Luka 1

Á̱son A̱lyiat

1Á̱niet ma̱ a̱di̱di̱t ka̱n kwan ba̱ lyuut a̱mgba̱m nkhang nang ba̱ tung tazwa nkyang nani, nang A̱gwaza tyia̱ na̱ si̱ bai da̱ a̱nu ka ma̱ nzi̱t a̱ni. 2Ba̱ ku nyia̱ ta̱m ma̱ng nkhang nang á̱khwo shei a̱lyiat A̱gwaza ba#1:2 Wa̱i a̱lyiat: Á̱khwo a̱lyiat A̱gwaza ba. Ku fa: “A̱yaata̱m Yesu ba.” ba̱ ku tsa fa̱k, ba̱ si̱ li ma̱ng á̱ghyi mba ba, a̱wot ba̱ si̱ tak ma̱ng a̱nzi̱t a̱ni. 3A̱tyoli Tiyofulut, nung mameang, n di ku myim n ta̱bam n zop kuzang nkyang tazwa Yesu, neet di̱n jen nang nkhang nani ntsa a̱ni. Da̱nian n ka ndyuut ang naa, n bu nta̱bam n fang ang naa ma̱nang na̱ ndi cha̱chaat a̱ni. 4Da̱nian a ka lyen za̱m nang kuzang kyang á̱ ku tyiet ang a̱ni, ku yet a̱tsak a̱lyiat wa.

Á̱ Tak Byin Yoona A̱tyu Nyia̱ Ba̱ptisman

5Di̱n jen nang a̱gwam Hiridut ku ngya tyok tazwa a̱byin Yahudiya ka a̱ni, pris A̱yahudawa a̱ghyang ku nshya̱ á̱ si̱ ngyei Za̱ka̱riya. A̱ ku neet mi̱ tangka̱i sot pris A̱biya. Á̱ si̱ ngyei a̱byii̱k nggu wu A̱li̱sa̱ba̱tu. Nggu meang, a̱ ku yet a̱nyiung mi̱ mman á̱nap sot pris Haruna nia. 6Mba a̱feang si̱ yet á̱niet nyia̱ tsotswat bya a̱zaghyi A̱gwaza. Ba̱ si̱ ta̱bam á̱ khwi a̱mgba̱m doká ma̱ng nkyang nang A̱gwaza chat a̱ni, di̱ ma̱ a̱bun. 7A̱mgba̱m ma̱ng a̱nia, ba̱ ku byia̱ nggwon bah, mat A̱li̱sa̱ba̱tu ku yet a̱na̱khwu wa. A̱wot ba̱ si̱ bu kwop ba̱t.

8Á̱ghyang á̱tuk, nang Za̱ka̱riya wa shya̱ di̱ nyia̱ ta̱m pris hu A̱mali Nwuat Za̱nang A̱gwaza ka, mat sot pris nggu ji ja ku byia̱ ta̱m hu mi̱ sati a̱hwa. 9Ma̱nang taada nta̱m a̱yaapris ji ndi a̱ni, á̱ si̱ koot tswak ji̱ tak nang Za̱ka̱riya wa á̱ nkhai gu nwuo A̱swang ka̱ yet A̱za̱za̱rak A̱vwuo mami A̱li Nwuat Za̱nang A̱gwaza ka a̱ni, gu ka fwui za̱nang turare ji. 10A̱wot nang a̱gba̱ndang á̱kpa á̱niet shya̱ a̱ta̱usa á̱ naai A̱gwaza, di̱n jen nang Za̱ka̱riya ku nfwui za̱nang turare ji a̱ni.

11Jen ji nang Za̱ka̱riya nshya̱ ma̱ A̱swang ka̱ yet A̱za̱za̱rak wu a̱ni, a̱ta̱m tswa A̱gwaza si̱ kin tyia̱ ma̱ pwut a̱ ghwut, a̱ yong a̱zayak a̱tyii fwui za̱nang turare wu a̱zaghyi Za̱ka̱riya! 12Nang Za̱ka̱riya ndi a̱ta̱m tswa wu a̱ni, Za̱ka̱riya si̱ ta̱dyuut. A̱wun si̱ ta̱bat gu ba̱t. 13A̱ta̱m tswa wu si̱ nyia̱ ma̱ng a̱nggu,

“Za̱ka̱riya, yok fa̱k a̱wun bah.

