Yowana 18

Ni̱ba tau Yesu

(Mat 26:47-56; Mar 14:43-50; Luk 22:47-53)

1Yo n Yesu a ri twa̱ba̱ki̱ke a kun n ti miyari̱m ki̱mu a yika yiki̱me wu a Kidrone. Lambu we wuka ki̱swi. N ki̱n a le fiko n ti miyari̱m ki̱mu. 2Yade nang fi n Yesu n ti miyari̱m ki̱mu ki̱murande, n Yafuda wu a kwa̱l ki̱ne a yim fiko. 3Kangu n Yafuda a yiu kwa̱l ni̱bu kuni̱nmu ti tikaketi chiyangu, bi̱bu wuduwe fansetiyeye n ti ni̱bu Farisamu a tumemu, a ya ki̱ni chi we yiki̱me wu. N chi a le fiko ki̱ni kuniti n ti fiti̱lati n ti kuli̱n kuni̱n.

4Kangu n Yesu a yim chitu yaka fwedu ti ki̱nangu. A chire we yiki̱me wu, a bi̱u chi ko, “Ti̱baba wure?”

5N chi a ke ki̱mi̱n ko, “Ni̱n babba Yesu wa Nasa̱rete.” N Yesu a yi chi ko, mi̱n nangki̱n n Yafuda wu a kwa̱l ki̱ne, we ware ti ni̱bu a tituwe fiko. 6Kangu n ki̱n a fwa̱n ya̱mu ko, “M mi̱nangu,” n chi a ki̱lani kutengi bi̱nglang a yarana ti̱m.

7N Yesu a bi̱ti̱ ki̱da ko, “Ti̱bau wure?”

N chi a yi ko, “N Yesu wa Nasa̱rete.”

8N Yesu a yi chi ko, “A mang fwa chimi̱n mi m mi̱n nangki̱n. Ka ti̱baba mi̱ne ti̱du bi̱ba yikan.”

9Yesu a ma ying ko ke ya̱m ki̱ma ri. N ki̱n a fwa ko, ma laibu wuka ko wiin we bi̱bu mwang niiyimu.

10A ya Simun Biti̱r ki̱ni kul, a chake kuli fud a swi wuka ka̱be tikake Fanse ki̱n, a mwati̱ti̱ ki̱tele wa kang ki̱yilange wad. Ka̱be wu di̱n ki̱nu m malkus.

11N Yesu a yi Biti̱r ko, “Di̱ki̱ti̱ kul munu we le. A ne mang no ki̱dang kwa̱sengu n Temi a niiyanga?”#18:11 Mat 26:39; Mar 14:36; Luk 22:42.

N Yesu a kakku Anana

(Mat 26:57-58; Mar 14:53-54; Luk 22:54)

12Yinu ni̱bu kuni̱mu n ti bi̱duum fanseti Yafudam bi̱bu ki̱to semu a tau Yesu a kwaban. 13N chi a mwe a yikan bwa a di̱Anana. N Anana tela Kayafa, tikake Fanse we swa̱r di̱ki̱nu. 14N Kayafa nang wa no yi ni̱bu Yafudamu ko, “A mwintuwe wuka nii ka bwadu di̱ne bi̱kamu ni̱be.”#18:14 Yow 11:49-50.

M Biti̱r a kwila Yesu

(Mat 26:69-70; Mar 14:66-68; Luk 22:55-57)

15N Simun Biti̱r a bunti̱ Yesu n ti wuka miyare. Tikake Fanse a yim miyare wuko, n ki̱n a bunti̱ Yesu we bwa a sa̱ngka Fanse Wuduwe. 16M Biti̱r a lebu kwa̱ru a ti a fi̱lang. Yinu miyare wu tikake fanse a yime, a ya fwa fwa̱nu ki̱to kwa̱ri̱nu mi̱n ya̱m. Wuko a du Biti̱r a le mure.

17Fwa̱n ki̱to kwa̱ru a bi̱u Biti̱r ko, “M mun n newe miyari̱m ki̱ma, ka mun wenga?”

M Biti̱r a yi ko “Mi̱ni̱n newe miyari̱m ki̱mu.”

18Ni̱bu tokumu n ti fanseti n ti ka̱bi a kuka ki̱rangu ki̱wullu di̱ne ti̱mu ki̱ni suyi. M Biti̱r a ya ti chimi̱ntuwe, ki̱wul ki̱rangu.

Tikake Fanse a ma Yesu mi̱n ti̱bi̱di̱ri

(Mat 26:69-70; Mar 14:55-64; Luk 22:66-71)

19Tikake Fanse a bi̱u Yesu miyari̱m ki̱mu ti chi n ki̱n ki̱miyaditu.

20N Yesu a ki̱nta chi ko, “N fwa ti̱ti̱nitu mi̱n ya̱mi̱mi kwa̱rikwa̱ri, kwadu mi̱n miyadu we kanbi muraku ni̱bu Yafudam n ti Kan Kwamanu, fi ni̱bu Yafudam be ki̱murandi kwange.” A yi ko, “Ma fwabu ya̱m bi̱laari̱mu. 21A mayire mun bi̱iye? Bi̱u bi̱bu n chi a nweyimu, a yim chi ma fwaatu.”

