Jenesis 19

Ol man Sodom oli mekem i nogud

1Nao tufala man ya#19.1: Tufala man ya, yu luk 18.22. we i stap wokbaot blong go long Sodom, tufala i enjel, mo long sapa, taem tufala i gotru, Lot i stap sidaon klosap long doa* blong bigfala stonwol blong taon ya. Nao taem hem i luk tufala, wantaem nomo, hem i girap, i wokbaot blong go toktok wetem tufala. Hem i bodaon long tufala, we fes blong hem i godaon i kasem graon, 2mo i talem se, “Tufala, yutufala i kam, yumi go long haos blong mi. Bambae yutufala i save wasem* leg blong yutufala, mo yutufala i save slip long ples ya. Mo tumora, bambae yutufala i save girap long eli moning blong folem rod blong yutufala bakegen.”

Be tufala i talem se, “No, i gud nomo. I gat ples blong ol strenja i stap long taon ya. Bambae mitufala i go slip long ples ya.”

3Be Lot i strong long tufala, gogo tufala i biaen long hem, tufala i go long haos blong hem. Nao hem i talem long ol man blong hem blong oli kukum sam bred* we i no gat is long hem, mo oli mekemrere wan gudfala kakae blong givim long tufala. Mo taem ol kakae ya i tan, oli givim long tufala, nao tufala i kakae.

4Be biaen, taem we tufala ya i no go blong slip yet, olgeta man blong taon ya, i stat long ol yangyangfala, i go kasem ol ololfala oli kam hivap raon long haos ya. 5#Jaj 19.22-24Nao oli stap singaot i go long Lot, oli talem se, “?Wehem tufala ya we i kam stap wetem yu long naet ya? !Yu tekem tufala i kam long mifala! !Mifala i wantem slip wetem tufala!”

6Be Lot i go afsaed, mo i satem doa, 7nao i talem long olgeta se, “!Ol fren! !Fasin ya i nogud we i nogud! Plis yufala i no mekem samting ya. 8!Yu luk! Tufala dota blong mi i stap, we i no gat man i go long tufala yet. Bambae mi tekem tufala i kam long yufala, blong yufala i mekem long tufala olsem we yufala i wantem. Be tufala man ya, plis yufala i no mekem wan samting long tufala. Tufala ya i strenja, mo tufala i stap finis long haos blong mi, nao mi mi mas lukaot gud long tufala.”

9Be olgeta oli talem se, “!Nogat! !Yu no blokem mifala! !Yu yu no man blong ples ya! !Yu no gat raet blong tok long mifala olsem! !Yu kamaot! !Yu no blokem rod! !Sipos no, bambae mifala i mekem i mowas long yu!” Nao oli pusumaot hem i gowe long doa, mo oli kam blong brekemdaon doa ya. 10Be tufala man ya insaed, tufala i openem doa, tufala i holem hem, tufala i pulum hem i kam insaed bakegen, nao tufala i satem doa. 11#2 King 6.18Mo tufala i mekem olgeta man ya afsaed oli blaen, we oli no moa save faenem doa ya.

Lot i aot long Sodom

12Nao tufala i talem long Lot se, “Sipos i gat sam famle blong yu i stap long taon ya, yu go tekem olgeta. Yu go tekem ol boe blong yu, wetem ol gel blong yu, mo ol man we i mared long ol gel blong yu, mo ol narafala famle blong yu, yufala i aot long taon ya, yufala i gowe, 13from we bambae mitufala i spolem taon ya. Ol man oli stap talemaot we ol man Sodom ya oli stap mekem ol rabis fasin we i nogud olgeta, mo Hae God i harem ol samting ya finis, nao i sanem mitufala blong mitufala i spolem taon ya olgeta.”

14Nao Lot i resis, i go luk tufala man ya we tufala i blokem finis tufala gel blong hem se bambae tufala i mared long tufala, i talem long tufala se, “!Yutufala i hareap! !Yutufala i kam kwik! !Bambae yumi aot long ples ya! !Naoia nomo, bambae Hae God i spolem taon ya olgeta!” Be tufala i ting se hem i stap mekem trik nomo long tufala, blong bambae i save laf long tufala, nao tufala i no kam.

15Nao taem i brok delaet, tufala enjel ya i stap tok long Lot blong traem mekem hem i hareap. Tufala i talem se, “!Yu kwik! Yu tekem woman blong yu wetem tufala dota ya blong yu, yufala evriwan i aot. Sipos no, taem mitufala i spolem taon ya, bambae yufala i lus ya.” 16#2 Pita 2.7Be Lot i stap tektaem, nao Hae God i gat sore long hem, mo tufala enjel ya i holem han blong hem wetem woman blong hem mo tufala dota blong hem, nao tufala i lidim olgeta oli goaot long taon. 17Nao wan long tufala ya i talem long olgeta se, “!Yufala i resis! !Sipos no, bambae yufala i lus ya! !Yufala i no lukbak long ples ya! Yufala i resis i go antap long hil ya, mo bambae yufala i no spel, gogo yufala i aot long levelples ya daon, yufala i go antap long hem. Long fasin ya nomo bambae yufala i save laef. !Sipos no, bambae yufala i ded ya!”

