Markus 7

Kem n ti kuli̱m

(Mat 15:1-9)

1Wuka di bi̱kam ni̱bu Farisamu n ti ni̱bu yungku yili̱n Musanimu, ba a be a Wurchalimame, 2chi a ku bi̱kamu miyari̱m Yesum, ki̱chau chabti̱tu ki̱ni Fa̱liyu a nurabu nurane, yinang kangu da seli̱bu wemi̱nangu. 3(Ni̱bu Farisamu n ti ni̱bu Yafudam kwang a chabu chitu ka a nurabu Fa̱li chiyu yinangu da seli̱bu wemi̱nange. 4Ka a ki̱lawe a Kwa̱ma̱re, a ne chau chabti̱tu di̱ne a mwintuwe ka nura fa̱liyu didiin. Aya yikayu dati seli̱bi̱ we nabwen yiyu n chi ki̱ nabi̱diyu. Yinang nuraku beti̱ sa̱ni n ti satti n ti beti̱ chii.)

5Yinu Farisawa n ti ni̱bu yungku yili̱ni̱mu a bi̱u Yesu ko, “Di̱ne wule miyari̱m mumu a bunti̱bu da seli̱bu, aya n chi ki̱chau chabti̱tu ki̱ni Fa̱liyu a nurabi̱ nurane?”

6N ki̱n a yi chi ko, “N Yichaya a ma fa̱kuitu we dutu chi̱ntu yo a yi ko,

‘N Ti̱n ni̱bu di̱bebeline. Yinanga mwal ko,

Ni̱bu bi̱bu ki̱rikayu ki̱ni kana yii,

ni̱tu chitu a kurbu mi̱n.

7Ki̱sii ti̱kwani aya ki̱miya yili̱n ni̱bi,

ko n nang ya̱m Kwamamu.’

8“A le chimi̱n, ti̱du chi Kwama a fwatu, ti̱bunti̱ daati ni̱bi.” 9Yinu a yi chi ko, “Ti̱yo yili̱n Kwamatu a ki̱swi tiko keti̱ bunti̱ daati chiyu.” 10Nangki̱n, m Musa a fwa ko, “Ni te mun n ti ne mun dwiyentu, nii ka tu te ki̱n ka n ne ki̱ne a lwe bwa.” 11Aya n ti̱n ti̱yo ni̱bu ki̱du bi̱bu a bi̱u chimu we tiko, ka ni a yi te ki̱n, ka n ne ki̱ne ko, “Chi no ta yadu a di̱ mi̱ne n yangyange, mang ma Kwama mi̱n ki̱li̱mangi ki̱n. 12We yiko, ta dubu nii wu a maka teki̱n ka neki̱ne. 13We ki̱ku ba̱la̱ng ti̱kai ya̱m Kwamamu a ne ki̱kwi we di̱ne dati chiyu ti̱miya bwesi̱m mi̱niyu, a bwin yiko, ti̱mana chitu nabwen tiyang ti̱tu.”

Chi ki̱kai yile ni we kakku Kwamange

(Mat 15:10-20)

14Yinu n Yesu a ki̱la yalte ni̱bu we, a yi chi ko, ti̱nwei n ti̱ni ki̱ni kwang, ti̱swaan yinang. 15“Chi ki̱le fur niine a kaibu yile ni we kakku Kwamangu, aya chi ki̱chiredu we ni̱r niine, n nang chi ki̱kai yile ni we kakku Kwamange. 16Di̱ne ying, nii ki̱tele ki̱nwe diye, a nwe.”

