Nta̱m A̱yaata̱m 3

Bitut Choot A̱ta̱luk A̱ti̱tak

1A̱ghyang a̱tuk, nang Bitut ma̱ng Yoona naat naai A̱gwaza mi̱ didyaat A̱li Nwuat Za̱nang A̱gwaza, nang jen ji yet tswam tsat a̱ta̱mam; 2nang ba̱ si̱ ntat a̱zanunwuai didyaat A̱li Nwuat Za̱nang A̱gwaza ka a̱ni, ba̱ si̱ shya̱ a̱yin a̱ja, á̱ byin nggu ma̱ng ta̱luk a̱ti̱tak hu! Á̱ ni̱ kyiak guu, á̱ si̱ sak kuzang a̱tuk a̱zanson a̱na̱nwuai nang á̱ ku ngyei “A̱sham A̱zanunwuai ka” a̱ni. Da̱nian gu ka shweang kurum da̱ a̱vwuo á̱niet ba, ba̱ ni̱ nwuai didyaat A̱li Nwuat Za̱nang A̱gwaza hu a̱ni. 3Jen nang gu ndi Bitut ma̱ng Yoona nshim nwuo mi̱ didyaat A̱li Nwuat Za̱nang A̱gwaza hu a̱ni, a̱ si̱ naai mbaa ba̱ nang nggu kurum nang á̱ ni̱ mbeang á̱kunak na a̱ni.

4A̱jawa Bitut ma̱ng Yoona si̱ jwaat gu á̱ghyi. Bitut si̱ nyia̱ ma̱ng a̱nggu, “Nwuan nzi̱t, a lii!” 5A̱ta̱luk a̱ti̱tak wu si̱ sak ba á̱ghyi. A̱ si̱ ntyia̱ fwuo, ba̱ na nang nggu kurum! 6A̱wot Bitut si̱ nyia̱ ma̱ng a̱nggu, “N byia̱ kurum zi̱nariya ku a̱zurfa nang n na nang ang a̱ni bah. A̱mgba̱m ma̱ng a̱nia, kyang hu n byia̱ a̱ni; huhwa n na nang ang. Mami chet a̱lyoot Yesu Kristi A̱tyu Na̱za̱ra̱t, [[doot]]#3:6 Lyuut ghyang mbyia̱ “Doot” bah. a chong!”

7A̱jawa Bitut si̱ ta̱bat gu di̱ mbwak yak. A̱ si̱ ta̱ngam nggu a̱ka̱tsak. A̱wot a̱ti̱tak nggu ba ma̱ng nkunkup á̱ka̱li a̱ti̱tak nggu na si̱ kin tyia̱ chet mi̱ di̱ yong a̱hwa! 8A̱ si̱ kin fi̱p a̱ doot a̱ yong ka̱tsak. A̱ si̱ ta̱bat a̱chyet ma̱ng a̱ti̱tak nggu ba. A̱ si̱ nwuo mi̱ didyaat A̱li Nwuat Za̱nang A̱gwaza hu dundung ma̱ng Bitut ma̱ng Yoona. A̱ si̱ chong a̱ fi̱ri̱p a̱ tswang a̱ tsa a̱ bu ndyep A̱gwaza!

9A̱mgba̱m á̱niet ba si̱ li nggu nang gu chong. Ba̱ si̱ bu fa̱k nang gu dyep A̱gwaza. 10Jen nang ba̱ nfi̱k nang nggu wa ku yet a̱ta̱luk a̱ti̱tak wu, a̱ ni̱ swan a̱zanson A̱sham A̱na̱nwuai didyaat A̱li Nwuat Za̱nang A̱gwaza ka a̱ shweang a̱ni; ba̱ si̱ fa̱k a̱ga̱de ma̱ng a̱ri̱bi̱di nang á̱ nyia̱ nggu ndyo a̱ni!