A̱gwaza fa̱k naai ang hu.

A̱li̱sa̱ba̱tu a̱byii̱k ang wu na byin nggwon.

A na tyia̱ nka a̱lyoot Yoona.

14Nyi na byia̱ a̱gwai ma̱ng a̱lyia̱ sai.

A̱wot á̱niet ma̱ a̱di̱di̱t na fa̱k nyinyang ba̱t,

mat byin Yoona hu.

15Mat a̱ na byia̱ shi a̱zaghyi A̱gwaza.

Á̱ na shim gu niaat

ku a̱ swuo a̱sa̱khwot a̱na̱p,

ku nkyang nhyeng njhyang bah.

A̱za̱za̱rak Ntswa na tyia̱ gu chet,

neet nang gu ni̱ shya̱ ma̱ a̱fa a̱yang nggu ka#1:15 Ku: “Neet di̱ mbyin.”.

16A̱wot a̱ na bwuok ma̱ng á̱niet Isi̱rela ma̱ a̱di̱di̱t,

a̱ bai ndyo da̱ a̱vwuo A̱gwaza nyin wu,

a̱ bu yet A̱tyoli nyin wu a̱ni.

17A̱ na yet a̱tyu a̱ byia̱ tangka̱i za̱kwa#1:17 Lyuut cha̱chaat: “Tswa.”

ma̱ng chet nang Iliya,

a̱ta̱m a̱kwonu A̱gwaza gbangbang ku byia̱ a̱ni.

A̱ na khwat a̱son A̱tyoli.

A̱ bu jhyi nfwuo á̱niet na

ba̱ swan á̱ fwuong A̱tyoli wu a̱ni.

A̱ na bwuak nfwuo a̱yaatyia̱

na̱ nat di̱ mman mba na.

A̱wot a̱ na tyia̱ á̱niet ba̱ tyia̱ zat a̱ni,

ba̱ shya̱ mumwang nang

á̱tsotswat á̱niet A̱gwaza a̱ni.”

18Za̱ka̱riya si̱ lyip a̱ta̱m tswa A̱gwaza wu nyia̱, “N na nyia̱ ni n dyen ka̱ a̱nia wa ku na ndi? Mat nung ma̱ng a̱byii̱k nung wu, zi̱ wa ka̱n kwop.”

19A̱jawa A̱ta̱m tswa A̱gwaza wu si̱ nyia̱, “Nung gwa n gyet Jibi̱ra̱ilu, n ni̱ gyong a̱zaghyi A̱gwaza a̱ni! Nggu wa ku ta̱m nung n tak ang A̱sham Nkhang kani. 20A̱wot ma̱ninika, nang a ndak nwuak a̱chuchuk da̱ a̱lyiat nang n tak ang a̱ni; fa̱k la! A na tyia̱ nywang. Da̱ nwan a na lyiat bah, si̱ a̱tuk nang á̱ mbyin nggwon ka a̱ni. Mat a̱lyiat nung na na bai cha̱chaat da̱ a̱nu ka, da̱ a̱tsatsak njen wu.”

21Nang á̱kpa á̱niet ka ngyong a̱ta̱usa á̱ fwuong Za̱ka̱riya a̱ ghwut ma̱ A̱swang ka̱ yet A̱za̱za̱rak a̱ni; ba̱ si̱ fa̱k a̱ga̱de di̱ si̱sak nang gu ndabeang mami A̱li Nwuat Za̱nang A̱gwaza ka a̱nia a̱ni. 22Nang gu mang a̱ ba̱ nghwut a̱ni, a̱lyiat na si̱ kaat nggu ma̱ng a̱mba. A̱jawa ba̱ si̱ ndyen nang gu ndi a̱ma̱bwoi nia, ma̱ A̱swang ka̱ yet A̱za̱za̱rak a̱ni. Mat a̱ ku nwuo lyiat ma̱ng a̱mba ma̱ng bwak.

