ཡོ་ཧ་ནན། 20
20
ལེའུ་ཉི་ཤུ༌པ།
སྟོང་བར་ལུས་པའི་དུར་ཁུང་།
1གཟའ་འཁོར་གཅིག་གི་ཉིན་དང་པོར་ནམ་མ་ལངས་པའི་སྔོན༌ལ། མཱག་རྡལ་གྱི་མིར་ཡམ་དུར་ཁུང་གི་གམ་དུ་སླེབས་པ༌ན། དུར་ཁུང་གི་སྒོ་གཅོད་བྱེད་ཀྱི་རྡོ་ཕ་བོང་དེ་ཕར་བསྒྲིལ་ཟིན་པ་མཐོང༌བས། 2མྱུར་དུ་སི་མོན་པེ་ཏྲོ་དང་སྐྱབས་མགོན་ཡེ་ཤུས་བྱམས་ཤིང་གཅེས་པའི་ཐུགས་སྲས་ཅིག་ཤོས་དེའི་མདུན་དུ་སོང་སྟེ་ན༌རེ། གཙོ་བོའི་སྐུ་གདུང་མི་གཞན་རྣམས་ཀྱིས་དུར་ཁུང་ནས་ཁྱེར་ཞིང་ངེད་རྣམས་ཀྱིས་གང་དུ་བཞག་ཡོད་པའང་མ་ཤེས་ཞེས་སྨྲས་པ༌དང༌། 3པེ་ཏྲོ་དང་ཐུགས་སྲས་གཞན་དེ་ཕྱི་རོལ་ཏུ་ཐོན༌ནས། 4མཉམ་དུ་དུར་ཁུང་གི་ཕྱོགས་སུ་བརྒྱུགས་པ་དང་ཐུགས་སྲས་ཅིག་ཤོས་པེ་ཏྲོ་ལས་མགྱོགས་པས་སྔོན་ལ་དུར་ཁུང་ཡོད་སར་སླེབས༌ཤིང༌། 5མགོ་བོ་སྒུར་ནས་དུར་ཁུང་ནང་དུ་བལྟས་པ་ན། སྐྱབས་མགོན་ཡེ་ཤུའི་སྐུ་གདུང་བཏུམ་བྱེད་ཀྱི་སོ་རས་ཤུལ་དུ་ཡོད་པ་མཐོང་བ་དང་ཁོ་རང་ནང་དུ་མ་སོང་ངོ་།། 6དེ་ནས་སི་མོན་པེ་ཏྲོ་ཡང་སླེབས་ཏེ་དུར་ཁུང་ནང་དུ་སོང་བ༌ན། སོ་རས་ཤུལ་དུ་ལུས་ཡོད་པ༌དང༌། 7སྐྱབས་མགོན་ཡེ་ཤུའི་དབུ་བཏུམ་བྱེད་ཀྱི་རས་དེ་སོ་རས་དང་མཉམ་དུ་མེད༌པར། གནས་གཞན་ཞིག་ཏུ་དཀྲིས་ཏེ་བཞག་ཡོད་པ་མཐོང༌། 8སྔོན་ལ་སླེབས་པའི་ཐུགས་སྲས་དེ་ཡང་དུར་ཁུང་ནང་དུ་སོང་སྟེ་གནས་ཚུལ་དེ་དག་མཐོང་བ་དང་ཡིད་ཆེས་པར་གྱུར་ཏོ།། 9རྒྱུ་མཚན་ནི་དེ་གཉིས་ཀྱིས་གསུང་རབ་ཀྱི་མདོ་ལས་སྐྱབས་མགོན་ཡེ་ཤུ་གྲོངས་པ་ནས་སླར་གསོན་པར་འགྱུར་དགོས་ཞེས་པའི་དོན་དེ་ད་དུང་མ་རྟོགས༌པ་རེད། 10དེ་ནས་ཐུགས་སྲས་དེ་གཉིས་ཕྱིར་རང་གནས་སུ་ལོག༌གོ།
སྐྱབས་མགོན་ཡེ་ཤུས་རང་ཉིད་ཀྱི་སྐུ་གཟུགས་མངོན་པར་མཛད༌པ།
