Tourat 1: Foyda Nama 30

1Rahelae zebla deḳla, tan goro Iakubor kunu aolad oira na, ou shomoy tan bonir bae ingsha foyda oilo. Tain Iakubre ḳoila, “Amare aolad deo, naile ami morizimu!” 2Teu Rahelar loge Iakube kub gusa ḳoria ḳoila, “Ami kunu Alla ni? Tain-u to tumar feṭ bond ḳori disoin.” 3Rahelae ḳoila, “Hunoukka, amar bandi Bilha ono ase, afne tair gese zaukka, tairedi hurutta faia ami-o hurutta-ala oizitam fari.” 4Oḳan ḳoia hari Rahelae tan bandi Bilhare Iakubor gese hanga dila, ar Iakub tair gese roila. 5Teu Bilhar goro Iakubor eḳ fua oilo. 6Ar Rahelae ḳoila, “Allae amare insaf ḳorsoin, ar amar ahazari hunia egu fua disoin.” Tain i fuar nam raḳla Dan [mani, insaf]. 7Bade Rahelar bandi Bilhar goro hirbar Iakubor dusra fua foyda oilo. 8Ar Rahelae ḳoila, “Boinor loge moha laṛait ami zitsi.” Ou tain i fuar nam raḳla Noftali [mani, laṛai].

9Leae zebla deḳla tan goro ar hurutta oira na, teu tain-o tan bandi Zilpare Iakubor gese hanga dila. 10Teu Lear bandi Zilpar feṭo Iakubor eḳ fua oilo. 11Ar Leae ḳoila, “Amar ḳofal kulche!” Tain er nam raḳla Sadu [mani, ḳofal]. 12Bade Lear bandi Zilpar goro Iakubor aroḳ fua oilo. 13Ar Leae ḳoila, “Amar ḳoto shuk! Hoḳol beṭinte amare shuki koiba.” Teu tain i fuar nam raḳla Ashir [mani, shuki].

14Gom daoar shomoy Rubene bondo gia kisu dutra-guṭa faia, tan ma Lear gese ania dila. Ar Rahelae Leare ḳoila, “Tumar fuar ḳoygu dutra-guṭa amare deo sain.” 15Leae ḳoila, “Tumi amar zamaire doḳol ḳorso, itae oise na ni? Oḳon amar fuar dutra-guṭa-o sairae ni?” Rahelae ḳoila, “Taile tumar fuar dutora-guṭar bodla aiz rait tain tumar loge roiba ne.” 16Hainja bala Iakube bondo tone aite-u Leae bar oia tane ḳoila, “Aiz amar loge roibae, ḳaron amar fuar dutora-guṭar bodla ami tumare aolat nisi.” Ou hi rait tain Lear goro hutila. 17Allae Lear dua kobul ḳorae, tan goro Iakubor fas nombor fuar zonom oilo. 18Ou Leae ḳoila, “Amar zamair gese amar bandire dislam ḳori, Allae amare er bodla dila.” Erlagi tain i fuar nam raḳla Isaḳor [mani, bodla]. 19Bade hirbar Lear goro Iakubor soy nombor fuar zonom oilo. 20Leae ḳoila, “Allae amare bout boṛo eḳ niamot dila. Oḳon amar zamaie amare dam diba, ḳaron ami tan soygu fuar zonom disi.” Tain i fuar nam raḳla Sobulon [mani, dam]. 21Heshe Lear eḳ fuṛi oilo, tair nam raḳla Dina.

22Allae Rahelar bae-o kial ḳorla. Tain Rahelar dua kobul ḳoria, tanre hurutta foydar takkot dila. 23Ar Rahelar goro eḳ fua oile tain ḳoila, “Allae amar shorom horaisoin.” 24Tain i fuar nam raḳla Iusuf [mani, baṛani]. Tain ḳoila, “Mabude amare arogu fua baṛai deukka.”

Hozrot Iakub (a:)or don-shompod baṛise

25Rahelar goro Iusuf oar bade, Iakube Labonre ḳoila, “Oḳon amare bidae dilaukka, ami nizor deshor baṛit zaigi. 26Afne to zanoin, ami kila afnar gulami korsi, ami amar bouain ar fua-fuṛir lagi afnar gulami korsi. Oḳon tarare loia amare zaite deukka.” 27Labone tanre ḳoila, “Amar lagi zudi tumar maya taḳe, te zaio na. Ami alamote buziar zen, tumar ḳatire Mabude amare-o borkot nazil ḳorsoin. 28Tumar beton tumi nize-u ḳoilao. Ami tumare ola-u dimu.” 29Ou Iakube tanre ḳoila, “Ami kila afnar gulami korsi, ar amar ato afnar foshur fal kilaḳan oise, ita afne-u zanoin. 30Ami aoar age afne gorib asla. Ar oḳon to baṛia boutta oise. Amar ḳarone Mabude afnare bout borkot disoin. Oile amar nizor foribaror lagi kundin ḳamai kortam?” 31Teu Labone ḳoila, “Ami tumare kita ditam?” Iakube ḳoila, “Afne amare kunta-u na dia zudi amar egu mat raḳoin, te ami hirbar afnar foshur falor kezmot ḳormu. 32Ami aiz afnar foshur falor maze gia, fuṭa fuṭa dagala ar ḳala ar sitra meṛain ar sagolor maze sitra ar fuṭa fuṭa rongor hokkolṭi amar beton babot nimugi. 33Teu afne zebla-u betonor ḳarone aiba, i shomoy deḳba, amar imandarie amar lagi zuaf dibo. Ar fuṭa fuṭa dagala ar ḳala ar sitra meṛain ar sagolor maze sitra ar fuṭa fuṭa rongorta saṛa ar kunta faile mono ḳorba, ami suri korsi.” 34Ou Labone ḳoila, “Aichcha, tumar ḳota-u ṭik taḳouk.” 35Labone hou din-u fal taki lamba dagala ar sitra sagol, fuṭa fuṭa dag ar sitra tuṛa tuṛa dola sagin ar ḳala meṛa oḳol algaia nizor fuaintor gese dilaila. 36Dia tain Iakubor ges taki tin dinor fot duroi horia gelagi ar Iakube Labonor baki fal oḳolre raḳat roila.

37Iakube libni, lauz ar armun gasor ḳasa ḍal ḳaṭia ufre taki baḳol falaia ḍalor maze lamba lamba dola dag dila. 38Sagolor fale aia zeḳano fani kain, tain ou baḳol falail dagala ḍal oḳol, hono fanir gamlar samne toila. Ar fani kaoar shomoy era fal ḳaito. 39Teu ou ḍalor gese aia fal ḳaoae tarar baichchain-o sitra, lamba dagala ar fuṭa fuṭa rongor oita.

40Bade tain ou baichchain algaita, ar Labonor ḍura-ala ar ḳala meṛaintor bae meṛintor souk raḳaita. Ou laḳan tain, tan nizor falre Labonor falor loge milaita na. 41Ar zurala meṛi-saginte fal ḳaoar shomoy, tain gamlat tarar souḳor samne ou ḍal oḳol toita, 42oile ḳomzur foshur samne i ḍalain toita na. Teu Labonor foshuin oita ḳomzur, ar Iakubor foshuin oita zurala. 43Ou laḳan ḳam ḳoria tain bout doni oila. Tan gulam-bandi, uṭ-gada ar foshur fal bout baṛigelo.

Currently Selected:

Tourat 1: Foyda Nama 30: sylL

Highlight

Copy