Markus 12

Baltaku a ni̱bu bi̱bwilam a ya suku ti̱mang

(Mat 21:33-46; Luk 20:9-19)

1Yinu n Yesu a chakakku ki̱fwa ya̱mu ki̱ni baltaku, “Wuka ni a fi ku yinabe, a kana kuu ki̱ni yakwale, a swa̱nti di̱kulen di̱du kani̱n ya̱mi̱n ti̱kulan mwe yinabiyentu, a buti̱ kweeru kani̱n mwata mi̱n ya̱mi̱nu. A ni bi̱kam ni̱bu suku ku, ko a nang sudu a yikati̱ di̱bwal. 2Yo ki̱swi yakku ti̱kulan we ku yinabe a lame, a tum wuka naba nanga ko we ni̱bu nanganmu ko a yiu ki̱mi̱ne ti̱kulantu. 3Yo naba nanga a be, ni̱bu bi̱bu a tau a ngau, a yo ki̱n, a yikan fa̱li kwako. 4Nii wu a tum chi mi̱nte wuka naba nanga, n chi a ngau wuko a dur, a ni ti̱n ki̱n riye. 5A kuteng ki̱ku, n ki̱n a tungte wuka. N chi a ngau wuko, a chi̱u. 6A du naba kuu mi̱n kana bweko, wu n ki̱n a mi̱lan yinange. A kuteng ki̱ku naba kuwe a tume ki̱n we di̱ chiye, ‘Ki̱kuradu ko ka ni bwe ko dwiyentu.’ 7Yo ni̱bu ki̱su kuumu a kuwe, a yi ko, ‘Bwe ka chau kula nang wu, ti̱be, ni chi̱u, ke ni chatti̱ kula!’ 8N chi a tau bwe a chi̱u, a da̱u bwe a mar a kuteng yakwaleng we ku yinabe.

9“Kanodu Tewuduwe a kuu yinabe wu ka ma chidi yire? N Yesu a bi̱u chi. Chi ka maditu, ka bedu ka chi̱be ni̱bu suremu, ka da̱u ku wu ka ni bi̱kam ni̱bu. 10Yoye ta kiinbu ya̱m Kwamam bi̱bu wenga?

‘Kale ni̱bu muki̱mu a konge,

nang kale ki̱la da̱u tureng kanne.

11Ti̱tu nangang Tewuduwe,

a kau chi ya̱r yii we da̱ngku chirengu.’ ”

12Bi̱duum tikaketi ni̱bu Yafudamu a bau wa̱re ka tau ki̱ne, di̱ne n chi a swaan ko baltaki̱ku a dur chi̱n. Kanang chikiye, n chi nang ni̱bu ki̱suu bi̱bwilamu we ya̱m bi̱bu. Aya a tabu ki̱n di̱ne n chi ki̱nwe tayi ki̱tu ni̱be, n chi a du ki̱n, a yarati̱n.

Feku sangkal a di̱Kaisare

(Mat 22:15-22; Luk 20:20-26)

13Yinu n chi a tung ki̱mi̱ne ni̱bu Farisa n ti ni̱bu Yirudumu ko ke a yo ki̱mi̱n la̱ta̱ yii, ke chi tau we ya̱mu ka fwadi̱mu. 14Yo n chi a benge, a yi ki̱n ko, “Naba yungke, ni̱n yim m mun, mun fwa ya̱mi der, mwang wulbu tayi ni̱biyu mwang da̱ngti̱bu dwiyen ni̱tu. Aya mun yung ka ya̱m bi̱yili̱m bi̱bu n Kwama fwamu. Kanodu a dakan nang fe Mai wuduwe Kaisar sangkala? Ni̱n fenga, ka ni̱n feduwenga?”

15Aya n Yesu a swaan bwila chi, a yi chi ko, “A mayire ti̱ sweye? Ti̱niye ka̱mbi̱ru ti̱fen sangkali̱nu.”

16N chi a be ki̱mi̱ne ki̱n. A bi̱u chi ko, “Wu kabu wure?”

N chi a ke ko, “Kabu Kaisare.”

17N Yesu a yi chi ko, “Ti̱ni Kaisar ti̱tu, n ti̱u Kaisaritu. Ti̱ni Kwama ti̱tu n ti̱u Kwamatu.” Chitu a ya̱r ni̱bu yii nabwen.

Di̱bi̱du a kunku kwa̱miyang

(Mat 22:23-33; Luk 20:27-40)

18Yinu ni̱bu Sadukiyamu, bi̱bu a kebu ki̱ni kunki̱ kwa̱mimu a be fi a di̱ki̱ne a bi̱u ki̱n ko, 19Naba yungke, m Musa a mwal ni̱mi̱n ko, “Ka kemo a bwange, a du naye ko a ne bi̱be wenge, a mwintuwe keko ka ni̱n na naye ko, ke a ya ki̱mi̱n bwesi̱mu ka chau kulamu.” 20Bi̱kam kebu we chi bi̱dibiin. Wu sele a ti kake, a yiu naye, a bwa a bi̱bu bwe. 21Wu robe a bunti̱ ki̱ne, a da̱u naye ki̱nadu, n ki̱n a be bwa ti̱n a ne bi̱be we. Wu tare yiko ti̱nti̱n. 22N nang kangu n chi ki̱ni bi̱dibiin, a twiya mi̱nangu. A ne wu a bi̱u bwe wa̱re n ti naye we. We kuteng ki̱ku naye wu a bwa ti̱n. 23We di kunki̱ kwa̱miyange, ka kau naye wure we tibe chi? Yo n chi kwang a na naye we.