11དེ་ནས་མཱག་རྡལ་གྱི་མིར་ཡམ་དུར་ཁུང་གི་ཕྱི་རོལ་ཏུ་ལངས་བསྡད་དེ་ངུས༌ཤིང༌། ངུ་བཞིན་མགོ་བོ་སྒུར་ནས་དུར་ཁུང་ནང་དུ་བལྟས་པ༌ན། 12སྐྱབས་མགོན་ཡེ་ཤུའི་སྐུ་གདུང་བཞག་སའི་ཤུལ་དུ་གོས་དཀར་པོ་གྱོན་པའི་ཕོ་ཉ་གཉིས་ཡོད་ཅིང་གཅིག་ནི་དབུ་དང་གཅིག་ནི་ཞབས་ཀྱི་ཕྱོགས་སུ་བཞུགས་པ་མཐོང་ངོ༌།། 13དེ་ནས་ཕོ་ཉ་དེ་གཉིས་ན༌རེ། ཀྱེ། བུད༌མེད། ཁྱོད་རང་ཅིའི་ཕྱིར་ངུ་བ་ཡིན་ནམ་ཞེས་དྲིས་པ༌ལ། ཁོ་མོ་ན༌རེ། ང་ཡི་གཙོ་བོའི་སྐུ་གདུང་མི་གཞན་རྣམས་ཀྱིས་ཁྱེར་ཞིང་གང་དུ་བཞག་པ་མི་ཤེས་པའི་ཕྱིར་ཡིན་ཞེས་སྨྲས་པ༌དང༌། 14ཁོ་མོ་ཁ་ཕྱིར་འཁོར་བ༌ན། སྐྱབས་མགོན་ཡེ་ཤུ་གནས་དེར་བཞེངས་ཡོད་པ་མཐོང༌ཡང༌། ཁོ་མོས་སྐྱབས་མགོན་ཡེ་ཤུ་ཡིན་པ་མ་ཤེས་སོ།། 15དེ་ནས་སྐྱབས་མགོན་ཡེ་ཤུས་འདི་སྐད༌དུ། ཀྱེ། བུད༌མེད། ཁྱོད་རང་ཅིའི་ཕྱིར་ངུ་བ་ཡིན༌ནམ། ཁྱོད་ཀྱིས་སུ་ཞིག་འཚོལ་ལམ་ཞེས་གསུངས་པ༌ན། མིར་ཡམ་གྱིས་མི་དེ་ནི་སྐྱེད་ཚལ་སྲུང་མཁན་ཡིན་པར་སྙམ༌སྟེ། ཇོ་བོ༌ལགས། ཁྱེད་ཀྱིས་ཁོང་གི་སྐུ་གདུང་ཁྱེར་བ་ཡིན་ན་གང་དུ་བཞག་པ་བདག་ལ་སྨྲོས་དང་ང་རང་ལེན་དུ་འགྲོ་ཞེས་སྨྲས་སོ།། 16དེ་ནས་སྐྱབས་མགོན་ཡེ་ཤུས་མིར་ཡམ་ཞེས་ཁོ་མོའི་མིང་ནས་བོས༌ཤིང༌། མིར་ཡམ་ཁོང་གི་ཕྱོགས་སུ་འཁོར༌ཏེ། ཨིབ་རིའི་མི་རིགས་ཀྱི་སྐད༌དུ། རཱབ་པོ་ནེ་ཞེས་ཞུས་ཤིང་སློབ་དཔོན་ལགས་ཞེས་པའི་དོན་ཡིན་ནོ།། 17ཡང་སྐྱབས་མགོན་ཡེ་ཤུས་འདི་སྐད༌དུ། ང་རང་ད་དུང་ཡབ་ཀྱི་དྲུང་དུ་མ་འཕགས༌པས། ང་རང་དམ་པོར་འཛིན་པར་མི༌བྱའོ།། ཁྱོད་རང་བདག་གི་སྤུན་ཟླ་རྣམས་ཀྱི་གམ་དུ་སོང་ནས་དེ་རྣམས་ལ་འདི་སྐད༌དུ། ང་རང་ནི་བདག་གི་ཡབ་དང༌། ཁྱོད་ཅག་གི་ཡབ། བདག་གི་དཀོན༌མཆོག་སྟེ་ཁྱོད་ཅག་གི་དཀོན་མཆོག་གི་དྲུང་དུ་འགྲོ་བ་ཡིན་ཞེས་སྨྲོས་ཤིག་ཅེས་གསུངས་སོ།། 