Yowana 13

N Yesu a nura miyari̱m ki̱mu mi̱n nani

1Kangu Yiye yabake a mwatawengu, n Yesu a yim ko ki̱swi ko a mwata ki̱riyedu, kano ki̱yika bwa a di̱Te ki̱ne. N ki̱n a mi̱la ni̱bu bunti̱ki̱mi kwadu, a yung chi yinangu ka mi̱la chi nabwenangu.

2Yo n chi a yaki̱ chau chabtu meete, n Setan a le ni̱r Yafuda Yiskariyoti bwe Simun, ko a ya kwa̱l Yesu. 3N Yesu a yim ko n Te a du chiti kwang a dukan ki̱n. A yim ko ki̱be a di̱Kwama, ki̱ki̱la bwa a di̱Kwama. 4N Yesu a kun we chaku chabtangu, a suku luke ko wu wuduwe, yinu a mu tawul we a taru. 5A kuteng ki̱ku, n ki̱n a yo mwe a kwa̱se, ki̱nura miyari̱m ki̱mu mi̱n naniyu, ki̱musu ti̱nu ki̱ni tawulu n ki̱na mu a tari̱nu.

6N Simun Biti̱r a to n Yesu ki̱bedu ka nura yikiye, a bi̱u ko, “Tewuduwe, be mwang nura nani miya?” A yi ko, “Kwako.”

7N Yesu a ke ki̱mi̱n ko, “Mwang yimbu chi mi̱n maditu, aya mwang swaan chi mi̱n maditu we bwa kake.”

8M Biti̱r a yi ko, “Tewuduwe, a ne mwang nura yimiyu nani ko bayim.”

N Yesu a yi ki̱n ko, “Ka mang nurabu nani mwiye, a ne mwang ya ki̱ti̱me we di̱ mi̱ne.”

9N Simun Biti̱r ko, “Tewuduwe, ka yiko, nurami naniyu ti fa̱liyu ti duri kwang.”

10N Yesu a yi ko, “Nii a ru mwe, ka bau kana nuraki̱ naniyang,#13:10 Nuraki̱ naniyang: Yikayu tatti̱ki̱dai a di̱ki̱bu ya̱m bi̱bu. di̱ne bwikiyu a ne dutu we. N ti̱ni wauwadu aya wuka chi̱n ki̱ni dutu, n ti̱n ti̱newe ki̱ni dutu, aya a ne we ki̱ni kwang.”

11N Yesu a yim nii wu yaka kwa̱l ki̱ne, nang chi a yo a fwa ya̱m bi̱bu ko, “Wuka we tibe chi̱n ki̱ni dutu. 12Yo n ki̱n a nura nani miyari̱m ki̱mu a riye, a doti̱ luke we, a ki̱lan a sweswe. A bi̱u chi ko, ti̱swaan chi mang ma chimi̱na?” #13:12-15 Luk 22:27. 13N Yesu a yi chi ko, “Ti̱yaliyu ti naba yungke, ti̱yal ti̱nu ti Tewuduwe, a le yiko, m mi̱n nangki̱n. 14Ki̱ka̱ngu m mi̱n, n Tewuduwe chi̱n, m mi̱n naba yungke chi̱n, n nura chimi̱n naniyu. N chi̱n ti̱n yati̱maka yichiyu. 15N yung chi̱n chitu ta ni̱n maditu, ya ti̱nang madi yiko. 16Bi̱yili̱m mi̱n fwa chimi̱nu, ka̱be a labu Tewuduwe ko. Fandu a ne la ni wa tum ki̱ne. 17Ki̱ka̱ngu ta yim bi̱yili̱mangu, ta ya delaku ka ti̱tume.”

N Yesu a fwa nii yaka kwa̱l ki̱ne

18“Mang fwabu ya̱m bi̱bu n ti chi̱ni kwang. N yim ni̱bu mang sutumu. Aya chi Ya̱m Kwamam a fwaatu ka ridu. Ya̱m Kwamamu a fwa ko, ‘nii wu mi̱n chau chabtu ware ka suliyu.’ ” #13:18 Sa̱b 41:9.

19“Mi̱n fwa chimi̱n ya̱m bi̱bu, ke ti̱siredu chi we yo ki̱chitu wu ka fwede. Ka a fwenge, ta yindu ko, ‘m mi̱n nang Masiya.’ 20Bi̱yili̱m mi̱n fwa chimi̱nu, ka wuwule niye wu ka yiu wu ma tume a yiu mi̱n. Wa yiu mi̱ne, a yiu wa twiye.” #13:20 Mat 10:40; Mar 9:37; Luk 9:48; 10:16.

