Tourat 1: Foyda Nama 26

Hozrot Isʼhak (a:)or gese Allar oada

1Ibrahimor zomanar laḳan ifira-o desho hirbar eḳ nidan deḳa dilo. Teu Isʼhak Gerar ṭauno Filistini oḳlor bashsha Abimalikor gese gelagi. 2Ar Mabude Isʼhakre didar dia ḳoila, “Tumi Mishoro lamia zaio na. Ami tumare ze deshor ḳota ḳoimu, ono-u takio. 3Ou desho tumi musafir oia ro. Ami tumar loge roia, tumare borkot nazil ḳormu. I desh oḳol ami tumare ar tumar oarish oḳolre dimu. Ar tumar baf Ibrahimor gese ami ze ḳosom ḳorslam, oḳṭa fura ḳormu. 4Ami tumar oarish oḳolre asmanor terar laḳan behishab ḳormu, ou desh oḳol-o tarare dimu. Tumar oarishredi, duniair hoḳol zatie borkot faiba. 5Ibrahime amar mat hunia, amar hukum, amar ain ar amar shoriot oḳol amol ḳorse.”

6Teu Isʼhak Gerar ṭauno roila. 7Ar hinor manshe tan bour ḳota zikaile, tain ḳoila ein amar boin. Enre bou ḳoite tain ḍoraila, mone ḳorla, Rebeka shundori koria hinor manshe Rebekare neoar lagi tanre kun ḳoriliba. 8Isʼhak bout din hono roar bade eḳdin Filistini oḳlor bashsha Abimalike tan kiṛki baedi saia deḳla, Isʼhake tan bibi Rebekare maya ḳorra. 9Dekia tain Isʼhakre neoaia ḳoila, “Deḳoukka, Rebeka to ashole afnar bibi, te afne ḳene tanre afnar boin ḳoila?” Isʼhake zuaf dila, “Ami mone ḳorslam tair lagi amar zan araimu.” 10Teu Abimalike ḳoila, “Amrar loge afne ita kita bebohar ḳorla? Zekunu manshe to afnar bibir loge mila-misha ḳorto sailo one ar afne amrare dushi banaila one.” 11Bade Abimalike hoḳol manshore ou hukum zari korla, ḳeu zudi Isʼhak ba tan bibir shorilo at dey, tare nisoy zane mara oibo.

12Ar Isʼhake hi boros ḳet ḳoria tan zomino rua bis taki eḳ-sho gun beshi foshol faila, Mabude tanre oula borkot nazil ḳorla. 13Tan ḳali baṛte-u laglo, aste aste tain kub maldar oigela. 14Tan goru-sagol ar gulam-bandi oula baṛlo zen, ita dekia Filistini oḳole ingshaita lagla. 15Ar tan baf Ibrahimor amolo, tan gulam oḳole ze kua oḳol kudisla, Filistini oḳole iguin maṭidi boria bond ḳorilaisla. 16Bade Abimalike Isʼhakre ḳoila, “Afne amrar ges tone zaukkagi, afne to amra tone beshi shoktiala oigesoin.”

17Ou Isʼhake hon tone horia gia Gerar mora gangor soro tambu gaṛia roila. 18Ar tan baf Ibrahimor amolor kuda kuain, tain hirbar kudila, ḳaron Ibrahimor moutor bade Filistini oḳole ita borilaisla. Ar tan bafe ou kuaintor ze nam raḳsla, tain-o ou nam raḳla. 19Isʼhakor gulam oḳole ou gangor soro kudia fanir futala ek kua faila. 20Ar Geraror raḳal oḳole tan raḳal oḳlor loge dorbar ḳoria ḳoilo, i fani amrar. Ou tain i kuar nam raḳla Eshok [mani, dorbar]. 21Bade Isʼhakor raḳal oḳole aro ek kua kudila, ar iṭa loia-o tara dorbar ḳorla. Ou tain iṭar nam raḳla Siṭna [mani, dushmoni]. 22Heshe tain hon tone horia gia aro ek kua kudaila, ifira tara ar kunu dorbar ḳorla na. Teu Isʼhake ou kuar nam raḳla Rohobot [mani, bout zaga]. Tain ḳoila, “Oḳon Mabude-u amrare bout zaga dila, amra i desho aro baṛtam farmu.”

23Bade Isʼhake hon tone horia Ber-Shebat gelagi. 24Hou rait-u Mabude tanre didar dia ḳoila, “Ami tumar baf Ibrahimor Alla. Tumi ḍoraio na, amar gulam Ibrahimor ḳatire ami tumar loge asi. Ami tumare borkot nazil ḳormu ar tumar bongsho baṛaimu.” 25Ou Isʼhake hono ekkan kurbani kana banaia Mabudor nam loila. Hono tain tan tambu gaṛila ar tan gulam oḳole ek kua kudila.

26Bade Abimalike tan uzir Ohuzot ar shenapoti Fikulre loia Gerar taki Isʼhakor gese aila. 27Isʼhake erare ḳoila, “Afnara amar gese kitar lagi aila? Afnara to ingsha ḳoria amare afnarar ges tone ḳedai dilaisoin.” 28Tara ḳoila, “Amra oḳon saf buziar zen, Mabud afnar loge asoin. Erlagi afnar loge amrar egu oada oizauk. Aukka, amra eḳ chukti korilai. 29Amra zela afnare soisi na ar afnar balai saṛa kunu ḳeti korsi na, zela afnare shantie bidae disi, oula afne-o amrare ḳeti korta na. Afne-u to Mabudor borkotor manush.” 30Bade Isʼhake tarar lagi kana-dana zuit ḳorle, tara ḳana-dana ḳorla. 31Bador din biane uṭia tara duiozone ḳosom ḳorla. Ar Isʼhake tarare bidae dile, tara dilor maze shanti faia roana oila. 32Hou din-u tan gulam oḳole aia tarar kuda ek kuar ḳobor zanaila, tara fanir lagal faisoin. 33Ou tain er nam dila Sheba [mani, ḳosom]. Erlagi aiz-o hinor nam Ber-Sheba roise.

34Ishe sallish boros boyosho Hiṭṭi Berir fuṛi Zihudit ar Hiṭṭi Elonor fuṛi Bashomotre shadi korla. 35I duio beṭie Isʼhak ar Rebekar zanor maze kub duk dila.

Currently Selected:

Tourat 1: Foyda Nama 26: sylL

Highlight

Copy