24N Yesu a yi chi ko, “Ti̱kuran chi̱ntu n ke ti̱yili di̱ne ta swanbu ya̱m Kwamamu, yinu ta swanti̱bu dukan Kwamanu.” 25We di swan kute, a ne ya̱m ki̱natim we bwadiye. Ni̱bu kwang ka kadu yinang ni̱bu ti̱tumbi̱ri Kwamam. 26Ki̱ka̱ngu we ya̱m kunku kwa̱miyamu, ta kibu we tati̱ki̱dai Musa? Ta kibu chi a mwal ki̱dangu a be di̱ki̱ di̱lukene ki̱ tau ki̱ranga yinangu Kwama fwa ko, “M mi̱n nang Kwama Yibrayime, n ti Kwama Yichaku, n ti Kwama Yakubu we. 27N ki̱n n ke Kwama bi̱bwari̱m. N ki̱n wa bi̱kuri̱me. N ti̱n ni̱bu Sadukiyamu ti̱le nabwen.”

Yilang ki̱duwangu

(Mat 22:34-40; Luk 10:25-28)

28Wuka ni we ni̱bu yungku yili̱n Musantu a be nwe yinangu n chi ki̱tukadu we yichiyangu, kangu n ki̱n a swan ko n Yesu a nii chi di̱ki̱li̱n di̱yili̱nangu, a bi̱u Yesu ko, “Yilang ki̱ku a la chiyangu n nang ki̱ki̱le?”

29N Yesu a yi ki̱n ko, “Yilangu a la chiyangu n nang ki̱ku ‘Ti̱nwe ni̱bu Yisrelamu, Kwama Tewuduwe, Tewuduwe wiin ki̱kumang. 30Mi̱la Kwama Tewuduwe mo ki̱ni ni̱r muni diin, ki̱ni ti̱kuri mwiti kwang, ki̱ni ti̱kuran mwiti kwang, yinu ki̱ni dukan muni kwang.’ 31Ki̱ku ki̱bunti̱dangu n nang ki̱ku, ‘Ke kemo yinang yimwi.’ A ne yilangu a la ki̱kangu we.”

32Yinu naba ni̱bu yungku yili̱ne a yi Yesu ko, “N fwa bi̱yili̱m, naba yungke, n Kwama wiin, a ne wukane we. 33Ke ki̱ni ni̱ru kwang, ki̱ni ti̱kuri mwitu kwang, ki̱ni dukan munu kwang, yinu mi̱la kemo yinang yimwi. Ti̱tu a la ti̱niriti kwang n ti niku ki̱tumang.”

34Kangu n Yesu a yim ko nii wu ki̱ni yingkangu, a yi ki̱n ko, “N kwatuwe yaa Kwama.” A kuteng ki̱ku a ne ni a ma ki̱mi̱n di̱kan di̱bi̱de we.

M Masiya Bwe wure?

(Mat 22:41-46; Luk 20:41-44)

35Yinangu n Yesu yaki̱ ma yungki̱ku we Kan Kwamana Wurchalimanu, a ma di̱bi̱du ko, “Kanodu ni̱bu yungku yili̱ni̱mu ki yidu ko m Masiya bwe Dauda n wure? 36N Dauda n ki̱fwan, we dukan Fi̱ki̱m Kwamami̱nu a yi ko,

‘Tewuduwe a yi Tewuduwe mi ko,

N swe a kang ki̱yilamangu

ka lammi̱nti̱ ki̱dangu mang chau ki̱la ki̱ni fwakwarbu mumu

we nani mwiyangu.’ ”

37Yo n Dauda ki̱fwan, a fwa ko, “M Masiya Tewuduwe, yinu ka kaddi yire m Masiya ka kau bwe we di̱Dauda?” Ni̱bu nabwen a ma furi mwemwen, ki̱ni ya̱m Yesumu.

38We yungki̱ku, n Yesu a yi ko, “Ti̱ma dandan ki̱ni ni̱bu yungku yili̱ni̱nmu, n chi ki̱do lukei yiswa̱mi, ki̱bwali ki̱n, ki̱baddu ni̱bu ka ni̱n sii chidu a kwa̱ma̱ri. 39Ki̱bau fanti yiyili we kambi murakitu, ti fanti yiyili we yo ni̱bu ki̱ma yeniye. 40N chi nang bi̱bu ki̱chau kuli̱n nati̱bu kwartabu chimu a bwaran ni̱mu. Ki̱twa̱ba̱ buni chitu swa̱n swa̱n ko ke ni̱bu a yim chi. Aya n chi ka ya mwataku ki̱duwang.”

Niku na buneng

(Mat 21:1-4)

41N Yesu a swe we Kan Kwama di̱dunu, a kwatuwe finu ni̱bu ki̱kurin ka̱mbi̱r. Ki̱da̱ngdu yinangu ni̱bu ki̱kur kambi̱ritangu, kuli̱nmu a kur ka̱mbi̱ru nabwen. 42Yinu wuka nabune a bete, a kur ki̱nuti ka̱mbi̱ri yurabu, ka nang chi kiye a ni̱ni yurau.

43Yinu, n Yesu a yale miyari̱n ki̱mu, a yi chi ko, “Bi̱yili̱m, min fwa chimi̱nu, chi nabune wu a kure a la ni̱bi kwang. 44Ni̱bu bi̱bu a chake we kuli chitu a ni, aya nabune wu, a chake we kwalan kiti kwang a ni.”

Currently Selected:

Markus 12: Tula

Highlight

Copy