Ma̱rkut 16

Yesu Doot ma̱ng Swuan ma̱ Á̱niet ba̱ ka̱n Kwi a̱ni

(Mat 28:1-8; Luk 24:1-12; Yon 20:1-10)

1Nang a̱tuk Mam Fwung A̱yahudawa ka nswak a̱ni, Ma̱ryamu Ma̱ga̱daliya, ma̱ng Ma̱ryamu a̱yang Yakubu, ma̱ng Sa̱lomi, si̱ nat ba̱ si̱si̱ san turare niat nkwom, da̱nian ba̱ nat ba̱ ka nkwon di̱ kwom Yesu hu. 2Ma̱ a̱tsotson a̱tson a̱tuk Ladi ka, cha̱chaat nang a̱nu mam ka ghwut; ba̱ si̱ nat da̱ a̱vwuo a̱bi ka nang á̱ lung da̱ a̱fang a̱ni. 3A̱wot ba̱ si̱ lyip á̱ghyang mba, “A̱nyan wa na yuut zi̱t a̱fang ka, a̱ ghwon a̱nu a̱bi ka?”

4A̱wot nang ba̱ ntat kpa̱mkpaan a̱ni, ba̱ si̱ kin di nang á̱ wa ka̱n gyuut a̱fang ka á̱ sak da̱ gbang a̱nyiung! (A̱fang ka ku yet a̱gba̱ndang wa ba̱t).

5Nang ba̱ nnwuo mami lyak ka a̱ni, ba̱ si̱ li nggwon seam#16:5 Wa̱i a̱lyiat: Nggwon seam Á̱ kyiak nggwon seam kani nang a̱ta̱m tswa A̱gwaza mi̱ Mat 28:2 ma̱ng Luk 24:4. a̱ghyang, ka swan a̱zayak, ka̱ kup a̱junjung a̱sai a̱toot. A̱wot ba̱ si̱ ta̱dyuut.

6A̱wot ka̱ si̱ nyia̱ ma̱ng a̱mba, “Nyi yok fa̱k a̱wun bah! Nyi chat Yesu a̱tyu Na̱za̱ra̱t wa; nang á̱ ku kpang da̱ a̱team a̱khwu wu a̱ni. A̱ nshya̱ bah! A̱ wa ka̱n doot ma̱ng swuan ma̱ á̱niet ba̱ ka̱n kwi a̱ni! Nyi li a̱vwuo ka nang á̱ ku myiai kwom nggu hu a̱ni! 7A̱wot nyi nat, nyi si̱ hyia̱ ma̱ng mman ta̱m nggu na ma̱ng Bitut nyia̱, ‘Yesu kyiak a̱son nyin a̱ naat fam a̱byin Ga̱lili. Nyi na li nggu a̱ja, ma̱nang gu ku nhyia̱ ma̱ng a̱nyin a̱ sii du khwu a̱ni.’ ”

8Á̱nyiuk a̱bya si̱ ghwut mi̱ lyak hu di̱n chung, mat ba̱ ku tyi̱ri̱m vam ba̱ si̱ tyia̱ tai. Ba̱ si̱ kaat kyang ma̱ng a̱yin bah, mat ba̱ ku fa̱k a̱wun ba̱t.

Yesu Tyai A̱pyia̱ nggu Kpa̱sai da̱ a̱vwuo Ma̱ryamu Ma̱ga̱daliya

(Mat 28:9-10; Yon 20:11-18)

9 # 16:9-20 Ma̱ a̱da̱dei zwunzwuo a̱kubunyiung nat nswak nfeang (9-20) nshya̱ mi̱ lyuut nang á̱ ntsa lyuut hu a̱ni bah. [[A̱wot nang Yesu ku ndoot ma̱ng swuan ma̱ a̱tsotson a̱tson a̱tuk Ladi ka ma̱ á̱niet ba̱ ka̱n kwi a̱ni; a̱ sii ya ntyai a̱pyia̱ nggu kpa̱sai da̱ a̱vwuo Ma̱ryamu Ma̱ga̱daliya, a̱byii̱k wu nang gu ku kam á̱ka̱tuk ntswá a̱natat ba̱ si̱ ghwut ma̱ a̱nggu a̱ni.

10Nggu a̱byii̱k a̱wa si̱ nat a̱ si̱ shya̱ mman ta̱m Yesu na nang ba̱ shya̱ ma̱ng byian fwuo á̱ tsa á̱ bu nkhwot á̱ghyi. A̱ si̱ hyia̱ ma̱ng a̱mba kyang ku bai a̱ni.#16:10 Á̱ bu mbyia̱ lyuut ngaan feang ku yet a̱da̱dei zwunzwuo a̱kubunyiung ma̱ng swak a̱ni. Ma̱r 16:9. Bachyuang zwunzwuo a̱feang nani tak nyia̱: (9) “A̱mgba̱m nkyang nang nggwon seam ka ku tak á̱nyiuk ba a̱ni, á̱nyiuk ba meang ba̱ si̱ tak mman ta̱m na ma̱ng Bitut. (10) Á̱ si̱ labeang bah, Yesu ma̱ a̱pyia̱ nggu si̱ ta̱m mman ta̱m nggu na di̱ fam a̱tyin ma̱ng jenshyung, ba̱ shei A̱za̱za̱rak A̱sham Nkhang da̱ ka̱ na tyak a̱ni bah, tazwa swuan sang sangba̱p ji.” 11A̱wot nang gu ntak ma̱ng a̱mba nang Yesu nshya̱ ma̱ng swuan, a̱wot nggu ma̱ a̱pyia̱ gu si̱ li nggu a̱ni; ba̱ si̱ nwuak a̱chuchuk di̱ kyang gu lyiat a̱ni bah.