11A̱mgba̱m á̱niet ba si̱ fa̱k a̱ga̱de. Ba̱ si̱ tyong chung á̱ nat ma̱ a̱junjung didyaat a̱ byia̱ kup a̱ni nang á̱ ngyei “Didyaat Solomon hu;”#3:11 Wa̱i a̱lyiat: Didyaat Solomon hu shya̱ mami a̱gba̱ndang didyaat A̱li Nwuat Za̱nang A̱gwaza wu. nang a̱tyu ta̱luk a̱ti̱tak nang á̱ choot a̱ni, ni̱ ba̱ng Bitut ma̱ng Yoona gi̱ngi̱ng.

Bitut Shei A̱sham Nkhang mi̱ Didyaat Solomon hu

12Nang Bitut nfi̱k nang gu nshya̱ a̱wat a̱ lyiat a̱ni, a̱ si̱ nyia̱ ma̱ng á̱niet ba, “Á̱tyok Isi̱rela, yihwa mbyia̱ nang choot a̱tyu huni ngyet nyin kyang a̱ga̱de hu? Yihwa mbyia̱ nang nyi nsak zi̱t á̱ghyi a̱nia? Nyi ngyei chet á̱pyia̱ nzi̱t hwa ku khwi A̱gwaza nzi̱t hwa mbyia̱ nang a̱ta̱luk a̱ti̱tak wuni nchong a? 13A̱gwaza Ibrahim, ma̱ng Ishaku, ma̱ng Yakubu, a̱ yet A̱gwaza a̱mgba̱m a̱yaatyia̱ a̱khwop nzi̱t ba a̱ni; nggu wa nwuak a̱khwo nggu wu Yesu shi gu choot a̱tyu wuni! Nggu wa yet Yesu wu nang nyi ku lak, nyi si̱ tyia̱ nggu mbwak gwomna Bilatut; ku nang gwomna Bilatut ku nchat a̱ kai nggu a̱ ghwon a̱ni. 14Nyi si̱ lak Yesu a̱ yet A̱za̱za̱rak ma̱ng A̱tsotswat a̱yin a̱ni. A̱wot da̱ a̱kwonu a̱kya, nyi si̱ chat á̱ kai a̱tyu hyaai á̱niet wu wa á̱ ghwon nyin dyo. 15Nyi si̱ hyat Yesu, a̱tyu a̱ yet a̱tyin nswuan ka a̱ni. A̱wot A̱gwaza si̱ ta̱ngam gu ma̱ng swuan ma̱ á̱niet ba̱ ka̱n kwi a̱ni. A̱wot nzi̱t ma̱ á̱pyia̱ nzi̱t, zi̱ si̱ li nkyang na̱ shya̱ Yesu a̱ni ma̱ng á̱ghyi nzi̱t!

16“Mat nang a̱tyu wuni nnwuak fwuo da̱ a̱lyoot Yesu ka a̱ni, huhwa mbyia̱ nyi ndi gu nchoot. A̱wot nyi bu fi̱k nang nggu wa ku ngyet a̱ta̱luk a̱ti̱tak wu di̱n jen swak ji. Nwuak fwuo da̱ a̱lyoot Yesu hwa choot guu. Nyi si̱ li ma̱ng á̱ghyi nyin.

17“Á̱na̱nyiuk nung, n nwuak a̱chuchuk; a̱ka̱kpa̱t na nang nyin ma̱ng a̱yaakwak a̱son nyin ba ku nyia̱ Yesu ndyo a̱ni, nyi ku nyia̱ na di̱ mi̱ lyen hwa. 18A̱wot a̱ni wa nang A̱gwaza ku ntyia̱ kuzang kyang si̱ mbai da̱ a̱nu ka; ma̱nang gu ku ntak á̱zanson gbangbang a̱bwonu a̱mgba̱m a̱yaata̱m a̱kwonu nggu ba a̱ni. Nyia̱, Kristi a̱tyu nang A̱gwaza kup gu tyok a̱ni, na swuo a̱bung a̱ka̱kpa̱t nani.

