Matta 28

N Yesu a kun we furu

(Mar 16:1-8; Luk 24:1-12; Yow 20:1-10)

1Yo difi̱kare ni̱bu Yafudam a suwe, we di wu kake ki̱ni si̱n, m Maryamu wu a Maka̱dala n ti wuka Maryamu a ya yaka da̱nge furu.

2Bi̱nabi̱na ti̱mu a mi̱kan we ti̱ti̱nitu, wuka naba di̱tumbi̱re Tewuduwe a suwe we dii, a bi̱l ne kale wu a no yinge fure, a swe we diiko. 3N ki̱n yinang ki̱yile, lukei kiyu a fwiyeni tweng yinang fi̱bi̱n. 4Yo ni̱bu ki̱rangmu a ku ki̱ne, tayi a tau chi yinang, bwiyu a mi̱kan, n chi a yaran a ti̱m yinang bi̱bwari̱m.

5Aya naba di̱tumbi̱re a yi nati̱bu ko, “Ti̱wulu tayi we, n yim ti̱ba Yesu wu ni̱bu a kukane. 6A ne we fi. A kun we furu kangu a fwangu. Ti̱be ti̱da̱ng fi Tewuduwe a no dami̱ne. 7Ti̱ya fwebu, yati̱ fwa Miyari̱m ki̱mu mi̱n tiko, a kun we furu. Aya ka tu chi̱nu we Ka̱lili, ta ku ki̱nu we bwako. Nang chi mang be mang fwa chimi̱nditu.”

8Nati̱m bi̱bu a kaibu ki̱swi a du furu a yikan ki̱ni tayi n ti furi mwemwenu nabwen. N chi a wul ko ke ya chi mwa Miyari̱m Yesumu. 9N Yesu a ngaban n ti chi, a yi chi ko, “Mang la̱n chi̱n.” N chi a be ki̱dwang a kwar nani kiyu a sii. 10Yinu n Yesu a yi chi ko, “Ti̱nwedu tayi we, yati̱ fwa kebu mi̱mu mi̱n tiko a yika Ka̱lili, n chi ka kuyu we bwako.”

Di̱mwar ni̱bu ki̱rangmu ki̱to furi̱mu

11Yo nati̱bu ki̱yi̱kade, bi̱kamu we ni̱bu ki̱rangmu a lewe bi̱nu, a fwa wuduwe fansetiye mi̱n chitu a fweti kwang. 12Yinu fansetiyu n ti seli̱bu a muran a da̱ng chi we mure, n chi a ni ni̱bu ki̱rangmu ka̱mbi̱r nabwen. 13A yi chi ko, “Ti̱yi ni̱bu tiko Miyari̱m ki̱mu a barawe ki̱ni kum a da̱u ki̱n yo ta da dume. 14Ka ya̱m bi̱bu a lam kwabna, ni̱n we nang fwa ya̱mu n ti ki̱n, nang yu chi̱nu we riye.” 15Ni̱bu ki̱rangmu a yiu ti̱n ka̱mbi̱ru, a ma ti̱n chitu a fwa chi mi̱ni̱ntu. Ya̱m bi̱bu a lanta dii, a ti̱ra ti̱mu ki̱ni kwang, ni̱bu Yafudam ki̱fwadu.

N Yesu a ni miyari̱m ki̱mu nangang

(Mar 16:14-18; Luk 24:36-49; Yow 20:19-23; Nfa 1:6-8)

16Miyari̱mi kub chiri wiini̱mu a yikan Ka̱lili ki̱ni kwang, n chi a ya di̱kun di̱du n Yesu a yi chi̱nu.

17Yo n chi a ku ki̱ne a sii ki̱n, aya bi̱kamu, a le chimi̱nbu we bwiyu ko nang ki̱n. 18N Yesu a be ki̱dwan, a yi ko, “A ni mi̱n dwiyentu we dii n ti ti̱mi kwang. 19Di̱ne yiko, ti̱yikan yati̱i mwa kuuti kwang we ti̱ti̱nitu tiko a bumiti̱n, ti̱nang ma chimi̱n batisma we di̱n Tenun ti di̱Bwenu n ti di̱da Fi̱ki̱m Kwamam. 20Ti̱yung chi chitu mang fwa chimi̱niti kwang a nan bunti̱n yilangu. Ti̱yim ka wuwule diye, mi̱n we n ti chi̱n ka lami̱nti̱ di fi̱rke.”

Currently Selected:

Matta 28: Tula

Highlight

Copy