Mak 14
14
Ol lida blong ol laen blong Isrel oli lukaot rod blong kilim Jisas
(Matiu 26.1-5; Luk 22.1-2; Jon 11.45-53)
1 #
Eks 12.1-27
Nao i gat tu dei i stap blong kasem Lafet blong Pasova*, wetem Lafet* ya blong Kakae Bred* we i No Gat Is long hem. Nao ol jif pris* mo ol tija blong Loa* oli stap traem lukaot wan rod blong holem Jisas, blong kilim hem i ded, be long fasin blong stil nomo. 2Olgeta oli stap talem se, “Yumi no save mekem long taem blong lafet, from we i nogud ol man oli mekem faet long yumi.”
Wan woman i kafsaedem senta i go long hed blong Jisas
(Matiu 26.6-13; Jon 12.1-8)
3 #
Luk 7.37,38 Nao Jisas i stap long Betani, long haos blong Saemon, man ya we bifo hem i gat wan rabis sik blong skin#14.3: Yu luk futnot B long 1.40. Mo taem hem i stap kakae, i gat wan woman i kam long hem we i karem wan botel we oli wokem long wan ston, nem blong hem alabasta. Long botel ya i gat senta we oli wokem long nad* we i beswan, mo smel blong hem i gud tumas, mo praes blong hem i antap tu. Nao woman ya i brekem maot blong botel ya, i kafsaedem senta ya i go long hed blong Jisas. 4Be i gat sam man oli kros, nao oli stap taltalem long olgeta se, “?From wanem woman ya i spolem senta ya olsem? 5Sipos hem i salem nomo, bambae hem i save kasem antap long tri handred taosen vatu* blong givim long ol puaman.” Nao oli tok long woman ya.
6Be Jisas i talem se, “!Ei! !Yufala i livim woman ya! ?From wanem yufala i stap spolem hem? Hem i mekem wan gudfala samting long mi ya. 7#Dut 15.11Ol puaman bambae oli stap oltaem wetem yufala. Mo sipos yufala i wantem, oltaem yufala i save mekem i gud long olgeta. Be mi, bambae mi no save stap oltaem wetem yufala. 8Woman ya i mekem wan samting we hem i naf blong mekem. Hem i kafsaedem senta ya long bodi blong mi blong mekem mi mi rere blong oli berem mi. 9Tru mi talem long yufala, long evri ples long wol we bambae oli talemaot gud nius blong mi, be bambae oli mas tokbaot samting ya we woman ya i mekem, blong tingbaot hem bakegen.”
Judas i glad blong letem Jisas i go long han blong ol enemi blong hem
(Matiu 26.14-16; Luk 22.3-6)
10Nao Judas Iskariot, wan long ol twelef man blong Jisas, hem i go long ol jif pris* blong mekem rod blong letem Jisas i go long han blong olgeta. 11Taem olgeta oli harem tok blong hem, oli glad tumas, mo oli promes blong givim mane long hem. Nao Judas i stap lukaot rod blong letem Jisas i go long han blong olgeta.
Tu man blong Jisas tufala i mekemrere kakae blong Lafet blong Pasova
(Matiu 26.17-19; Luk 22.7-13)
12Nao i kam kasem fas dei blong Lafet* blong Kakae Bred* ya we i No Gat Is long hem. Long dei ya, ol man oli stap kilim ol smol sipsip* blong mekem Lafet blong Pasova*. Nao ol man blong Jisas oli askem long hem se, “?Yu wantem mifala i go mekemrere kakae blong Lafet blong Pasova long weples, blong yu save kakae long hem?”
13-15Nao Jisas i talem long tu man blong hem se, “Yutufala i go long taon, mo bambae yutufala i mitim wan man we i stap karem wan bigfala botel wota, nao yutufala i biaen long hem. Mo taem yufala i go insaed long haos, bambae yutufala i talem long masta blong haos ya se, ‘?Tija i sanem mitufala i kam blong askem long yu, se rum ya we hem wetem ol man blong hem bambae oli mekem Lafet blong Pasova long hem, i stap wea?’ Nao hem bambae i tekem yutufala i go long wan bigfala rum antap, we ol samting blong hem oli stap rere finis. Long ples ya nao bambae yutufala i save mekemrere kakae blong yumi blong lafet ya.” Nao hem i sanem tufala i go.
