Matyu 12
12
Yesu wa yet A̱tyoli A̱tuk Mam Fwung wu
(Ma̱r 2:23-28; Luk 6:1-5)
1Di̱n jen a̱ja, Yesu si̱ chong a̱ si̱ teap ma̱ a̱byin swaat, a̱tuk Mam Fwung#12:1 Wa̱i a̱lyiat: A̱tuk Mam Fwung. A̱tuk a̱kya ka̱ yet a̱tuk mam A̱sa̱ba̱t.. Nang mman ta̱m nggu na nfwuong zong a̱ni, ba̱ si̱ nwuo sam dudung swaat hu á̱ shwam. 2Nang A̱fa̱risawa á̱ghyang ndi a̱nia a̱ni, ba̱ si̱ nyia̱, “Di! Mman ta̱m ang na tyat doka ji, di̱ nyia̱ ta̱m chak swaat a̱tuk Mam Fwung ka!”
3A̱wot Yesu si̱ nyia̱ ma̱ng a̱mba, “Nyi ka̱n fang A̱lyiat A̱gwaza na tazwa kyang nang a̱gwam Da̱wuda ku nyia̱, di̱n jen nang gu ma̱ng á̱kpa̱ndang chyet nggu ba ku nfwuong zong ji a̱ni baa? 4A̱gwam Da̱wuda ku nnwuo mi̱ Suswak Nwuat Za̱nang A̱gwaza hu#12:4 Lyuut cha̱chaat: “A̱li A̱gwaza.”, a̱wot nggu ma̱ng á̱kpa̱ndang chyet nggu ba si̱ tyat doka ji. Ba̱ si̱ ya a̱za̱za̱rak burodi nang á̱ khap á̱ sak da̱nian a̱yaapris bya ma̱nyin ba myim ba̱ ya a̱ni.#12:4 Li̱v 24:8.
5“Ma a̱nia wa, nyi ka̱n fang mami doka Musa ji meang, nyia̱ a̱yaapris ba̱ byia̱ ta̱m mami A̱li Nwuat Za̱nang A̱gwaza ka a̱ni, ni̱ nyia̱ ta̱m a̱tuk Mam Fwung ka di̱ mi̱n tyat doka ji baa? 6N tak ma̱ng a̱nyin, á̱ mbyia̱ a̱yin a̱ji a̱ swak A̱li Nwuat Za̱nang A̱gwaza ka ma̱ng shi a̱ni! 7Ki̱ nyi wa lyen kyang hu nang A̱lyiat A̱gwaza nani fa a̱ni, ‘N chat nwuat za̱nang hwa bah. N chat nyi fwuong kunak á̱niet hwa.’#12:7 Hos 6:6. Si̱ nyi tyia̱ mman ta̱m nung na ba̱ sang a̱bun a̱ni, a̱bun bah. 8Mat Nggwon A̱tyubishyi kya yet A̱tyoli ku tazwa a̱tuk Mam Fwung ka!”
Yesu Choot A̱tyu nang Bwak hu Khwu a̱ni A̱tuk Mam Fwung
(Ma̱r 3:1-6; Luk 6:6-11)
9A̱wot Yesu si̱ nat mi̱ tutu a̱tung A̱yahudawa hu. 10A̱ si̱ kin di a̱tyok a̱ghyang a̱ja nang bwak nggu hu khwu a̱ni. A̱fa̱risawa ba si̱ lyip Yesu nyia̱, “Doka ji shim á̱ nyia̱ ta̱m choot a̱yin a̱tuk Mam Fwung kaa?” (Ba̱ ku fa nyia̱ Yesu na shim, da̱nian ba̱ ka shya̱ ta̱fwat nang ba̱ na mbat gu a̱hyiak a̱ni).
11A̱wot Yesu si̱ nwuak ba shim nyia̱, “Ka̱ a̱yin ma̱ nyin byia̱ zon seap, ji̱ si̱ kwa mi̱ ri̱jiya a̱tuk Mam Fwung; a̱ na nyia̱ ta̱m a̱ ti̱n ji̱ a̱tuk Mam Fwung ka baa? Ku mbyia̱ susun bah, a̱ na ti̱n ji za̱m! 12Mat a̱nia, nang a̱tyubishyi ngyet a̱ lan zon seap ma̱ za̱nzan a̱ni, ku fa doka ji shim a̱yin a̱ beang a̱ghyang gu a̱tuk Mam Fwung ka.”
