Matta 22
22
Baltaku a ki̱na
(Luk 14:15-24)
1N Yesu a ki̱la fwa chimi̱n ti̱n ya̱mu ki̱ni baltaku, a yi ko. 2Yaa diye a chir kami̱n ti wuka mai wu ki̱badu ka ma bweko mi̱n ye ki̱nai. 3A tum kabi kiyu ko a yala ni̱bu bi̱bu a ya di̱yal we ki̱namu, n chi a ko a bebu. 4A ki̱la tum ti̱n bi̱kam kabi a yi ko, “Ti̱fwa bi̱bu ni̱bu a ya di̱yalmu mi̱n ko, ‘N tu n do chabti̱tu, n bita tanti̱kai yiyiliyu, n do chiti kwang ti be fi a ki̱na!’ ”
5Aya n chi a swa̱ba ki̱n, n ka wure a tau wuko wa̱re a yika ti̱n, wuka a yika kuko, wuka a yika kwa̱ma̱r. 6Bi̱kamu n chi a tau ka̱biyu a ngau, a chiti̱ chi. 7M mai a kai ni̱ru nabwen. A tum ni̱bu kuni̱mu ko a chiben bi̱bu ki̱kau duti̱mu, a twiti̱ bi̱nchinu kwang. 8Yinu a yi kabiki̱yu ko, doku ki̱nangu a ri aya bi̱bu a ya di̱yalmu a lwebu. 9Di̱ne yiko, ti̱bunti̱ wa̱riyu, ni wu ta yade kwang, ti yale a be ki̱na. 10Ka̱biyu a yikan we wa̱riyu a mure ka wuwule niye bi̱yili̱mu n ti bi̱kwani̱mi kwang, ki̱na a ri ki̱ni rungko chib.
11Kangu m mai a le ki̱da̱ng ki̱nangu a ku wuka nii we mure wu a dobu luke ki̱na. 12A yi ni wu ko, fate a mayire mwan le mure mwang dowebu luke ki̱nange? Aya ni wu a kwalla chi ka fwaditu. 13Yinu m mai a yi ka̱biyu ko, ti kwau nii wu we Fa̱liyu n ti nani kiyu, ti̱mar ki̱n a ki̱liki̱liye wu kwane, we bwako ka ki wii ti ki̱rtiki̱ numang.
14Ni̱bu nabwen a ya di̱yalu, bi̱suti̱ri̱mi bayim.
Di̱bi̱du a feku sangal Kaisarang
(Mar 12:13-17; Luk 20:20-26)
15We fiko ni̱bu Farisamu a yikan, n chi a do kangu n chi ka si ki̱mi̱n la̱n we ya̱m ki̱mangu. 16N chi a tum miyari̱m chimu n ti bi̱kam ni̱bu Yirudu ko a yi ki̱n ko, “Tete ni̱n yim mun tum bi̱yili̱m, mun yungti̱ bi̱yili̱mu we wa̱re Kwama, ni̱bi kwang a fi wiin we di̱mune, di̱ne mwang swabu ni̱bu swabe. 17N fwa ni̱mi̱n, a dakan nang ni kaisar sangkala, ka ni̱n nidu wenga?”
18Aya n Yesu a swaan muli̱n chi̱nu a yi ko, “A mayire ti sweyu n ti̱n ni̱bu di̱bebeli̱me? 19Ti̱yungi ka̱mbi̱ru ti feen sangkali̱nu.” N chi a be ki̱mi̱ne ki̱ni ki̱nu ka̱mbi̱re. 20A yi chi ko, ki̱wulang ki̱ku n ti di̱n di̱du n di̱wure?
21N chi a yi ki̱n ko, n di̱kaisar, yinu a yi chi ko ti̱tu n ti̱u Kaisaritu ti̱ni Kaisar aya ti̱tu n ti̱u Kwamatu ti̱ni Kwama.
22Kangu n chi a nwengu a ya̱r yii, n chi a du ki̱n a tau ware chi a yikan.
