Wok 16
16
Timoti i biaen long Pol mo Saelas
1Nao Pol i wokbaot bakegen, i go long Debe mo Listra. Nao long ples ya, i gat wan man blong Jisas, we nem blong hem Timoti. Mama blong hem i wan laen* blong Isrel*, we hem tu i bilif long Jisas, be papa blong hem i wan man Gris. 2Ol brata blong yumi long Listra mo Ikoniam oli stap talem se Timoti i wan gudfala man. 3Nao Pol i wantem tekem Timoti i go wetem hem, nao hem i mekem sakomsaes* long hem. Hem i mekem olsem blong i no mekem trabol long ol laen blong Isrel long ol ples ya, from we oli save we papa blong Timoti i wan man Gris. 4Nao taem trifala ya i gotru long ol taon, trifala i stap talemaot long ol man blong Jisas, ol rul ya we ol aposol mo ol elda* long Jerusalem* oli putum. Mo trifala i stap tijim olgeta, se oli mas holem ol rul ya. 5Nao long fasin ya, olgeta man long jos long evri ples oli stap kam strong moa long bilif blong olgeta. Mo evri dei, namba blong olgeta i stap kam antap moa.
Pol i luk wan vison
6Nao trifala ya i gotru long ol ples long Frijia mo Galesia, from we Tabu Spirit i no letem trifala i go long provins ya Esia* blong talemaot tok ya long ol ples ya. 7Nao taem trifala i kam long mak blong distrik ya Misia wetem provins ya Bitinia, trifala i wantem go long Bitinia. Be Spirit blong Jisas i no letem trifala i go. 8Nao trifala i wokbaot i gotru long Misia, nao trifala i godaon long wan taon, nem blong hem Troas. 9Nao long naet ya, Pol i luk wan vison*. Hem i luk olsem we wan man Masedonia i stap stanap, i stap askem strong long hem se, “Plis yu kamkros long Masedonia, yu givhan long mifala.” 10Taem Pol i luk samting ya finis, wantem nomo mifala i stat putumrere ol samting blong mifala, blong mifala i aot blong go long Masedonia, from we mifala i haremsave se God i singaot mifala, blong talemaot gud nius blong Jisas long ol man blong ples ya.
Olgeta oli kam long Filipae mo Lidia i bilif long Jisas
11Nao mifala i tekem wan sip, mifala i aot long Troas, mifala i gokros wantaem long aelan ya Samotres. Mo long nekis dei, mifala i go kasem provins ya Masedonia, mifala i goso long Neapolis. 12Nao mifala i aot long ples ya, mifala i wokbaot i go kasem taon ya Filipae, we i stap long fas distrik blong Masedonia.#16.12: Provins ya Masedonia i gat fo distrik long hem. Mo ol man blong taon ya oli sitisen blong Rom. Nao mifala i stap smol taem long ples ya. 13Mo long Sabat* dei, mifala i kamaot long taon ya, mifala i godaon long wan wota, from we mifala i harem se i gat wan ples klosap long wota ya, we ol laen blong Isrel oli stap go long hem blong prea. Nao mifala i sidaon, mifala i stap stori wetem ol woman we oli kam finis long ples ya. 14Nao i gat wan woman i stap lesin long mifala, we hem i woman Tuatira, nem blong hem Lidia. Hem i gat stoa blong hem blong salem kaliko ya we i pepol we oltaem praes blong kaliko olsem i antap we i antap. Woman ya, oltaem hem i stap mekem wosip long God, nao Masta* blong yumi i openem tingting blong hem blong i bilif long tok blong Pol. 15Nao hem wetem ol famle blong hem mo ol man blong wok blong hem oli baptaes. Nao hem i talem long mifala se, “Sipos yufala i save se mi mi bilif tru long Masta blong yumi, i gud yufala i kam stap long haos blong mi.” Hem i strong long mifala, nao mifala i go long haos blong hem.
Pol mo Saelas, tufala i kalabus long Filipae
16Nao wan taem, taem mifala i stap go long ples ya blong prea, wan gel we i stap wok slef* i faenem mifala long rod. Gel ya i gat devel i stap long hem, we i stap soemaot long hem ol samting we bambae i save kamtru. Gel ya i stap winim plante mane blong ol masta blong hem, from we ol man oli stap pem olgeta blong harem tok blong hem. 17Nao hem i stap wokbaot biaen long mifala wetem Pol, i stap singaot bigwan, i talem se, “Ol man ya oli man blong wok blong God ya we i hae we i hae. Oli stap talemaot rod long yufala, blong God i sevem yufala.”
18Hem i stap mekem olsem long plante dei, gogo wan dei Pol i harem nogud tumas from. Nao hem i tanemraon, i tok long devel we i stap long gel ya, i talem se, “Long nem blong Jisas Kraes, mi mi talem long yu, yu kamaot long gel ya.” Nao wantaem nomo, devel ya i kamaot long gel ya.