13A̱jawa Yesu si̱ nyia̱ ma̱ng a̱tyu nang bwak nggu hu khwu a̱ni, “Neap bwak ang hu.” A̱tyok a̱wa si̱ neap bwak nggu hu. A̱wot bwak hu si̱ kin tyia̱ ka̱nka̱ra̱ng nang nyiung hu a̱ni. 14A̱wot A̱fa̱risawa ba si̱ yorong a̱tung, ba̱ si̱ la̱p si̱sak nang ba̱ na nhyat Yesu a̱ni.
A̱gwaza Khai Yesu a̱ Nyia̱ Ta̱m nang A̱khwo nggu a̱ni
15Nang Yesu nfi̱k kyang ba̱ vwuoi a̱ni, a̱ si̱ doot a̱ja. Á̱kpa á̱niet ma̱ a̱di̱di̱t si̱ khwi ngguu. A̱ si̱ choot a̱mgba̱m á̱niet nzwán ma̱ mba. 16A̱wot a̱ si̱ gba mba nyia̱ da̱ ba̱ yok tyai nggu bah. 17Nta̱m Yesu nani bai cha̱chaat ma̱ng kyang nang Ishaya a̱ta̱m a̱kwonu A̱gwaza ku shei á̱zanson a̱ni nyia̱,
18“Di, a̱khwo nung wa wu nang n khai a̱ni!
Nggu wa nang n chat ba̱t,
a̱tyu nang fwuo nung hu fa̱k da̱ nggu a̱ni.
N na tyia̱ Tswa nung ji da̱ nggu.
Ji̱ na tyia̱ nggu chet.
A̱wot a̱ na tak a̱mgba̱m nnwap
mi̱ bibyin swanta na a̱tsotswat shi̱ri̱ya.
19A̱ na nyia̱ a̱yaat bah.
Da̱ nggu, a̱ na ngai bah.
Da̱ a̱yin, a̱ na fa̱k gu nyia̱ a̱gugwong di̱n vak bah.
20A̱ na but a̱shya̱ ka̱ gworong a̱ni bah,
ku a̱ nyiip long sang
ku sang a̱lya̱ra̱p a̱ni bah.
Si̱ nang gu kwak a̱son tsotswat,
si̱ swuo chet.
21A̱wot mami a̱lyoot nggu kya,
a̱mgba̱m nnwap na mi̱ bibyin
swanta na mba̱ng fwuo.”#12:21 Ish 42:1-4.
A̱fa̱risawa Lyiat Yesu Lihyat
(Ma̱r 3:20-30; Luk 11:14-23)
22Á̱ si̱ bai ma̱ng Yesu a̱tyu a̱ byia̱ a̱ka̱tuk ntswa, ji̱ tyia̱ nggu a̱fi̱fan ma̱ng yet ma̱ma̱m a̱ni. Yesu si̱ kam a̱ka̱tuk ntswa wu a̱ si̱ ghwut ma̱ a̱nggu. A̱ si̱ nwuo a̱lyiat, a̱ bu nwuan a̱vwuo. 23Á̱kpa á̱niet ka si̱ fa̱k a̱ga̱de, ba̱ si̱ lyip nyia̱, “Yesu wuni wa yet A̱ka̱mbwon Da̱wuda ka! A̱ si̱ yet Kristi#12:23 Wa̱i a̱lyiat: Kristi fa, A̱tyu nang A̱gwaza kup gu tyok a̱ni. Ma̱r 1:1. wu baa?”
24Nang A̱fa̱risawa ba nfa̱k a̱nia a̱ni, ba̱ si̱ nyia̱, “A̱tyu wuni doot a̱ khai á̱ka̱tuk ntswá ba̱ ghwut ma̱ á̱niet. Kyang a̱ri̱bi̱di hwa bah, mat a̱ shyat chet khai á̱ka̱tuk ntswá ba̱ ghwut ma̱ á̱niet ba da̱ a̱vwuo Baalza̱but#12:24 Wa̱i a̱lyiat: Baalza̱but yet a̱lyoot a̱ghyang a̱si̱ A̱ta̱nyeang kya, ka̱ yet a̱gwam á̱ka̱tuk ntswá ba., a̱gwam á̱ka̱tuk ntswá wu wa!”
