Yowana 8
8
Naye wu ni̱bu a taba ti̱kuliye
1N Yesu a yika Kun di̱du ki̱ni tini Setuniye. 2Ki̱ni si̱n, n Yesu a ki̱lati̱ Kan Kwamanu we. Ni̱bi kwang a mura ki̱mi̱ntuwe. N ki̱n a sweswe ki̱ miya chi mi̱nu. 3Ni̱bu yungku yili̱n Musa n ti ni̱bu Farisamu a be ki̱mi̱ne ki̱ni naye wu n chi a taba ti̱kuliye. N chi a yo naye a ti we tibe chi. 4A yi Yesu ko, “Naba yungke, ni̱n tau naye wu ki̱ma ti̱kuli. 5Yilang Musangu a yung ni̱n ko, ni̱ng kwela dum bi̱bu ki̱ni kali, ni̱n chi̱u, mun fal n fwa ko wule?”
6N chi a si la̱n di̱du ko ke chi tang ki̱n, chi yati̱ fi̱li chi mari̱ng keme ko. Aya n Yesu a swa kabu a ti̱m a mwal chitu we ti̱mu ki̱ni bewure ko.
7Kangu n chi a chakakku ki̱ni ti̱bi̱di̱ritangu, a kun a yi chi ko, nii wa mambu ki̱le we tibe chi̱ne, a mwe a mabi ki̱ni kale. 8N Yesu a sungtu kabu we ti̱mu, a mwal chitu.
9Yo n chi a nwe ya̱m bi̱be, n kawure ki̱chiri daan, ki̱yikati̱du. A mwetuwe seli̱bu, ki̱ni kwang. N chi a yaran a duka Yesu ti naye we fi a ti mi̱ne. 10Yinu n Yesu fal a kun a bi̱u naye ko, “Naye, n chi a bwa̱le? A ne ni a mwata ya̱me wenga?”
11Naye a ke ko, “Tewuduwe, a newe ko wiin.”
N Yesu a yi ko, “M mi̱n ti̱n ne mang ya̱n ya̱m, yikan yang du chi ti̱bwilaitu, chadu kakku we ki̱n.”
N Yesu nang yiiku ti̱ti̱niyangu
12N Yesu a chakakku ki̱ni ya̱mu ko, “Mi̱n nang yiiku ti̱ti̱niyangu, ka wuwule niye wu ka bumiti̱ne, a ne ya yayu a ki̱liye, aya ka yiiku ki̱ku a ti̱kuriyang.”#8:12 Mat 5:14; Yow 9:5.
13Yinu ni̱bu Farisamu a yi Yesu ko, “Mun mwa dur mun, ti̱nti̱ne, di̱mwar munu a ne bi̱yili̱mu we.”#8:13 Yow 5:31.
14N Yesu a ke chi mi̱n ko, “Kono mi̱n mwa dur mi̱n, mi̱n mwa bi̱yili̱m, di̱ne n yim bwa mang bemi̱ne n ti bwa mang yikande, aya n ti̱n, ta yimbu bwa mang yikande. 15Kabaku changu ki̱ku a niyang, m mi̱n mang kaba ni mi̱nbu. 16Aya kasi no mi̱n kabadu, mi̱n kaba bi̱yili̱m. Mi̱n n newe m mi̱kun mi̱n n we ware ti Te wa twiye. 17We yili̱n chi̱ntu a mwal ko, ‘Di̱mwaru a yini ni̱bi burabi̱nu di̱yili̱n.’ #8:17 Mwa 19:15. 18Mi̱n, mi̱n ma di̱mwaru a dur mi̱n m mi̱fwan, wu robe nii ki̱ma di̱mware nang Temi.”
19N chi a bi̱u ki̱n ko, “N te mun a fi̱re?”
N Yesu a ke chi mi̱n ko, “Ta yimbu mi̱n, ta yim ti̱bu Te. Ka no ti̱yim mi̱ne no ta yim Te.”
20N Yesu a fwa ya̱m bi̱bu a ki̱swi wu n ki̱n a yaki̱ ma miyaku ki̱dwan ti fi a kan ka̱mbi̱ri̱ne we Kan Kwamane. A ne nii a tau ki̱ne we di̱ne ki̱swiko a lambu.
