Yowana 7

Yesu ti kebu ki̱mu

1A kute ki̱ku, n Yesu a bwa̱lan a Ka̱lili yangu, aya a babu ka ya Yafudiya, di̱ne ni̱bu Yafudam we bwako, ki̱baddu ka chi̱u ki̱nu. 2Yiye tukubiye ni̱bu Yafudam a lame ki̱dang kangu.#7:2 Fan 23:34; Mwa 16:13. 3Kebu Yesumu a yi ki̱n ko, “A dakan mwang du fi mwang yika Yafudiya ke miyari̱m mumu a ku chitu mu maditu. 4Nii ki̱baddu ni̱bu ka ying ki̱nu yinange, ki̱madi kwa̱rikwa̱ri. Ka mun ma ti̱chituwe, mwang yung dur munu we ti̱ti̱nitu ke ni̱bu a swaani̱n.”

5N chi kebu Yesumu ti̱n, a kebu bi̱yili̱mu we di̱Yesuwe.

6N Yesu a yi chi ko, “Ki̱swimi a lambu, aya n ti̱n ka nang ki̱ki̱le ki̱dange a le chimi̱n. 7Ti̱ti̱nitu a ne medu ka ko chidu, aya ki̱ko mi̱nu di̱ne mi̱n mwa chidu we chi ti̱bwilaitu n chi ki̱maditu. 8Ti̱yika Yiye, mang yabu diidin,#7:8 Mang yabu diidin: Yikayu tatti̱ki̱dai a mwal ko, mang yabu. di̱ne ki̱swimi a lambu wu mang ya Yiye.”

9A kute ki̱ku n Yesu a fwa chimi̱n ya̱m bi̱bangu, a sweti̱ ki̱da we Ka̱lili.

N Yesu a Yiye ti̱kubiye

10A kuteng ki̱ku kebu ki̱mu a yika Yiyengu, n Yesu a be baran a ya Yiye, a yabi kwa̱rikwa̱ri. 11Bi̱duum ni̱bu Yafudamu a le ki̱babba ki̱nu we fi a Yiye, ko, “A bwa̱le ni wuko?”

12Bi̱kamu we muraki̱ku a le ki̱fwa ki̱nu we fiko ko, “Nii wu yile, bi̱kamu ko naba di̱buti̱re.” 13Aya a ne ni wa chire fi̱lang ki̱ni ya̱me we di̱ne n chi ki̱nwe taiyi bi̱duum ni̱bu Yafudamu.

N Yesu a ma miyaku a Yiye ti̱kubiye

14Ki̱dangu ti̱kalitu a bikanangu, n Yesu a ya Kan Kwamanu a ma miyaku. 15Bi̱duum ni̱bu Yafudamu a ya̱r yi, ko nii wa yabu miyaku ki̱duwang, n ki̱n a miyawe a fi̱re?

16N Yesu a ki̱nta chi ko, “Mang miyabu ti̱mi, aya ti̱tu n temi a tum mi̱netu. 17Ko wa sutu ka ma chitu n Kwama ki̱ baddite, ka yindu ko chitu mi̱n miyaditu a chire a di̱Kwama n ke ti̱mi. 18Wu ki̱miya chitu mang babite, ki̱bau di̱n, wu ki̱fumbwi ko ke ki̱ya wa tum ki̱ne mi̱n di̱ne, naba bi̱yili̱me, a ne di̱buti̱r we di̱ki̱ne. 19A mika m Musa a ni chi̱n yili̱nte? Aya ti̱ni ki̱ni kwang ti̱kii yili̱ntu. Ka a newe yuko, a ma yire ti̱badu ta chiye?”

20Ni̱bu nabwen a ke ki̱mi̱n we fiko ko, “Ki̱fi̱bti we durmunu, n bi̱wure ki̱baddu ka chi̱nu?”

21N Yesu a ke a yi chi ko, “M ma chi ka̱ta̱kiti wiin, aya n ti̱ni ki̱ni kwang ti̱ka̱ta̱n. 22M Musa a du chi̱n ko ti̱nang bii laar (Kasi ki̱ku bati̱tukebu a yo n ke Musangu) ta kwiyabu ti̱bitati̱n labitu we Difi̱kare ni̱bu Yafudam. #7:22 Chi̱ 17:10; Fan 12:3. 23Ka ta medu ta bii bwe mi̱n laaru we Difi̱kare ni̱bu Yafudame, di̱ne ke ti̱bunti̱ yilang Musangu, yinu a mayire ti̱kai ni̱ru ki̱ni mi̱n di̱ne mang be ki̱ni ni we Difi̱kare ni̱bu Yafudame? #7:23 Yow 5:9. 24Ti̱kadu ya̱mu we ki̱ni kamaku aya ti̱mwata ya̱mu yinang ka dakanang.”

Wu nang Masiya?

25Bi̱kamu ni̱bu Wurchalima a yiko, “Ni̱bem, nii wu n ke wu no chi ki̱baddu ka chida? 26Nang wa ki̱la ki̱fwa ya̱mu a tibe chi kwa̱rikwa̱ri a ne ni kiyi ki̱n ya̱me we. Ka tikaketi kwa̱l ni̱bu Farisamu a tu a ke ko, n ki̱n m Masiya? 27Ni̱n yim finu nii wa chirmi̱ne, ka Masiya wu yile, a benge a ne nii ka yim fi a chirmi̱ne we.”

28Yo n Yesu a yaki̱ miyadu we Kan Kwamane, a fwa ya̱mu ki̱ni dukan ko, “Ti̱yim mi̱n, ti̱yinti̱ fi mang chirmi̱ne, mang bebu ki̱ni dukan mi̱n, aya wa twiye, ki̱ni bi̱yili̱m, n ti̱n ta ying ki̱mbu. 29Mi̱n n yim di̱ne, n be a bwa a di̱ki̱ne, n ki̱n a tum mi̱ne.”

