Joel 2
2
Ol lokis ya i saen we Dei blong Hae God bambae i kam
1Nao Profet Joel i talem se,
“Ol pris*.
Yufala i mas go stanap long Hil ya Saeon*,
tabu hil* blong God,
mo yufala i blu long pupu
we yufala i pulum i longfala,
blong givim saen long ol man
blong oli rere.
Ol man Juda*.
Yufala i mas fraet, yufala i seksek.
Naoia Dei blong Hae God i stap kam.
2Dei ya bambae i gat bigfala klaod,
we i blak we i blak,
mo olgeta ples bambae i tudak olgeta.
Naoia ol lokis* oli stap kam
we oli plante we plante,
mo oli kavremapgud ol bigbigfala hil
olsem tudak.
I no gat wan samting olsem samtaem,
mo neva bambae i gat samting olsem bakegen samtaem.
3“Ol lokis ya oli kam,
oli kakae evri samting we oli flatemgud,
olsem we faea i kakae gras.
Taem oli stap muv i kam,
long fored blong olgeta,
ol gras oli grin gud i stap,
olsem gudfala ples ya Iden.
Be biaen long olgeta,
i no gat wan gras nating i stanap,
graon nomo i stap.
I no gat wan samting
we i save ronwe long olgeta.
4 #
Rev 9.7-9
Oli olsem ol hos,
mo oli resis olsem ol hos blong faet.
5Taem oli stap kakae antap long ol hil,
noes blong olgeta i olsem noes blong kat blong faet,
mo i olsem noes blong faea
we i stap bonem waetgras.
Olgeta oli laenap,
olsem ol soldia
we oli stanap rere blong go faet.
6Taem oli stap kam klosap,
olgeta man oli stap fraet,
oli seksek,
we fes blong olgeta i kam nogud olgeta.
7Taem oli resis i kam,
oli klaem long stonwol olsem ol soldia.
Oli muv i kam stret nomo,
we oli no tanemraon nating,
8mo oli no paspas nating long olgeta.
Oli plante we plante,
mo oli muv i kam stret olsem ol soldia,
we oli no fraet nating
long ol enemi blong olgeta.
Oli muv i kam,
we i no gat wan samting i save blokem olgeta.
9Oli resis i kam,
oli klaem long stonwol blong taon,
oli kam insaed blong spolem ples ya.
Mo oli klaem long ol haos,
oli gotru long ol windo
olsem man blong stil.
10 #
Rev 8.12
“Taem oli stap kam,
graon i seksek bigwan,
mo skae tu i seksek.
Nao san mo mun tufala i kam tudak,
tufala i no moa saen.
Ol sta tu oli no moa saen.
11 #
Rev 6.17
Hae God i stap tok
we voes blong hem i olsem tanda,
blong i givim ol tok blong hem
long ol lokis ya
we oli olsem ol soldia blong hem.
Olgeta oli plante we plante,
mo oli gat paoa,
be olgeta oli stap obei long hem.
Dei ya blong Hae God i strong tumas.
?Hu nao bambae i save sef
long bigfala dei ya?”
Man i mas tanem tingting blong hem from ol sin blong hem
12Nao Profet Joel i talemaot we Hae God i talem se,
“Ol laen* blong Isrel*.
Nating we ol trabol ya i stap kasem yufala,
be yufala i mas kambak long mi
long olgeta tingting blong yufala.
Yufala i mas tanem tingting blong yufala
from ol sin blong yufala,
mo yufala i mas lego kakae blong yufala,
mo yufala i mas harem nogud,
yufala i krae.
13Yufala i stap terem* ol klos blong yufala,
blong soemaot we yufala i harem nogud,
be hemia i no naf.
Yufala i mas harem nogud tru
long olgeta tingting blong yufala
from ol sin blong yufala.”
Nao profet i gohed, i talem se,
“Hae God i God blong yumi,
mo yufala i mas kambak long hem.
Hem i kaen mo i gat sore long man,
hem i no save kros kwik,
mo oltaem hem i stap holem promes blong hem.
Oltaem hem i rere blong fogivim man
blong i no save panisim hem.
14Maet Hae God i jenisim tingting blong hem,
nao i blesem yufala long plante kakae long garen.
Nao bambae yufala i save givim presen long hem bakegen
long kakae mo waen blong yufala.
15“Ol pris*.
Yufala i mas go antap long Hil ya Saeon*,
yufala i blu long pupu
blong singaot ol man oli kam wanples.
Yufala i talem long olgeta
blong oli lego kakae blong olgeta.
16Yufala i singaot olgeta man i kam wanples
long haos* blong Hae God,
ol olfala, mo ol pikinini mo ol bebi tu.
I nating sipos i gat man we i jes mared,
be tufala i mas aot long rum blong tufala,
tufala i kam.
Nao yufala i mas mekem olgeta oli klin
long fes blong Hae God.
17Yufala i man blong mekem wok blong hem.
Yufala i mas stanap long medel
blong olta mo vranda blong haos blong hem,
nao yufala i mas harem nogud,
yufala i krae.
Yufala i mas prea se, ‘Hae God.
Mifala evriwan i man blong yu,
plis yu sore long mifala,
yu no letem we ol man blong ol narafala kantri
oli kam spolem mifala, oli tok nogud long mifala.