18དེ་ནས་མཱག་རྡལ་གྱི་མིར་ཡམ་ཕྱིར་སོང་ནས་ཐུགས་སྲས་རྣམས་ལ་ང་རང་གཙོ་བོ་ལ་མཇལ་བྱུང་ཞེས་སྨྲས་པ་དང་ཁོང་གིས་ཁོ་མོར་གསུངས་པ་རྣམས་ཀྱང་སྨྲས༌སོ།།
སྐྱབས་མགོན་ཡེ་ཤུས་ཐུགས་སྲས་རྣམས་ལ་རང་ཉིད་ཀྱི་སྐུ་གཟུགས་མངོན༌པ།
19གཟའ་འཁོར་གཅིག་གི་ཉིན་དང་པོའི་མཚན༌མོར། ཐུགས་སྲས་རྣམས་ཡ་ཧུ་དཱ་པ་རྣམས་ལ་འཇིགས་ཏེ་སྒོ་བརྟན་པོར་བརྒྱབ་ནས་སྡོད་པ༌ལ། སྐྱབས་མགོན་ཡེ་ཤུ་གནས་དེར་བྱོན་ནས་ཁོ་རྣམས་ཀྱི་དཀྱིལ་དབུས་སུ་ཡར་བཞེངས་ཏེ་ཁྱོད་རྣམས་བདེ་བར་སྨོན་ཞེས་གསུངས་པ༌དང༌། 20རང་ཉིད་ཀྱི་ཕྱག་དང་གཞོགས་བསྟན་པ་དང་ཐུགས་སྲས་རྣམས་གཙོ་བོ་ལ་སླར་ཡང་མཇལ་བས་སེམས་དགའ་བར་གྱུར་ཏོ།། 21ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་རྣམས་བདེ་བར་གྱུར༌ཅིག ཡབ་ཀྱིས་ང་རང་ཇི་ལྟར་མངགས་པ་བཞིན་བདག་གིས་ཀྱང་ཁྱོད་རྣམས་དེ་ལྟར་མངག་པར་བྱ་ཞེས་གསུངས༌ཤིང༌། 22དེ་རྣམས་ལ་ཞལ་ཕུ་བཏབ་སྟེ་འདི་སྐད༌དུ། ཁྱོད་རྣམས་ཀྱིས་དམ་པའི་ཐུགས་ཉིད་ལོངས་ཤིག 23ཁྱོད་ཅག་གིས་མིའི་སྡིག་པ་བསལ་བ་ཡིན་ན་མིའི་སྡིག་པའང་དག་པ༌ཡིན། ཁྱོད་རྣམས་ཀྱིས་སུ་ཞིག་གི་སྡིག་པ་མི་བསལ་ན་མི་དེའི་སྡིག་པའང་ལུས་པ་ཡིན་ཞེས་གསུངས༌སོ།།
སྐྱབས་མགོན་ཡེ་ཤུས་ཐུགས་སྲས་ཐོ་མཱ་ལ་རང་ཉིད་ཀྱི་སྐུ་གཟུགས་མངོན༌པ།
24སྐྱབས་མགོན་ཡེ་ཤུ་ཕེབས་ཡོང་བའི་དུས༌སུ། ཐུགས་སྲས་བཅུ་གཉིས་པོ་ལས་མིང་གཞན་ལ་མཚེ་མ་ཞེས་ཀྱང་འབོད་པའི་ཐོ་མཱ་ནི་ཁོ་ཚོ་དང་མཉམ་དུ་མེད༌པས། 