19“Mat a̱nia, ma̱ninika, nyi ghwon a̱ka̱tuk nyia̱ nyin wu! Nyi bwuok, nyi khwi A̱gwaza, gu ka chi a̱ka̱tuk nyia̱ nyin wu. 20A̱nia wa nyi na nshya̱ jen fwung, á̱ nwuak tswá nyin ji chet mat A̱gwaza shya̱ dundung ma̱ng a̱nyin. A̱wot A̱gwaza bu na ta̱m ma̱ng a̱nyin Yesu; a̱tyu a̱ yet Kristi nang gu khai, a̱ si̱ kup gu tyok a̱ni. 21Mat ku yet ta hwa, Yesu a̱ ya a̱son ma̱ng swat Ma A̱gwaza tswazwa; a̱ fwuong jen ji nang á̱ na mbwuak kuzang nkyang nang A̱gwaza mat, na̱ tyia̱ fai a̱ni; ma̱nang A̱gwaza ku nyia̱ a̱li̱ka̱uli a̱bwonu á̱za̱za̱rak a̱yaata̱m a̱kwonu nggu ba gbangbang a̱ni.

22“Musa ku nyia̱, ‘A̱gwaza a̱ yet A̱tyoli nyin wu a̱ni, a̱ na ta̱m ma̱ng a̱nyin a̱ta̱m a̱kwonu A̱gwaza a̱ghyang mami á̱niet nyin ba, a̱ tai nung a̱ni. Nyi ni̱ mmyiai a̱fufwuo shansham. Nyi fa̱k kuzang á̱lyiat nang gu na hyia̱ ma̱ng a̱nyin a̱ni.’#3:22 KDok 18:15. 23Musa si̱ bu nyia̱, ‘A̱tyu a̱ lak myiai a̱fufwuo a̱ si̱ fa̱k a̱ta̱m a̱kwonu A̱gwaza a̱wa a̱ni, á̱ na fi̱n nggu á̱ ghwut ndyo ma̱ á̱niet A̱gwaza ba!’#3:23 KDok 18:19; Li̱v 23:29.

24“A̱tsak a̱lyiat, neet di̱n jen Sa̱mwila a̱ta̱m a̱kwonu A̱gwaza, kuzang a̱ta̱m a̱kwonu A̱gwaza a̱ bai lilyim nggu a̱ni, a̱ ku mun a̱ shei á̱zanson tazwa kyang ku na bai da̱ a̱nu ka a̱fwun a̱ni. 25Nyin bya yet á̱ka̱mbwon a̱yaata̱m a̱kwonu A̱gwaza a̱bya. A̱wot á̱ ku mun á̱ tyia̱ nyin mi̱ la̱p a̱li̱ka̱uli nang A̱gwaza ku nyia̱ a̱li̱ka̱uli wu ma̱ng a̱yaatyia̱ a̱khwop nyin ba a̱ni. Ma̱nang A̱gwaza ku nyia̱ a̱li̱ka̱uli wu ma̱ng Ibrahim a̱ni, nyia̱,

‘Mi̱ kwai ang ja nang a̱mgba̱m nnwap mi̱ swanta na,

na nshya̱ a̱li̱ba̱rka wu!’#3:25 A̱ts 22:18.

26“Jen nang A̱gwaza ku nkhai a̱khwo nggu wu Yesu a̱ni, a̱ si̱ tsa ta̱m nggu da̱ a̱vwuo nyin á̱niet Isi̱rela. Da̱nian gu ka nang nyin a̱li̱ba̱rka di̱ si̱sak ji nang gu na ntyia̱ konyan ma̱ nyin a̱ ghwon a̱ka̱tuk nyia̱ nggu wu, a̱ bwuok a̱ khwi A̱gwaza a̱ni.”

Currently Selected:

Nta̱m A̱yaata̱m 3: TyapNT

Highlight

Copy