Yowana 19

1Yinu m Bi̱latu a ni ni̱bu kuni̱mu Yesu ko a twalan. 2Ni̱bu kuni̱m mu a mu di̱ki̱ri̱n di̱du a kwa̱da a di̱ku we dur Yesunu, a yau ki̱mi̱nti̱ luke wu wurwure. 3N chi ki̱yadu yaki̱sungdu ki̱dati kwang ki̱fita ki̱nu, ki̱siidu ko, Mai Sa̱i, Mai ni̱bu Yafudam ni̱n siinu, ki̱ngati̱ni wa̱b, we kabu ki̱ni fa̱li chiyu.

4M Bi̱latu a chirti̱ fi̱langu ki̱da, a yi bi̱duum ni̱bu Yafudamu ko, nang wu mi̱n be chimi̱nedi ki̱n, ke ti̱yim tiko ma kubu ki̱leko. 5Yo n Yesu a chire ki̱ni kuli̱n n ti kwa̱da ki̱seli di̱du ni̱bu a yau ki̱mini̱ne. M Bi̱latu a yi chi ko, “Nii nang wu.”

6Yinangu tikaketi fanseti n ti bi̱kamu bi̱duumu a kuwangu, a bwe kemiyu ko, “Ti̱kukan, ti̱kukan.” M Bi̱latu a yi chi ko, “Ti̱da̱u ki̱n, ti̱kukan. M mi̱n mang yabu ki̱le we di̱ki̱ne.”

7Ni̱bu Yafudam a ke ki̱mi̱n ko, “Ni̱nni ki̱ni yilang. We yili̱n Musatu a dakan ka bwadu. Di̱ne a yi ko, n ki̱n Bwe Kwama.”

8M Bi̱latu a ki̱la ka̱ta̱n nabwen yinang ka a nwe ya̱m bi̱bangu. 9A ki̱latuwe loko, a ya bi̱u Yesu ko, “M mun naba fi̱re? Aya n Yesu a nibu di̱ki̱li̱n yiin. 10Yinu n Bi̱latu a yi ko, mu nweyi tuna? Mwang yimbu mwi m mi̱ni ki̱ni dukanu ma yo kukaki̱ mwangu, yinu m mi̱n ti̱n, ki̱ni dukanu ma mari̱na?”

11N Yesu a ke ki̱mi̱n ko, “M mun n newe ki̱ni di̱kan dukan we dur mi̱nu ka n ke di̱du n Kwama a ni ni̱ne. Aya wa tungiye a kang mwange, a la chi ki̱ni ki̱letiyu.”

12M Bi̱latu fal a no ke ka kwi ki̱nu. Aya bi̱duum ni̱bu Yafudamu a yi ki̱n ko, “Ka m mar nii we, mun n ke fate Kaisare. Nii wu a yung dur ki̱nu ko n ki̱n maiye, kati̱re Mai wuduwe Roma.”

13Yo n ki̱n a nwe ya̱m bi̱be, a chaku chi mi̱ne Yesu. Yinu m Bi̱latu a swe we kwer kabaki̱nu, di̱da bu kalinu. N chi ki̱yalu ko, “Kabata” ki̱ni yi Yafudame. 14Ki̱swi a lam fi a tibe diko, we di doku bwiyan Yiye yabake ni̱bu Yafudame. M Bi̱latu a yi ni̱bu ko, “Mai chi̱n nang wu.”

15N chi a bwe kemiyu ko, “Ti̱kukan, ti̱chiu.”

M Bi̱latu a yi chi ko, “Mang chi̱u Mai chi̱na?”

Tikake fansetiye a ke ko, “Ni̱n newe ki̱ni wuka Mai ka n ke Mai wuduwe Roma n Kaisare.”

16M Bi̱latu fal kangu chita bwa ki̱nangu, a ni ni̱bu kuni̱mu Yesu ko a ya kukan. N chi a tau Yesu a yikani ki̱n.

Ni̱bu kuni̱mu a kuka Yesu

(Mat 27:32-44; Mar 15:21-32; Luk 23:26-43)

17Yinu Yesu a da̱u ki̱tiyang bwangu ki̱tosada ki̱n fal, a yikan bwanu n chi ki̱yalu ko kasire, ni̱bu Yafudam ki̱yalu ko Kolkota. 18N chi a kuka ki̱n we bwako n ti bi̱kam ni̱bi burau we ba̱li̱n kitu. A di̱ku Yesu a tibe chi.

19M Bi̱latu a mwal mwarangu, a ku we di a ki̱tiyang bwang Yesungu. N ki̱n a mwa ni̱bu we chi n ki̱n a mwale ko, “YESU NABA NASA̱RETE, Mai NI̱BU YAFUDAME.” 20Ni̱bu Yafudam nabwen a ke di̱mwar di̱du. Di̱ne fi n chi a kukan Yesuwe a kwatuwe bi̱nu, a mwali yii ni̱bu Yibraniyamu n ti yii ni̱bu Yelenamu n ti yii ni̱bu Romame. 21Yinu tikaketi fanseti Yafudamu a yi Bi̱latu ko, a mwaluwe ko, Mai ni̱bu Yafudam. Ko n ki̱n ka mwalu ko, wa yiko n ki̱n Mai ni̱bu Yafudam.

22M Bi̱latu a yi ko, “Chi mang mwalitu m mwal.”