25Nang Yesu ndyen a̱di̱dam mba wu a̱ni, a̱ si̱ nyia̱ ma̱ng a̱mba, “Kuzang tyok ku nyia̱ zwang ma̱ng a̱pyia̱ nhu a̱ni, ku na kwa. Ma a̱nia wa, kuzang a̱keang ku a̱li ka̱ nyia̱ jhya̱ tsi̱tsak nka a̱ni, ka̱ na yong bah, ka̱ na kwa. 26Ma a̱nia wa, ka̱ A̱ta̱nyeang khai á̱ka̱tuk ntswá nka ba, ba̱ ghwut ma̱ á̱niet, ka̱ na gang ka̱ nyia̱ zwang ma̱ng a̱pyia̱ nka. Tyok nka hu na yong bah.
27“Ka̱ nyi nyia̱ Baalza̱but wa nwuak nung chet hu nang n khai á̱ka̱tuk ntswá ba ba̱ ghwut ma̱ á̱niet a̱ni, a̱wot mman ta̱m nyin na mameang nyia̱ a̱nia, ma̱ng chet Baalza̱but hwa nang ba̱ nkhai á̱ka̱tuk ntswá ba̱ ghwut ma̱ á̱niet baa#12:27 Lyuut cha̱chaat: “Ma̱ng chet a̱nyan hwa nang ba̱ nkhai á̱ka̱tuk ntswá ba̱ ghwut ma̱ á̱niet?”? Kaai! Mat a̱nia, mman nta̱m nyin na na tak nang nyi nyia̱ shot kwa. 28A̱wot ka̱ n ma nkhai á̱ka̱tuk ntswá ba̱ ghwut ma̱ á̱niet ma̱ng chet A̱za̱za̱rak Ntswa A̱gwaza hwa, ku tak nang Tyok A̱gwaza hu mbai da̱ nyin.
29“Kidee, á̱ na nyia̱ ni wa á̱ nnwuo a̱mali a̱tyu byia̱ chet, á̱ kwok nkyang nggu na á̱ nkat ndyo? Si̱ nang á̱ ya nda̱p gu, á̱ sii du shya̱ a̱wat á̱ kwok nkyang a̱mali nggu na á̱ nkat ndyo.#12:29 Wa̱i a̱lyiat: Yesu fa, nggu ma̱ a̱pyia̱ nggu byia̱ chet a̱ lan A̱ta̱nyeang ka̱ yet “A̱tyu byia̱ chet,” Mat a̱nia, Yesu byia̱ chet a̱ khai á̱ka̱tuk ntswá ba̱ ghwut ma̱ a̱tyubishyi.
30A̱tyu da̱ a̱ shya̱ dundung ma̱ng a̱nung a̱ni bah,
a̱ nyia̱ fi̱p hwa ma̱ng a̱nung.
A̱wot a̱tyu da̱ a̱ beang nung
tung zón seap ji a̱ni bah,
a̱ yet a̱tyu seang ji wa.
31“Mat a̱nia, n tak ma̱ng a̱nyin a̱tsak a̱lyiat, á̱ na chi kuzang a̱ka̱tuk nyia̱ ma̱ng lihyat nang á̱niet nyia̱ a̱ni. A̱wot lihyat nang á̱ nyia̱ tazwa A̱za̱za̱rak Ntswa A̱gwaza wu a̱ni, á̱ na chi nhu bah. 32Ma a̱nia wa, konyan wa lyiat Nggwon A̱tyubishyi lihyat a̱ni, á̱ na chi nggu. A̱wot konyan wa lyiat lihyat tazwa A̱za̱za̱rak Ntswa wu a̱ni, á̱ na mak chi nggu ndyo bah, ku ma̱nini, ku si̱ nat sang sangba̱p.
Á̱ ni̱ Fi̱k kuzang A̱kwon mat Sum nka hu
(Luk 6:43-45)
33Ma a̱nia wa, ka̱ a̱kwon ka yet a̱ka̱nka̱ra̱ng,
sum nka hu na yet a̱tan.
A̱wot ka̱ a̱kwon ka byia̱ zwan,
sum nka hu na yet a̱bombwuon.
