Luke 20
20
Ba de’er u murung’agen mat’wun Jesus
(Matthew 21:23–27; Mark 11:27–33)
1Reb e rran ni bay Jesus u lan e Tempel ni be machibnag fare Thin Ni Bfel’ ko girdi’, me cheag e pi tolang ko prist nge pi tamchib ko Motochiyel nge pi’in pi’ilal ngarbad 2me lungurad ngak, “Mog ngomed ko uw e yib mat’wum riy ni ngam rin’ e pin’ey? Me mini’ e ke pi’ mat’wum ni ngam rin’?”
3Me fulweg Jesus ngorad ni ga’ar, “Nggu fith bbugithin ngomed. Mogned ngog 4ko mat’wun John ni nge tawfe e yib rok Got fe yib rok e girdi’?”
5Miyad tabab i lulu’ag e thin u fithik’rad ni be lungurad, “Mang e nga dogned? Ya fa’anra lungudad e yib rok Got, mra ga’ar ngodad, ‘Ere mangfan nde mich u wun’med e thin ni i yog John?’ 6Ma fa’anra lungudad e yib rok e girdi’, ma pi girdi’ ney ni aray urngin ni yad bay u roy e yad ra malang nagdad, ya ke riyul’ u wun’rad ni John e immoy ni ir reb e profet.” 7Ma aram miyad fulweg ni lungurad, “Da gu nanged e en ni yib rok.”
8Me ga’ar Jesus ngorad, “Ere ku er rogog ndab gog ngomed ko uw e yib mat’wug riy ni nggu rin’ e pin’ey.”
Fanathin ni murung’agen e pi’in nni pag fan ba milay’ i grape ngorad
(Matthew 21:33–46; Mark 12:1–12)
9Ma aram me weliy Jesus e re fanathin ni ba’aray ngak e girdi’: “Immoy be’ nib mo’on ni yung ba mmilay’ i grape, me pi’ ngak e pi’in kar ninged ngak ni ngu’ur ayuweged, ma yad be fek boch i wom’ngin, ma yad be pi’ boch ngak ni puluwon, ma aram me yan ko milekag nib n’uw nap’an. 10Ma fa’ani taw nga nap’an ni ngan t’ar wom’ngin fa gi woldug, me l’oeg ba sib rok ngak fa pi’in kar ninged fa gi woldug ni nge fek e birok’ e f’oth rorad. Machane me pirdi’iy fa pi’in kar ninged fa gi woldug fare sib miyad pag nge sul ngak nde fek ban’en. 11Ma aram miki l’oeg reb e sib rok nge yan, ma fa pi’in kar ninged fa gi woldug e kur pirdi’iyed fa binem e sib, miyad moningnag nge mu’ miyad pag nge sul nde fek ban’en. 12Me l’oeg reb e sib rok ni aram e bin ni gaman e dalip ngak; miki maad’ad fa pi’in kar ninged fa gi woldug ngak, miyad tuluf nge yan. 13Me ga’ar fa’anem ni ir e suwon fa gi woldug, ‘Mang e nggu rin’? Nggu l’oeg fakag nrib t’uf rog nge yan; ya rib muduwgil ni yad ra tayfan!’ 14Ma fa’ani guy fa pi’in kar ninged fa gi woldug fa’anem ni fak me lungurad rorad, ‘Ireray fak fa’anem ni ir e suwon e re gi woldug ney. Ngad li’ed ngem’, mi ri mil suwon e gi woldug ney ngodad!’ 15Miyad yin’ nga wuru’ fa gi woldug miyad li’ u rom ngem’.
Me fithrad Jesus ni ga’ar, “Ere fa’anem nib mil suwon fa gi woldug ngak e mang e ra rin’ ngak fa pi’in kar ninged fa gi woldug? 16Ra yib nge li’ fa pi’inem ngarm’ad, me pi’ fa gi woldug ngak yugu boch e girdi’.”
Ma fa’ani rung’ag fapi girdi’ e re bugithin ney me lungurad, “Yigi siy i yodorom!”
17Me sap Jesus ngorad me fithrad ni ga’ar, “Mang e be yog e re bugithin ni ba’aray ni bay u lan e babyor nib thothup nike ga’ar:
‘Fare malang ni dabun e pi’in yad ma toy e naun, ya ra fineyed ndariyfan
e yan i aw ni aram e re malang ni ir e ba th’abi ga’ fan.’
18En nra mul nga daken e re malang nem e ra mesengseng; ma fa’anra mul e re malang nem nga daken be’, mra pirdi’iy nge ngal’ ni ab.”
Ba de’er ni murung’agen e tax ni yibe pi’
(Matthew 22:15–22; Mark 12:13–17)
19Fapi tamchib ko Motochiyel nge pi tolang ko prist e ra guyed rogon ni ngar koled Jesus ngar feked ni ka chingiyal’ nem, ya kar nanged nike weliy e re fanathin nem ni yad e ba togopluw ngorad; machane yad be tamdag ngak e girdi’. 20Ma aram mu ur guyed rogon e ngiyal’ nrayag riy. Miyad pi’ puluwon boch e pumo’on ngranod ngak Jesus ni ngar fithed yu bugithin ngak ni susun e riyul’ ni yad ba’adag ni ngar nanged e fulweg riy, machane yad be guy rogon ni nge aw Jesus ko wup rorad ko thin ni ngar fithed ngak, ni fan e nge yag nra pi’ed Jesus nga pa’ e cha’ ni ir e am nu Roma ni bay mat’wun nge gelngin. 21Me yan i ga’ar e pi girdi’ nem ngak Jesus, “Tamchib, gamad manang ni tin ni ga be yog ma ga be machibnag e bmat’aw. Gamad manang ni ta’reb rogon e girdi’ ni gubin u wun’um, ma ga be fil e tin riyul’ ni murung’agen e tin nib m’agan’ Got ngay ni ir e nge rin’ e girdi’. 22Mog ngomad, gur ba togopluw ko Motochiyel rodad ni ngad pi’ed e tax ngak e Emperor nu Roma fa danga’?”