23Nang sati hu Za̱ka̱riya na nnyia̱ ta̱m mami A̱li Nwuat Za̱nang A̱gwaza ka nswak a̱ni, a̱ si̱ bwuok a̱ nat a̱mali. 24Á̱ si̱ labeang bah, A̱li̱sa̱ba̱tu, a̱byii̱k Za̱ka̱riya wu si̱ shya̱ a̱fa. A̱ si̱ nyia̱ zwát tsuon nang gu ghwut nta bah. 25A̱li̱sa̱ba̱tu si̱ nyia̱, “A̱gwaza wa fa̱k shok nung, a̱ si̱ ti̱n nung nsum sang mman mami á̱niet!”

A̱ta̱m Tswa A̱gwaza Tak Á̱zanson tazwa Byin Yesu

26Nang A̱li̱sa̱ba̱tu nshya̱ ma̱ng a̱fa ka̱ yet zwat a̱taa a̱ni, A̱gwaza si̱ ta̱m Jibi̱ra̱ilu, a̱ta̱m tswa nggu wu ma̱ a̱keang a̱ghyang á̱ ngyei Na̱za̱ra̱t, ka̱ shya̱ mi̱ fam a̱byin Ga̱lili. 27A̱gwaza si̱ ta̱m nggu da̱ a̱vwuo nggwon neam a̱ghyang, ka̱ ka̱n nwai lyen a̱tyok a̱ni, á̱ ngyei nka Ma̱ryamu. A̱ ku byia̱ a̱sak nang ba̱ la̱p ba̱ na nyia̱ nyeang a̱ni. Á̱ si̱ ngyei nggu Isuu, a̱ ku neet mi̱ kwai a̱gwam Da̱wuda ja. 28Jibi̱ra̱ilu si̱ nat da̱ a̱vwuo Ma̱ryamu, a̱ si̱ nyia̱, “N byiat ang! A̱gwaza fa̱k shok ang, a̱ si̱ shya̱ dundung ma̱ng a̱nwan!#1:28 Lyuut ghyang mbyia̱: “Nwan wa swak ma̱ng a̱li̱ba̱rka mami a̱mgba̱m á̱nyiuk!” Luk 1:42.”

29Ma̱ryamu si̱ tyia̱ ma̱ a̱tai, a̱ si̱ fa̱k a̱ga̱de mat a̱lyiat a̱nia. A̱ si̱ nyia̱ a̱di̱dam di̱ kyang nang tangka̱i byat huni fa a̱ni. 30A̱ta̱m tswa wu si̱ bu nyia̱ ma̱ng a̱nggu a̱ni,

“Ma̱ryamu, yok fa̱k a̱wun bah!

A̱gwaza wa ka̱n fa̱k shok ang!

31A na shya̱ a̱fa, a byin nggwon a̱sam.

A̱wot a na ngyei nka Yesu.#1:31 Mat 1:21.

32Ka̱ na yet a̱tsatsak a̱gba̱ndang a̱yin.

Á̱ bu ngyei nka Nggwon A̱gwaza

a̱ Swak ma̱ng A̱kyenkyai Shi a̱ni.

A̱gwaza a̱ yet A̱tyoli a̱ni,

na nwuak nggwon kani

a̱gba̱ndang chuk tyok a̱gwam Da̱wuda;

a̱ yet a̱tyia̱ a̱khwop nka wu a̱ni.#1:32 2Sa̱m 7:12; 13‒16; Ish 9:7.

33A̱wot ka̱ na nyia̱ tyok tazwa

kwai Yakubu si̱ nat sang sangba̱p.

Tyok nka hu na byia̱ sangba̱p bah!#1:33 Dan 2:44; 7:14,27; Mik 4:7.”

34Ma̱ryamu si̱ nyia̱ ma̱ng a̱ta̱m tswa wu, “Ku na nyia̱ ni ku ndi a̱nia? N gyet nggwon neam kya. Da̱ nung, n ka̱n dyen a̱tyok bah.”

35A̱ta̱m tswa wu si̱ nwuak gu shim nyia̱,

“A̱za̱za̱rak Ntswa wa na chyok da̱ nwan.

A̱wot chet A̱gwaza a̱ Swak ma̱ng A̱kyenkyai Shi a̱ni, na kup ang.

Mat a̱nia, nggwon ka a na byin a̱ni,

ka̱ na yet a̱za̱za̱rak wa.

A̱wot á̱ na ngyei nka Nggwon A̱gwaza.