17A kuteng ki̱ku n ki̱n a yaran n ti muraki̱ kangu, a le lo. Miyari̱m ki̱mu a bi̱u ki̱n bi̱bu ki̱dum baltaki̱m. 18A yi chi ko, “Yoye ta swaanbu ya̱m bi̱ba? Ta swaanbu ko chi ki̱le fur nii ne a kaibu yile ni we kakku Kwamangu?” 19Di̱ne ti̱tu a yabu bwa ni̱re, aya ki̱le bwi, ti̱nti̱ne ka chiru we bwiyu (We bi̱bu ya̱m n Yesu a yung chabti̱tu a kaibu yile nii.) 20A chakakku ki̱fwadu ko, “Ya̱mu ki̱chiredu a fur ni̱ni̱mu n nang chi ki̱kai yile ni we kakku Kwamange. 21Di̱ne we mure ni̱r niine, ti̱kuran ti̱bwilai ti̱tu ki̱chiredu we, yinang yari, n ti kutu, n ti chiku durang n ti, ti̱kuli 22mi̱ka kwiye n ti kubeku bwiyang, n ti bwila, n ti di̱buti̱r, n ti kubeki̱ ki̱bwilang, n ti kataku, n ti swa̱ba ku, n ti kukuki̱ durang n ti kwalan ti̱kurane. 23Bwila wu ki̱ni kwang ki̱chiredu a ni̱r niin, be ki̱kai ni we kakku Kwamangu.”

Keku bi̱yili̱mang wuka nayeng

(Mat 15:21-28)

24A kuteng ki̱ku n Yesu a kun a yika bale a ti̱m Taya n ti Sidon a le wuka lo wu a no babu nii ka yindu, aya a fwebi yiko. 25Wuka naye wu befwa̱ne ko ki̱ni ki̱fi̱be wu bwila, kanga nwe ya̱m ki̱mangu, a be sung ki̱mi̱n a kakku. 26Naye wu na Yelenamu. A bi̱u ki̱n a bale ti̱m Finikiyam we ti̱m Suriyamu. N ki̱n a wana Yesu ko a chaki̱ befwa̱ne mi̱n ki̱fi̱bti.

27N Yesu a yi ki̱n ko, “Yam ni̱bu Yafudam a chau a ri funi chiyu didin n chi bwesi̱m lomu, di̱ne a dakabu mang da̱u chabtu bwesi̱mitu mang ni kadatiyu.”

28N ki̱n a ke ki̱mi̱n ko, “we yiko Tewuduwe,” “kasi no n nang kadatiyu, mare ki̱chau ti̱buken ti̱tu ki̱twa̱kadu we kwa̱se bwesi̱metu.”

29N Yesu a yi ki̱n ko, “Di̱ne ya̱m bi̱bu mwang fwamu, Ki̱la lo, ki̱fi̱bti a chir a du bwe fwa̱nemo.” 30N ki̱n a ki̱la lo, a ya fwa̱nu a da kwa̱mbi̱re mwe. Ki̱fi̱bti a chir we di̱ki̱ne.

N Yesu a be di̱fun di̱du a yimbu fwa ya̱mi̱n

31Yinu n Yesu a chir we bale Taya, a yika Sidon a bale far di̱dun Ka̱liline, a bale Dikafoli. 32We bwako, ni̱bu a be ki̱mi̱ne ki̱ni waka nii di̱fun di̱du a yimbu fwa ya̱mi̱n. N chi a wana ki̱n, ko a yo fa̱la̱ngu we nii wu ke a ya beku. 33N Yesu a yal di̱funu a ki̱tiki̱, fi a ne ni̱bu we, yinu a di̱ki̱ beti̱ wuri kiyu we ki̱teli kiyu, a ti̱bu ki̱tum ki̱mu, yinu a twai ben ki̱nu ki̱ni ki̱tumu. 34N ki̱n a kuku nui kiyu a dii, a ma ko “Mmm,” yinu a fwa ko, “Yifata!” Ka nang chikiye “Wuden!”

35Yo a fwa ya̱m bi̱be, ki̱teli ni wuyu a wuden. Ben ki̱nu a kwiran, a mwe ki̱fwa ya̱mu yinang.

36N Yesu a ngatti̱ ki̱kure ko a fwa wuka nii mi̱nuwe, aya ni̱bu ki̱fwadi chik, kasi ki̱ku n ki̱n we ki̱ngau ki̱kurengu. 37Chi a fwetu, a ya̱r ni̱bu yii. N chi ki̱fwadu ko, “Nii wu ki̱ma kana chi ti̱yiliye.” Ko a yo ti̱funitu ki̱nwedu yinu bi̱bu ki̱lwa̱bu ya̱mi̱mu ki̱fwa ya̱mi der.

Currently Selected:

Markus 7: Tula

Highlight

Copy