Ezekiel 33

May turubagen it guwardiya in ega ituturan ya duꞌun it katataawan i magꞌaꞌabut nga panriga it Ampuꞌang Diyus

1Miyabut siꞌ it aken i ampang it AMPUꞌANG DIYUS nga magꞌaat, 2“Ikaw ngaytu nga taw lamang, itu i isugid mu kat mga kabanwa mu. In beteꞌ parumpakan ku i esang banwa, baw may esang guwardiya nga ipiyatindeg it banwa ngayti, 3simpri basta nalawag ya i mga magꞌaꞌabut na nga rumurumpak, eypan yang lagi i taburi nga pamaꞌrut ya it katataawan. 4In siyu-siyu nga nakagneg it taburi ngaytu temed belag gay daeng-daeng ya, bawnga mabunuꞌ kanya, egay dapat nga manubag it kamataynen ya ngaytu. 5Kasalaꞌan ya mana in maꞌimatay kanya sabap ega inintindi ya i paꞌimbanda ngayti. Sana maribri naga kanya in daꞌga lamang belag gay daeng-daeng ya. 6Temed in ega eypan it guwardiya ngaytu i taburi ya, maski nalawag ya na i magꞌaꞌabut nga rumurumpak, bawnga may mabunuꞌ nga mga kabanwa ya, maski karaꞌe-raꞌetan nira i timnaban it kanira nga inimatay temed talagang panubagan it guwardiya ngayti i kamataynen nira.

7Ta, ikaw ngaytu nga taw lamang, ipiyatindeg ku na ikaw nga guwardiya it bangsa nga Israel. Unu-unu nga ipasugid kut imu, kaꞌilangan nga ituturan mu duꞌun it kanira, nga yay bilang paꞌimbanda kut kanira. 8Temed in beteꞌ kuꞌaat ku it esang taw nga matay na kanya sabap karaꞌe-raꞌetan nay nakapnuꞌ it kanya, bawnga ega isugid mu duꞌun it kanya isaꞌun maꞌugadan ya nagay adat ya ngaytu, maski imatayen kanya sabap it karaꞌe-raꞌetan ya temed yay matuud, panubagan muy kamataynen ya ngaytu.#33:8 Atkayan naga, kita nga magpamayaꞌ it ki Cristo, in beteꞌ baliwalaꞌen ta lamang i mga kabanwa ta, nga ega paꞌimbandaan ta sira pasar it egay kaskedan nga panriga nga abutan nira in ega mamayaꞌ sira gasiꞌ it ki Cristo, ta panubagan ta gasiꞌ i mabetangan nira ngaytu. 9Temed in napaꞌimbandaan mu na i karaꞌe-raꞌetan na ngaytuy nakapnuꞌ takaꞌ ega naga ugadan ya i adat ya, maski imatayen kanya sabap it karaꞌe-raꞌetan ya ngaytu, egay demdemen mu ka ega panubagan mu i kamataynen ya.

11Aypaꞌ isugid mu talaga duꞌun it mga Israelita ngaytu nga ituy ipagsugid it AMPUꞌANG DIYUS nga egay kasbung. ‘In magꞌuꞌunu ipagpamatuud ku nga egen aku, ipagpamatuud ku gasiꞌ nga ega talaga magkasagyaan ku i magpatay nga makasalaꞌan. Iyan talagay magkasagyaan ku, in indiꞌan ya nay kasalaꞌan ya isaꞌun ega na matay. Bangsa nga Israel, pedkanan mi na i mga karaꞌe-raꞌetan nga pamagbuwaten mi. Eeꞌ baꞌ, pedkanan mi na talaga. Unuka magpangeget kamu na?!’”

Currently Selected:

Ezekiel 33: TBWONT

Highlight

Copy