22Kangu n ki̱n a riin ya̱m bi̱bangu, wuka we ni̱bu tokumu a ngau Yesu mwa! A yi ko, “A mayire mwang fwa Tikake Fanseti mi̱n ya̱mi ye?”

23N Yesu a yi ki̱n ko, “Ka mang lelenge, n fwami fi mang le mi̱ne, ka bi̱yili̱me, a mayire mun ngaiyu we bi̱yili̱me?”

24Anana a kwau Yesu chiku a tunga di̱Kayafa, wuduwe fansetiyeye.

M Biti̱r a kwilati̱ ki̱da ko ka yimbu Yesu

(Mat 26:71-75; Mar 14:69-72; Luk 22:58-62)

25Yo n Simun Biti̱r we ki̱wul ki̱range, n chi a yi ki̱n ko, “M mun wetuwe miyari̱m ki̱ma?”

M Biti̱r a yi ko, “Mi̱ni̱n newe miyari̱m ki̱mu.”

26Wuka ka̱be tikake Fanse, wu namang we tibe chi ti wu m Biti̱r a mwatu ki̱mi̱n ki̱tele. A kukte ya̱mu we ko, “Ki̱mamidu yinangu ma kuuntuwe yiki̱me n ti Yesungu.”

27M Biti̱r a kan ki̱tarangu a riye, kware a ta̱r ti̱n.

N Yesu a kakku Bi̱latusang

(Mat 27:1-2; Mar 15:1-5; Luk 23:1-5)

28Ni̱bu Yafudam a fwiti̱ kunsiin we, a twa̱ku Yesu we kakku Kayafa, a yikan bwanu a kwabna wuduwe Roma. Bi̱duum ni̱bu Yafudamu a yikani̱mu, a swe a fi̱lang we sa̱ngka Kwabna, a ko a lebu sa̱ngka kwabna, di̱ne n chi ki̱bau wauwade wu ka chan Yiye yabake. 29M Bi̱latu, Mai wuduwe, a ya bwana di̱chiye, a bi̱u chi ko, “Nii wu a ma ki̱le wureni?”

30N chi a ke ko, “Ka n ke nii wu kwane a no ne nang be mi̱nedi ki̱n.”

31M Bi̱latu a yi ko, “Ti̱yikani ki̱n, yati̱ kaba ki̱mi̱n n ti̱fwan, yinang kangu yili̱n Musatu a fwangu.”

Ni̱bu Yafudam a yi ko, “N ni̱ni̱n newe ki̱ni wuka da na chi̱u nii wu.”

32Ti̱ta fwe ke Ya̱mu n Yesu a no fwa a bwakomu a ri yiko. #18:32 Yow 3:14; 12:32.

33M Bi̱latu a ki̱lati̱ loko we ki̱da, a yi ni̱bu ko a be ki̱ni Yesu, yinu a bi̱u ki̱n ko, “M mun nang Mai ni̱bu Yafuda?”

34N Yesu a ke ki̱mi̱n ko, “Mun fwa chi mwang yimiya, ka wuka nii a fwa mi̱na?”

35M Bi̱latu ko, “M mi̱n naba ni̱bu Yafuda? Kuu ni̱bu chim ti tikaketi fanseti a be ki̱ni mun a di̱ mi̱ne. N kai wureni?” 36N Yesu a ke ko, “Mati̱n mita newe ti̱ti̱tnitu, ka no a newe yiko, mi̱n ki̱ni ni̱bu ka ma kuni̱mu, yoko bi̱duum fanseti ni̱bu Yafudamu a taiye. Aya mati̱n mitu n ke ti̱tu a ti̱ti̱ni.”

37M mai Bi̱latu fal a bi̱u ki̱n ko, “Yoye m mun maiya?”

N Yesu a yi ko, “M fwa bi̱yili̱m. Bi̱bemi ti beku ti̱ti̱niyang mangu di̱ne yiko. Ke n fwa bi̱yili̱mu, wa kwa̱l bi̱yili̱mi̱mu ka nweyu.”

Ni̱bu a mwata Yesu mi̱n bwa

(Mat 27:15-31; Mar 15:6-20; Luk 23:13-25)

38M Bi̱latu a bi̱u Yesu ko, “Bi̱yili̱mu wureni?”

A kuteng ki̱ku a fwa ya̱m bi̱bangu, a chir a yika bwa ni̱bu Yafudam, a yi chi ko, “Ki̱kumang mayabu nii wu ki̱ni ki̱le. 39Aya we da chi̱n, mi̱n kwi chimi̱n naba di̱bi̱ntle wiin we Yiye yabake. Ki̱ka̱ngu ti̱ke n kwi chimi̱ne Mai ni̱bu Yafudam?”

40N chi a yibi kuuu! Ko, “N ke ki̱n, aya m Barabas.” M Barabas wu n chi ki̱fwade di̱bwilan daaku.

Currently Selected:

Yowana 18: Tula

Highlight

Copy