Markus 15

N Yesu a kakku Kwabna Bi̱latusang

(Mat 27:1-2,11-14; Luk 23:1-5; Yow 18:28-38)

1Ki̱ni kunsin, tikaketi fansetimu n ti bi̱kamu seli̱bu n ti ni̱bu yungku yili̱ni̱mu n ti kwa̱l yili̱nu kwang a do ya̱m chimu we dur Yesunu. N chi a kwaba Yesu, a yikan kakku Bi̱latu wu ki̱chau mati̱n Romate.

2M Bi̱latu a bi̱u ki̱n ko, “M mun nang Mai ni̱bu Yafudama?” N Yesu a ke ko, “A mwan fwa.”

3Tikaketi fansetiyu a le ki̱swita ki̱nu. 4Yinu n Bi̱latu a bi̱ti̱ ki̱da ko, “A ne mwang fwa ya̱mma. Mwang nwebu nabwe ya̱miye, ni̱bu ki̱fwadu a dur muniya?”

5We chik, n Yesu a fwabu chi. Ti̱tu a ya̱r Bi̱latu yii.

A mwata Yesu mi̱n bwa

(Mat 27:15-26; Luk 23:13-25; Yow 18:39–19:16)

6We da chi, m Kwabna Bi̱latu ki̱maiye naba di̱bi̱nti̱le wiin wu n chi ki̱bade we ka nang wuwule ki̱swi Yiye Yabake. 7We ki̱dang kangu, wuka nii we di̱n ki̱nu n Barabas wu ni̱bu a kwau a di̱bi̱nti̱le n ti bi̱bu a chi̱u ni̱bu a ki̱dang bi̱ngaiyimu. 8Ki̱tu ni̱be a bulawe bwa di̱Bi̱latuwe ko a mar chimi̱ne ni wiin yinangu n ki̱n ki̱madi kwadangu.

9M Bi̱latu a ki̱nta chi ko, “Ti̱badu mang mai chimi̱n Mai ni̱bu Yafudama?” 10Di̱ne n ki̱n a swan ko tikaketi fansetiyu a tau Yesu di̱ne kati̱ne. 11Tikaketi fansetiyu a suu ni̱bu ko a yi Bi̱latu a mare Barabas, a bwin Yesu.

12Yinu n Bi̱latu a bi̱u chi ko, “Yinu fal, mang ma wu ti̱yidu ko n ki̱n Mai ni̱bu Yafudame yire?”

13N chi a yibi kuuu ko, “Ti̱kukan ki̱n!”

14M Bi̱latu a yi chi ko, “Di̱ne wule? A ma ki̱le wureni?” N chi a su keru ki̱yidu ko “Ti̱kuka ki̱n!”

15Di̱ne m Bi̱latu ki̱baddu ka li̱ma ni̱bu mi̱n ni̱te, n ki̱n a mar chimi̱ne Barabas. A yo ni̱bu a twala Yesu yinu a ni ni̱bu Yesu ko a ya kukan.

Ni̱bu kuni̱mu a fita Yesu

(Mat 27:27-31; Yow 19:2-3)

16Ni̱bu kuni̱mu a lengi ki̱ni Yesu a lon Kwabna. N chi a yo kwa̱l di̱dun ni̱bu kuni̱mu we fiko.

17Yinu a do ki̱mi̱n wuka luke wu wurwure ki̱duum bi̱bu mati̱m ki̱yadi̱mu. A bwa̱u ki̱mi̱n di̱ki̱ri̱n kwa̱da, a do ki̱mi̱n we duru. 18Yinu n chi a le ki̱fita ki̱nu, ki̱sidu ko, “Saki Mai ni̱bu Yafudame.” 19N chi ki̱twalu ki̱twalang we duru ki̱dati kwang, ki̱ti̱bi̱ti̱nu ki̱ni ki̱tum, a sung ki̱ma ki̱mi̱n di̱siir ti̱kwani̱n. 20Yo n chi a ri ki̱fiye, a suku ki̱mi̱n luke mati̱ne wurwure, a do ki̱mi̱n luke ko, a chir ki̱ni ki̱n yaka kukadu.

Ni̱bu a kuka Yesu a ki̱tiyang bwang

(Mat 27:32-44; Luk 23:26-43; Yow 19:17-27)

21Yo n chi we wa̱re ki̱yikade, n chi a tekan n ti Simun naba Sairin, n te Aleksanda n ti Rufu. N chi a yo ni wu mi̱n ki̱tiyang bwangi ki̱ng ko a da̱u. 22N chi a yikani ki̱ni Yesu a finu ni̱bu ki̱yalu ko Kolkota ka nang chikiye finu a kasire. 23We fiko ni̱bu a ni ki̱n mwe yinabe a se ti mur. Aya a ko a nobu. 24Yinu n chi a kuka ki̱n we ki̱tiyang bwangu. N chi a keran luketi kiyu, n chi a ma suti̱ku we bwiti chiyu ko ke chi yim, ki̱ti̱me wu n kawure ka yade.