23Yinu ni̱bu kuni̱nmu, kanga ri kukaki̱ Yesungu, a da̱u kuli̱n ki̱nu a keran ti̱nti yana. Ka wuwule naba kune ki̱ni ki̱ti̱me. N chi a da̱uti̱ luke wu swa̱me wa kubu kuwe, wuki̱mari burume.

24N chi yi ko, “Wu luke a neni keradu, aya a ma sutuku we, ke nii ka chade ka yiti̱nu.”

A fwa ying ke ya̱m Kwamam bi̱bu ni̱bu a mwal ko,

“A kera kuli̱n mi̱nu a bwiti chi,

a ma sutuku we a luke miye a ri.”

Ni̱bu kuni̱nmu a ma yiko.#19:24 Sa̱b 22:18.

25Bi̱bu a tituwe ki̱tiyang bwamu, n ne ki̱n n ti wuwiye ke ne ki̱ne n ti Maryamu naye Kilobase. Yinu n ti Maryamu wu a Maka̱dala. 26Yo n Yesu a ku ne ki̱n ti miyare ko wu n ki̱n a mi̱lane, a tituwe a ki̱tiyang bwange a yi ne ki̱n ko, “Nene, bwemo n nang wuko.”

27Yinu a ki̱la yi miyare ko, “Ne mun nang wuko.”

Miyare a multuwe fiko a yikan lo ki̱ni naye wu.

Bwa Yesuwe

(Mat 27:45-56; Mar 15:33-41; Luk 23:44-49)

28A kute ki̱ku, n Yesu a yim ki̱ri nangangu, a yi ko, “Mi̱n nwe dimwen. Ke ya̱m Kwama ma fwamu a ri.” #19:28 Sa̱b 69:21; 22:15.

29Di̱kan di̱kuur a no we fiko ki̱ni mwe yinabi wu bwangbwange, n chi a da̱u soso yisobi a be di̱ku we mwe wu bwangbwange, yinu a da̱u ki̱kwale yisobang a kuku soso ki̱n a di̱ku ki̱mi̱n we yi. 30Yo n Yesu a twaiye, a yi ko a ri. A mar duri kwa̱lba̱ng, a bwa.

31Ni̱bu Yafudam a kebu kwa̱me ka lam Difi̱kare, di̱ne a le chi mi̱n ti̱n a diti Yei. Difi̱kare di wuduwe wa Yiye yabake. N chi a ya wana Bi̱latu ko, “A ni ni̱bu da a kiya naniyu we ni̱bu a ki̱tiyang bwamu, a si̱kte kwa̱miyu. Ko a dakabu kwa̱miyu kanodu a ki̱tiyang bwang we di wuduwe.”

32Ni̱bu kuni̱mu a be a kiya naniyu we bi̱bu n chi a kukan ti Yesumu. 33N chi a be, a ya Yesu a tu, a bwa. N chi a dutu nani kiyu ki̱ni ying, a ki̱yabu. 34Aya wuka naba kune a turi ki̱ni yangu we bale kwiye kutubu. Bi̱nabi̱na, ki̱tuum ti mwe a chire we bwiyu.

35Nii wu a kuwe a fwa bi̱yili̱m, di̱mwaru di̱yili̱n. A yim ko ki̱fwa bi̱yili̱m. A ma di̱mwar di̱du ko ke ni ke bi̱yili̱mu. 36Ki̱chitu wa fwe ke ya̱m Kwamam a ri bi̱bu a fwa ko, a ne ki̱tiyangu ni̱bu ka ki̱da bwi kiyangiyu we. #19:36 Chi̱ 12:46; Kik 9:12; Sa̱b 34:20. 37A wuka fi ya̱m Kwamam a fwa ko, n chi ka da̱ng nii wu n chi a kure. #19:37 Sak 12:10; DYo 1:7.

Furem Yesum

(Mat 27:57-61; Mar 15:42-47; Luk 23:50-56)

38A kute ki̱ku, n yusufu naba Arimatiya, miyare wa babu ka yung dur ki̱ni kwa̱rikwa̱riye di̱ne ki̱nwe tayi ni̱bu Yafudamu, a bi̱u Bi̱latu kwa̱me Yesuwe ko yaka da̱du. M Bi̱latu a ke ki̱mi̱n. N ki̱n a be da̱u kwa̱me Yesuwe a yikani ki̱n. 39N Nikodimu wa be mi̱ne we bwana di̱Yesuwe ki̱ni kume, a bungan ti Yusufu Arimatiya. N ki̱n a tatu kuli̱n furemi̱na fa̱la̱ng. N ki̱n a ya ki̱ni kuli̱n furemi̱n di̱di fi̱rfi̱ri̱n yinang mur ti los wu ni swe tureng kangu ka mwata swe bume. #19:39 Yow 3:1-2.

40N chi a dal Yesu ki̱ni yadi wu yile, a ma nangangu ki̱ni kuli̱n furemi̱ni fi̱rfi̱ri̱nu, ki̱ku n Nikodimu a ta̱nengu. N chi a bunti̱ yili̱n furki̱ niyangi ti̱ta ni̱bu Yafudamitu. 41Fi n chi a kukan Yesuwe a kwati̱na lambu. Fur di̱fwin we lambu, di̱du a furi̱nbu wuka ni wen. 42Yade ni̱bu Yafudamu ki̱do bwi yiya Yiye yabake, n chi a yo Yesu we fur di̱du, di̱ne a mabu kutan.

Currently Selected:

Yowana 19: Tula

Highlight

Copy