөрелиң» дийишдилер.

16Шейлеликде, олар гыссанмач гидип, Меръеми, Юсубы ве ахырда ятан чаганы тапдылар. 17Олар Исаны гөренлеринде, бу чага хакда эшиденлерини олара гүррүң бердилер. 18Чопанларың гүррүңлерини эшиденлериң бары хайран галды. 19Меръем болса бу затларың бары хакда чуңңур пикире батып, олары йүрегинде саклаярды. 20Чопанлар хемме гөрүп-эшиденлериниң өзлерине айдылышы ялы боландыгы үчин, Худайы шөхратландырдылар, өвгүлер айдып, ызларына доландылар.

Шимгон ве Ханна Иса хакда пыгамберлик эдйәрлер

21Секизинҗи гүн чаганы сүннетлемели боланда, Онуң адына Иса дакдылар. Бу Онуң энесиниң гөвресинде галмаздан өң, перишдәниң Оңа берен адыды. 22Мусаның кануны боюнча гечирилйән тәмизлениш дәп-дессурларың берҗай эдилмели дөври етип геленде, Юсуп билен Меръем Иерусалиме гитдилер. Олар Исаны Реббе багыш этмек үчин, Оны хем янларына алдылар. 23#Мср 13:2,12.Канунда: «Илкинҗи доглан хер бир эркек гөбекли Реббе багыш эдилмели» дийип языландыр. 24#Лев 12:8.Олар Канунда язылышы ялы, ики гумрыны я-да кепдерини хем гурбанлык хөкмүнде хөдүр этмелидилер.

25Шол вагт Иерусалимде Шимгон атлы бир догручыл ве таква адам яшаярды. Ол ысрайыл халкының азат эдилмегине гарашярды, Мукаддес Рух онуң үстүндеди. 26Оңа Реббиң Месихини гөрмезден өң өлмеҗекдиги Мукаддес Рух тарапындан аян болупды. 27Симун Мукаддес Рухуң угрукдырмагы билен ыбадатхананың ховлусына гелди. Исаның эне-атасы Төвратда язылан адаты берҗай этмек үчин, Чаганы ичери саланларында, 28Симун Оны гуҗагына алып, Худая алкыш окап, шейле дийди: 29«Я Реб, Өз берен сөзүңе гөрә, инди гулуң аркайын аманадыны табшырып билер. 30-31Ине, Сениң әхли халкларың өңүнде тайярлан Халасгәриңи гөзүм билен гөрдүм. 32Кесеки миллетлере аянлык берҗек, халкың ысрайылы шөхратландырҗак нуры гөрдүм».

33Чага барада айдылян сөзлере онуң эне-атасы хайран галды. 34Шимгон олара ак пата берип, энеси Меръеме: «Бу чага Худай тарапындан берлен аламат болуп, ынсанлар оңа гаршы чыкарлар. Ол себәпли Ысрайылда көп адамлар хеләк болар, көп адамлар болса ялканар. 35Шонда энчеме йүреклериң сырлы пикирлери аян болар. Сениң калбыңа хем хасрат йити гылыч кимин санҗылар» дийди.

36-37Ол ерде сегсен дөрт йылдан бәри дул яшаян Ханна атлы гарры пыгамбер аял хем барды. Ол ашер тиресинден Пануелиң гызыды. Ол дурмуша чыкандан соңра әри билен еди йыл яшашып, дул галыпды. Бу аял хемише ыбадатхананың ховлусында болуп, агыз бекләп, дога окап, гиҗе-гүндиз Худая ыбадат эдйәрди. 38Ханна хем эдил шол пурсат гелип, Реббе өвги айдып, Иерусалимиң халас болмагына гарашянларың барына бу Чага хакда гүррүң берди. 39Юсуп билен Меръем Мусаның кануны боюнча әхли зады берҗай эденлеринден соңра, Җелилә, өзлериниң Насыра шәхерине доландылар. 40Чага улалып, гүйчде ве акылдарлыкда өсйәрди. Худайың мерхемети Онуң үстүндеди.

Иса дин мугаллымлары билен

41Исаның эне-атасы хер йыл Песах байрамында Иерусалиме гидйәрдилер. 42Иса он ики яшына етенде, олар байрамчылык адаты боюнча ене Иерусалиме гитдилер. 43Байрамчылык гутарандан соң, олар өйлерине доландылар. Етгинҗек Иса болса Иерусалимде галды, эмма Онуң эне-атасының мундан хабары ёкды. 44Олар Оны ёлагчыларың арасындадыр өйдүп, бир гүнлүк ёлы гечдилер. Онсоң Оны доган-гарындашларының, дост-ярларының арасындан гөзләп башладылар. 45Оны гөзләп тапмансоңлар, ызларына Иерусалиме доландылар. 46Үч гүнден соң, Оны ыбадатхананың ховлусындан тапдылар. Ол дин мугаллымларының арасында отурып, олары диңләп, сораглар берйәрди. 47Исаны диңлейәнлериң бары Онуң пайхасына, берйән җогапларына хайран галярдылар. 48Эне-атасы Оны гөренлеринде гең галдылар. Эҗеси Оңа: «Оглум! Нәме үчин бейтдиң? Какаң икимиз гаты гайгы эдип, Сени гөзледик» дийди. 49Иса олара: «Мени нәме үчин гөзледиңиз? Сиз Мениң Атамың өйүнде болмалыдыгымы билмейәрдиңизми?» дийди. 50Эмма олар Онуң нәме дийҗек боляндыгына дүшүнмедилер. 51Онсоң Иса эне-атасы билен Насыра гайтды, оларың сөзүне гулак асды. Эмма Онуң эҗеси бу гүррүңлериң әхлисини йүрегинде саклаярды. 52Иса акылдарлыкда, бойда өсүп, Худайың хем адамларың мәхрини газанярды.

Currently Selected:

Лука 2: TukCyr16

Highlight

Copy