Matta 18

N wure a la chi ki̱ni dwiyentu

(Mar 9:33-37; Luk 9:46-48)

1We ki̱swi wuko, miyari̱mu a be we di̱Yesu we, a bi̱u ki̱n ko, “N wure a mwang a la chi we Yaa diye?”

2Yinu a yale wuka bwe wuti̱re a ti we tibe chi, 3a yi ko, bi̱yili̱m n fwa chimi̱nu, ka ta sutebu dati chiyu, ta kabu yinang bwesi̱m bi̱ti̱ri̱me, a ne ta le Yaa Kwama ko bayim. 4Di̱ne yiko, ni wu ka mar durki̱nu yinang bweti̱re, nang sele we Yaa Kwama. 5Ti̱nti̱ne, nii wu a yiu bweti̱re yinang wu a di̱n mi̱ne, a yiu mi̱n.

Chi ki̱yo yare

(Mar 9:42-48; Luk 17:1-2)

6Ti̱nti̱ne nii ka yo wuka bwe wuti̱re wu a ke bi̱yili̱m we di̱n mi̱nu mi̱n yare, a ma ki̱le. Ka la chi ni kwau ki̱mi̱n neer we kwiir ki̱nu, ni mar ki̱nu a ki̱sule fare. 7A no ti̱ti̱nitu di̱ne chi ki̱yo ni̱bu ki̱ma ki̱letiye, a kabbi ki̱n ki̱chiti̱ wu ka bedu, aya a no nii wu chitu ka bedu a di̱ki̱ne.

8Ka fa̱la̱ng n ti nang mwangu ki̱yonu ki̱ni ki̱letiye, mwatu n mar a bwa, ka la mi̱n chi mwang ya ti̱kuri ki̱diya kwadi ki̱ni ti̱kubi n ti ki̱ku fa̱la̱ng ka nange ka yodu mwang le far ki̱rang. 9Ka kwalangemo ki̱yodu mun ma ki̱lenge, chaku n mar a bwa, ka la chi mwang ya ti̱kuri ki̱diya kwaditu ki̱ni nu wiin n ti ki̱ku mwan le far a ki̱ranu ki̱ni nuyi yurau be.

Baltaku a kwami wu a laiye

(Luk 15:3-7)

10“Ti̱kedu ti̱swa̱badu bi̱bu a rubu we bunti̱ki̱mu we. Mi̱n yi chi̱nu, di̱ne ni̱bu ti̱tumbi̱ri chimu ki̱dang kabu Temi wu a diye. 11[Di̱ne Bwe Nii a be ka yu bi̱bu a laiyimu.]

12“Ti̱kuri yire? Ka ni ki̱ni kwanti kuule, yinu wuka wiin we tibe chi a laiye, n ki̱n a ne ka du yiyu wan turkubu chiri turkubiyu we nachangu yaka babba wu a laiya? 13Yinu ka yange, bi̱yili̱m mi̱n fwa chimi̱nu, ka mi̱ladu we ni̱r ki̱nu ka la yiyu wan turkubu chiri turkubu a laibiyu. 14A fi wine, Te chi̱n wu a diye a kebu wuka we bwesi̱m bi̱bu ka laiyu.

Ka kemo a ma ki̱le

15“Ka kemo a ma mi̱n ki̱le, yung ki̱n ki̱le ko, ti̱fwa ti̱ni burau, ka a nwene, m marti̱ ki̱n we wa̱re. 16Aya ka nwen be, bau wuka nii wiin ka burabe yati̱ dokan di̱ne ya̱mu a yiini ni̱bi burabi̱mu ka bi̱tange ki̱ti kwiir. 17Ka ni wu a nwebu chiye, fwa ni̱bu bunti̱ki̱m min, ka a nwebu ni̱bu bunti̱ki̱me, ti̱da̱u ni wu a yimbu Kwama, ka yinang ni̱bu ki̱yiu sangkali̱me.

18“Bi̱yili̱m mi̱n fwa chimi̱nu, chitu ta bwa̱u we ti̱ti̱nitu, a bwa̱u we bwadi.

19“Ti̱nti̱ne mi̱n fwa chimi̱nu, ka ti̱ni burau we ti̱ti̱nitu ti̱kekan a ti̱kan chi ti̱tu ti̱badu a di̱Kwamate, n Temi wu a diye ka ma chimi̱nu. 20Aya fi ni̱bi burau ka bi̱ta a muran mi̱n we di̱n mi̱ne, n mi̱n we ware n ti chi.”

Ka̱be wu a du nii mi̱n be

21Yinu m Biti̱r a be a yi Yesu ko, “Tewuduwe, kemi ka mami ki̱le ki̱da yile mang du ki̱mi̱nu, ki̱da yidibina?”

22N Yesu a ke ko, “N ke ki̱da yibidin aya yi̱di̱bi̱n wanti̱di̱bin. 23Di̱ne yiko, ni swe Yaa Kwama ki̱ni Mai wu ki̱baddu ka ta̱l chi a fa̱li ka̱bi kiye. 24Yo n ki̱n a mwe ki̱ta̱lle chide, ni̱bu a be ki̱mi̱ne ki̱ni wuka nii wu n ki̱n ki̱bunti̱ ka̱mbi̱riye. 25Kangu a yimbu fe di̱si̱nangu, naba loko a yo ni̱bu ko a feku ni wu n ti naye ko n ti bwesi̱m ki̱mu n ti kwali̱n chi̱n ki̱nu ki̱ni kwang a fen ka̱mbi̱ru. 26Yinu ka̱be a sung we kakku kangu ki̱wanadu ko, temiya, ma bwanu, mang fedu ki̱ni kwang. 27Yinu naba lo a nwe ki̱bune ka̱be, a du ki̱mi̱n di̱si̱n di̱du. A yi ko, a yikan.

28“Kangu ka̱be wu a chirengu, a tekan n ti wuka fate nangange ko, wu n ki̱n ki̱bunti̱ di̱si̱n ka̱mbi̱r surine, a sa ki̱n a kwiru ko, ‘Feyi di̱si̱n ka̱mbi̱r mi̱nu suriyu kuul.’ 29Yinu n fate nangange ko a sung ki̱wana ki̱nu ko, ‘Ma bwanu, we mang fenu.’ 30Aya ka̱be a ko, a yikan ki̱ni ni wu a di̱bi̱nti̱l, a lami̱nti̱ yo a fe di̱si̱ne. 31Yo bi̱kamu fati̱bu nangam a kuye, ni̱tu chitu a kaiyan, a yikan a fwa naba lo chi mi̱n chi a fweti kwang.

32“Yinu naba loko a yalle ka̱be wu, a yi ki̱n ko, ‘M mun ni wu kwane! N dumi̱n di̱si̱n munu di̱ne mwang kiimi wiye. 33A mayire ne mwang nwe ki̱bune fate nangange mo tiyangu mang nwe ki̱bune monge?’ 34Ki̱chiti̱ wu a fwi naba loko mi̱n ni̱r, a yo ni̱bu a ni ki̱n riye, a lami̱nti̱ yo n ki̱n a fe di̱si̱ne.”

35Yinu n Yesu a swa̱n ya̱mu ko, “Nang yinangu Te wu a diye, ka madu ki̱ni chi̱nangu, ka nii a dubu ke ko mi̱nbu ki̱leti kiye.”

Currently Selected:

Matta 18: Tula

Highlight

Copy