N Yesu ko yaka kwa̱la̱du

(Mat 26:20-25; Mar 14:17-21; Luk 22:21-23)

21A kuteng ki̱ku a fwa ya̱m bi̱bangu, ni̱r Yesu a ma tureng nabwen. A fwa ko, “Bi̱yili̱m, wukane we tibe chi̱n ki̱yadu ka kwa̱liyu.”

22Miyari̱mu n kawure ki̱da̱ng fate wa̱la̱t a yimbu ka n Yesu ki̱fwa ya̱mu a wuwule niye. 23Wukane, wu n Yesu a mwan a mi̱lane a kwa ki̱mi̱ntuwe. 24N Simun Biti̱r a yung miyare wuko ko, “M bi̱u Yesu, mwi n ki̱n ki̱fwa wure?”

25Miyare wuko a ki̱re ki̱dwan n ti Yesu a bi̱u ko, “Tewuduwe, mu fwa wure we tibe nu?”

26N Yesu a ke ko, “Ki̱danne wu yamang wulade, mang ni wu mi̱n fwade. N Yesu a dwe a ni Yafuda bwe Simun Yiskariyoti.”

27A kuteng ki̱ku Yafuda a chau ki̱dannengu, Setan a le ni̱r ki̱nu. N Yesu a yi Yafuda ko, “Ya daatu, yang ma chi mun baddu mwang maditu.” 28Aya we bi̱bu ki̱chau chabtu mu, a ne ni a yim chi, a yo n Yesu a fwa Yafuda mi̱n ya̱m bi̱be we. 29Kangu swe ka̱mbi̱re a di̱Yafudangu, bi̱kamu miyari̱m a nwe ko kano n Yesu kiyi Yafuda ko a ta̱ne chabtu, ka ka ni ti̱lusanitu ti̱kan chiye. 30N ki̱n fal tiyangu a yiu ki̱danengu, a chir ti̱n. Aya kum a ma ki̱dang kangu.

Yilang ki̱fwiyang

31A kuteng ki̱ku, n Yafuda a yikanangu, n Yesu a yi ko, “Ki̱ka̱ngu Bwe Nii a ya dwiyen, n Kwama a ya ti̱n. 32A kuteng ki̱ku, n Kwama a yiu dwiyentu di̱ne ki̱nangu, n Kwama ka be ki̱mi̱nedu ki̱ni dwiyentu a ne ti ke.”

33N Yesu a chakakku ko, “Bwesi̱mi̱m, a ne ti ke ma du chi̱nu, ta baiyu a ne ta yayu, m fwa chimi̱n tiyangu ma fwa ni̱bu Yafudam mi̱nangu, a neta ya bwa mi̱n yade.” #13:33 Yow 7:34.

34“Aya ma ni chi̱n ki̱ku yilang ki̱fwiyang ti̱mi̱la yichiyu, Yinang kangu mang mi̱la chi̱nangu, Ti̱mi̱la yichiyu. #13:34 Yow 15:12; 17:1; 1Yow 3:23; 2Yow. 35Ka ti̱mi̱la yichiye, ka nang wuwule niye ka yindu ko n ti̱n miyari̱m mi̱m.”

M Biti̱r yaka kwila Yesu

(Mat 26:31-35; Mar 14:27-31; Luk 22:31-34)

36N Simun Biti̱r a bi̱u ko, “Tewuduwe, mun ya fi̱re?”

N Yesu a ke ko, “Ne mwang ying ya bwanu mi̱n yade. Aya we bwa kake mwang yadu.”

37M Biti̱r a yi ko, “Tewuduwe, a mayire ne ma ying bumi̱n ti̱nu ki̱ka̱nge? N ke mang bwadu a kuteng mwang.”

38N Yesu a bi̱u ko, “Ki̱kumang, mwang medu mwang bwadu di̱ne mi̱nna?” A yi ki̱n ko, “Bi̱yili̱m ma fwa mi̱nu Biti̱r, kware a ne ta̱ru mwang kwilayu ki̱da yitta, mwiko mwang yimbi̱ mi̱n.”

Currently Selected:

Yowana 13: Tula

Highlight

Copy