Juan 17

Pagpanalanginan ni Jesus i sadili ya

1Pagkatupus it iting pagꞌampangen ni Jesus, timningaraꞌ kanya duꞌut langit bawnga nanalangin. Maat ya, “Amaꞌ, naꞌbut nay timpu. Buwaten mu nga maltegan i kabantugan it Anak mu, isaꞌun kat buwaten ku nga Anak mu, ipalteg ku i kadakulat kabantugan mu. 2Subung nagat pagbegay mut aken it pagsakep it muꞌsang taw kat sinirungat langit, isaꞌun begayan kut kaꞌgenang egay kaskedan i muꞌsang ibinggay mut aken. 3Ituy mapisiꞌan nirat kaꞌgenang egay kaskedan, kamatuudang pagkilala nira it imu nga esa-esang matuud nga Ampuꞌang Diyus baw aku nga si Jesu-Cristo gasiꞌ nga tiyaꞌeg mu. 4Ipiyalteg ku na sinit sinirungat langit i kabantugan mu ka nakumplitu ku nay kumpur ipagpabwat mut aken. 5Aypaꞌ kayti, Amaꞌ, in asan aku sit imu, ibgay mu sit aken i kabantugan nga aken nang lagi, iyan asan aku paꞌ ngayat imu, parabir giyuna i banwa ngaytu.”

Ipagpanalangin na ni Jesus i mga alagad ya ngayti

6“Ipiyakilala ku ikaw kat mga taw nga ibinggay mut aken kat kadaklan sinit banwa ngayni. Sira ngaytu, imu. Ibinggay mu lamang it aken, baw pagsunudun niray mga ampang mu. 7Kayti urut na nira nga iyan muꞌsa nga isiyarig mut aken, egay beken nga giyaringan in daꞌga garing nga muꞌsa asat imu. 8Sabap itiyulduꞌ ku nat kanira i panulduꞌ nga ipiyakarguꞌ mut aken, baw pagpamayaꞌnen talaga nira. Talagang pagsisiguruun na nira nga aku, garing asan it imu, baw pagpamayaꞌnen nira nga ikaw i nagtaꞌeg it aken.

9Ipagpanalangin ku na sira ngayni. Ega ipagpanalangin kuy muꞌsang katataawan, in daꞌga sira lamang nga ibinggay mut aken, ka imu naga sira. 10Iyan muꞌsa nga aken, imu nagaytu, baw kumpur imu, aken naga yan. Baw matanyag duꞌut kanira i kabantugan ku. 11Daꞌku na maꞌlay sinit sinirungat langit, ka muliꞌ aku na asat imu. Temed sira, sini pat banwa ngayni. Amaꞌ nga alaid kat muꞌsang kasalaꞌan, tatarimaen mu sira kat keseg it guna baw kabantugan mu nga itanyag mu sinit aken. Tatarimaen mu sira isaꞌun urunyun sirang pirmi, subung nagat aten. 12Mintras iba nira aku, pagtatarimaen ku sira kat keseg it guna mu nga ibinggay mut aken. Inarigraan ku sirat magayen, aypaꞌ maski esa, egay naꞌilang, puyrat iyan taw nga tiyulus yay ikaꞌilang ya, ka pagtuman lamang gasiꞌ it magbebtang duꞌun it kasuratan.

13Temed kayti, magꞌuꞌuliꞌ aku na asat imu, baw ipagsugid ku nang lagi i mga itu ngaytung bagay mintras sini aku pat banwa ngayni isaꞌun, kadakulaꞌat kasagyaan ku, makanira it egay kurang ya. 14Nakaꞌaat ku nat kanira i mga ampang mu, aypaꞌ ka pagꞌisgan na sirat kadakel nga ega magpamayat aken, sabap ega na magpakiꞌuyun sirat kadakel. Kabilangan nira, subung na sirat aken nga ega taga sinit banwa ngayni. 15Ega ipagpanalangin ku nga awaꞌen mu sira sinit banwa ngayni, in daꞌga tatarimaen mu sira, isaꞌun daꞌsira daꞌgen ni Satanas ngayting gimpuꞌun it karaꞌe-raꞌetan. 16Ega na sinakepan sirat karaꞌe-raꞌetan ya ngayti sabap, subung na sirat aken nga ega taga sinit banwa ngayni. 17Kat keseg it ampang mu nga purus kamatuudan, baꞌguun muy adat nira nga mamlag na kat adat it mga taw nga makasalaꞌan. Ka mga ampang mu, talagang kamatuudan. 18In magꞌuꞌunu tiyaꞌeg mu aku nga manulduꞌ sinit kadakel it mga makasalaꞌan, atkayan naga pagtaꞌgen ku na sira, nga manulduꞌ naga duꞌut katataawan nga alaid pat imu. 19Baw sabap it kanira, ipasiguru ku nay sadili ku nga sunudun kung banar i muꞌsang kaꞌirgan mu, isaꞌun masiguru gasiꞌ sira nga imu nang matuud, nga alaid na kat kasalaꞌan.”

Ipagpanalangin ni Jesus i kumpur mamayaꞌ it kanya

20“Baw ega lamang mga alagad ku ngayni i ipagpanalangin ku, in daꞌga pati iyan mga mamayaꞌ it aken sabap it pangadal nira, 21isaꞌun magꞌurunyun sirang muꞌsa. Subung nagat aten, Amaꞌ, nga nagꞌuyun ta nga banar, ikaw sinit aken, aku asat imu, sang kagina-ginawaan ta lamang. Pagꞌangutun ku nga urunyun sira kat kaꞌirgan mu, isaꞌun sira baw kita, subuk sang kabilu-bilugan na. Pagꞌangutun kuytu isaꞌun pamayaꞌnen it mga katataawan nga ikaw i nagtaꞌeg it aken. 22Iyan kabantugan nga ibinggay mut aken, ibinggay ku gasiꞌ it kanira, isaꞌun magꞌuyun-uyunun sirang banar subung it pagꞌuyun tat aten, 23nga aku baw sira, ega nay beblagan sabap it pasarum duꞌut kanira nga Espiritu Santo, ka ikaw baw aku, sang kagina-ginawaan ta lamang. Sana buwaten mu sira nga magꞌuyun-uyunun nga banar, ka sikaytu makilalaan it mga katataawan ngayni nga ikaw i nagtaꞌeg it aken, baw sira pagmaꞌalen mu, subung gasiꞌ it pagmaꞌal mut aken.

24Baw itu gasiꞌ i ireg ku, Amaꞌ, nga kumpur ibinggay mut aken, makataꞌid sira gasiꞌ duꞌut pagtataꞌidan ku. Ka in duꞌun na, maltegan niray kabantugan ku nga ibinggay mut aken, ka talagang garing pat tagnaꞌ nga ega pay banwa, pagmaꞌa-maꞌalen mu na aku.

25Amaꞌ ku nga mataldeng talaga, daꞌka pagkilalaen it kadaklan sinit banwa ngayni, temed aku, pagkilalaen ku talaga ikaw. Baw mga kaꞌibaan ku ngayni, naꞌrutan na nira nga ikaw i nagtaꞌeg it aken. 26Ipiyakilala ku na ikaw sinit kanira baw tamaran ku pay pakilala ngaytu isaꞌun, in magꞌuꞌunu pagmaꞌalen mu aku, atkayan nagay pagmaꞌal nira. Baw beken, isaꞌun aku nagay kaꞌibaan nirang pirmi kat Espiritu Santo nga pasarum duꞌut kanira.”

Currently Selected:

Juan 17: TBWONT

Highlight

Copy