Genesis 22

Siyukdanan si Abraham it mabeꞌgat nga sukdan

1Nagtaꞌlib i mga taꞌun, siyukdanan it Ampuꞌang Diyus si Abraham. Tiyaꞌwagan kanyat Ampuꞌang Diyus, nga magꞌaat, “Abraham!”

“Wayni aku, Agalen ku,” maat i tubag ya.

2Maat i inaat it kanya, “Mapanaw ka. Pabayaꞌen muy paeꞌesa-esa ngayang anak mi ni Sara. Eeꞌ baꞌ, si Isaac ngayang pagmaꞌa-maꞌalen mu. Paꞌaduꞌun kamu it rugar ngayting pagpangaranan it Moria, ka imatayen baw antengen mu duꞌun i anak mu ngayan, ka isamba mu na kanya it aken. Buwatan mu kayan, duꞌun it siyagpawan it esang bukid nga iꞌaat ku it imu.”

3Aypaꞌ pagꞌeyag magbangun si Abraham, magpanariꞌsak it kayu. Bawnga inasikasu yay kabayuꞌ nga asno nga papirisiꞌnen it kumpur tabanen ya, uyut i tiyariꞌsak ya ngayti nga iduꞌput yat buwaten ya ngayting ipagsamba nga pagꞌantengen. Epat siray napanaw, si Isaac na ngayting anak ya baw duwang kataawan i mga uripen, paꞌaduꞌun it rugar ngayting ipiyagꞌaat it Ampuꞌang Diyus. 4Iyan nakatlu nay piyanawan nira, yapay magkalawag na ni Abraham i abutun nira ngayting rugar. 5Maat ni Abraham it duwa ngayting uripen ya, “Patuduꞌ kamu na sikaytu. Arigraan mi i asno ta. Duwa kami na lamang ni Isaac i lumangbus ka sumamba kami duꞌun. Pagkatiwas namen, paꞌuliꞌ kami yan situt imyu.”

6Ipiyapasaꞌan ni Abraham it ki Isaac i kayu ngayting iduꞌput. Kanyang singkel, apuy baw yuꞌgut. Namagpanaw na sira. 7Ega naꞌlay sirat panaw, miningkut si Isaac it amaꞌ ya. Maat ya, “Amaꞌ!”

“Unu?” maat it amaꞌ ya ngayting si Abraham.

“Ay Amaꞌ, taban tay apuy baw kayu nga iduꞌput. Ta ariyen i uꞌuybun it tupa nga antengen ta?”

8Maat i tubag ni Abraham, “Ampuꞌang Diyus nay baalaꞌ. Kanya na i megay it aten.” Seked na kayti i ingkut ni Isaac. Sigi-sigi nang panaw nira.

9Pagꞌabut nira duꞌun it ipiyagꞌaat ngaytit Ampuꞌang Diyus nga duꞌun nay pagbuwatan, nagbuwat na si Abraham it papangantengan. Pagkaꞌman ya, ipiyagsagpaw yat pagayen-gayen i kayu ngayting taban nira. Bawnga biyayuk ya na si Isaac ka ipiyaliꞌtid na duꞌut sagpaw. 10Singkel na ni Abraham i yuꞌgu-yuꞌgut ya. Pagraiꞌ yat maat imatayen ya nay anak ya ngayti, 11sakaliꞌ nga nakagneg kanyat taꞌwag nga duꞌun it langit i garing. Anghil it AMPUꞌANG DIYUS i magpataꞌwag it kanya, nga magꞌaat, “Abraham, Abraham!”

Maat i tubag ya, “Wayni aku, Agalen ku.”

12Maat i inaat it kanya, “Ega na imatayen muy waꞌwaꞌ ngayan. Ega buwatan mu kanya it maski unu nga pakuriꞌ. Talagang natantuwan ku nga kamatuudan i iꞌlam mu nga paggalang mut aken nga Ampuꞌang Diyus. Sabap maski pagmaꞌa-maꞌalen mu nang anak ka paeꞌesa-esa, temed ega nangbit it nakem mu nga iꞌimet it aken.”

13Pagpatingkag ni Abraham it ulu ya, naltegan yay esang tudu nga tupa nga nakasaꞌit i tanduk ya duꞌut sangat kayu-kayu. Iti nay pinsiꞌ ni Abraham nga inanteng, nga ganti it anak ya ngayti. 14Sikayti nga rugar, piyangaranan ni Abraham it AMPUꞌANG DIYUS i Megay it Mga Kaꞌilangan Ta. Seked kayti pagꞌaaten it mga taw nga, “Duꞌun it bukid it AMPUꞌANG DIYUS, ipagbegay yay pagkaꞌilanganen mu.”

15Piyakisugidan siꞌ it Anghil it AMPUꞌANG DIYUS it sumaꞌup si Abraham, nga duꞌun it langit i garing it ampang ya. 16Magꞌaat i inaat, “Aku nga AMPUꞌANG DIYUS mismu i magsanggup it imu. Kayti nga ega ipiyagꞌimet mut aken i paeꞌesa-esang anak mu, talagang ildawan ku ikaw nga banar. 17Ildaw ku it imu, talagang mga tungtung-inapuꞌ mu, dumakel sira nga subung it kadakel it mga bituꞌun duꞌut langit baw igis duꞌut baybayan. Daꞌgen nira i mga bangsa nga kalaban nira. 18Baw manggaring kat mga tungtung-inapuꞌ mu, maꞌildawan i muꞌsang bangsa situt sinirungat langit, sabap siyunud mu i inaat ku it imu.”

19Pagkatiwas kayti, namagꞌuliꞌ na na Abraham duꞌut mga uripen ngayting itiyuduꞌ nira, ka namagꞌuliꞌ na duꞌut giyaringan nira ngayting Beer-seba, ka sikayti nay takenaꞌ nira.

Currently Selected:

Genesis 22: TBWONT

Highlight

Copy