Mat a̱nia, á̱ ni̱ fi̱k a̱ka̱nka̱ra̱ng a̱kwon wu
mat sum nka hu hwa.#12:33 Wa̱i a̱lyiat: Yesu ku lyiat tazwa a̱pyia̱ nggu kya. Nyia̱, ku myim A̱fa̱risawa ba ba̱ fi̱k ka̱ a̱ choot a̱yin di̱ nyia̱ a̱tan ta̱m, ku tak nang gu ngyet a̱tan a̱yin wa.
34“Nyin á̱ka̱tuk ntsuup a̱byin bani! Á̱ na nyia̱ ni wa á̱ka̱tuk á̱niet nang a̱nyin a̱ni, nyi ndyiat kyang ku myim ku bu yet a̱tan a̱ni? Mat a̱mgba̱m kyang ku shya̱ mi̱ nfwuo nyin na a̱ni, huhwa yet a̱tyin kyang nang nyi lyiat a̱ni. 35A̱tan a̱yin ni̱ ghwut ma̱ng a̱tan nkyang nang gu niat mi̱ nfwuo nggu hu a̱ni. Ma a̱nia wa, a̱ka̱tuk a̱yin ni̱ ghwut ma̱ng a̱ka̱tuk nkyang nang gu shya̱ ndyo di̱ niat mi̱ nfwuo nggu hu a̱ni.
36“N tak nyin a̱tsak a̱lyiat, a̱tuk shi̱ri̱ya A̱gwaza ka, a̱mgba̱m a̱tai ma̱ng a̱ka̱tuk a̱lyiat nang nyi lyiat a̱ni, A̱gwaza na ba̱ng nyin da̱ na. 37Mat ka̱ a̱lyiat nyin na yet a̱tan, A̱gwaza na shya̱ nyin ma̱ng a̱bun bah. A̱wot ka̱ a̱lyiat nyin na yet a̱ka̱tuk wa, A̱gwaza na shya̱ nyin ma̱ a̱ka̱tuk nyia̱ za̱m.”
Yesu Gba Á̱niet Lak Nwuak Fwuo da̱ nggu a̱ni
(Ma̱r 8:11-12; Luk 11:29-32)
38A̱jawa a̱yaagwak tyiet doká ma̱ng A̱fa̱risawa si̱ nyia̱ ma̱ng Yesu, “A̱tyu tyiet, zi̱ chat a nyia̱ kyang a̱ga̱de ku yet a̱lama, ku ka tak tyok ang hu kpa̱sai.”
39Yesu si̱ nwuak ba shim nyia̱, “Che ku yet a̱ka̱tuk ma̱ng nwai nyia̱ tsotswat nang si̱ huni a̱ni, huhwa ni̱ chat li nkyang a̱lama na. A̱wot mi̱ a̱lama wu n na ntak ba a̱ni, nggu wa yet a̱si̱ Yunana a̱ta̱m a̱kwonu A̱gwaza. 40Ma̱nang Yunana ku nnyia̱ mam a̱tat ma̱ng a̱tyetuk a̱tat a̱mafa a̱gba̱ndang a̱fa̱n ka a̱ni, a̱nia wa nang Nggwon A̱tyubishyi ka, na nnyia̱ mmam tat ma̱ng a̱tyetuk ntat nang ka̱ shya̱ mami a̱tsuung lyak wu mi̱ swanta hu.
41“A̱tuk mam shi̱ri̱ya A̱gwaza ka, á̱tyok Ni̱neba na doot ndung ma̱ng che huni, ba̱ tak hu nang ku mbwuo a̱bun. Mat á̱tyok Ni̱neba ba ghwon a̱ka̱tuk nyia̱ mba wu, ba̱ si̱ khwi A̱gwaza mat shei A̱lyiat A̱gwaza Yunana hu. Nyi li la! Ma̱ninika a̱tyu a̱ swak Yunana ma̱ng shi a̱ni shya̱ a̱ji. A̱wot nyi si̱ lak fa̱k gu hu! 42Ma a̱nia wa, a̱tuk mam shi̱ri̱ya A̱gwaza ka, Sa̱ra̱uniya a̱tak wu na doot ma̱ng che huni a̱ tak hu nang ku mbwuo a̱bun. Mat a̱ ghwut neet ma̱ a̱byin a̱ghyang ma̱ gbang, a̱ si̱ bai a̱byin Isi̱rela a̱ ka fa̱k mumwang Solomon hu. Nyi li la! Ma̱ninika a̱tyu a̱ swak Solomon ma̱ng shi a̱ni shya̱ a̱ji! A̱wot nyi si̱ lak fa̱k gu hu.