25N chi a kuka ki̱ni si̱n yo ki̱swi a awa turkube. 26N chi a mwal ki̱le wu n chi a yo Yesu mi̱ne we di a ki̱tiyang bwange ko, “Mai NI̱BU YAFUDAME.” 27N chi fal a kuka ki̱n ware n ti dabi̱kuumi burau, wu wiine a kang ki̱yilang kang, yinu wukane a kwatakwelang kang. 28Ya̱m Kwamamu a ri, bi̱bu a fwa ko, “A ki ki̱n a ni̱bu bi̱bwilam.”

29Ni̱bu ki̱sudu we fikomu ki̱ swa̱ba ki̱nu ki̱fwara ki̱mi̱n ya̱mi yi kwani, n kawure ki̱mi̱ku duri ko, “Kwele, m mun wu mwang wur Kan Kwaman mwang muti̱nu we diti yittange, 30mwang yu dur munu n suwe kaang.”

31Yinu ti̱nti̱ne, wuduwe fansetiyemu n ti ni̱bu yungku yili̱ni̱mu ki̱fitati̱ ki̱nu ko, “A yu bi̱kamu, a yimbu yu yikiyu. 32M mun Masiya suwe ki̱ka̱ngu. Suwe Mai Yisrela we ki̱tiyang bwangu, ke ni̱n yim ni̱n ke bi̱yili̱mu.” Dabi̱kumu ni̱bu a kuka ware n ti ki̱ni̱mu, a le ki̱fwarati̱ ya̱mi yi kwaniyu.

Bwa Yesuwe

(Mat 27:45-56; Luk 23:44-49; Yow 19:28-30)

33Yo tibe kuko a lame, ki̱liye a yinge ti̱mi kwang a lami̱nti̱ yo ki̱swi a awa yitta wu menge. 34Yo ki̱swi a awa yitta a lame, n Yesu a kuku keru ki̱ni dukan a yi ko, “Eli Eli, lama sabatani?” Kanang chikiye “Kwama mi, Kwama mi, di̱ne wule mwang mariye?”

35Yo bi̱bu we fikomu a nwenge, a yi ko “Ti̱nwe, ki̱yale fa̱ku Yiliya.”

36Wuka we tibe chi a wul a da̱u soso a di̱ku we mwe yinabe wu bwa̱ngbwa̱nge, yinu a da̱u ki̱twalang ki̱kwale a kuku soso ki̱n a di̱ku ki̱mi̱n we yi. A yi ko, “Ti̱yam ni da̱ngdu ka n Yiliya we beka yu ki̱ne.”

37Yinu n Yesu a bwe wi ki̱ni keru dukan yinu a bwa.

38Wule luke wa Kan Kwamana Wurchalimane, a ngi̱ran bali̱ntii turau, a mwe we dii a fwe ti̱na bale ti̱me. 39Yo tikake ni̱bu kuni̱nmu ki̱ma toki̱mu, wa ti̱ya kakku Yesungu a ku yinangu a bwange, a yi ko, “Bi̱yili̱m, ni wu Bwe Kwama!”

40Bi̱kamu nati̱bu we fiko a tiye kutan ki̱da̱ng chi ki̱fweditu. M Maryamu wu a Maka̱dala n ti Salomi n ti Maryamu ne Yakubu wuti̱re n ti Yose. 41Yo n ki̱n we Ka̱lili, nati̱m bi̱bu a nabu ki̱n ki̱maka ki̱nu ki̱ni chabti̱tu. Bi̱kamu nati̱bu nabwen bi̱bu a bungan n ti ki̱n ti̱n we Wurchalimamu wetuwe fiko.

Furem Yesum

(Mat 27:57-61; Luk 23:50-56; Yow 19:38-42)

42Diko di sabwi ni̱bu Yafudam, ki̱ni me ni̱bu ki̱do bwi di̱ne Difi̱kare ni̱bu Yafudamu a mwatan ka mwedu. 43Wuka nii we wu di̱n ki̱nu n Yusufu Arimatiya, n ki̱n we ni̱bu ki̱ni ki̱siyangmu we kwa̱l yili̱nu, wu n ki̱n ki̱yandu yo Yaa Kwama ka bede, a ya bwa di̱Bi̱latu a ne tayi we, a bi̱u ko a ni ki̱n kwa̱me Yesu we. 44M Bi̱latu a ka̱ta̱n yinangu a nwe ko n Yesu a tu a bwangu. N ki̱n a yale tikake naba kune a bi̱u ko n Yesu a bwa a ma ki̱twalanga? 45Yo n ki̱n a nwe we yi naba ki̱range ko a bwange, a ni Yusufu da ko a ya fur kwa̱me. 46Yinu n Yusubu a ta̱ne luke fureme wu mwemwe, yinu a si̱ke ki̱n we ki̱tiyang bwangu, a dal ki̱n we luke mwemwe, a di̱ku a furu a swa̱ba kwaminu. A bi̱le ne tii kale a fi̱rtuwe yaku furangu.

47M Maryamu wu a Maka̱dala n ti Maryamu ne Yose a ku fi a furi̱n ki̱ne.

Currently Selected:

Markus 15: Tula

Highlight

Copy