I nogud oli stap taltalem se,
“?Wehem God ya blong olgeta?” ’ ”
Hae God i mekem ol graon i kam gud bakegen
18Nao Profet Joel i talem se,
“Nao Hae God i tingbaot kantri ya blong hem bakegen,
mo i sore long ol man blong hem.
19Hem i ansarem prea blong olgeta,
i talem se,
‘Naoia bambae mi givim bakegen
ol kakae mo waen mo olifoel long yufala,
blong yufala i save harem gud bakegen.
Ol man blong ol narafala kantri
bambae oli no moa save tingting rabis
long yufala bakegen.
20Mi bambae mi tekemaot olgeta lokis* ya
we oli aot long not oli kam,
mi ronemaot olgeta i go long draeples.
Haf ya we oli kam fastaem,
bambae mi ronemaot olgeta i go long Ded Si*,
mo haf ya we oli kam biaen,
bambae mi ronemaot olgeta
i go long Mediterenian Si.
Ol dedbodi blong olgeta
bambae oli sting olbaot.
Mi bambae mi spolemgud olgeta
from olgeta samting ya we oli mekem long yufala.
21“ ‘Graon.
!Yu no moa fraet!
Yu mas harem gud,
mo yu mas glad
from ol bigbigfala samting ya
we mi mi mekem.
22Yufala ol anamol,
yufala i no moa fraet.
Naoia ol gras oli gru bakegen finis
blong yufala i kakae.
Ol tri oli karem frut bakegen,
mo ol figtri* mo ol rop blong grep*
oli karem plante frut blong olgeta bakegen.
23“ ‘Ol man Saeon*.
Mi mi Hae God,
mi God blong yufala.
Yufala i mas harem gud,
mo yufala i mas glad
from olgeta samting ya
we mi mi mekem from yufala.
Mi mi givim ren#2.23: Ren. Yu luk tok ya GAREN long Diksonari. long yufala
long stret taem blong hem,
long taem blong mekem garen* i rere blong planem,
from we fasin blong mi i stret gud.
Mo mi givim ren long koltaem
we i plante we plante.
Mo long taem blong ol samting oli gru,
mi mi givim ren long yufala bakegen,
blong mekem ol kakae long garen i gru gud,
olsem we mi stap mekem fastaem.
24Bambae ol ples blong kilimaot
kakae blong wit* mo bale*,
oli fulap gud long kakae,
mo ol hol#2.24: Hol blong wokem waen. Yu luk tok ya GREP long Diksonari. blong wokem waen,
bambae oli fulap long waen mo olifoel.
25Olgeta samting we i lus,
long ol yia ya we i pas finis,
we ol lokis oli spolem,
mi bambae mi givimbak
olgeta samting ya long yufala bakegen.
Ol lokis ya, oli olsem ol soldia
we mi nomo mi sanem olgeta i kam long yufala.
26Naoia bambae yufala i gat plante kakae bakegen,
blong yufala i kakae,
yufala i harem gud.
Mi mi Hae God,
mi God blong yufala,
mo bambae yufala i presem mi,
from we mi nao mi mekem
ol gudgudfala samting long yufala.
Yufala i man blong mi,
mo bambae i no moa gat man
i save tingting rabis long yufala bakegen.
27Nao bambae yufala i savegud
we mi mi Hae God,
mi God blong yufala,
mo mi mi stap long medel blong yufala, i no gat narafala god moa.
Yufala i man blong mi,
mo bambae i no moa gat man
i save tingting rabis long yufala bakegen.’ ”
Bigfala Dei ya blong Hae God bambae i kam
28Mo Profet Joel i gohed, i talemaot we Hae God i talem se,
“Nao biaen,
mi bambae mi givim Spirit blong mi
long olgeta man,
we bambae olgeta evriwan
oli kasem fulpaoa blong hem.
Ol pikinini blong yufala,
ol boe mo ol gel,
bambae oli save talemaot ol tok
we mi bambae mi givim long olgeta.
Mo ol olfala blong yufala
bambae oli save drim long ol drim.
Mo ol yang man blong yufala
bambae oli save luk ol vison*
we mi bambae mi soemaot long olgeta.
29Nating we ol boe blong wok
mo ol gel blong wok nomo,
be long taem ya,
mi bambae mi givim Spirit blong mi long olgeta,
we bambae oli kasem fulpaoa blong hem.
30“Mi bambae mi mekem ol saen
long skae mo long wol ya tu.
Bambae i gat blad, mo faea,
mo bigfala smok i go antap.
31 #
Mat 24.29; Mak 13.24,25; Luk 21.25; Rev 6.12,13 Fastaem, san bambae i kam tudak,
mo mun bambae i kam red olsem blad.
Nao biaen,
Dei ya blong mi we mi mi Hae God,
bambae i kamtru.
Hemia i wan bigfala dei
we bambae ol man oli fraet gud long hem.
32 #
Wok 2.17-21
#
Rom 10.13
Nao long taem ya,
olgeta man we oli singaot mi
long nem blong mi,
mi bambae mi sevem olgeta.
I olsem we mi talem finis,
se sam long olgeta we oli stap long Hil ya Saeon*
mo long ol narafala ples long Jerusalem*
bambae oli save ronwe oli sef.
Mo olgeta ya we oli sef,
mi mi jusumaot olgeta finis
blong oli man blong mi.”
Currently Selected:
Joel 2: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.