Jenesis 14

Ebram i sevem Lot

1Nao long taem ya, i gat ol king blong fo kantri oli kam joen wanples blong go mekem faet. Olgeta ya, i gat King Amrafel blong Babilonia#14.1: Babilonia. Yu luk futnot V long 10.10., mo King Ariok blong Elasara, mo King Kedolaoma blong Elam, mo King Tidal blong Goeim. 2Ol fo king ya oli kam blong mekem faet agens long ol king blong faef taon. Ol king blong faef taon ya, i gat King Bera blong Sodom, mo King Bisaha blong Gomora, mo King Sineab blong Admaha, mo King Semeba blong Jeboeim, mo king blong Bela, we narafala nem blong taon ya, Joa. 3Nao ol faef king ya oli tekem ol soldia blong olgeta, oli kam wanples long bigfala levelples daon long medel blong ol hil, we nem blong hem Sidim. (Naoia, Ded* Si i draonem ples ya finis.)

4Ol faef king ya oli stap twelef yia finis aninit long han blong King Kedolaoma, nao long namba totin yia blong hem, oli girap, oli agens long king ya. 5Ale, long namba fotin yia, king ya wetem tri narafala king ya we oli fren blong hem, mo ol soldia blong olgeta oli kam blong mekem faet long ples ya. Fastaem, oli kam long ples ya Astarot Kenaem, oli mekem faet long ol lariken man ya we ol man oli stap singaot olgeta se ol Refaem,* mo oli winim olgeta. Mo biaen, oli kam long ples ya Ham, oli mekem faet long olgeta ya we ol man oli stap singaot olgeta se ol Susim,* mo oli winim olgeta ya tu. Nao oli kam long bigfala levelples ya Kiriataem, oli mekem faet long olgeta ya we ol man oli stap singaot olgeta se ol Emim,* mo oli winim olgeta long ples ya bakegen. 6Mo oli kam long ples blong hil long kantri ya Edom, mo oli mekem faet long ol laen* blong Hori long ples ya, oli winim olgeta, mo oli ronem olgeta gogo oli kasem ples ya Elparan, long bigfala draeples saed i kam. 7Nao ol fo king ya oli tanemraon, oli kambak long ples ya Kades, we long taem ya, nem blong hem Enmispat. Nao oli holem olgeta graon ya we biaen ol laen blong Amalek oli kam stap long hem, mo oli go long ples ya Hajajontama, oli mekem faet long ol laen blong Amoro* we oli stap long ples ya, mo oli winim olgeta. Nao oli kam blong mekem faet long ol faef king ya.

8Nao ol faef king ya oli tekem ol soldia blong olgeta, oli kam long bigfala levelples ya daon long medel blong ol hil, we nem blong hem Sidim, mo oli mekemrere blong faet. Nao oli mekem faet 9long ol fo king ya. 10Bigfala levelples ya, graon blong hem i narafala, i gat fulap hol i stap olbaot long hem, we oli fulap long kolta, nao taem ol faef king ya oli stat blong lus, oli ronwe long faet, mo king blong Sodom mo king blong Gomora wetem ol soldia blong tufala oli stap folfoldaon long ol hol ya. Be tri narafala king ya wetem ol soldia blong trifala oli ronwe, oli go haed antap long ol hil. 11Nao ol fo king ya oli go insaed long tu taon ya Sodom mo Gomora, oli tekemaot olgeta samting we i stap, wetem ol kakae, nao oli karem evriwan i go. 12Nao long taem ya, man ya Lot we i pikinini blong brata blong Ebram, hem i stap long Sodom, mo olgeta ya oli tekem hem tu i go, wetem olgeta samting blong hem.

13Be wan man long taon ya i aot long han blong olgeta, i ronwe, nao i kam luk Ebram we i wan Hibru,* mo i talemaot olgeta samting ya long hem. Hem i faenem hem long ples blong hem, klosap long ol tri ya we ol man oli stap mekem wosip long olgeta, long graon blong Mamre ya we i laen blong Amoro. Mamre ya wetem tufala brata blong hem Eskol mo Anere, trifala i fren blong Ebram, mo trifala i mekem promes finis blong joen wetem hem long taem blong faet. 14Nao taem Ebram i harem nius we ol fo king ya oli holem Lot, mo oli stap tekem hem i go, hem i singaot olgeta man blong faet long ples ya oli kam wanples, mo oli mekemrere blong go faet. Olgeta ya, namba blong olgeta i kasem tri handred eitin olgeta. Nao oli aot, oli biaen long ol fo king ya olwe, gogo kasem taon ya Dan* long not, we i longwe olgeta. 15Nao long ples ya, Ebram i seraot ol man blong hem long ol kampani, mo long naet, oli go mekem faet long ol enemi ya blong olgeta, nao oli winim olgeta, mo oli ronem olgeta gogo kasem taon ya Hoba, long narasaed Damaskes i go. 16Nao Ebram i tekembak olgeta samting we olgeta ya oli karem i go. Hem i tekembak Lot ya wetem olgeta samting blong hem, mo ol woman, mo ol narafala man we olgeta ya oli stap karem i go, nao i tekem olgeta oli kambak long ples blong hem.

King Melkisedek i blesem Ebram

17Nao taem we Ebram i stap kambak long faet ya we i winim ol fo king ya, king blong Sodom i go blong mekem welkam long hem long bigfala levelples ya long medel blong ol hil, we nem blong hem Sabe. Narafala nem blong ples ya, “Ples blong king.” 18#Hib 7.1-10Nao King Melkisedek, we i king blong taon ya Salem#14.18: Salem. Nem ya, hem i olfala nem blong taon ya Jerusalem fastaem. mo i pris blong God ya we i hae we i hae, hem i kam long ples ya, i givim bred* mo waen long Ebram. 19Nao i blesem hem, i talem se,

“Ebram.

Prea blong mi,

we God ya we i hae we i hae,

we i mekem skae mo graon,

hem bambae i blesem yu.

20Hem nao i mekem

yu yu winim ol enemi blong yu

long faet.

!Yumi presem hem!”

Nao Ebram i tekem olgeta samting ya we hem i tekemaot bakegen long ol fo king ya, i seraot olgeta long ten hif, mo i givim wan hif i go long King Melkisedek ya.

21Nao king blong Sodom i talem long Ebram se, “Ebram. Olgeta samting ya blong mi we yu tekemaot bakegen long ol fo king ya, yu holem oli blong yu. Ol man blong mi nomo, mi wantem oli kambak long mi.”

22Be Ebram i talem long hem se, “King. Long fes blong Hae God we i hae we i hae, we i mekem skae mo graon, mi mi mekem wan strong tok finis long nem blong hem, 23se bambae mi no save holem wan samting nating we i blong yu. Nating we strap nomo blong olfala sandel blong yu, be bambae i mas gobak long yu bakegen, blong bambae yu no save talem samtaem, se yu yu mekem mi mi kam rijman. 24Mi bambae mi no save tekemaot wan samting nating long olgeta samting ya we mi tekem i kambak se i blong mi. Ol kakae ya we ol man blong mi oli kakae finis, hemia nomo mi mi glad long hem. Be trifala fren ya blong mi, Anere, mo Eskol, mo Mamre, we trifala i joen wetem mi long faet, i gud yu letem trifala ya i tekemaot haf blong ol samting ya we i blong trifala.”

Currently Selected:

Jenesis 14: BBR

Highlight

Copy