23Me nang Jesus e ban rorad me ga’ar ngorad, 24“Mu daged ba salpiy ni silber ngog. Mini’ e ya’an owchen nge fithingan e ba’aray riy?”
Miyad fulweg ni lungurad, “I Emperor.”
25Miyad fulweg ni lungurad, “ Emperor nu Roma.” Ma aram me ga’ar Jesus ngorad, “Ere mpi’ed ngak e Emperor nu Roma e tirok’ ban’en, mi gimed pi’ ngak Got e tirok’ Got ban’en.”
26Ma aram e de yag ni nge aw ko wup rorad u rom u p’eowchen e girdi’, ma aram miyad par ni kar th’abed gulungrad, ma kar gin gad ko tin ke fulweg.
Ba de’er u murung’agen e fos ko yam’
(Matthew 22:23–33; Mark 12:18–27)
27Me yib boch e Sadduse ngak Jesus, ni aram e picha’ ni yad ma yog ni dabi fos e girdi’ ko yam’. Miyad fith ngak ni lungurad, 28“Tamchib, i Moses e yoloy e re motochiyel ni ba’aray ni fan ngodad ni ga’ar, ‘Fa’anra yim’ be’ nib mo’on me digey e bpin rok ni dariy e bitir rorow, ma aram e thangri leengiy e en ni walagen fare mo’on fare pin ngar diyengow ni fak fare mo’on nike yim’. 29Immoy medlip i walag ni pumo’on; bin th’abi ilal rorad e mabgol, me yim’ ndariy fakrow fare pin. 30Me le’ay e en ni migid ko fapi walag fare pin, 31ma aram e n’en ni rin’ e en ndalip ko fapi walag; yad medlip ni aram e n’en nra ngongliyed — miyad yim’ ndariy bagayad nra diyengow fare pin. 32Mfini yim’ fare pin u tomur. 33Ere fa’anra ni faseg e pi’in karm’ad ko chirofen ni ngan faseg e yam’ riy, me mini’ e arorad nra mang fare pin leengin? Ya yad medlip nra leengiyed fare pin!”
34Me fulweg Jesus ngorad ni ga’ar, “Pumo’on nge ppin e yad be mabgol ko biney e tamilang, 35machane pumo’on nge ppin ni pi’in bay rogorad ni ngan fasegrad ko yam’ ngu’ur pired ko bin ni bay yib e tamilang e dab kur mabgolgad. 36Ya kar boded e pi engel ndabkiyag ni ngarm’ad. Ma kar manged pifak Got, ni bochan e kan fasegrad ko yam’. 37Mi Moses e ri micheg nib tamilang ni bay ni faseg ko yam’ e pi’in karm’ad, ni be yog ko fa gin’en ni bay fare thal i yol riy ni murung’agen fachi ke gek’iy ni be daramram ni be weliy murung’agen Somol riy ni ir e Got rok Abraham, me ir e Got rok Isak, me ir e Got rok Jakob. 38Fan e ren’ey e ir e Got rok e girdi’ nib fos, ma gathi Got rok e girdi’ nib yam’, ya rogon ni be guy Got e girdi’ e yad urngin ni yad ba fos.”
39Me non boch e tamchib ko Motochiyel ni lungurad, “Tamchib, rib fel’ e fulweg riy ni kam pi’!” 40Ya aram e daki ga’aran’rad ni ngu’ur fithed boch ban’en ngak Jesus.
Ba de’er u murung’agen fare Messiah
(Matthew 22:41–46; Mark 12:35–37)
41Me ga’ar Jesus ngorad, “I di’in minog ni fare Messiah e ra yib ni ir owchen e ganong rok David? 42Ya David e yog u lan e babyor ko Psalm ni ga’ar:
‘I Somol e ga’ar ngak e Somol rog:
Mpar iray nga ba’ ni mat’aw rog,
43nge yan i mada’ ko ngiyal’ ni bay gu tay e pi to’ogor rom nga tan e rifrif u em ni nge mang tagil’ e magif ko rifrif u em.’
44David e pining ‘Somol’ ngak. Ere ra di’in me yan i aw ni fare Messiah e ir owchen David?”
Jesus ni yog ni ngan ayuw rok e pi tamchib ko Motochiyel
(Matthew 23:1–36; Mark 12:38–40)
45Nap’an ni be motoyil fapi girdi’ ni aram urngirad ngak, me ga’ar Jesus ngak pi gachalpen, 46“Mu ayuwgad rok e pi tamchib ko Motochiyel, ya yad ba’adag ni ngu’u ranod ni ka ron’ed e mad nib n’uw, ma yad ba’adag ni ngu’un siro’ ngorad ko gin ni bay e market riy; ma ku yad ba’adag e chiya ni kan tay u lan tafen e mu’ulung i yan nib muduwgil e girdi’ ntagil’ nge yungi n’en nth’abi fel’ ni yima par riy ko pi madnom ni yima tay; 47yad e picha’ ni kar felan’gad u puluwon e pi’in ni ppin nike yim’ figirngirad ni yad be leag e naun rorad, ma yad be fek e meybil nib n’uw, ni yad be guy rogon ni ngu’un guyrad! Ere gechig ni yira pi’ ngorad e ri kab gel!”
Currently Selected:
Luke 20: YAP
Highlight
Share
Copy
Want to have your highlights saved across all your devices? Sign up or sign in
© 2007 Bible Society of Micronesia. Released under the Creative Commons CC-BY-SA license 4.0.