36“Yok bwung a̱na̱nyiuk ang wu A̱li̱sa̱ba̱tu bah. A̱mgba̱m ma̱ng kwop nggu hu, a̱ shya̱ ma̱ a̱fa; ka̱ yet zwat a̱taa ja ji! A̱li̱sa̱ba̱tu wu, a̱ yet a̱na̱khwu a̱ni, a̱ na byin nggwon. 37Mat á̱ mbyia̱ kyang ku na kaat A̱gwaza nyia̱ a̱ni bah.#1:37 Lyuut ghyang mbyia̱: “A̱lyiat A̱gwaza na kwa̱i a̱byin bah.””

38Ma̱ryamu si̱ nwuak a̱ta̱m tswa A̱gwaza wu shim, nyia̱, “N gyet a̱khwo A̱gwaza wa. Yok kuzang kyang nang a hyia̱ tazwa nung a̱ni, ku bai da̱ a̱nu ka.” A̱jawa a̱ta̱m tswa wu si̱ doot, a̱ si̱ ghwon guu.

Ma̱ryamu Nat Byiat A̱li̱sa̱ba̱tu

39Á̱ si̱ labeang bah, Ma̱ryamu si̱ doot. A̱ si̱ ghan a̱ nat ma̱ a̱keang a̱ghyang, ka̱ shya̱ mi̱ tsutsok mi̱ fam a̱byin Yahudiya; 40a̱keang ka nang Za̱ka̱riya nswan a̱ni. Nang gu nnwuo mali Za̱ka̱riya ka a̱ni, a̱ si̱ byiat A̱li̱sa̱ba̱tu. 41Mi̱ di̱ fa̱k byat Ma̱ryamu hu, nggwon ka ka̱ shya̱ ma̱ a̱fa A̱li̱sa̱ba̱tu ka a̱ni, si̱ kin tyia̱ a̱guguut! A̱wot A̱za̱za̱rak Ntswa wu si̱ kin tyia̱ A̱li̱sa̱ba̱tu chet.

42A̱li̱sa̱ba̱tu si̱ ta̱ngam a̱nwuat ma̱ng a̱gwai mi̱ chet nyia̱, “Ma̱ryamu, A̱gwaza wa ka̱n tyia̱ ang a̱li̱ba̱rka a̱ swak a̱mgba̱m á̱kum á̱nyiuk ka! Ma a̱nia wa nggwon ka nang a na byin a̱ni na nshya̱ a̱li̱ba̱rka! 43Kwot! A̱nyan wa nang n gyet nang a̱yang A̱tyoli nung bai a̱ byiat nung; a̱wot a̱ nwuak nung tangka̱i a̱gba̱ndang shi huni? 44Ma̱ryamu, mi̱ di̱ fa̱k a̱nwuat byat ang ka, nggwon ka̱ shya̱ ma̱ a̱fa nung ka a̱ni; ka̱ si̱ kin tyia̱ a̱guguut mat a̱gwai! 45Ma̱ryamu, a shya̱ a̱li̱ba̱rka mat a nwuak a̱chuchuk nang A̱gwaza na nyia̱ kyang nang gu nyia̱ a̱li̱ka̱uli a̱ni!”

Ma̱ryamu Dyep A̱gwaza ma̱ng A̱bwom

46Ma̱ryamu si̱ bwom nyia̱,

“Fwuo nung hu dyep A̱gwaza!

47A̱wot A̱gwaza a̱ yet A̱tyusan nung a̱ni,

tyia̱ nung a̱gwai!

48Mat a̱ jhyung nung n gyet

a̱khwo nggu a̱ ghyuai a̱pyia̱ a̱ni.

A̱wot kyiak ma̱nini si̱ nat á̱zanson,

a̱mgba̱m nche na na kyiak nung;

n gyet a̱tyu a̱li̱ba̱rka wa.#1:48 1Sa̱m 1:11.

49Mat A̱gwaza a̱ byia̱ a̱mgba̱m chet

a̱ bu yet A̱za̱za̱rak a̱ni,

nyia̱ nung a̱cha̱chet nkyang!

50Kyiak neet di̱ nche si̱ nat nche,

A̱gwaza ni̱ fa̱k kunak á̱niet ba̱ fwuong a̱wun gu a̱ni.

51A̱ nyia̱ a̱cha̱chet nkyang kpa̱sai

ma̱ng chet a̱gba̱ndang bwak nggu hu!