16Nao tufala i aot, tufala i go long taon, tufala i faenem evri samting, stret olsem we Jisas i talem. Nao tufala i mekemrere kakae blong Lafet blong Pasova.
Jisas i talemaot we bambae Judas i letem hem i go long ol enemi blong hem
(Matiu 26.20-25; Luk 22.14,21-23; Jon 13.21-30)
17Long naet ya, Jisas i kam wetem ol twelef man blong hem. 18#Sam 41.9Nao taem olgeta oli sidaon long tebol, oli stap kakae, Jisas i talem se, “Tru mi talem long yufala, wan long yufala bambae i letem mi mi go long han blong ol enemi blong mi. Wan long yufala ya we yumi stap kakae naoia.”
19Nao ol man blong hem oli sore tumas, mo oli stap askem wanwan long hem se, “?Hu ya? ?Mi?”
20Nao Jisas i talem se, “Hem i wan long yufala ol twelef man blong mi, we yumi stap pusum bred* blong yumi long supsup ya long wan dis nomo. 21Mi, mi Pikinini* blong Man, bambae mi mas ded olsem we Baebol* i talem, be sore tumas long man ya we bambae i letem mi mi go long han blong olgeta. Bambae i moa gud long man ya, sipos hem i no bon.”
Lastaem blong Jisas blong kakae wetem olgeta
(Matiu 26.26-30; Luk 22.15-20; 1 Korin 11.23-25)
22Taem olgeta oli stap kakae, Jisas i tekem bred*, i prea blong talem tangkiu long God from. Nao hem i brekem, i givim long olgeta, i talem se, “Yufala i tekem. Hemia bodi blong mi.” 23Mo hem i tekem wan kap waen, i talem tangkiu long God from, nao i pasem i go long olgeta, mo olgeta oli dring. 24#Eks 24.8; Jer 31.31-34Nao hem i talem se, “Hemia i blad blong mi we i blong mekem promes* blong God i stanap. Blad blong mi bambae i ron blong sevem plante man. 25Tru mi talem long yufala, bambae mi mi no moa save dring waen ya bakegen, gogo kasem we bambae mi dring niufala waen long niufala wol ya we God i king* long hem.”
26Nao oli sing long wan Sam, mo biaen oli aot, oli go long hil ya we nem blong hem “Hil blong Tri ya Olif*”.
Jisas i talemaot we Pita bambae i talem se hem i no save hem
(Matiu 26.31-35; Luk 22.31-34; Jon 13.36-38)
27 #
Sek 13.7
Nao Jisas i talem long olgeta se, “Bambae bilif blong yufala evriwan i save foldaon, from we long Baebol* God i talem se, ‘Bambae mi mi kilim man blong lukaot long sipsip, nao bambae ol sipsip oli go wanwan olbaot.’ 28#Mat 28.16Be taem mi laef bakegen long ded, bambae mi mi go fastaem long Galili*, yufala i kam biaen.”
29Be Pita i talem long hem se, “Maet bilif blong olgeta ya evriwan i foldaon, be bilif blong mi bambae i no save foldaon nating.”
30Jisas i talem long hem se, “Tru mi talem long yu. Bambae long naet ya nomo, taem faol i no singaot tu taem yet, be yu bambae yu talem tri taem, se yu no save mi.”
31Be Pita i talem bakegen we i talem strong moa se, “Sipos olgeta oli wantem kilim mi mi ded wetem yu, be bambae mi no save talem se mi no save yu.” Mo olgeta evriwan oli talem sem tok.
Jisas i go long Getsemane, i prea
(Matiu 26.36-46; Luk 22.39-46)
32Nao olgeta oli go long wan ples, nem blong hem Getsemane. Nao Jisas i talem long ol man blong hem se, “Yufala i sidaon long ples ya fastaem, bambae mi mi go prea.”
33Mo hem i tekem Pita mo Jemes mo Jon, trifala i go wetem hem. Nao tingting blong hem i kam hevi we i hevi, mo hem i harem nogud tumas. 34Nao hem i talem long trifala ya se, “Tingting blong mi i hevi tumas, we klosap mi mi ded from. Yufala i stap wet long ples ya, i nogud yufala i slip, yufala i mas waj.”
