Tourat 1: Foyda Nama 27

Hozrot Iakub (a:) (27:1—36:43)

Hozrot Isʼhak (a:)e huru fuare dua dila

1Murobbi boyosho Isʼhakor souḳor zuti komi zaoae tain ar souke deḳta na. Tain tan boṛo fua Ishʼre anaia ḳoila, “Babare.” Ishe zuaf dila, “Ounu ami.” 2Tain ḳoila, “Deḳo, ami to buṛa oigesi, kundin morizimu ḳoitam fariar na. 3Tumi egu ḳam ḳoro; tumar atiar, tir-donuk loia zongolo shikaro zao, ar amar lagi kunta shikar ḳoria, 4amar fosondor bala ḳani toiar ḳori ano, teu morar age ita ḳaia amar zane tumare dua dibo.”

5Isʼhake zebla tan fua Ishʼor loge ita matira, i shomoy Rebekae ita hunchila. Teu Ish zebla shikaro gelagi, 6tain aia tan fua Iakubre ḳoila, “Huno, ami hunlam tumar bafe tumar bai Ishʼre ḳoira, 7‘Tumi amar lagi kunta shikar ḳori bala ḳani toiar ḳoro, teu ami morar age ota ḳaia, Mabudor samne tumare dua dimu.’ 8Te re fut, ami tumare oḳon zeta ḳortae ḳoimu, tumi oula hunio. 9Tumi gia fal taki duiṭa taza ḳoshi ano. Ami itadi tumar bafor shoḳor ḳani, asanoḳ moza ḳori randia dei. 10Teu tumi ota loia tumar bafor gese zaio, tain ita ḳaia morar age tumare dua ḳorba.” 11Iakube tan maʼre ḳoila, “Huno, amar bai Ishʼor shoril to ruma-ala, amar shorilo to ruma nae. 12Zudi babae amar shorilo atain, te mono ḳorba ami tane duka diar, taile ami duar bodla aro lannot ḍakia anmu.” 13Teu tan maʼe ḳoila, “Futre, tumar i lannot amar ufre-u foṛouk. Tumi kali amar matḳan huno ar ḳoshiguin ania deo.” 14Ou Iakube gia ḳoshi ania tan maʼre dila. Ar tan bafe zela shok koroin, tain oula moza ḳori randila. 15Bade tain goror maze toa boṛo fua Ishʼor bala bala ḳafoṛ-sufoṛ ania tan huru fua Iakubre findaila. 16Iakubor ato ar golat ze zagat ruma nae, hou zagat ou ḳoshir samṛa lagai dila. 17Ar nizor randa hou mozar ḳani ar ruṭi tan fua Iakubor ato dila.

18Iakube tan bafor gese gia ḍaḳ dila, “Baba.” Isʼhake zuaf dila, “Ounu ami, tumi ke re fut?” 19Iakube tan bafre ḳoila, “Ami afnar boṛo fua Ish. Afne amare zela ḳoisla, ami oula ḳorsi. Doya ḳori uṭia boukka, amar shikaror gust ḳaukka, ḳaia harle afne amare dua diba.” 20Isʼhake tan fuare ḳoila, “Babare, tumi oto zoldi shikar failae kila?” Tain ḳoila, “Afnar Mabud Allae milai disoin.” 21Ou Isʼhake Iakubre ḳoila, “Baba, amar ḳasat ao teu tumar gotro at dia buzmu, tumi hasau amar fua Ish ni.” 22Iakub tan baf Isʼhakor aro ḳasat gela. Tain shorilo ataia ḳoila, “Golar aoazṭa Iakubor, oile at duioḳan to Ishʼor.” 23Iakubor at tan bai Ishʼor moto rume bora asil ḳori Isʼhake tanre sinla na. Ou tain Iakubre dua dila. 24Tain zikaila, “Tumi kita hasau amar fua Ish ni?” Iakube ḳoila, “Ji oy baba.” 25Ou Isʼhake ḳoila, “Fuar shikaror gust amar gese ano, ita ḳaia harle amar zane tumare dua dibo.” Iakube gust loia aile tain ḳaila. Bade tanre anguror shorbot dile tain eota ḳaila. 26Heshe tan bafe ḳoila, “O fut ao, ḳasat aia amare hunga deo.” 27Ou Iakube ḳasat gia hunga dila, ar Isʼhake tan shorilor ḳafoṛor geran hungia tanre dua dila, “Deḳo, amar fuar geran to Mabudor borkoti ketor geranor laḳan. 28Allae asmanor kua tone ar roshail zomin tone tumare deukka; bout foshol ar anguror shorbot tumare deukka. 29Hoḳol manush tumar gulam ouk, hoḳol zatie tumar gese mata nuauk. Nizor zator maze tumi boṛo murobbi o, tumar maʼr feṭor baiainte tumar gese mata nuauk. Ze tumare lannot dibo, tar ufre lannot foṛouk. Ze tumare dua ḳorbo, he rohomoti ouk.”