43“Di̱ ngaan hu, ka̱ a̱ka̱tuk ntswa wu ghwut da̱ a̱yin, ji̱ na nat mi̱ tswa a̱yit, da̱nian ji̱ ka chat a̱vwuo fwung a̱ja, a̱wot ji̱ na shya̱ bah. 44A̱jawa ji̱ na nyia̱, ‘N na bwuok n nat mi̱ vam a̱tyu nang n ghwut a̱ni, n bu swan a̱ja.’ Ka̱ ji̱ bwuok, ji̱ si̱ shya̱ nang vam a̱tyu a̱hwa li nang a̱li ka̱ swan gang a̱ni, nang á̱ lyang á̱ si̱ shok ka a̱ni. 45A̱jawa a̱ka̱tuk ntswa wu na chat a̱ shya̱ á̱ka̱tuk ntswá a̱natat á̱ghyang ba̱ swak ji ma̱ng a̱ka̱kpa̱t a̱ni, ba̱ ka nwuo mi̱ vam a̱tyu a̱hwa ba̱ swan a̱ja. A̱wot a̱ni wa, a̱tyu a̱wa na mbeang byian hu a̱ swak jen nang a̱ka̱tuk ntswa a̱nyiung wu ku nshya̱ ma̱ a̱nggu a̱ni. A̱nia wa ku na ndi ma̱ng a̱ka̱tuk nche wuni.”#12:45 Wa̱i a̱lyiat: Yesu ku nyia̱ mman nta̱m A̱fa̱risawa na khai á̱ka̱tuk ntswá ba̱ ghwut ma̱ á̱niet kang ma̱ng chet Yesu hu. Ma̱ a̱da̱dei zwunzwuo wuni, shimba Yesu fa nyia̱, á̱niet ba nang a̱ka̱tuk ntswa wu ghwon mba a̱ni, ka̱ ba̱ lak shim A̱za̱za̱rak Ntswa si̱ nwuo ma̱ mba ba̱ na mbeang byian hu a̱ swak jen nang a̱ka̱tuk ntswa a̱nyiung wu ku nshya̱ ma̱ mba a̱ni. Mat 12:27.
Á̱niet ba ba̱ yet Á̱tsatsak Á̱na̱nyiuk Yesu a̱ni
(Ma̱r 3:31-35; Luk 8:19-21)
46Nang Yesu nshya̱ da̱ a̱lyiat na ma̱ng á̱kpa á̱niet ka a̱ni, a̱yang byin nggu wu ma̱ng á̱na̱nyiuk nggu ba si̱ bai á̱ ba̱ yong a̱ta̱usa, ba̱ chat lyiat ma̱ng a̱nggu. 47[[A̱yin si̱ hyia̱ ma̱ng Yesu nyia̱, “A̱yang byin ang wu ma̱ng á̱na̱nyiuk ang ba yong a̱ta̱usa ba̱ chat lyiat ma̱ng a̱nwan.”]]#12:47 Lyuut á̱ghyang mbyia̱ a̱da̱dei zwunzwuo swak naai ma̱ a̱natat (47) wuni bah.
48Huhwa gu si̱ nyia̱ ma̱ng a̱tyu a̱ hyia̱ ma̱ng a̱nggu a̱ni, “A̱nyan wa yet a̱yang nung wu, ma̱ng á̱na̱nyiuk nung ba?”
49Huhwa Yesu si̱ ta̱fang mman ta̱m nggu na nyia̱, “Di a̱yang nung wu ma̱ng á̱na̱nyiuk nung bibya ba! 50Konyan wa nyia̱ ta̱m hu nang A̱tyia̱ nung wu a̱ shya̱ tswazwa ka chat a̱ni, nggu wa yet a̱na̱nyiuk nung, a̱sam ma̱ng a̱nap, ma̱ng a̱yang nung wu!”
Currently Selected:
Matyu 12: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