A̱ ni̱ seang a̱di̱dam nfwuo á̱niet ba̱ tam a̱ni.

52A̱ si̱ chyok ma̱ng á̱gwam

di̱ kyang nswat ntyok#1:52 Lyuut cha̱chaat: “A̱cha̱chet chuchuk ntyok.” mba na.

A̱wot a̱ si̱ nwuak á̱niet ba̱ ghyuai á̱pyia̱ mba a̱ni, shi.

53A̱ si̱ tsuung á̱niet ba̱ fwuong zong a̱ni,

ma̱ng a̱chuchuk nkyayak.

A̱wot á̱niet nzwá si̱ bai

a̱ si̱ ghwon mba mbwak nkhwot, ba̱ si̱ nkat.

54A̱gwaza ka̱n beang a̱khwo nggu wu Isi̱rela.

A̱wot a̱ ni̱ jhyung a̱ fa̱k kunak nggu.

55Mat a̱ ku nyia̱ a̱yaatyia̱ a̱khwop nzi̱t ba

a̱li̱ka̱uli wuni ma̱ng shyishyi,

da̱ a̱vwuo Ibrahim ma̱ng mman nggu na,

si̱ nat sang sangba̱p.”

56Ma̱ryamu si̱ nyia̱ zwát tsat nang gu swan ma̱ng A̱li̱sa̱ba̱tu nang á̱nietchen a̱ni, a̱ sii du bwuok a̱ nat a̱mali.

Byin Yoona A̱tyu Nyia̱ Ba̱ptisman

57Nang jen byin nggwon A̱li̱sa̱ba̱tu ji nnyia̱ a̱ni, a̱ si̱ byin nggwon a̱sam. 58A̱wot nang á̱kpa̱ndang swat A̱li̱sa̱ba̱tu ba ma̱ng á̱niet nggu ba nfa̱k nang A̱gwaza nfa̱k kunak gu ba̱t a̱ni; ba̱ si̱ gwai dundung ma̱ng a̱nggu.

59A̱tuk nang nggwon ka nnyia̱ mam a̱ni̱nai di̱ mbyin a̱ni, ba̱ si̱ bai ba̱ tyia̱ nka mi̱ chen. Ba̱ si̱ chat tyia̱ nka a̱lyoot “Za̱ka̱riya,” a̱ yet a̱lyoot a̱tyia̱ nggu wu a̱ni.#1:59 Li̱v 12:3. 60A̱wot A̱li̱sa̱ba̱tu, a̱yang byin nggwon wu si̱ nyia̱, “Kaai! Á̱ na ngyei nka ‘Yoona!’ ”

61Ba̱ si̱ nyia̱ ma̱ng a̱yang byin wu, “Yihwa aa? Á̱ mbyia̱ a̱yin ma̱ á̱niet ang ba, a̱ byia̱ a̱lyoot a̱kya a̱ni bah!”

62Mat a̱nia, ba̱ si̱ lyip Za̱ka̱riya a̱ yet a̱tyia̱ wu a̱ni, di̱ lyiat ma̱ng mbwak, zang a̱lyoot kya gu chat á̱ tyia̱ nggwon ka. 63A̱ si̱ tyia̱ á̱ jong gu a̱kpa̱kpai a̱fang lyuut, a̱ si̱ ndyuut, nyia̱, “Á̱ na gyei nggwon nka ‘Yoona.’ ” Kuzang a̱yin ma̱ mba si̱ fa̱k a̱ga̱de! 64Mi̱ di̱ yong a̱hwa, Za̱ka̱riya si̱ kin nwuo a̱lyiat, a̱ si̱ ta̱bat dyep A̱gwaza!

65A̱wun si̱ ta̱bat á̱kpa̱ndang swat nggu ba. Nkhang nani si̱ kai a̱mgba̱m tsutsok fam a̱byin Yahudiya hu. 66A̱mgba̱m á̱niet ba ba̱ ku fa̱k nkhang na a̱ni, ba̱ si̱ byim mi̱ nfwuo, nyia̱, “Zang tangka̱i a̱yin hwa nang nggwon kani na yet?” Mat, mami a̱chuchuk, chet A̱gwaza shya̱ di̱ nggwon kani da̱ a̱tsatsak nvak.

