Matiu 22
22
Jisas i mekem parabol long bigfala kakae blong mared
(Luk 14.15-24)
1Nao bakegen, Jisas i talem wan parabol long olgeta. 2Hem i talem se, “Fasin blong God blong singaot ol man oli kam man blong hem, blong hem i King* blong olgeta, i olsem wan king we hem i mekem wan bigfala kakae blong mared blong pikinini blong hem. 3Hem i sanem ol man blong hem oli go long ol man we hem i singaot olgeta finis, blong oli kam long kakae ya. Nao oli go talem long olgeta blong oli kam, be oli no wantem kam. 4Nao king ya i talem long sam narafala man blong hem blong oli gobak bakegen, oli talem tok ya blong hem long olgeta se, ‘King i talem se kakae ya i rere finis. Ol buluk blong hem, wetem ol yangfala buluk we hem i fidim olgeta oli fatfat gud, hem i kilim olgeta evriwan, mo olgeta samting i rere finis. Yufala i kam joen long kakae ya blong mared.’ 5Be olgeta ya oli no ting hevi nating long tok ya blong king, oli gohed nomo long bisnes blong olgeta. Wan i go long garen blong hem, mo narawan i stap lukaot long stoa blong hem. 6Mo sam narawan oli holem ol man ya blong king, oli mekem i nogud tumas long olgeta, nao oli kilim olgeta oli ded. 7Nao king ya i kros tumas, i sanem ol soldia blong hem oli go, nao oli kilim ol man ya blong kilim man oli ded, mo oli bonem taon blong olgeta.
8“Nao king ya i talem long ol man blong hem se, ‘Kakae ya i rere finis, be olgeta ya we mi singaot olgeta fastaem blong oli kam long kakae ya, oli no stret blong oli kam, yumi livim olgeta. 9Naoia yufala i mas pas long ol big rod blong taon ya, yufala i mas singaot olgeta man we yufala i save faenem, blong oli kam long kakae ya.’ 10Nao ol man blong hem oli go long ol rod ya, oli singaot olgeta man we oli save faenem olgeta, ol gudfala man wetem ol man nogud, mo oli tekem olgeta i kam long kakae ya. Nao haos blong kakae ya i fulap gud long man.
11“Be taem king ya i kam insaed blong luk ol man ya we oli kam, hem i luk wan man we i no putum klos blong kakae blong mared. 12Nao king i askem long hem se, ‘Maefren. ?Yu yu kam insaed olsem wanem we yu no putum klos blong lafet blong mared?’ Be man ya i no moa tok. 13#Mat 8.12; 25.30; Luk 13.28Nao king i talem long ol man blong hem se, ‘Yufala i fasem han mo leg blong hem, yufala i sakem hem i go afsaed, long ples ya we i tudak, we ol man oli stap krae, mo oli stap harem nogud tumas, oli stap kakae tut blong olgeta from.’ ”
14Mo Jisas i talem se, “God i save singaot plante man oli kam, be smol nomo hem i jusumaot.”
?I stret blong man i pem takis long Sisa?
(Mak 12.13-17; Luk 20.20-26)
15Nao ol Farisi* oli go mekem toktok blong traem faenem rod blong mekem Jisas i foldaon long ol tok blong hem. 16Nao oli sanem sam man blong olgeta wetem sam man we oli sapota blong ol laen blong King Herod#22.16: Ol sapota blong ol laen blong King Herod. Hemia olgeta we oli no wantem ol man Rom i rulum olgeta, oli wantem wan laen blong King Herod ya we i nambawan king i rul long olgeta. oli kam long Jisas, oli talem se, “Tija. Mifala i save we yu yu wan stret man. Yu yu tok tru nomo, mo yu stap tijim ol man long fasin we God i wantem. Yu no save fraet long ol man, from we yu no tingbaot we man i haeman, no i no haeman. 17Ale, yu talem long mifala. ?Yu yu ting olsem wanem? ?I stret long Loa* blong yumi blong yumi pem takis long Sisa* we i man Rom, mo i king long olgeta kantri, no i no stret olsem?”
18Be Jisas i save we olgeta oli wantem spolem hem, nao hem i talem se, “Yufala i man blong giaman. ?Weswe yufala i stap traem mi? 19Yufala i tekem wan mane blong pem takis ya i kam, yufala i soem long mi.”
Nao oli tekem wan mane i kam, 20mo hem i askem long olgeta se, “?Fes ya i fes blong hu? ?Mo nem ya i nem blong hu?” Olgeta oli talem se, “Fes blong Sisa ya, mo nem blong hem tu.”