Neta ying ya bwanu mi̱n yade
21N Yesu a ki̱la fwati̱n ki̱da ko, “Mi̱n mi̱n yikadu. Ta baiyu, ta bwaradu ki̱ni ki̱leti chiyu. A ne ta ying ya bwanu mi̱n yade.”
22Ya̱m bi̱bu a yo Bi̱duum ni̱bu Yafudamu ki̱twayadu ko, “Kano yaka chi̱u yikiya? Nang chi a fwa ko, a ne ta ying ya bwanu mi̱n yadea?”
23N Yesu a chakakku ko, “N chi̱n m bi̱u ti̱m, m mi̱n n chire a bwa diye. N ti̱n bi̱bu a ti̱ti̱nim, m mi̱n n ke wa ti̱ti̱niye. 24Nang chi mang fwa chimi̱n mi ta bwaradu ki̱ni ki̱leti chiyu, ka ta kebu bi̱yili̱mu ti m mi̱n nang wu mang yi mi mi̱n nangki̱ne.”
25N chi a bi̱u ki̱n ko, “Mun nang wure?”
N Yesu a yi ko, “Nang chi mang fwa chimi̱n yoko niyang mwe we ya̱me.” #8:25 yoko niyang mwe we ya̱me: Yikayu tatti̱ki̱dai a mwal ko, a mayire no mwang fwa chimi̱n ya̱me.
26Ya̱m mi̱mu nabwen bi̱bu mang fwadu we di̱chi̱ne mu, bi̱bu ka kau chimi̱n mwataki̱mu.
27Ni̱bu a swaanbu ko n Yesu ki̱fwa chimi̱n ya̱ma Temu. 28Nang chi a yo n Yesu a yi ko, “Ki̱dangu ta kukku Bwe Nii we ki̱tiyang bwangu, nang ki̱dangu ta swaanu ti mi̱n nangki̱nangu. Ta swaan ti̱du ti ma mabu chi a ki̱ke mi aya kana chi Te a fwa ko m maatu. 29N ki̱n wa twiye we ware ti mi̱n. A dubu mi̱n m mi̱kun, di̱ne mi̱n ma chi a ki̱keko kwadu.”
30Ni̱bu nabwen a ke bi̱yili̱mu a di̱Yesuwe, we a ki̱twalang ki̱ku n ki̱n a yaki̱ fwa ya̱ma̱ngu.
Bi̱yili̱mu ka chaku chi̱nu
31N Yesu a yi ni̱bu Yafudam bi̱bu a ke bi̱yili̱mu a di̱n ki̱nemu ko, “Ta kau miyari̱m mi̱m bi̱yili̱mu, ka ta marbu ya̱m mi̱mu a ti̱me. 32Ta yim bi̱yili̱mu, bi̱yili̱mu ka tu chi̱nu.”
33N chi a ke ko, “Ni̱n chire a ki̱kuwang Yibrayim, nang mambu ka̱bi we a mayire mwang yidu mwiko bi̱yili̱m ka tu ni̱ne?”#8:33 Mat 3:9; Luk 3:8.
34N Yesu a yi chi ko, “Bi̱yili̱mu mi̱n fwa chimi̱nu, ni wu ki̱ma ki̱letiye, a kau ki̱letitu mi̱n ka̱be. 35Ka̱be n ke bwe lo wu ki̱swedu ki̱diya kwade. Aya bwe lo, n we lo ki̱diya kwadu. 36Nang chi a yo ma yi mi, ka Bwe a tuune, a tuun ki̱yilang. 37We yuko n ti̱n ki̱kuwang Yibrayim, aya ti̱badu ta chiyu di̱ne ta kebu ki̱ni miyaki̱ mangu. 38Mi̱n fwa chimi̱n chi ma ku a Tetu, aya ti̱n ti̱ma chi ta nwe a tebu chimitu.”
Bwesi̱m fakwarem
39N chi a ke ki̱mi̱n ko, “Te ni̱n n Yibrayim. N Yesu a ki̱nta chi ko, Ka no te chi̱n n Yibrayime a no ta ma chi n Yibrayim a maatu.” 40Da̱ng ti̱badu ta chiyu, mi̱n wu mang fwa chimi̱n bi̱yili̱mu mang nwe a di̱Kwamamu. N Yibrayim a ma ya? 41Ti̱bunti̱ chi tebu chimu a maatu. N chi a yi ko, “Ni̱n n ke dum ki̱kulbi̱m ni̱n ki̱ni Te nang Kwama.”
