རུ་ཐི། 4
4
ལེའུ་བཞི་པ།
པཱོ་ཨ་ཟི་ཡིས་རུ་ཐི་བླུས་པ།
1དེ་ཡང་པཱོ་ཨ་ཟི་ཡར་མཁར་གྱི་སྒོ་ཁ་རུ་སོང་ནས་སྡོད་སྐབས། ལྟོས་དང་། ཏན་ཏན་ཁོས་སྔོན་དུ་གླེང་མྱོང་བའི་བླུ་མཁན་དེ་སླེབས་པ་དང་ཁེལ། པཱོ་ཨ་ཟི་ཡིས་འདི་ལྟར། བདག་གི་གྲོགས་པོ་ལགས། ཚུར་ཤོག་ལ་འདིར་སྡོད་དང་ཞེས་སྨྲས་པ་ན། མི་དེས་ཀྱང་ཁོའི་ངག་བཞིན་དུ་བྱས་སོ། ། 2ཡང་པཱོ་ཨ་ཟི་ཡིས་གྲོང་རྡལ་དེའི་རྒན་པོ་རྣམས་ལས་མི་བཅུ་བདམས་ནས་དེ་དག་ལ་འདི་ལྟར། ཁྱེད་རྣམ་པ་འདིར་བཞུགས་པར་མཛོད་ཅེས་ཞུས་པ་ལ་ཁོ་རྣམས་ཀྱིས་ཀྱང་དེ་ལྟར་བྱས་སོ། ། 3དེ་ནས་པཱོ་ཨ་ཟི་ཡིས་བླུ་མཁན་དེ་ལ་འདི་ལྟར། མོ་ཨབ་ཡུལ་ནས་ཕྱིར་སླེབས་པའི་ནཱ་ཨོ་མུ་ཡིས་བདག་ཅག་གི་སྤུན་ཟླ་འདས་པོ་ཨེ་ལི་མེ་ལེག་གི་ས་ཞིང་དེ་བཙོང་བར་འདོད་དོ། ། 4བདག་གི་བསམ་ཚུལ་ལ་ས་ཞིང་དེ་ནི་ཁྱེད་ཀྱིས་ཉོ་རུང་བ་དང་། ཁྱེད་ཀྱི་རྗེས་སུ་བདག་ཡིན་ཞིང་། གཞན་དེ་བཞིན་དུ་བྱ་རུང་བ་སུ་ཡང་ཡོད་པ་མ་ཡིན། ཁྱེད་ཀྱིས་འདིར་བཞུགས་པ་རྣམས་དང་བདག་གི་རིགས་རྒྱུད་ཀྱི་རྒན་པོ་རྣམས་ཀྱི་མདུན་དུ་གསལ་བཤད་བྱས་ཆོག་སྟེ། ཁྱེད་ཀྱི་བླུ་བར་དགོངས་ན་བླུས་ཤིག གལ་ཏེ་མི་བླུ་ན་བདག་གིས་ཤེས་པའི་ཕྱིར་བདག་ལ་སྨྲ་བར་མཛོད་ཅེས་སྨྲས་པ་ན། མི་དེ་ན་རེ། ངས་བླུ་བར་བྱའོ་ཞེས་ལན་སྨྲས་སོ། ། 5དེ་ནས་པཱོ་ཨ་ཟི་ཡིས་འདི་ལྟར། ཁྱེད་ཀྱིས་ནཱ་ཨོ་མུ་ནས་ས་ཞིང་དེ་ཉོ་བའི་ཉིན་མོར། གཤིན་པོའི་མིང་ནི་ཁོ་རང་གི་ནོར་སྐལ་སྟེང་རྒྱུན་འཛིན་བྱེད་པའི་ཕྱིར་ཁོའི་ཆུང་མ་སྟེ་མོ་ཨབ་ཡུལ་གྱི་རུ་ཐི་ཡང་ཚུར་རང་གིས་ལེན་འོས་པ་ཡིན་ཞེས་སྨྲས་པའོ། ། 6དེ་ནས་མི་དེ་ན་རེ། དེས་ན་བདག་གི་ནོར་སྐལ་ལ་བར་ཆད་འབྱུང་ཉེན་ཡོད་པས་བདག་གིས་ས་ཞིང་དེ་བླུ་མི་ནུས། ཁྱོད་ཀྱིས་དེ་བླུས་ཤིག ངའི་ཐོབ་སྐལ་དེ་ཁྱོད་རང་གིས་བླུས་ཆོག་ཅེས་སྨྲས་སོ། །