25ཐུགས་སྲས་གཞན་རྣམས་ཀྱིས་ངེད་ཅག་གཙོ་བོ་ལ་མཇལ་བྱུང་ཞེས་སྨྲས་པ༌ན། ཐོ་མཱ་ན༌རེ། ཁོང་ཉིད་ཀྱི་ཕྱག་ཟུང་སྟེང་གི་གཟེར་མས་བསྣད་པའི་རྨ་ཤུལ་མཐོང་བ་དང་བདག་གི་མཛུབ་མོས་རྨ་ཤུལ་ལ་རེག༌ཅིང༌། ཡང་ངའི་ལག་པ་ཁོང་གི་གཞོགས་སུ་བཞག་ན་མ་གཏོགས་ང་རང་ཡིད་མི་ཆེས་ཞེས་སྨྲས་སོ།། 26དེ་ནས་ཉིན་བརྒྱད་འགོར་བའི་རྗེས༌སུ། ཐོ་མཱའང་ཐུགས་སྲས་གཞན་རྣམས་དང་མཉམ་དུ་སླར་ཡང་ཁང་པ་དེའི་ནང་དུ་བསྡད་ཅིང་སྒོ་བརྟན་པོར་བརྒྱབ་པ༌ལ། སྐྱབས་མགོན་ཡེ་ཤུ་གནས་དེར་བྱོན་ནས་ཁོ་རྣམས་ཀྱི་དཀྱིལ་དབུས་སུ་བཞེངས་ཏེ་ཁྱོད་རྣམས་བདེ་བར་སྨོན་ཞེས་གསུངས་པ༌དང༌། 27ཐོ་མཱ་ལ་འདི་སྐད༌དུ། ཁྱོད་ཀྱིས་རང་གི་མཛུབ་མོ་བརྐྱངས་ནས་བདག་གི་ལག་པ་ལ་རེག་པར༌གྱིས། ཁྱོད་ཀྱིས་རང་གི་ལག་པ་བརྐྱངས་ནས་བདག་གི་གཞོགས་ལ་ཞོག༌དང༌། མི་དད་པའི་སེམས་སྤོངས་ལ་དད་པ་བྱོས་ཤིག་ཅེས་གསུངས་སོ།། 28དེ་ནས་ཐོ་མཱས་ང་ཡི་གཙོ་བོ༌ལགས། ང་ཡི་དཀོན་མཆོག་ལགས་ཞེས་ཞུས་སོ།། 29ཡང་སྐྱབས་མགོན་ཡེ་ཤུས་འདི་སྐད༌དུ། ཁྱོད་ཀྱིས་ང་རང་མཐོང་ནས་ད་གཟོད་དད་པ་བྱས་པ༌ཡིན། ང་རང་མ་མཐོང་བར་དད་པ་བྱེད་མཁན་རྣམས་ནི་བདེའོ་ཞེས་གསུངས༌སོ།།
30སྐྱབས་མགོན་ཡེ་ཤུས་ཐུགས་སྲས་རྣམས་ཀྱི་མདུན་དུ་གྲུབ་རྟགས་གཞན་མང་པོ་མཛད་ཀྱང་མདོ་འདིའི་ནང་དུ་མ་བཀོད་དོ།། 31འོན་ཀྱང་འདིར་བཀོད་པའི་དོན་རྣམས་ཁྱོད་ཅག་གིས་ཡེ་ཤུ་ནི་སྐྱབས་མགོན་མཱ་ཤི་ཀ་སྟེ་དཀོན་མཆོག་གི་སྲས་ཡིན་པར་དད་པ་བྱེད་ཅིང་། ཁོང་ལ་དད་པ་བྱས་ཏེ་ཁོང་གི་མཚན་གྱི་སྒོ་ནས་མཐའ་མེད་པའི་ཚེ་སྲོག་འཐོབ་པའི་ཕྱིར་ཡིན༌ནོ།།
Currently Selected:
ཡོ་ཧ་ནན། 20: NTB
Highlight
Share
Copy
Want to have your highlights saved across all your devices? Sign up or sign in
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.
