Tourat 1: Foeda Nama 22

Hozrot Ibrahim (a:)or moha kurbani

1I goṭonar bade Allae Ibrahimor eḳ forikka loila. Allae tanre ḍaḳ dila, “Ibrahim!” Tain zuaf dila, “Ounu ami.” 2Mabude formaila, “Tumar fuare, zare tumi oto mohobbot ḳoro, hou ḳas mayar fut Isʼhakre loia tumi Muria elaḳat zao. Hoḳano ze faṛor ḳota ami tumare ḳoimu, er ufre tare nia zalail kurbani deo.” 3Teu Ibrahime fozore uṭia gadar fiṭit goddi lagaia tan fua Isʼhak, duizon gulam ar zalail kurbanir lagi laḳṛi kaṭia loia, ze zagar ḳota Allae tanre ḳoisla, hobaedi roana oila. 4Tin dinor din Ibrahime souk tulia saite-u duroi taki hou zagaḳan deḳla. 5Ou tan gulam oḳolre ḳoila, “Tumra gadaṭa loia ono ubao, ami ar amar fua hono gia ebadoti shesh ḳoria harle tumrar gese aimu.” 6Ibrahime zalail kurbanir laḳṛir aṭa tan fua Isʼhakor ḳando tulia dia nize aguinor fatil ar suri loia, duio zone samnor bae aguaila. 7Ou Isʼhake tan bafre ḳoila, “Baba.” Tain ḳoila, “Kitare baf ḳo?” Isʼhake ḳoila, “Ino to laḳṛi ar aguin ase, te kurbanir meṛa-baichcha kuai?” 8Tain zuaf dila, “Babare, kurbanir lagi Allae nize-u meṛa-baichcha zugaiba.” Ota matte matte tara aguai gela.

9Allar fosondor zagat fosia Ibrahime kurbani kana banaia, laḳṛi hazaila. Bade nizor fua Isʼhakre bandia ou darur ufre hutaila. 10Ar tain nizor fuare kurbanir lagi suri ato loila. 11Ou Mabudor firistae asman tone tane ḍaḳ dila, “Ibrahim! O Ibrahim!” Tain ḳoila, “Ounu ami.” 12Firistae ḳoila, “Fuagur bae tumar at tulio na, tare ar kunta-u ḳorio na. Tumi zen Allare ḍorao ita buza gese, ḳaron amare tumar fua, tumar ḳas mayar fua dan ḳorte-o na-kush oiso na.” 13Ibrahime souk tuli saia deḳoin, tan ḳore eḳṭa dumba ar tar hing zongolor maze aṭki roise. Ou tain gia dumbaṭa ania, nizor fuar bodla zalail kurbani dila. 14Tain hi zagar nam raḳla Iaoweh-Zirih [mani, Mabude zugain]. Erlagi oḳono manshe ḳoin, “Mabudor faṛo zugail oibo.”

15Mabudor firistae asman tone hirbar Ibrahimre ḍakia ḳoila, 16“Huno, Mabude ḳoira, tumi oula ḳorlae, tumar fuare, tumar ḳas mayar fuare dan ḳorte-o naraz oilae na. Erlagi ami Mabude ḳosom ḳoria ḳoiar, 17ami nisoy tumare borkot nazil ḳormu, tumar bongshore asmanor tera ar doriar soror balur laḳan behishab ḳormu. Tumar bongshoe tarar dushmonor ṭaun oḳol doḳol ḳorba. 18Ar tumar bongshor usillae duniar hoḳol zatie borkot hasil ḳorba. Ḳaron tumi amar hukum mancho.” 19Bade Ibrahime tan gulam oḳlor gese firia aila, ar tara eḳloge Ber-Sheba namor zagat gela. Ou zagat-u tain boshoti korla.

Hozrot Ibrahim (a:)or bai Nahuror ḳandan

20I goṭonar bade Ibrahime ḳobor faila, tan bai Nahuror bibi Milkar ḳoygu fuain oisoin. 21Er boṛo fuar nam Auz, tar baiaintor nam Buz, ar Oramor baf Komuel, 22erbade Kesod, Hosho, Fildosh, Zidlof ar Botuel. Botuelor fuṛir nam Rebeka. 23Ibrahimor bai Nahuror bibi Milkar feṭo taki i aṭzon fuar zonom oisil. 24Nahuror eḳ hangar bou asil, tair nam Rouma. Tair feṭo Ṭeboh, Gohom, Tohosh ar Maḳar zonom oisil.

Currently Selected:

Tourat 1: Foeda Nama 22: sylL

Highlight

Copy