Baf taki faona dua Shek Ishe araila

30Isʼhake Iakubre dua ḳora shesh oile, Iakub tan baf Isʼhakor samne tone horte-u, tan bai Ishe shikar loia goro aila. 31Tain-o bala ḳani toiar ḳoria bafor gese loia aia ḳoila, “Baba, uṭia boia afnar fuar shikaror gust ḳaukka, ḳaia harle afnar zane amare dua diba.” 32Ou tan bafe ḳoila, “Tumi ke?” Tain ḳoila, “Baba, ami to afnar boṛo fua Ish.” 33Ar Isʼhakor shorilo bezuita ḳafa shuru oilo. Ḳafi kafi tain ḳoila, “Taile amar gese shikaror gust loia ze aisil, igu ḳe? Tumi aibar age-u ami ota ḳaia tare dua disi, ar duar fol he-u faibo.” 34Bafor mat hunia-u Ishe ekebare buk bangia sillaia tan bafre ḳoila, “Bazan, amare, amare-o dua ḳoro!” 35Isʼhake ḳoila, “Tumar baie aia soturi koria tumar faona dua nisegi.” 36Ishe ḳoila, “Tar nam Iakub [mani, dukabaz] nae ni? Hasau he duibar amare duka dise. Boṛo fua hishabe amar malikana he age suri kori nisil, ar deḳoukka, ifira amar dua-o loia gelogi.” Tain firia ḳoila, “Afne amar lagi kunu dua-u raḳsoin na ni?” 37Isʼhake zuaf dila, “Huno, ami tare tumar neta banaisi, ar tar gusṭire tar gulam banaisi, tare foshol ar anguror shorbot dia samani korsi; oḳon tumar lagi ar kita ḳortamre fut?” 38Ishe firia tan bafre ḳoila, “O bazan, afnar gese kita ou eḳ dua-u asil ni? Bazan reba, afne amare, amare-o dua ḳoroukka!” Ota ḳoia tain zure zure sillaia ḳandat lagla.

39Ou tan baf Isʼhake ḳoila, “Tumar boshotḳanar maṭi nirosh oibo, hino asmanor kua-o foṛto nae. 40Toluar-u tumar zindegi oibo, ar nizor bair gulam oibae; oile zebla tumi na-manra oizibae, ou shomoy nizor gordona taki tar zual horaibae.”

Hozrot Iakub (a:) Shek Ishʼor ges tone bagila

41Iakube tan bafor ges tone dua faisla ḳori Ishe tanre ingshaita lagla. Ishe mone mone ḳoila, “Amar bafor lagi moutor ḳandonor din aichche. Erbade-u tare kun ḳormu.” 42Rebekae tan boṛo fua Ishʼor ita mata-mati hunla, teu huru fua Iakubre anaia ḳoila, “Huno, tumar bai Ishe tumare kun ḳorar niote dilre bandilaise. 43Amar fut, tumi amar matḳan huno, tumi Haran ṭauno amar bai Labonor gese horia zaogi, 44ar tumar bair gusa na ḳoma forzonto tan gese taḳo. 45Tar gusa ḳomigele, tumi tar loge zeta ḳorso ita he faurilile, ami kobriadi tumare anaimu. Kitallagi ami eḳdine tumra duiozonre araitam?”

46Bade Rebekae Isʼhakre ḳoila, “Ou Hiṭṭi fuṛintor lagi amar ar basar shad nai. Iakube-o zudi ou laḳan, i deshor kunu Hiṭṭi fuṛire shadi korilae, taile amar ar basia-u lab kita?”

Currently Selected:

Tourat 1: Foyda Nama 27: sylL

Highlight

Copy