Za̱ka̱riya Tak Á̱zanson ma̱ng Dyep A̱gwaza

67A̱wot Za̱ka̱riya a̱tyia̱ nggwon wu, A̱za̱za̱rak Ntswa A̱gwaza si̱ tyia̱ gu chet, a̱ si̱ tyai ta̱m A̱gwaza ji kpa̱sai nyia̱,

68“Zi̱ dyep A̱gwaza,

a̱ yet A̱gwaza Isi̱rela wu a̱ni!

Mat a̱ bai,

a̱wot a̱ si̱ san á̱niet nggu ba,

ba̱ yet á̱sa̱t á̱niet.

69A̱wot a̱ si̱ ta̱ngam A̱gwak

a̱ na san nzi̱t a̱ni#1:69 Lyuut cha̱chaat: “A̱kwak ka̱tsak.”.

A̱ neet a̱mali tyok a̱khwo nggu wu Da̱wuda;

70ma̱nang A̱gwaza ku ntyia̱ á̱za̱za̱rak a̱yaata̱m a̱kwonu nggu ba

si̱ nshei a̱li̱ka̱uli nggu wu gbangbang a̱ni.

71Kyiak ma̱nini si̱ nat á̱zanson,

a̱ na san zi̱t mbwak á̱niet lak li nzi̱t ba.

A̱wot a̱ bu san nzi̱t mbwak

a̱mgba̱m á̱niet ba ba̱ lak li nzi̱t a̱ni.

72A̱ni wa#1:72 Ku: “Da̱nian A̱gwaza a̱ ka tak a̱yaatyia̱ a̱khwop nzi̱t ba fa̱k kunak nggu hu.” A̱gwaza nfa̱k kunak a̱yaatyia̱ a̱khwop nzi̱t ba;

mat nang gu njhyung a̱za̱za̱rak

la̱p a̱li̱ka̱uli nggu wu,

73ma̱ng shyishyi nang gu shyi

ma̱ng Ibrahim a̱tyia̱ a̱khwop nzi̱t wu a̱ni.

74A̱gwaza la̱p a̱li̱ka̱uli,

a̱ na san zi̱t mbwak á̱niet lak li nzi̱t ba.

Da̱nian zi̱ ka nyia̱ nggu nta̱m

di̱ mi̱n fa̱k a̱wun,

75mami a̱za̱za̱rak nswat ma̱ng nyia̱ tsotswat a̱zaghyi A̱gwaza

si̱ nat a̱mgba̱m swat nzi̱t wu mi̱ swanta hu.

76A̱wot nwan nggwon nung,

á̱ na ngyei ang a̱ta̱m

a̱kwonu A̱gwaza Tswazwa,

a̱ Swak ma̱ng A̱kyenkyai Shi a̱ni.#1:76 Mal 3:1.

Mat a na yet a̱son bai ghwon A̱tyoli wu,

a ka jhyi nggu vak hu.

77A na tak ma̱ng á̱niet nggu ba,

si̱sak ba̱ na nshya̱ san di̱n vak

chi a̱ka̱tuk nyia̱ mba wu a̱ni.

78Mat si̱sak ji A̱gwaza nfwuong kunak

a̱ si̱ chat zi̱t a̱ni;

a̱ ni̱ tyei mam a̱tsotson#1:78 Wa̱i a̱lyiat: A̱tsotson neet Ma A̱gwaza tswazwa yet kidee Kristi, a̱tyu nang A̱gwaza kup gu tyok a̱ni.

neet Ma A̱gwaza tswazwa

ku shim tat da̱ nzi̱t.#1:78 Mal 4:2.

79Da̱nian ku ka sai tazwa á̱niet

ba̱ shya̱ mi̱ ndyin ma̱ng a̱ghwaghwu a̱khwu a̱ni;

a̱ bu tyia̱ nzi̱t di̱n vak swat nyinyang.#1:79 Ish 9:2.”

80A̱wot Yoona a̱ yet nggwon ka a̱ni, si̱ laai. A̱ si̱ tyia̱ chet mi̱ za̱kwa. A̱ si̱ swan mi̱ ntswa a̱yit si̱ nat jen nang gu nnwuo nyia̱ ta̱m nggu hu kpa̱sai mami á̱niet Isi̱rela a̱ni.

Currently Selected:

Luka 1: TyapNT

Highlight

Copy