30N chi a ke ka tadu, aya a ne nii a mwiye we, di̱ne ki̱swiko a lambu. 31Ni̱bu nabwen a ke bi̱yili̱mu we fiko, a yi ko, “Yo m Masiya ka bede we beka ma chi ka̱ta̱ki ti̱tu ni wa maata?”

Bi̱duum ni̱bu Yafudamu ki̱baddu ka tau Yesu

32Ni̱bu Farisamu a nwe ko ni̱bu ki̱madi kungakunga ki̱ni Yesu, wuduwe fansetiye n ti ni̱bu Farisamu a tum dokariti yiyu a Kan Kwaman ko a ya tau Yesu.

33N Yesu a ki̱nta chi ko, “A du ki̱swi bayim ma swedu ti chi̱n, a kute ki̱ku ma ki̱la bwa a nii wa tum mi̱ne. 34Ta baiyu a ne ta yayu, bwa ma yade, a ne ta yin yadu.”

35Bi̱duum ni̱bu Yafudam bi̱bu a kebu Yesumu, n chi fal a yi ko, “Kano ki̱ya fi̱re wa ne ni yin ya ki̱ne? Ko kano ki̱ya bwana ni̱bu Yafudam bi̱bu a ti̱ran a swe ti ni̱bu Yelenamu, #7:35 Ni̱bu Yelenamu: ni̱bu Yelenamu n ke ni̱bu Yafudamu. yaka ni̱n miya chimi̱n da? 36Wureni a yo n ki̱n a yi ko ta baiyu neta yayu. Ko bwanu mi̱n yade a neta me yake?”

Mwe wa ti̱kuriye

37We di swete Yiye, di wu Yiye ki̱rbu ki̱rbu we ni̱bu Yafudam, n Yesu a ti a fwa ya̱mu ki̱ni dukan ko, “Nii ki̱nwe dimwene a be a di̱mi̱ne a no. #7:37 Fan 23:36. 38Nii ki̱ke bi̱yili̱m a di̱mi̱ne, neti̱bwi yiyu a ti̱kuri ka ni̱n fwadu we ni̱r wu ki̱ke bi̱yili̱me yinang ka mwal we ya̱m Kwamangu.” #7:38 Ese 47:1; Sak 14:8. 39N Yesu ki̱fwa ya̱mu a Fi̱ki̱m Kwamam a bi̱bu ni̱bu bunti̱ki̱mu ka yiddu a di̱ki̱nemu.

Fi̱ki̱m Kwamamu a tibu beduwe ki̱dang kangu, di̱ne n Yesu a tibu yiu dwiyen kitu.

Yaram a le tibe ni̱be a dur Yesun

40Kangu ni̱bu a nwe ya̱m bi̱bu n Yesu a fwamu, n chi a yi ko, “Ki̱kumang, wu nang fa̱ku#7:40 Fa̱ku: Da̱ng 1:21. wu m Musa a yiko ka bede.”

41Bi̱kamu a yiko, “Wu nang Masiya.” Bi̱kamu a kebu, ko Ka̱lili nang fi Masiya ka chirmi̱nedenga? 42N chi a yi ko, “Mare tatti̱ki̱dai yika̱riyu a fwa ko m Masiya ka chiredu a ki̱fi̱ku Daudang, a bwa Beti̱lami, a bebi̱ne n Dauda swemi̱ne.” #7:42 2Sam 7:12; Mik 5:2. 43Ti̱kuran ni̱bitu a ma dangdang we dur Yesunu. 44Bi̱kamu ko chi tau Yesu aya a ne nii a kuku kangu ko ka tadde we.

Bi̱duum ni̱bu Yafudamu a kebu bi̱yili̱mu

45Yo doka̱ritiya Kan Kwamana Wurchalimanu a ki̱lane, ni̱bu Farisamu n ti tikaketi fansetiye a bi̱u chi ko, “A mayire ta bebi̱ ki̱ne?”

46Ni̱bu tokumu n ti fanseti a ke chi mi̱n ko, “Wuka nii a fwaangbu ya̱m ki̱mu we.”

47Ni̱bu Farisamu a yi doka̱ritiyu ko, “A buti̱ti̱ chi̱na?” 48N chi a yi ko, “Bi̱kam we tikaketi kwa̱l ni̱bu Farisamu, a ke bi̱yili̱mu we ya̱m ki̱ma? 49N chi ka ti̱turan ko, aya ki̱ku muraku a yimbu chi we yili̱n Musatu, n chi ka bi̱bwilam.”

50N Nikodimu wa yaang we bwa a di̱Yesuwe, wu n chi wetuwe mure, naba Farisam. A yi chi ko, #7:50 Yow 3:1-2. 51“We yilang chirengu, n chi̱ni ni newe ki̱ni da ni kaba nii wu mi̱n ya̱mu, ka niyang nwebu chi we di̱ki̱nenge. Nang tiyangu ni swaan chi we murengu.”

52N chi a ke ki̱mi̱n a yi ko, “Mun naba Ka̱liliye ti̱nti̱na? Ta̱l tatti̱ki̱dai Kwamayu yinang, fa̱kubu Kwamamu a chirmi̱nebu#7:52 a chirmi̱nebu: Yikayu tatti̱ki̱dai a yi ko a ne chiredu. we Ka̱lili.”

53[N chi a yaran, n kawure a yika loko.]

Currently Selected:

Yowana 7: Tula

Highlight

Copy