7སྔོན་ཆད་ཡེས་ར་ཨེལ་དུ་བླུ་བ་དང་ཡང་ན་ཉོ་ཚོང་བྱེད་པའི་དོན་གང་ཞིག་ཐག་གིས་གཅོད་པའི་སྐབས་སུ། གཅིག་གིས་བསིལ་ལྷམ་ཕུད་ནས་གཞན་པ་དེར་སྤྲོད་ཅིང་། ཡེས་ར་ཨེལ་གྱི་མི་ཐམས་ཅད་ཀྱིས་དེ་བདེན་དཔང་གི་གཏའ་མར་བྱེད་པའོ། ། 8དེའི་ཕྱིར། མི་དེས་པཱོ་ཨ་ཟི་ལ་འདི་ལྟར། ཁྱོད་ཀྱིས་རང་ལ་ཉོས་ཤིག་ཅེས་སྨྲས་ནས་ཁོས་རང་གི་བསིལ་ལྷམ་ཕུད་པ་རེད། 9དེ་ནས་པཱོ་ཨ་ཟི་ཡིས་རྒན་པོ་རྣམས་དང་མི་ཚོགས་ལ་འདི་ལྟར། དེ་རིང་ཁྱེད་རྣམ་པ་ནི་དཔང་པོ་རྣམས་ཡིན་ཏེ། ཨེ་ལི་མེ་ལེག་དང་། ཀིལ་ཡོན། མཱ་ལིན་བཅས་ལ་དབང་བ་ཐམས་ཅད་བདག་གིས་ནཱ་ཨོ་མུ་ཡི་ལག་ནས་བླུས་པ་དང་། 10ཡང་གཤིན་པོའི་མིང་ནི་ཁོ་རང་གི་ནོར་སྐལ་སྟེང་རྒྱུན་འཛིན་བྱེད་པ་དང་ཁོའི་མིང་ནི་རང་ཁྱིམ་དང་རང་ཡུལ་ནས་ཡལ་བར་མི་འགྱུར་བའི་ཆེད་དུ། འདས་པོ་མཱ་ལིན་གྱི་ཆུང་མ་སྟེ་མོ་ཨབ་པ་རུ་ཐི་ནི་བདག་གིས་ཆུང་མར་བླངས་པ་ཡིན། ཁྱེད་རྣམ་པས་དེ་རིང་བདེན་དཔང་བྱས་ཆོག་ཅེས་སྨྲས། 11དེ་ནས་མཁར་གྱི་སྒོ་ཁ་རུ་སྡོད་པའི་མི་ཚོགས་དང་རྒན་པོ་བཅས་ཐམས་ཅད་ཀྱིས་འདི་ལྟར།
ངེད་རྣམས་དོན་འདིའི་བདེན་དཔང་ཡིན་པ་སྟེ། །
དཀོན་མཆོག་ཡ་ཝཱེས་ཁྱོད་ཀྱི་ཁྱིམ་ནང་དུ། །
ཡོང་བར་འགྱུར་བའི་བུད་མེད་དེ་ཉིད་ནི། །
ཡེས་ར་ཨེལ་གྱི་ཁྱིམ་རྒྱུད་འཛུགས་པ་ཡི། །
རཱ་ཧེལ་ལེ་ཨ་གཉིས་བཞིན་མཛད་གྱུར་ཅིག །
ཁྱོད་རང་ཨེབ་རཱད་ཡུལ་དུ་དོན་འགྲུབ་ཅིང་། །
པེད་ལེ་ཧེམ་དུ་སྙན་གྲགས་རྒྱས་པར་སྨོན། །
12དཀོན་མཆོག་ཡ་ཝཱེས་གཞོན་ནུ་མ་འདི་བརྒྱུད། །
ཁྱོད་ལ་བུ་རྒྱུད་གནང་སྟེ་ཁྱིམ་གཞིས་ནི། །
ཡ་ཧུ་དཱ་དང་ཐལ་མཱར་ཁོང་གཉིས་ལས། །
སྐྱེས་པའི་བུ་སྟེ་ཕེ་རེལ་ཟི་བྱ་བའི། །
ཁྱིམ་གཞིས་ལྟ་བུ་ཡིན་པར་མཛད་དུ་གསོལ། །
ཞེས་བརྗོད་དོ། །
པཱོ་ཨ་ཟི་ཡིས་རུ་ཐི་རང་གི་ཆུང་མར་བླངས་པ།
13དེ་ནས་པཱོ་ཨ་ཟི་ཡིས་རུ་ཐི་རང་གི་ཆུང་མར་བླངས་ཤིང་ཁོ་མོ་དང་མཉམ་དུ་བསྡད་པ་ལ། དཀོན་མཆོག་ཡ་ཝཱེས་ཁོ་མོར་མངལ་དང་ལྡན་པར་མཛད་ནས་བུ་ཞིག་སྐྱེས། 14བུད་མེད་རྣམས་ཀྱིས་ནཱ་ཨོ་མུ་ལ་འདི་ལྟར།