18-19Be Lot i talem se, “No Masta, be ol hil ya oli longwe tumas. Plis yu no mekem mifala olsem. Mi save we yu yu kaen tumas long mi, yu sevem laef blong mi finis, be sipos mi mas resis blong go antap long hil ya, bigfala trabol ya bambae i kasem mi long hafrod ya, nao bambae mi no gotru antap long hil, bambae mi ded fastaem. 20?Yu luk vilej ya we i stap? Hem i klosap nomo, mi save go kasem. Plis yu letem mi mi go stap long hem. Yu luk, hem i wan smol vilej nomo, mo bambae mi save stap gud long hem.”

21Nao enjel ya i talem se, “Ale, i gud nomo. Bambae mi no spolem vilej ya. 22!Be hareap, a! !Yu resis! Bambae mi no save mekem wan samting, gogo yu gotru long hem.”

Nao from we Lot i talem se vilej ya i smol nomo, oli putum nem blong hem se Joa.#19.22: Joa. Long lanwis ya Hibru, nem ya klosap i olsem wan narafala tok we i min se “Smol”.

Hae God i spolem tufala taon ya Sodom mo Gomora

23Nao taem Lot i kamtru long vilej ya Joa, san i stap kam antap. 24#Mat 10.15; 11.23,24; Luk 10.12; 17.29; 2 Pita 2.6; Jud 1.7Mo wantaem nomo, Hae God i mekem salfa* we i laet i aot long skae, i folfoldaon olsem ren long tufala taon ya Sodom mo Gomora. 25Long fasin ya, hem i spolemgud tufala taon ya, wetem olgeta narafala ples long bigfala levelples ya daon we tufala taon ya i stap long hem. Mo i spolem tu olgeta man blong ples ya, wetem olgeta samting we i stap gru long hem. 26#Luk 17.32Be long taem ya, woman blong Lot i lukbak long ol samting ya, nao sol i stap folfoldaon i kavremap hem, mo bodi blong hem i kam strong, i stap stanap olsem ston.

27Nao long nekis dei, long eli moning, Ebraham i resis i go long ples ya we i bin toktok wetem Hae God long hem, 28nao i lukluk i godaon long tufala taon ya Sodom mo Gomora, mo ol ples raonabaot long tufala. Nao i luk we olbaot long ples ya, smok blong bigfala faea ya i stap go antap, we i bigwan we i bigwan, i bitim mak olgeta. 29Be taem Hae God i spolem tufala taon blong bigfala levelples ya daon we Lot i stap long hem, hem i stap tingbaot Ebraham, nao i letem Lot i ronwe, i go stap long wan sef ples.

Stamba blong ol man Moab mo ol man Amon

30Nao Lot i fraet blong stap long vilej ya Joa, mo from samting ya, hem wetem tufala dota blong hem, trifala i aot long ples ya, trifala i go antap long hil, trifala i go stap long wan hol blong ston. 31Nao wan taem, fasbon long tufala gel ya i talem long sista blong hem se, “Papa blong yumitufala i olfala, mo i no moa gat man long wol ya we i save kam mared long yumitu, blong yumitufala i bonem pikinini. 32I gud yumitufala i givim plante waen long hem, nao wan long yumitufala i go slip wetem hem. Long fasin ya, bambae yumitufala i save bonem pikinini blong holem nem blong hem.” 33Nao long naet ya, tufala i stap givim waen long hem gogo hem i drong, nao fasbon i go slip wetem hem. Be olfala ya i drong tumas, i no save samting ya we i mekem.

34Nao long nekis dei, fasbon ya i talem long sista blong hem se, “Las naet, mi mi slip wetem hem. Bambae yumitufala i mekem hem i drong bakegen long naet ya, nao bambae yu tu yu save slip wetem hem. Long fasin ya, bambae yumitufala i karem pikinini blong holem nem blong hem.” 35Nao long naet ya, tufala i mekem hem i drong bakegen, nao sekenbon i go slip wetem hem. Be bakegen, olfala i drong tumas, i no save samting ya we i mekem. 36Nao long fasin ya, tufala gel ya i gat bel long papa blong tufala nomo. 37Nao fasbon i bonem wan pikinini boe blong hem, mo i putum nem blong hem se Moab#19.37: Moab. Long lanwis ya Hibru, nem ya klosap i olsem wan narafala tok we i min se “Blong papa blong mi”., mo ol laen* we oli kamaot biaen long hem oli go stap long wan kantri we biaen oli putum nem blong hem se Moab. 38Mo sekenbon tu i bonem wan pikinini boe blong hem, mo i putum nem blong hem se Benami#19.38: Benami. Long lanwis ya Hibru, nem ya Benami, klosap i olsem wan narafala tok we i min se “Man Amon”. we i min se “Pikinini blong wan famle blong mi”, mo ol laen we oli kamaot biaen long hem oli go stap long wan kantri we biaen oli putum nem blong hem se Amon.

Currently Selected:

Jenesis 19: BBR

Highlight

Copy