Matta 17

N Yesu a sute bwiki

(Mar 9:2-13; Luk 9:28-36)

1A kuteng ditiyi yurukunangu, n Yesu a bungan n ti Biti̱r n ti Yakubu n ti ke Yakubuwe n Yowana, a yika di̱kan kun di̱swa̱mi̱n, n chi chikun we bwako. 2N Yesu a sute bwikiyu we fiko, kabuko ki̱yillu tiyang kuko diye, kuli̱n ki̱nu a fwiyeni mwe. 3Bi̱nabi̱na, miyari̱mi bi̱tamu a ku Musa n ti Yiliya ki̱fwa ya̱mu n ti Yesu.

4M Biti̱r a yi Yesu ko, “Tewuduwe, a le tiyangu n chi̱ni a fiyangu. Ka mwang kede mang ti ti̱kubiti ti̱tta di̱kanu n di̱mun, di̱kanu n di̱Musa, di̱kanu n di̱Yiliya.”

5Yo m Biti̱r a yaki̱ fwa ya̱me, di̱kan di̱twin mwe a be yinge chi we fiko. Bi̱nabi̱na di̱kan ker a chire we di̱twin di̱du ko, “Wu nang Bwe mi, wu mang mi̱lane, mi̱n nwe ta̱ma̱ng kangu yinang, ti̱ nwe ki̱n!”

6Kangu miyari̱m ki̱mu a nwe ker di̱dangu, tayi a tau chi, a yaran a swara kabi̱ni chiyu a ti̱m. 7N Yesu a be a twai chi a yi ko, “Ti̱kun, ti̱nwedu tayuwe we.” 8N chi a kukki̱ kabuni chiyu a kubu wuka nii we fiko, kana Yesu n ki̱kun.

9Yo n chi yaki̱ suwedu we kunne, n Yesu a wu chimi̱n ki̱teli ko, “Ti̱fwa wuka nii mi̱nu chi ta kuutu we ka lami̱nti̱ yo Bwe Nii ka kunnu we fure.”

10Miyari̱m ki̱mu a bi̱u ki̱n ko, “Di̱ne wule ni̱bu yungku yili̱ni̱mu ki̱yidu ko, a kabi ki̱ng, n fa̱ku Yiliya ka mwe beke?”

11A ki̱nta chi ko, a mwintuwe n Yiliya ka bedu, ka do ka ti̱ti̱le chiye. 12Aya mi̱n fwa chi mi̱nu, n Yiliya a tu a be, n chi a swaanbu, n chi a ma ki̱mi̱n ka ti̱ti̱le chiye yinang kangu a kur we ni̱tu chitangu. A lakanbu, Bwe Nii yaka nwe riye yiko we Fa̱li chiyu. 13Yinu fal miyari̱m ki̱mu a swaan ko ki̱fwa chimi̱n ya̱mu a dur Yowana naba batisma.

N Yesu a chakku ki̱fi̱bti a bwe ki̱ni ki̱kuliye

(Mar 9:14-29; Luk 9:37-43a)

14Tiyang ka n chi a lam fi ni̱bu a mura mi̱nengu, wuka nii a be a sung we kakku Yesungu, a yi ko, 15“Tewuduwe, nwe ki̱bune bwemiye, ki̱nwe riye nabwen we ki̱kuliyu. Wuka yo ki̱yar ti̱nu a ki̱rang ka a mwe. 16N ya miyari̱m mumu mi̱ni ki̱n mi ka we bedi ki̱ne, a yabu dawe.”

17N Yesu a ke ko, “Ki̱ku ki̱dang! A mayire ta kebu ki̱ni mi̱n, ti̱kur ka ya̱m bi̱kwani̱me? Ti̱badu mang swedu n ti chi̱ni yire, wu we ta kebu bi̱yili̱mu we di̱ mi̱ne? Bwanumi ka lanti̱ fere? Ti̱be ki̱ni bwe a fi.” 18N Yesu a yi ki̱fi̱bti ko, “Chir!” Ki̱fi̱btiyu a chir a dutu bwe. We ki̱swi wuko bwe a be ti̱n.

19A kuteng ki̱ku, miyari̱m ki̱mu a be, a ya ki̱n, yo a ne ni̱bu we, a bi̱u Yesu ko, “Wureni a yo n ni̱n nang yimbu chaku ki̱kuliye?”

20N Yesu a yi chi ko, “Di̱ne keku bi̱yili̱mang changu, a mwan, a ki̱tane. N ki̱n a chakakku ko, bi̱yili̱m mi̱n fwa chimi̱nu, ka n ti̱n ki̱ni keku bi̱yili̱mangu yinang ki̱kwi ki̱si̱raiye, ta yi kun di̱du ko, kun we fi, yikani bwa, kunnu ka yika ti̱nu.” A ne chi ka bwa chi̱ne we.

21[Aya ki̱duum ki̱fi̱bti̱m bi̱bu a chirbu we ni, ka n ke ka twa̱ba̱ku n ti da̱kku dimwene.]

Yesu a fwati̱ ya̱m bwakomu we ki̱da

(Mar 9:30-32; Luk 9:43-45)

22Wuka di yo n ki̱n a swe ti miyari̱m ki̱mu a Ka̱lili, n Yesu a yi chi ko, “Fakwarbu mi̱mu yaka ni Bwe Nii a fa̱li ni̱bii.” 23N chi ka chi̱u mi̱nu, aya n Kwama ka yodu mang kunu we wu tare di. Ya̱m bi̱bu a kai ni̱tu miyari̱m ki̱mitu.

Sangkal Kan Kwaman

24Ki̱daangu n Yesu n ti miyari̱m ki̱mu a lam Kafanawu mangu, ni̱bu bi̱bu ki̱mur sangkalu ka nang di̱di̱le swa̱re we ni̱bu Yafudam kwang di̱ne ke a dong Kan Kwamani̱mu, a ya we di̱Biti̱r, a bi̱u ko, “Naba lomo we ki̱fe sangkal Kan Kwamana?”

25M Biti̱r a ke ko, “Ngo, ki̱fedu,” Yo m Biti̱r a ki̱la lo, n Yesu a mwe a ma di̱bi̱du ko, “Simun, we da̱ngku mwangu, mati̱m mu ki̱yiu sangkalu a di̱wure, a bwesi̱m chima, ka a bi̱bu n ke bi̱chima?”

26M Biti̱r a yi ko, “A bi̱bu n ke bwesi̱m chim.” Yinu n Yesu a yi ko, “A kau bwesi̱m chimu a swi we feku sangkalangu.” 27Di̱ne ke ni kai chi mi̱nu ni̱r we, “Di̱ne yiko, ya n mar kolo we mwe nabwe fare, tau chi̱nge ka mwe leke, wudu yii ko, mwang ya ka̱mbi̱r we wu ka lwe sangkale. Fe sangkal munu n ti di̱mi̱ni ki̱n.”

Currently Selected:

Matta 17: Tula

Highlight

Copy