དཀོན་མཆོག་ཡ་ཝཱེ་ཁོང་ཉིད་བསྟོད་འོས་ཏེ། །
ཁོང་གིས་ཁྱོད་རང་དེ་རིང་ཉིན་མོ་འདིར། །
ཉེ་བའི་བླུ་མཁན་མེད་པར་མ་བསྐྱུར་ཏོ། །
ཕྲུ་གུ་འདི་ནི་ཡེས་ར་ཨེལ་པའི་ཁྲོད། །
སྙན་གྲགས་ཡོངས་སུ་རྒྱས་པའི་སྨོན་འདུན་ཞུ། །
15འདི་ནི་ཁྱོད་རང་གཅེས་སུ་འཛིན་པ་ཡི། །
མནའ་མ་དེ་ཡིས་བཙས་པའི་བུ་ཡིན་པས། །
ཁོས་ནི་ཁྱོད་ཀྱི་སེམས་ཤུགས་ཆེར་བསྐྱེད་ཅིང་། །
ཁྱོད་རང་རྒས་དུས་སྙོར་སྐྱོང་བྱེད་ངེས་ཡིན། །
འདི་ལྟའི་མནའ་མ་ཁྱོད་ལ་ཡོད་པ་ནི། །
བུ་བདུན་ཡོད་པ་ལས་ཀྱང་ཤིན་ཏུ་ལེགས། །
ཞེས་སྨྲས། 16དེ་ནས་ནཱ་ཨོ་མུ་ཡིས་ཕྲུ་གུ་པང་དུ་བཟུང་སྟེ་བུ་སྙོར་མ་རུ་གྱུར་ཏོ། ། 17ཁྱིམ་མཚེས་ཀྱི་བུད་མེད་རྣམས་ན་རེ། ནཱ་ཨོ་མུ་ལ་བུ་ཞིག་སྐྱེས་སོ་ཞེས་སྨྲས་པ་དང་ཁོ་རྣམས་ཀྱིས་ཕྲུ་གུ་དེའི་མིང་ལ་ཨོ་བེད་ཅེས་བཏགས། ཨོ་བེད་ནི་ཡེ་སེ་ཞེས་བྱ་བའི་ཡབ་ཡིན་ཞིང་ཡེ་སེ་ནི་དཱ་བིད་ཅེས་པའི་ཡབ་ཡིན་ནོ། །
རྒྱལ་པོ་དཱ་བིད་ཀྱི་གདུང་རྒྱུད།
18ཕེ་རེལ་ཟིའི་རིགས་རྒྱུད་རྣམས་ནི་གཤམ་གསལ་ལྟར། ཕེ་རེལ་ཟི་ལ་བུ་ཧེས་རོན་ཞེས་བྱ་བ་སྐྱེས་པ་དང་། 19ཧེས་རོན་ལ་བུ་རཱམ་ཞེས་བྱ་བ་སྐྱེས་པ་དང་། རཱམ་ལ་བུ་ཨ་མི་ནཱ་དབ་ཅེས་བྱ་བ་སྐྱེས་པ་དང་། 20ཨ་མི་ནཱ་དབ་ལ་བུ་ནཱ་སོན་ཞེས་བྱ་བ་སྐྱེས་པ་དང་། ནཱ་སོན་ལ་བུ་སཱལ་མོན་ཞེས་བྱ་བ་སྐྱེས་པ་དང་། 21སཱལ་མོན་ལ་བུ་པཱོ་ཨ་ཟི་ཞེས་བྱ་བ་སྐྱེས་པ་དང་། པཱོ་ཨ་ཟི་ལ་བུ་ཨོ་བེད་ཅེས་བྱ་བ་སྐྱེས་པ་དང་། 22ཨོ་བེད་ལ་བུ་ཡེ་སེ་ཞེས་བྱ་བ་སྐྱེས་པ་དང་། ཡེ་སེ་ལ་བུ་དཱ་བིད་ཅེས་བྱ་བ་སྐྱེས་པ་ལགས་སོ།། །།
Currently Selected:
རུ་ཐི། 4: NTB
Highlight
Share
Copy
Want to have your highlights saved across all your devices? Sign up or sign in
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.