35Nao hem i wokbaot smol moa i go, mo i foldaon long graon blong i prea. Nao hem i askem long God, se sipos i gat wan narafala rod we hem i save mekem, bambae ol strong samting blong taem ya oli no kam kasem hem. 36Hem i talem se, “Aba,” we i min se “Papa”. “Yu yu save mekem evri samting. Plis yu tekemaot ol samting ya we i stap mekem mi mi harem nogud tumas. Be yu no mekem olsem we mi mi wantem, yu mekem olsem we yu nomo yu wantem.”
37Nao hem i kambak long trifala ya, mo i luk we trifala i slip finis. Nao hem i talem long Pita se, “Ei, Saemon. ?From wanem yu stap slip? ?Yu no save waj blong wan aoa nomo? 38Yufala i mas lukaot gud, yufala i mas prea, blong bambae i no gat wan samting i save traem yufala blong mekem yufala i foldaon. Tru, tingting blong yufala i strong be bodi blong yufala i slak.”
39Nao hem i gobak, i prea, i talem sem tok bakegen. 40Nao hem i kambak bakegen, mo i luk we trifala ya i slip bakegen, from we ae blong trifala i hevi we i hevi. Nao trifala i no save talem wan samting long hem.
41Nao hem i go, mo i kambak bakegen, we hemia i mekem tri taem blong hem, nao i talem long trifala se, “?Weswe? ?Yufala i stap spel yet, mo yufala i stap slip gud? !I naf! Taem i kam finis blong man ya i letem mi, mi Pikinini* blong Man, mi go long han blong ol man nogud. 42Yufala i stanap, yumi go. Yufala i luk. Man ya we i glad blong letem mi mi go long han blong ol enemi blong mi, hem i kam klosap finis.”
Ol enemi blong Jisas oli kam holem hem
(Matiu 26.47-56; Luk 22.47-53; Jon 18.3-12)
43Taem Jisas i stap toktok yet, wantaem nomo Judas we i wan long ol twelef man blong hem, hem i kamtru. Hem i rere finis blong letem Jisas i go long han blong ol enemi blong hem, mo i gat wan bigfala kampani blong ol man oli biaen long hem, we oli stap karem naef blong faet mo nalnal blong olgeta. Olgeta ya oli aot long ol jif pris* mo ol tija blong Loa* mo ol elda* blong ol laen* blong Isrel*. 44Judas i bin givim wan tok long olgeta finis se, “Man ya we bambae mi mi kis* long hem, hemia nao man ya. Yufala i mas holem hem, mo taem yufala i tekem hem i go, yufala i no mas letem hem i ronwe.”
45Nao taem Judas i kam kasem ples ya, wantaem nomo hem i kam long Jisas, i talem long hem se, “Tija,” nao i kis long hem. 46Nao olgeta ya oli kam, oli holemtaet Jisas. 47Be wan man we i stap klosap long hem i pulumaot naef blong faet blong hem, i katemaot wansaed sora blong slef* blong hae pris*.
48Nao Jisas i talem long olgeta se, “?Olsem wanem? ?Yufala i ting se mi mi man blong stil mo blong kilim man? ?From wanem yufala i stap holem naef blong faet mo nalnal blong yufala, blong kam holem mi? 49#Luk 19.47; 21.37Evri dei mi mi stap wetem yufala long haos* blong God, mi stap tij, be yufala i no holem mi. Be fasin ya i blong mekem ol tok blong Baebol* i kamtru.”
50Nao olgeta man blong hem oli lego hem, oli ronwe. 51Mo i gat wan man we i biaen long Jisas, we i parpar nomo, i no putum ol narafala klos. Mo taem olgeta oli traem blong holem hem, 52hem i lego parpar blong hem, i ronwe we i neked nomo.