Di̱bi̱du a kunku kwa̱miyang
(Mar 12:18-27; Luk 20:27-40)
23We di wuko, bi̱kam ni̱bu Sadukiyamu, bi̱bu ki̱yidu ko a ne kungku kwa̱miyang wengu, a be we di̱Yesuwe, a bi̱u ki̱n. 24N chi a yi ko, “Tete, m Musa a yi ko, ‘Ka nii a bwa a ne bwe wenge, keko ka na naye ko ke a bi̱u ki̱mi̱n bwesi̱m!’ 25Yinu bi̱kam kebu we bi̱dibiin bwesi̱m nii wiini̱m. Wusele a yiu naye, n ki̱n a bwa a yobu duumu, keko a be ki̱na naye. 26A fwe yiko ti wu robe, ti wu tare, a lanti̱ wu ni̱bine. 27A kutengu n chi a bwaranangu, naye wu a bwa ti̱n. 28We kabaku kwa̱mingu naye wu ka kau wu wure we tibe chi wu bi̱di̱bine. Di̱ne n chi ki̱ni kwang a na naye wu.”
29N Yesu a ki̱nta chi a yi ko, “Ti̱lele we ti̱kuran chi̱ntu, di̱ne ta yimbu ya̱m Kwamamu n ti dukan ki̱nu. 30Di̱ne we kunki̱ kwamiyangu, kwartabu a ne ka ma ki̱na, nati̱bu a ne ki̱na we ti̱nti̱n aya chi ka chirkadu ti ni̱bu ti̱tumbi̱ri Kwamam. 31Aya we kunki̱ Kwa̱miyangu, ta kibu chi ya̱m Kwamamu a fwa chimi̱ni̱nta? A mwal ko, 32Mi̱n nang Kwama wu Yibrayime, Kwama wu Yichaku n ti Kwama Yakubu we. N ki̱n Kwama ni̱bu ti̱kurime n ke wu a kwa̱miye.”
33Kangu ni̱bu a nwe yikongu, n chi a ya̱r yii we yungku kangu.
Yilang ki̱ku a la chiyang
(Mar 12:28-34; Luk 10:25-28)
34Yo ni̱bu Farisamu a nwe n Yesu a rii ki̱ni ni̱bu Sadukiyamu, n chi a mur dutu chitu. 35Wuka naba yungku yilange we tibe chi, a swe Yesu ki̱ni di̱bi̱du. 36A yiko, “Tete, ki̱ki̱le yilang a la chi we yili̱ntu?”
37N Yesu a ke ki̱mi̱n ko, “ ‘Mi̱la Kwama Tewuduwe ki̱ni ni̱r muni kwang n ti ti̱kuri mwitu n ti yingku mwangi kwang’ 38Ki̱ku nang yilang ki̱ka̱ra̱ngu, nang ki̱duwangi kwang. 39Ki̱robangu yilang tiyang ki̱kakkangu ti̱n, mi̱la kemo tiyang yimwiyu. 40Aya yili̱n ti̱tu n ti miyaku fa̱kuti kwang a swe we yili̱n ti̱ti turabitu.”
Di̱bi̱du a dur Masiyan
(Mar 12:35-37; Luk 20:41-44)
41Yo ni̱bu Farisamu a muran a fiwiine, n Yesu a bi̱u chi. 42A yi ko, “Ti̱kuran chi̱ntu m Masiya bwe wure?” N chi a yi ko n ki̱n Bwe Dauda.
43N Yesu a yi chi ko, yire wu n Dauda a yal ki̱n we Fi̱ki̱m Tewuduwe mu? A yi ko,
44N Tewuduwe a yi Tewuduwe mi ko, “Swenga kan ki̱yilang mangu, ka lami̱nti̱n yo fakwarbu mi̱mu ka kau ka̱bi mwiye.”
45Ka n Dauda ki̱yal ki̱nu ko, Tewuduwe, a mayire n ki̱n ka kau bweko?
46We dii wuko a ne nii a ki̱l ki̱mi̱n ya̱me we. A ne nii a ki̱la ma ki̱mi̱n ti̱n di̱kan di̱bi̱de we.
Currently Selected:
Matta 22: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
