Yowana 14

N Yesu a kum miyari̱m ki̱mu mi̱n ni̱tu

1N Yesu a yi chi ko, “Ni̱tu chi̱ntu a kaiyaduwe, ti̱ke bi̱yili̱mu we di̱Kwama, n ti mi̱n. 2Bwanu a di̱Temiye, loniyu we nabwen, ka no a newe yikono ma fwa chimi̱nu. Mi̱n yikadu yama ni̱n do chimi̱n fanti yiyu. 3Ka n yikan, n do fanti Yiye, mang ki̱ladu be mang da̱u chi̱nu ni yikadu, ta swedu a bwanu m mi̱n we mi̱ne. 4Ti̱yim wa̱re wu a bwa mi̱n yikande.”

5N Toma a yi ki̱n ko, “Tewuduwe, nang yimbu bwa mun yade, nang ying wa̱re yire?”

6N Yesu a yi chi ko, “Mi̱n nang wa̱re, mi̱n nang bi̱yili̱mu, mi̱n nang ti̱kuritu. A ne nii ka ya bwa a di̱Temiye we, ka n ke bwa a di̱ mi̱ne. 7Ka no ti̱yim mi̱ne, ta yim Temi. Bwa kake fal ti̱yim Temi, ti̱ku ti̱n.”

8N Filibu a yi ki̱n ko, “Yung ni̱n Tewuduwe, nang chi ni̱n badde.”

9N Yesu a yi ki̱n ko, “Ka mang tau mi̱n swedu ti chi̱ni fere, mwang swani ba Filibu? Wa kuye a ku Temi, a mayire mwang yidu mwiko n yungi̱n Te. 10Ta kebu bi̱yili̱mu tiko mi̱n we Te, yinu Te a di̱mi̱nenga? A ya̱mu mi̱n fwa chimi̱ndi̱mu n ke bi̱mi̱m, Te wu we ware a di̱mi̱ne ki̱chake ya̱m bi̱bu. 11Ti̱ke bi̱yili̱mu we di̱mi̱ne. Ti̱ke ya̱mu mang yi chi̱n mi m mi̱n we Te, yinu Te we di̱mi̱ne. Ka ta ke bi̱yili̱mu a chi ka̱ta̱kitu mang tau mi̱n madite. 12Bi̱yili̱m, mi̱n fwa chimi̱nu, ka n wure wa ke bi̱yili̱m a di̱mi̱ne, ka mati̱ nangi̱n ti̱tu ma tau mi̱n maditu. N ki̱n ka ma nangi̱n ti̱tu a la ti̱titu we ki̱ka̱ngu, m mi̱n, mi̱n yika bwa a di̱Temi̱yengu. 13Kasi no ti̱ti̱le chi ti̱tu ta bi̱du a di̱n mi̱nitu mang madu. Nang kangu n temi ka ya ri̱kaku we bwekongu. 14Kanang ti̱ti̱le chi ti̱tu ta bi̱du a di̱n mi̱nite mang madu.”

N Kwama ka tume Fi̱ki̱m ki̱mu

15“Ka ti̱ mi̱la mi̱ne, ta bunti̱ yili̱n mitu, 16Mi̱n mang bi̱u Te, ka tume Fi̱ki̱m ki̱mu, wu ka swedu ti chi̱n ki̱diya kwade. 17Fi̱ki̱m bi̱bu nang Fi̱ki̱mu ki̱yung bi̱yili̱m mi̱mu. Aya ti̱ti̱nitu a ne kedu di̱ne chi a kubu, a yin ti̱bu. Di̱ne a swe a di̱chine we chik ka ni̱n swedu we ni̱tu chi̱ntu. 18A ne mang du chi̱nu a babuni, ma ni̱ng be chimi̱nedu. 19Aya a ne tike, ni̱bu a ne kuyu we ti̱ti̱nitu, aya n ti̱n ta kuyu. Ti̱nti̱ne, di̱ne mi̱n wu kure, n ti̱n ta kau bi̱kuri̱m. 20We di wuko ta yindu tiko, m mi̱n a di̱temiye, n ti̱n a di̱mi̱ne, m mi̱n a di̱chine. 21Nii wu a yiu yilang mangu, yinu a tau ki̱bunti̱ne, nang wu a mi̱laye. N Kwama ka mi̱lati̱ ki̱nu, m mi̱n mang mi̱la ki̱nu mang yung ki̱n yimiyu.”

22Yinu n Yafuda (N ke Yafuda Yiskariyoti) a yi ko. “Tewuduwe, na swaanbu ya̱mu mwang yi mwiko mwang yung ni̱n yimwiyu a bwin ti̱ti̱niti̱mu.”

23N Yesu a ke ki̱mi̱n ko, “Nii wu a mi̱laye, ka tau ti̱kwa̱liyi mitu, n temi ka mi̱la wuko. Nang bedu na swedu n ti nii wuko. 24Aya wu a mi̱laibe, a ne bunti̱ ti̱kwa̱liyi mitu. Aya chi ta nwenge n ke ti̱mi, n ti Temi wu a tum mi̱ne.”

25N fwa chimi̱n ya̱m bi̱bu ki̱ka̱ngu m mi̱n we ti chinagu. 26Aya naba makare ka nang chikiye, Fi̱ki̱m Kwamam bi̱bu n temi ka tumedu di̱ne ke a suteyimu, ka miya chimi̱n chiti kwang, ka kur chimi̱nti̱ ya̱miyu mang fwaran ki̱dangu no chi̱ni wareyu. 27N du chi̱n li̱mang, n ni chi̱n li̱mang mangu. A lakan n ti li̱mangu ti̱ti̱ni ki̱nidangu, ni̱tu chi̱ntu a kaiyaduwe, ti̱ka̱ta̱duwe.

28Ti̱nwe yinangu ma fwa mi, mi̱n yikadu, mang ki̱late bwa a di̱ chi̱ne we, mang ya chi̱nu. Ka no ti̱mi̱laye, ta ma furi mwen, di̱ne mi̱n yika bwanu a di̱Te. N ki̱n a la mi̱n.

29Mi̱n fwa chimi̱n ya̱m bi̱bu yo chitu a tibu fwede. Ke yo ti̱chitu ka fwede ta ke bi̱yili̱m. 30A ne ki̱swi manni̱n fwa chimi̱n ya̱me we, di̱ne tikake Mai ti̱ti̱niye, n Setan a lame, kasi ki̱ku a ne dukan we a dur mi̱nangu. 31A dakan ti̱ti̱nitu ka yindu ko mi̱n mi̱la Kwama. Nang chi a yo mi̱n ma chi a ya̱iyitu yinang ka dakange. N Yesu a yi chi ko, “Ti̱kun, ni yikan.”

Currently Selected:

Yowana 14: Tula

Highlight

Copy