Jisas i stanap long fes blong Kaonsel
(Matiu 26.57-68; Luk 22.54-55,63-71; Jon 18.13-14,19-24)
53Nao olgeta oli tekem Jisas i go long hae pris*. Mo long ples ya, ol jif pris* mo ol elda* mo ol tija blong Loa* oli stap wanples finis. 54Mo Pita i biaen long hem, be i no go klosap long hem. Taem hem i kam insaed long yad blong bigfala haos ya blong hae pris, hem i go sidaon wetem ol man blong hae pris, blong i wom long faea. 55Nao ol jif pris wetem olgeta memba blong Kaonsel* oli stap lukaot sam man we oli save talem sam poen agens long Jisas. Oli wantem sam poen we oli save kilim hem from, be oli no save faenem wan. 56Tru i gat plante man oli girap oli stap mekem ol giaman poen agens long hem, be tok blong olgeta i no sem mak.
57Nao sam witnes oli stanap, oli giaman, oli talem poen ya agens long hem se, 58#Jon 2.19“Mifala i harem hem we i talem se, ‘Haos* ya blong God we ol man oli wokem, bambae mi mi brekemdaon. Mo biaen long tri dei, bambae mi stanemap wan niuwan bakegen, we i no gat man i wokem.’ ” 59Oli stap talem olsem, be long poen ya tu ol tok blong olgeta i no sem mak.
60Nao hae pris i stanap long medel blong olgeta, i talem long Jisas se, “?Weswe yu no toktok? ?Olsem wanem long ol poen ya we oli stap talemaot agens long yu?”
61Be Jisas i stap kwaet, i no toktok. Nao hae pris i askem bakegen se, “?Olsem wanem? ?Yu yu Mesaea*, yu Pikinini blong God ya we yumi stap presem hem?”
62 #
Dan 7.13
Nao Jisas i talem se, “Mi ya nao. Bambae yufala i save luk mi, mi Pikinini* blong Man, mi sidaon long raet saed blong God ya we i gat olgeta paoa. Mo bambae yufala i luk we mi mi kamaot long klaod long skae, mi kamdaon.”
63Nao hae pris ya i kros tumas, i terem* klos blong hem, i talem se, “?Weswe yumi stap lukaot witnes bakegen? 64#Lev 24.16Yufala i harem finis we hem i tok nogud long God. ?Yufala i ting olsem wanem? ?Bambae yumi mekem olsem wanem long hem?”
Nao oli jajem hem, oli talem se, “Hem i mas ded.”
65Nao sam long olgeta oli girap, oli spet long hem. Mo sam oli fasem ae blong hem, nao oli faetem hem, oli talem se, “!Ei, profet! !Yu traem talem! ?Hu nao i faetem yu?” Mo ol man blong hae pris tu oli tekem hem, oli stap slavem hem.
Pita i talem se hem i no save Jisas
(Matiu 26.69-75; Luk 22.56-62; Jon 18.15-18,25-27)
66Nao Pita i stap daon long yad blong haos ya, mo wan haosgel blong hae pris* i kam, 67i luk we Pita i stap wom long faea. Hem i luklukgud long hem, nao i talem se, “!Ei! !Yu tu yu stap wetem man Nasaret ya, Jisas!”
68Be Pita i talem se, “Mi no save man ya. Mi no save samting ya we yu stap talem.” Nao hem i aot, i godaon, i stap long get blong yad ya. Nao wan faol i singaot.#14.68: Long sam olfala kopi blong Niutesteman long lanwis blong ol man Gris bifo, las tok ya i no stap, we i talem se, Nao wan faol i singaot.
69Nao haosgel ya i luk hem bakegen, i stat talem long ol man we oli stap klosap se, “Man ya i wan long olgeta ya.” 70Be Pita i talem bakegen se, “Mi mi no wan long olgeta.”
Nao i no longtaem, ol man ya we oli stap klosap, oli talem long Pita se, “Yes, yu yu wan long olgeta, from we yu yu wan man Galili* ya.”
71Be Pita i mekem strong tok, i talem se, “Mi mi no save man ya we yufala i stap talem. Sipos mi giaman, God bambae i panisim mi from.”
72Nao stret long taem ya, faol i singaot bakegen, i mekem tu taem blong hem. Nao Pita i tingbaot tok ya blong Jisas we i talem se, “Taem faol i no singaot tu taem yet, be yu bambae yu talem tri taem, se yu no save mi.” Nao hem i harem nogud tumas, nao i krae.
Currently Selected:
Mak 14: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
