Zefaniah 3
3
Denen rok yu Jerusalem nge bayul riy
1Gafgow e nge tay yu Jerusalem, nib binaw nike sug ko kireb nge togopluw ni be gafgownag e girdi’ riy. 2Der ma motoyil ngak SOMOL ara fel’ u wan’ e fnow. Der ma pagan’ ngak SOMOL ara ning e ayuw ngak. 3Pi tolang riy e bod bogi layon ni be tolul; pi’in tapuf oloboch riy e yad bod e pi wolves ni kar uyngolgad, ni kari gel farad cholchol ni mada’ nga balay i yil ma dab ra paged nge kadbul ngay. 4Fapi profet e dariy ban’en nma m’ag rorad ni yad bogi sasalap; ma fapi prist e kar ta’ay niged e n’en nib thothup, ma yad ma dalib nag e motochiyel rok Got nge mang yad e fel’ ngorad. 5Machane SOMOL e ka be par u lan fare binaw; n’en nib mat’aw e be rin’ ya dariy e ngiyal’ nma rin’ ban’en nib kireb. Dariy reb e kadbul nde rin’ e tin nib mat’aw ko girdi’ rok. Ma girdi’ u rom nde mat’aw e go’ kireb e yad be rin’ ni dariy e ngar tamra’gad.
6Be ga’ar SOMOL, “Kug thirif e pi nam ni polo’ u but’; ma kug gathay e pi binaw rorad ke par e pi yoror nge pi tafen e damit riy ni dakriy woton u but’. Fapi binaw e dakriy be’ riy; ma yupa’ i kanawo’ e dakriy be’ ni be yan riy, ya dariy be’ ni magach. 7Ere gu leamnag ni aram e bay yib madgug u wan’ e girdi’ rog me m’ag u wan’rad e fanow rog, me siy ra paged talin e n’en ni kug fil ngorad. Machane de n’uw nap’an miyad ngongol nib gel e kireb riy ni bod kafram.
8Me ga’ar SOMOL, “Ere yug muson, muson nag fare rran ni bay gu sak’iy nggu togopluw ko pi nam. Kug turguy u wun’ug ni nggu kunuy e pi nam nga ta’bang ya aram e nggu pagrad ngar thamiyed gelngin e damumuw rog. Ga’ngin e fayleng nra mogothgoth ko damumuw rog ni be mo’oruf.
9“Ma aram e bay gu pingeg girdi’en e pi nam, ni kemus ni go’ gag e bay ur meybilgad ngog ma dakriy yug reb e got ngabang ni yad ra meybil ngay. Yad gubin ni bay urfol gad rog. 10Mus ko girdi’ ni gu weregrad nga Ethiopia nib palog e bay ra feked e maligach rorad i yib ngog. 11Gimed e girdi’ rog, re ngiyal’ i n’em e bayi dab kum tamra’gad ni um togopluwgad ngog. Bay gu chuweg e pi’in yad ba tolngan’ nge pi’in yab ba fenuwan’, ma gimed e dakriy e ngiyal’ ni gimed ra togopluw ngog u daken fare burey rog nib thothup. 12Bay gu tay e pi’in nib sobut’an nge pi’in gafgow u rom, ni bay urbad ngog ni nggu aywegrad. 13Girdi’ nu Israel nra magay nib fos e dariy ba kireb ni yad ra rin’ ngak be’, ma dab roged ban’en nib ban, ma ku dab ra guyed rogon ni ngar sasalpiyed ban’en. Bay i fel’ rograd miyad par ndariy ban’en nra buch rorad, ma dariy be’ ni yad ra tamdag ngak.”
Ba tangin e felfelan’
14Gimed e girdi’ nu Israel, mu tanggad mi gimed garusnag e felfelan’!
Gimed yu Jerusalem, mu felfelan’ gad u polo’ i lanin’med!
15I SOMOL e ke taleg e gechig romed;
ir e ke chuweg e pi to’ogor romed ni gubin.
I SOMOL, ni fare pilung nu Israel e be par romed;
ere dakuriy tapgin ni ngam rusgad e chiney.
16Arme nge taw ko fa ngiyal’ ni bay ra ga’ar gad ngak yu Jerusalem,
“Binaw nu Zion, dab mu rus!
Dab mu pag pa’am nge ul nga but’!
17Fare SOMOL ni Got romed e be par romed;
ni gelngin e be gel nagmed.
Bayi felfelan’ SOMOL ngomed,
ma fithik’ e t’ufeg rok e bayi pi’ reb e yafos nib be’ech ngomed.
Bayi tang ma be felfelan’ ngomed,
18ni bod feni felfelan’ e girdi’ u nap’an e madnom.”
I SOMOL e be ga’ar,
“Kug museg e gafgow romed
nge tamra’ romed ni kug chuweg.
19Arme nge taw ko fa ngiyal’!
Ni bay gu gechignag e pi’in ur gafgow naged gimed;
Bay gu ayweg e pi’in nib mugutgut
mug fulweg e pi’in yad ba kalbus nga taferad.
Bay gu pingeg e tamra’ rorad ko tayfan,
ma gubin e nam ni bay rogned e sorok ngorad.
20Arme nge taw ko fa ngiyal’!
Ni bay gu fulweg fapi girdi’ romed nra wear gad nga gubin e pi nam;
bay gu taymed nge gilbugwamed u ga’ngin e fayleng
mug fal’eg rogomed bayay.”
I SOMOL e keyog e pi thin ney.
Currently Selected:
Zefaniah 3: YAP
Highlight
Share
Copy
Want to have your highlights saved across all your devices? Sign up or sign in
© 2007 Bible Society of Micronesia. Released under the Creative Commons CC-BY-SA license 4.0.