21Nao hem i talem long olgeta se, “Oraet, samting we i blong Sisa, yufala i givimbak long Sisa. Mo samting we i blong God, yufala i givimbak long God.”
22Taem olgeta oli harem tok ya oli sapraes tumas. Nao oli livim hem, oli gowe.
?Bambae i olsem wanem long man we i ded nao i laef bakegen?
(Mak 12.18-27; Luk 20.27-40)
23 #
Wok 23.8
Nao long sem dei ya, i gat sam Sadusi* oli kam luk Jisas. Ol Sadusi oli stap talem se man we i ded i no save laef bakegen. Nao olgeta oli askem wan kwestin long hem se, 24#Dut 25.5“Tija. Moses i talem se sipos wan man i ded, mo i no gat pikinini blong hem, brata blong hem bambae i mas mared* long wido ya blong hem, blong bambae tufala i gat pikinini, blong holem nem blong man ya we i ded. 25Nao long ples blong mifala i gat seven brata long wan famle. Fasbon i mared, mo biaen hem i ded we i no gat pikinini blong hem. 26Nao seken brata i tekem wido ya, mo hem tu i ded we i no gat pikinini blong hem. Mo sem samting i kasem namba tri brata, gogo kasem namba seven brata, we olgeta evriwan oli ded we oli no gat pikinini. 27Mo biaen, woman ya tu i ded. 28?Nao from we ol brata ya evriwan oli bin mared long hem, long Lasdei, taem ol man oli laef bakegen, woman ya bambae i woman blong hu?”
29Nao Jisas i talem se, “Olgeta. Yufala i rong olgeta, from we yufala i no save tok blong Baebol*, mo yufala i no save paoa blong God tu. 30Taem we ol dedman oli laef bakegen, bambae oli no moa save mared. Bambae oli olsem ol enjel long heven nomo. 31Mo long fasin ya we man i laef bakegen, long Baebol God i talem long yufala se, 32#Eks 3.6‘Mi mi God blong Ebraham, mo mi God blong Aesak, mo mi God blong Jekob*.’ ?Ating yufala i no ridim tok ya samtaem? God ya i God blong man we i laef, hem i no God blong man we i ded.”
33Nao taem ol man oli harem tok ya, oli sapraes tumas long ol tok ya we Jisas i stap tijim olgeta long hem.
Loa blong God we i hae moa long ol narafala loa
(Mak 12.28-34; Luk 10.25-28)
34Taem ol Farisi* oli harem we Jisas i daonem ol Sadusi*, olgeta tu oli joen wanples, mo oli kam luk Jisas. 35Nao wan long olgeta we hem i waes long Loa*, hem i askem wan kwestin long Jisas blong traem mekem hem i foldaon. 36Hem i talem se, “Tija. ?Wanem loa blong God we i hae moa long ol narafala loa, i winim olgeta evriwan?”
37 #
Dut 6.5
Nao Jisas i talem long hem se, “ ‘Yu mas lavem Hae God* ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.’ 38Hemia nao loa ya we i hae moa long ol narafala loa, mo i nambawan blong folem. 39#Lev 19.18Mo narawan, we klosap i sem mak long hem, i talem se, ‘Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu.’ 40#Luk 10.25-28Tufala loa ya i stamba blong Loa we God i givim long Moses, wetem ol tok blong ol profet tu.”
Mesaea i no Laen blong King Deved nomo, be i Masta blong hem tu
(Mak 12.35-37; Luk 20.41-44)
41Nao long taem ya we ol Farisi* oli stap wanples, Jisas i askem wan kwestin long olgeta. 42Hem i talem se, “?Wanem tingting blong yufala long Mesaea* ya? ?Bambae hem i kamaot long laen* blong hu?”
Olgeta oli talem long hem se, “Bambae hem i kamaot long laen blong King Deved.”
43Nao hem i askem long olgeta se, “?Be olsem wanem we Tabu Spirit i givim waes long King Deved blong i singaot Mesaea ya, se Masta* blong hem? King Deved i talem se,
44 #
Sam 110.1
‘Hae God* i talem long Masta blong mi se,
“Yu sidaon long raet saed blong mi
yu wet.
Bambae mi mekem ol enemi blong yu
oli stap aninit long paoa blong yu,
oli slef* blong yu.” ’
45?Sipos King Deved i talemaot we Mesaea i Masta blong hem, olsem wanem we Mesaea ya i save kamaot long laen blong hem?”
46Nao i no gat man i save talem wan tok blong ansa long Jisas. Mo i stat long dei ya, i no moa gat man bakegen, i save askem kwestin long hem tu.
Currently Selected:
Matiu 22: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