19Nao taem ol masta blong hem oli luksave we oli lusum rod blong olgeta finis blong winim mane long gel ya, oli harem nogud. Nao oli holem Pol mo Saelas, oli tekem tufala i go stanap long ples blong mekem kot, long open ples long taon ya. 20Nao oli mekem tufala i stanap long fes blong tufala man Rom we tufala i man blong jajem man, nao oli talem se, “Tufala ya i laen blong Isrel. Tufala i stap mekem tumas trabol long ples blong yumi. 21Tufala i stap talem se yumi mas folem ol narafala fasin, be ol fasin ya oli no stret long loa blong yumi. Yumi sitisen blong Rom, yumi no save mekem olsem.” 22Nao olgeta man long ples ya oli joen wetem olgeta, oli agensem tufala.
Nao tufala jaj ya, tufala i talem long ol soldia blong oli tekemaot ol klos blong tufala, oli wipim tufala. 23Nao olgeta oli wipim tufala plante taem, mo biaen, oli putum tufala long kalabus. Mo oli talem long man blong lukaot long kalabus se, “Yu yu mas lukaot gud long tufala ya.” 24Taem man blong lukaot long kalabus i harem tok ya, hem i tekem tufala i go long wan rum we i insaed olgeta, nao i lokem leg blong tufala long wan wud we i olsem bigfala hankaf.
God i tekemaot Pol mo Saelas long kalabus mo man blong lukaot long kalabus i bilif long Jisas
25Nao long medel naet, Pol mo Saelas, tufala i stap prea, mo tufala i stap singsing long ol sing blong presem God, mo ol narafala man long kalabus oli stap lesin long tufala. 26Nao wantaem nomo, graon i seksek bigwan i mekem haos kalabus ya i seksek gud, evri samting i go olbaot. Wantaem nomo, olgeta doa oli open, mo olgeta jen blong fasem ol man, oli kamaot long olgeta, oli foldaon. 27Man ya blong lukaot long kalabus i wekap, nao taem hem i luk we olgeta doa blong kalabus i open, hem i ting se olgeta man long kalabus oli ronwe finis. Nao hem i tekem naef blong hem, i wantem stikim hem i ded. 28Be Pol i singaot bigwan, i talem se, “!Ei! !Yu no spolem yu! Mifala evriwan i stap yet.”
29Nao man ya i singaot blong wan man i karem laet i kam, nao hem i resis i go insaed, i foldaon long leg blong Pol mo Saelas, we i seksek tumas. 30Nao hem i lidim tufala i go afsaed, i askem long tufala se, “!E, tufala! ?Bambae mi mi mekem olsem wanem blong God i sevem mi?” 31Nao tufala i talem long hem se, “Yu mas bilif long Jisas ya we i Masta* blong mifala, nao God bambae i sevem yu, mo ol famle blong yu tu.” 32Nao tufala i talemaot tok blong Masta blong yumi long hem, wetem olgeta man long haos blong hem. 33I bitim medel naet finis, be semtaem nomo, man ya i tekem tufala, i wasem ol trak blong wip long bodi blong tufala. Mo wantaem nomo, hem wetem ol famle blong hem mo ol man blong wok blong hem oli baptaes. 34Nao hem i tekem Pol mo Saelas, i go antap long haos blong hem, i givim kakae long tufala. Mo hem wetem olgeta man long haos blong hem oli harem gud tumas, from we oli bilif long God.
35Taem i brok delaet finis, tufala jaj ya i talem long ol polis se, “Yufala i go letem tufala man ya i gofri.”
36Nao man ya blong lukaot long kalabus i talem long Pol se, “Tufala jaj ya i talem se mifala i mas letem yutufala i gofri. Yutufala i fri nao, yutufala i save go, we tingting blong yutufala i stap gud.”
37Be Pol i talem long ol polis ya se, “?Ei, be wanem ya? Mitufala i sitisen blong Rom. Mo tufala jaj ya i no faenem wan samting we mitufala i mekem we i rong. Be long fes blong ol man olgeta oli wipim mitufala finis. Mo oli sakem mitufala long kalabus. Mo naoia tufala i wantem tekemaot mitufala long fasin blong haed. !Nogat! Tufala ya i mas kam long ples ya, mo tufala nomo i mas tekemaot mitufala.”
38Nao ol polis ya oli go talemaot tok ya long tufala jaj ya, mo taem tufala i harem we Pol mo Saelas, tufala i sitisen blong Rom, tufala i fraet tumas. 39Nao tufala i go talem sore long Pol mo Saelas, mo biaen, tufala i lidim tufala i goaot long kalabus. Nao tufala jaj ya i talemgud long tufala blong tufala i save aot long taon ya.
40Nao Pol mo Saelas, tufala i aot long kalabus, tufala i go long haos blong Lidia. Long ples ya, tufala i faenem ol brata mo ol sista blong yumi, nao tufala i toktok lelebet long olgeta blong leftemap tingting blong olgeta, mo biaen, tufala i aot.
Currently Selected:
Wok 16: BBR
Highlight
Share
Copy
Want to have your highlights saved across all your devices? Sign up or sign in
Bislama Revised Bible © Bible Society of the South Pacific, 2012.
