Tourat 1: Foyda Nama 29

Hozrot Iakub (a:) mamar baṛit gela

1Bade Iakube aṭi aṭi fubor deshor manshor elaḳat gelagi. 2Gia honor bondor maze ek kua deḳla. Hou kuar gese tin fal meṛa huti roise; raḳal oḳole on tone tarare fani kaoain. Ar kuar muko boṛo eḳ fattor toa oise. 3Hoḳol meṛar fal zebla ekḳano oito, teu raḳal oḳole kuar muk tone fattorgu horai dia meṛaintore fani kaoaito. Bade fattorre hirbar kuar muko toito.

4Iakube tarare zikaila, “Bai oḳol, afnara kun zagar manush?” Tara ḳoila, “Haran ṭaunor.” 5Ou tain ḳoila, “Afnara Nahuror nati Labonre sinoin ni?” Tara ḳoila, “Ji oy, sini.” 6Iakube zikaila, “Tain bala asoin ni?” Tara ḳoila, “Ji oy, bala asoin. Ounu tan fuṛi Rahelae meṛar fal loia aira.” 7Tain ḳoila, “Deḳoukka, oḳono bout beil ase. Te foshu oḳol ekḳano oibar shomoy to oise na. Afnara meṛaintore fani kaoaia hirbar raḳat loia zaingi.” 8Tara ḳoila, “Na, amra ila ḳortam fari na, hokkol fal ekḳano dola oile bade kuar muk tone fattor horaia amra meṛaintore fani kaoai.”

9Tain oḳono tarar loge mato roisoin, ou shomoy Rahelae tan bafor meṛar fal loia ono aila, tain i falor raḳalit asla. 10Iakube tan mamu Labonor fuṛi Rahelare ar tan meṛar fal dekia-u kuar gese gia kuar muk tone fattorṭa horaia meṛaintore fani kaoaila. 11Bade tain Rahelare maya dia zure zure ḳandita lagla. 12Ar tain Rahelare ḳoila zen, tain Labonor baigna, Rebekar fua. Ou Rahelae douṛaia gia tan bafre i kobor dila.

13Labone tan baigna Iakubor ḳobor hunia douṛaia tan loge deḳa ḳorat aila. Tanre ainja ḳori doria hunga dia baṛit loia gela. Gia harle Iakube Labonre tan aibar hokkolta zanaila. 14Labone ḳoila, “Tumi to amar-u zan ar amar-u gust.” Ar Iakub Labonor baṛit eḳ mash roila.

Hozrot Iakub (a:)or dui bia

15Eḳ mash bade Labone Iakubre ḳoila, “Tumi amar kuṭum oilae ḳori bina betone amar saḳri kortae ni ba? Tumare kita ditam, ḳoilao.” 16Labonor duiṭa fuṛi asil. Boṛogur nam Lea ar hurugur nam Rahela. 17Lear ḳali souk-u shundor asil, oile Rahelar goṭon ar sehara-surot, hokkolta shundor asil. 18Iakube Rahelare fosond ḳorta ḳori tain ḳoila, “Afnar huru fuṛi Rahelar lagi ami shat boros afnar gulami kormu.” 19Labone ḳoila, “Rahelare manshor ato deoar saite tumar gese deoa-u bala. Tumi amar gese ro.” 20Teu Iakube Rahelar lagi shat boros gulami korla. Rahelare mohobbot ḳorta ḳori, ita eḳo boros tan gese eḳ dinor homan mono oilo.

21Heshe tain Labonre ḳoila, “Amar gulamir miad furi gese. Oḳon amar boure amar ato shomzaia deukka, ami tair gese roitam sai.” 22Teu Labone hou elaḳar hoḳol manshore biar daot ḳoria ḳana-dana ḳaoaila. 23Heshe rait oile tain tan fuṛi Leare Iakubor gese dila, ar Iakube en loge roila. 24Labone nizor bandi Zilpare, tan fuṛi Lear bandi girit dila. 25Oile biane uṭia deḳoin, ein to Lea. Teu Iakube Labonre ḳoila, “Afne amar loge ita kun zator ḳam ḳorla? Oto din ami Rahelar lagi afnar gulami korsi nae ni? Te amare duka dila ḳene?” 26Labone ḳoila, “Boṛo fuṛir age huru fuṛir bia deoa amrar deshor sol nae. 27Tumi biar kushi-bashir haftaṭa faroite deo. Teu hi fuṛire-o tumar gese bia dimu, oile tumi aro shat boros amar gulami korte oibo.” 28Iakube tan ḳota mania ou kushi-bashir hafta far ḳorla. Bade Labone tan fuṛi Rahelare-o Iakubor gese shadi dila. 29Ar tan bandi Bilhare Rahelar bandigirit dila. 30Iakube Rahelar loge-o roila, tain Lear saite Rahelare beshi maya ḳorta. Bade tain aro shat boros tan mamu Labonor gulami korla.

31Oile Leare maya na ḳorae, Mabude Leare hurutta foydar ḳemota dila, ar Rahela niaoladi roila. 32Ar Lear goro eḳ fua oilo. Tain fuar nam raḳla Ruben [mani, fuare deḳo]. Tain ḳoila, “Mabude amar duk deḳsoin, oḳon nichchoy amar zamaie amare maya ḳorba.” 33Bade hirbar tan goro eḳ fua oilo. Tain fuar nam raḳla Shimion [mani, hunoin], tain ḳoila, “Amare elami korar ḳota Mabude hunchoin, erlagi tain amare ou fua disoin.” 34Bade hirbar tan goro eḳ fua oilo. Tain ḳoila, “Oḳon amar zamaie amar loge ashik oiba, tan tinṭa fua amar feṭ tone foyda oilo.” Ou er nam raḳla Lebi [mani, ashik]. 35Bade hirbar tan aro eḳ fua oile tain ḳoila, “Ifira ami Mabudor tarif ḳormu.” Ar tain ou fuar nam raḳla Ehuda [mani, tarif]. Erbade tan hurutta oa bond oigelo.

Currently Selected:

Tourat 1: Foyda Nama 29: sylL

Highlight

Copy