Yesu Tyai A̱pyia̱ nggu Kpa̱sai da̱ a̱vwuo Mman ta̱m A̱feang

(Luk 24:13-35)

12Nang si̱ a̱hwa nswak a̱ni, Yesu si̱ shyak li nggu hu. A̱wot a̱ si̱ tyai a̱pyia̱ nggu kpa̱sai da̱ a̱vwuo mman ta̱m nggu na a̱feang, nang ba̱ shya̱ di̱n vak neet Urusha̱lima á̱ naat a̱keang á̱ghyang#16:12 Luk 24:15.. 13A̱wot mman ta̱m a̱feang a̱nia si̱ nat ma a̱nggang, ba̱ si̱si̱ hyia̱ ma̱ng á̱kum mman ta̱m ka. A̱mgba̱m ma̱ng a̱nia, mba mameang ba̱ si̱ nwuak a̱chuchuk da̱ mman ta̱m a̱feang a̱nia bah.

Yesu Nwuak Mman Nta̱m nggu na A̱gba̱ndang Ta̱m Shei A̱sham Nkhang

(Mat 28:16-20; Luk 24:36-49; Yon 20:19-23)

14Á̱ si̱ labeang bah, Yesu si̱ bu tyai a̱pyia̱ nggu kpa̱sai da̱ a̱vwuo mman ta̱m swak ma̱ a̱nyiung na nang ba̱ shya̱ di̱ ya kyayak. A̱ si̱ gba mba mat nwai nwuak a̱chuchuk ma̱ng gba̱p á̱pyia̱ mba hu. Mat, ba̱ ku lak nwuak a̱chuchuk da̱ á̱niet ba ba̱ ku hyia̱ ma̱ng a̱mba nyia̱, a̱ doot ma̱ng swuan ma̱ á̱niet ba̱ ka̱n kwi a̱ni.

15A̱jawa gu si̱ nyia̱ ma̱ng a̱mba, “Nyi nat mi̱ swanta hu a̱mgba̱m. Nyi shei konyan A̱sham Nkhang ka. 16Konyan wa nwuak fwuo da̱ nung, a̱wot á̱ si̱ nyia̱ nggu ba̱ptisman, a̱ na shya̱ san. A̱wot konyan wa ma ndak nwuak fwuo da̱ nung, á̱ na faat gu shi̱ri̱ya a̱khwu.

17“A̱wot á̱niet ba ba̱ nwuak fwuo da̱ nung a̱ni, ba̱ na nyia̱ nkyang a̱ri̱bi̱di nani. Ni̱nia yet: Ba̱ na khai á̱ka̱tuk ntswá mami a̱lyoot nung nang ba̱ ghwut ma̱ á̱niet; a̱wot A̱za̱za̱rak Ntswa wu na nwuak ba chet ba̱ lyiat di̱ lilyem fai ku yet si̱ nggu a̱ni. 18Ka̱ ba̱ kwok zwák ma̱ng mbwak da̱ mi̱ lyen, ji̱ na map ba bah. Ka̱ ba̱ swuo a̱ka̱tuk kan di̱ mi̱ lyen, kyang na shya̱ mba bah. A̱wot ka̱ ba̱ saai á̱niet nzwán mbwak, á̱niet nzwán ba na choot.”

Yesu Bwuok a̱ Nat Ma A̱gwaza Tswazwa

(Luk 24:50-53)

19Nang A̱tyoli Yesu ntyak lyiat ma̱ng mman ta̱m nggu na a̱ni, á̱ si̱ kyiak gu á̱ nat ndyo Ma A̱gwaza tswazwa; a̱ si̱si̱ swan da̱ a̱vwuo shi a̱zayak A̱gwaza. 20Mman ta̱m nggu na mameang, si̱ doot ba̱ si̱ chong á̱ shei A̱sham Nkhang A̱gwaza ka kuzang a̱vwuo. A̱gwaza wu si̱ nyia̱ ta̱m dundung ma̱ng a̱mba. A̱ si̱ li̱n a̱ma nkyang ba̱ lyiat a̱ni ma̱ng nkyang a̱ri̱bi̱di ma̱ a̱di̱di̱t.]]

Currently Selected:

Ma̱rkut 16: TyapNT

Highlight

Copy