Aesea 58
58
Fasin we man i livim kakae blong i ona long Hae God
1Bakegen, profet i talemaot long ol man blong hem we Hae God i talem long hem se, “!Yu singaot bigwan! !Yu mekem voes blong yu i bigwan olsem noes blong pupu! Olgeta ya oli laen* blong Isrel* ya, mo oli man blong mi. Yu talemaot ol sin blong olgeta, blong oli harem. 2Evri dei, olgeta oli kam mekem wosip long mi. Oli stap talem se oli wantem tumas blong save ol fasin we mi mi wantem, mo blong folem ol loa blong mi. Oltaem, oli stap mekem olsem we oli stap obei long mi olwe, we neva oli lego mi. Oli stap talem se oli wantem blong mi mi givim ol gudfala loa long olgeta, mo oli talem se oli glad tumas blong kam mekem wosip long mi. 3Olgeta oli talem long mi se, ‘?From wanem mifala i stap mekem tingting blong mifala i stap daon? !Yu no lukluk long mifala nating! ?From wanem mifala i stap livim kakae blong mekem wosip long yu? !Yu no luksave samting ya we mifala i stap mekem!’
“Be mi mi talem long olgeta se, ‘Yes i tru. Yufala i stap livim kakae, be long semtaem nomo, yufala i stap gohed blong wokem ol bisnes blong yufala, mo yufala i stap mekem i strong tumas long ol man blong wok blong yufala. 4Fasin ya blong yufala blong livim kakae, hem i mekem yufala i kros kwik, nao oltaem, yufala i stap rao, mo yufala i stap faet. ?Olsem wanem? ?Sipos yufala i stap mekem ol fasin ya, be yufala i livim kakae, yufala i ting se samting ya bambae i pulum mi, blong mi lesin long ol prea blong yufala? 5Oltaem, taem yufala i livim kakae blong mekem wosip long mi, yufala i stap mekem we yufala i harem nogud tumas. Yufala i bodaon we hed blong yufala i hang daon, olsem lif blong waelken we i hang daon i kasem graon. Yufala i putum rabis kaliko long graon, mo yufala i putum asis faea long hem, nao yufala i go slip long hem. ?Yufala i ting se hemia nao fasin blong livim kakae blong mekem wosip long mi? ?Yufala i ting se mi mi glad long ol fasin ya?
6“ ‘Fasin we mi mi wantem luk i olsem. Ol man we yufala i stap mekem i strong long olgeta, olsem we yufala i fasem olgeta long jen, naoia yufala i mas tekemaot jen ya long olgeta. Ol man we yufala i stap mekem i no stret long olgeta, olsem we yufala i stap mekem olgeta oli karem ol hevi samting, naoia yufala i mas tekemaot ol samting ya long olgeta, yufala i mas letem olgeta oli gofri. Ol man we yufala i stap mekem olgeta oli stap daon, oli olsem slef* blong yufala, naoia yufala i mas letem olgeta oli gofri. 7#Mat 25.34Yufala i mas letem olgeta we oli hanggri oli kam kakae wetem yufala. Yufala i mas letem olgeta we oli no gat haos blong olgeta oli kam stap long haos blong yufala. Yufala i mas givim klos long ol puaman we oli no gat klos blong olgeta, mo yufala i no mas blokem ol famle blong yufala we oli kam askem blong yufala i givhan long olgeta.
8“ ‘Sipos yufala i stap mekem olsem, bambae mi mi glad tumas long yufala. Bambae i olsem we san i kam antap, i mekem yufala i wom gud. Bambae mi mi mekem ol soa blong yufala oli kam gud bakegen kwiktaem. Mo oltaem, mi bambae mi stap wetem yufala blong sevem yufala, bambae paoa blong mi i stap raon long yufala blong blokemgud yufala long evri saed. 9Nao sipos yufala i prea long mi, bambae mi mi harem yufala, mo sipos yufala i singaot i kam long mi, bambae mi mi ansa long yufala.
“ ‘Yufala i mas finis long ol fasin ya we yufala i stap mekem i strong long ol narafala man, mo we yufala i stap lukluk nogud long olgeta, mo we yufala i stap talem ol rabis tok blong spolem olgeta. 10Yufala i mas givim kakae long olgeta we oli hanggri, mo yufala i mas givhan gud long olgeta we oli trabol. Sipos yufala i stap mekem olsem, tudak ya we i stap raonabaot long yufala, bambae i kam delaet, olsem medel dei nomo. 11Nao oltaem, bambae mi mi stap lidim yufala, mi stap givim ol gudgudfala samting long yufala blong mekem yufala i harem gud. Bambae mi lukaot gud long yufala, blong yufala i no sik, bodi blong yufala i strong. Bambae yufala i olsem garen, we oltaem ren i stap wasem. Bambae yufala i olsem springwota, we neva i save kam drae. 12Bambae ol man blong yufala oli stanemap bakegen ol haos blong yufala we oli brobrok longtaem finis, bambae oli stanemap olgeta samting ya blong bifo long olfala fandesen blong olgeta. Nao ol man bambae oli stap tokbaot yufala, se yufala nao i stanemap ol bigfala stonwol blong taon ya, yufala nao i wokemgud ol haos ya we oli brobrok finis.’ ”
Hae God bambae i mekem i gud tumas long ol man we oli holem Sabat dei
13Bakegen, profet i talemaot long ol man blong hem we Hae God i talem se, “Olgeta. Yufala i mas mekem Sabat* dei i tabu, i blong mi. Yufala i no mas mekem ol bisnes blong yufala long dei ya. Yufala i no mas wokbaot i go longwe tumas, mo yufala i no mas mekem ol wok blong yufala, mo yufala i no mas mekem i dei blong storian olbaot nomo. Sipos yufala i stap ona gud long dei ya, mo yufala i harem gud long hem, 14bambae yufala i kasem glad ya we i stap kamtru long ol man we oli stap obei long mi. Bambae mi mi mekem we ol man olbaot long wol oli tinghae long yufala, mo bambae yufala i save stap gud long kantri ya we mi mi givim long Jekob* ya bifo, we yufala i laen* blong hem. Mi mi Hae God, mo hemia tok blong mi.”
Currently Selected:
Aesea 58: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
