Sam Sotfala stori blong buk ya
Sotfala stori blong buk ya
Buk ya OL SAM, hem i wan himbuk blong ol laen* blong Isrel* bifo we i gat ol singsing mo ol prea i stap long hem. Tok ya “sam” i min se sing. Ol sam ya, plante man long ol laen blong Isrel oli wokem long ol naranarafala taem, nao oli putum olgeta wanples blong mekem wan buk, nao oli stap yusum buk ya long wosip blong olgeta. Mo biaen, taem oli putum ol narafala buk blong Oltesteman i go wanples, oli joenem buk ya tu i go wetem ol narafala buk long Baebol.
Buk ya i gat plantekaen singsing blong mekem wosip i stap long hem. Long ol singsing ya i gat ol singsing blong presem God mo blong mekem wosip long hem, mo i gat ol singsing blong prea long God, blong hem i givhan long man, mo blong i lukaot gud long hem, mo blong i sevem hem. Mo i gat ol singsing blong prea long God, blong hem i fogivim man, i tekemaot ol sin blong hem, mo i gat ol singsing blong talem tangkiu long God from we hem i stap mekem i gud tumas long man. Mo i gat ol singsing tu blong prea long God, blong i panisim ol enemi.
Long ol prea ya, i gat ol prea we man i mekem blong i yusum taem hem i stap prea hem wan, mo i gat ol prea we man i mekem blong olgeta man oli yusum taem oli kam wanples blong mekem wosip. Mo i gat prea we man i mekem blong soemaot olgeta tingting blong hem, we hem i harem gud olsem wanem, no i harem nogud olsem wanem. Mo i gat ol prea tu we i talemaot tingting blong olgeta man blong God, we oli trastem hem olsem wanem mo oli wantem hem i mekem olsem wanem long olgeta.
Taem Jisas* i stap long wol ya, hem i stap yusum ol tok blong OL SAM long ol wok blong hem, mo ol man we oli raetem Niutesteman, olgeta ya tu oli stap yusum ol tok ya long ol buk blong olgeta. Mo i stat taem Jisas i stanemap jos blong hem, i kam kasem tede, oltaem olgeta Kristin man oli stap yusum ol tok blong OL SAM ya long ol wosip mo prea blong olgeta.
Long buk ya blong OL SAM, i gat wan handred fifti sam olgeta, we fastaem oli stap long faef smol buk, be biaen ol laen blong Isrel oli putum olgeta i kam wanples long wan buk nomo. Ol faef buk ya i olsem.
Ol haf blong buk ya
Buk Wan Ol Sam 1—41
Buk Tu Ol Sam 42—72
Buk Tri Ol Sam 73—89
Buk Fo Ol Sam 90—106
Buk Faef Ol Sam 107—150
Currently Selected:
Sam Sotfala stori blong buk ya: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.