Injil 20: Iakub 4

Mair-dorbaror kuṭi

1Tumrar maze kuai tone mair-dorbar ar ḳaijja foyda oy? Tumrar shukor ḳaishe shorilor ze rifue laṛai kore, ogu taki-u ae. 2Zeta tumrar nae, ota tumra mone mone sao, erlagi tumra kun ḳoro. Ar lalos ḳoro oile fao na, erdae tumra mair-dorbar ar ḳaijja ḳoro. Tumra to sao na, erdae fao na. 3Ar saile-o fao na, ḳaron tumra to bod niote sao, zela tumrar monor ḳaish fura oy.

Duniar dust Allar dushmon

4O beiman oḳol, tumra kita zano na ni, duniar loge dustir mani Allar loge dushmoni? Ze duniar mayae buṛi zae, he Allar dushmon oizae. 5“Amrar bitre ze ruhu deoa oise, ikṭae amrare ingshar bae ṭane.” Pak Kitabor ou talim kunu emne batail oise ni? 6Oile ita taki amrar ufre Allar rohomot aro beshi. Erlagi kitabor maze leḳa ase, “Boṛai korrar ufre Allae at tuloin, oile norom manshore rohom ḳoroin.” 7Gotike tumra Allar zimmae roia Shoytanor mukabila ḳoro, teu he tumrar ges tone bagibo. 8Allar bae sao, teu tain-o tumrar bae saiba. O gunagar oḳol, tumra nizore fak-saf ḳoro, O du-dila manush, tumrar dil ḳaṭi koro. 9Duke ḳator oia ahazari koro, ashir bodla ḳando, kushir bodla mattom ḳoro. 10Mabudor dorbaro noto o, teu tain tumrare usa ḳorba.

Gibot ar bisar

11O bai oḳol, tumra eḳzone aroḳzonor gibot gaio na. Ḳeu zudi bair bodnam gae ba tar bisar ḳore, er mani he shoriotor bodnam ḳorlo ar shoriotor bisar ḳorlo. Tumi zudi shoriotor bisar ḳoro, te to shoriot manrae na, ulṭa tar bisar ḳorat ḳaṛa oiso. 12Shoriot ar bisaror ḳemota ḳali eḳzonor ato-u ase. Tain-u basain, tain-u maroin. Te ari-forir bisar ḳorra tumi aroḳzon ḳe?

Fuṭani deḳaio na

13Huno, tumra zara ḳo, aiz ba ḳail amra omuk ṭauno zaimugi, gia hono eḳ boros roia ḳay-ḳarbar ḳoria lab ḳormu. 14Oile ḳailkur ḳobor to tumra zano na. Tumrar zindegi-u ba kita? Tumrar zindegi to ḳosu fatar fani, tuṛa shomoy taḳe, bade foṛizae. 15Erdae ila na ḳoia ola ḳo, “Inshalla, amra hayati faimu, ar ota-hota ḳormu.” 16Oile tumra to boṛai koria fuṭani deḳairae. Ilaḳan fuṭani bala nae.

17Ḳeu zudi zania-o bala ḳam na ḳore, te he gunar bagi oibo.

Currently Selected:

Injil 20: Iakub 4: sylL

Highlight

Copy