42N Yesu a yi ko, “Ka no Kwama nang Te chi̱ne, a no ta mi̱layu, di̱ne n chire a bwa di̱Kwama. Ki̱ka̱ngu mi̱n ti chi̱n. Mang bebu a kurki̱ mang, aya n Kwama a twiye. 43Wule a yo ta swaanbu ya̱m mi̱me? Ta kebu miyaku mange? 44N ti̱n bwesi̱m Setan, nang te chi̱n. Ti̱ke ta ma chi ki̱badditu. We tile bi̱rke n ki̱n naba chike. A kebu bi̱yili̱mu di̱ne n ki̱n a newe ki̱ni bi̱yili̱mu we fur ki̱nu. N ki̱n a mi̱la ti̱kwanitu nang daako. N ki̱n nang te ti̱kwaniye. 45Aya m mi̱n wu mi̱n fwa chimi̱n ya̱m bi̱yili̱me, ta kebu bi̱yili̱mu we di̱mi̱ne. 46We tibe chi̱n n wure ka yidu ko m mi̱n naba ki̱letiye, ka mi̱n n ke naba ki̱letiye, a mayire ta kebu bi̱yili̱mu a di̱mi̱ne? 47Naba Kwama ki̱nwe ti̱kwa̱liyi Kwamatu aya n chi̱n ta nwebu di̱ne n ti̱n n ke ni̱bu Kwama.”
N Yesu n ti Yibrayim
48Ni̱bu Yafudamu a yi Yesu ko, “Nang lwebu yinangu nang yidu ko, m mun naba Samariya, m muni ki̱ni ki̱fi̱btiyanga?”
49N Yesu a ki̱nta chi ko, “A ne ki̱fi̱bti we dur mi̱nu. Mi̱n ni Temi dwiyentu aya n ti̱n, ti̱ni mi̱n riye. 50Mang babu dur mi̱nu mi̱n dwiyen aya wuka nii we ki̱bamidu. N ki̱n nang wu ki̱mwata ya̱me. 51Mi̱n fwa chi mi̱n bi̱yili̱mu, nii wu ki̱da̱u ti̱kwa̱li yii miye, a ne bwaangduwe.”
52We bi̱bu fal ni̱bu Yafudam a yi ko, “Ki̱ka̱ngu ni̱n yim ki̱fi̱bti we durmunu. N Yibrayim a bwa ti fa̱kuti Kwamayu, m mun mwiko ni ki̱ma nangangu ki̱ni ti̱kwa̱li yi mwite a ne bwaangduwe ko bayim. 53Mun kamadu n la tenu n Yibrayim ma? N ki̱n a bwa ti fa̱kubi̱bu. We kamaku mwangu, m mun n wure?”
54N Yesu a ke chi mi̱n ko, “Ka mi̱n ni dur mi̱nu dwiyene, dwiyen mitu ti̱kusi. M Temi wu ti̱yalu ko Kwama chi̱ne, nang ni wu ki̱ni mi̱n dwiyente. 55Kasi ki̱ku ta yim ki̱mbangu, mi̱n n yim. Ka n yi mi mang yim ki̱m be, mi̱n naba ti̱kwaniye. Aya n yim ki̱n mi̱n ma nangangu ki̱ni ti̱kwa̱li yii kitu. 56N te chi̱n n Yibrayim a ma furi mwen ko, ka no we ka ku ki̱dang mange. N ki̱n a mwiti̱n, a ku a ma ti̱mi̱lan.”
57Ni̱bu Yafudamu a yi ko, “Swa̱nti mwitu a lam ti̱bu wan tunu nang wu mwang yidu mwiko n ku Yibrayim ma?” #8:57 N ku Yibrayim: Yibrayim a kuuna?
58N Yesu a yi chi ko, “Mi̱n fwa chimi̱n bi̱yili̱mu, yo a tibu bi̱u Yibrayime, a ya m mi̱n we.”
59Kangu n chi a nwe bi̱bangu, a wo kali ko chi kwela Yesu, n Yesu a lai yikiyu, a chir a du Kan Kwamanu.
Currently Selected:
Yowana 8: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
