Tourat 1: Foeda Nama 21

Hozrot Isʼhak (a:)or zonom

1Mabude tan kalam mutabek Bibi Saerare hefazot ḳorla, tain zela oada ḳorsla, ola-u ḳorla. 2Ar Bibi Saerar feṭo hurutta ailo. Allae ze shomoykur ḳota ḳoisla, hou shomoye-u Ibrahimor murobbi boyosho tan fuar zonom oilo. 3Ibrahime Saerar goror tan ou fuar nam raḳla Isʼhak [mani, asha]. 4Allar hukum moto tain aṭ dinor din tan fua Isʼhakor mosolmani ḳam ḳoraila. 5Ibrahimor eḳ-sho bosoror shomoy tan fua Isʼhakor zonom oilo. 6Bibi Saerae ḳoila, “Allae amar muko ashi bar ḳorla, ar ita ze hunbo, he-o amar loge ashibo.” 7Tain aro ḳoila, “Saerae fuaintore bukur dud ḳaoaibo, ita Ibrahimre ḳe ḳoilo one? Ar oḳon to ou buṛa boyosho, amar feṭo tan fua foyda oilo.”

Bibi Hazera ar tan fuare ḳedai deoa

8Isʼhak boṛo oar bade zedin tane maʼr dud saṛail oilo, houdin Ibrahime eḳ boṛo mezbani korla. 9Ar Mishori Hazerar feṭo Ibrahimor ze fua oisil, Saerae deḳla he tamsha ḳorer. 10Ou tain Ibrahimre ḳoila, “Fua shoho i bandire bar ḳori deo, bandir fua amar Isʼhakor loge ongshidar oito farto nae.” 11Fuar ita hunia Ibrahime mono kub toklif faila. 12Ou Allae tanre ḳoila, “Tumar bandi ar tair fuar lagi tumi bezar oio na. Saerae zela tumare ḳoise oula ḳoro, ḳaron tumar fua Isʼhakor ḳandanre-u tumar ḳandan ḳoia gona oibo. 13Ar i bandir torofa fua taki-o ami eḳṭa zati toiar ḳormu, ḳaron he-o to tumar aolad.” 14Ou Ibrahime aguan uṭia kisu ruṭi ar fani bora eḳṭa samṛar toli hazaia Hazerar ḳando tulia dia, fuagure tair ato shofia bidae ḳorla. Hin tone bar oia Hazerae Ber-Shebar morubumir maze sokkor dita lagla.

15Tolir fani shesh oigele tain fuare eḳṭa zonglar tole hutaia toila. 16Ar eḳ ḍaḳor foriman duroi gia tain boiroila. “Fuar mout zate amar souke na deki,” mone mone ḳoia, tain hono boia-u sillaia ḳandila. 17Fuagur ḳandon Allae hunla, ar Allar firistae asman tone ḍakia Hazerare ḳoila, “Hazera, O Hazera, tumar kita oise? Ḍoraio na, fuagu zeno ase, hon taki-u tar ḳandon Allae hunchoin. 18Tumi uṭia fuagur ato doro, ami taredi eḳ biraṭ zati foyda ḳormu.” 19Ou Allae Hazerar souk kulia dila, ar tain ek kua deḳla. Hi kua tone samṛar tolit fani bori ania fuare ḳaoaila.

20Allae hou fuare hefazot ḳorla. He boṛo oilo, ar morubumit takia tir-donuḳ salanir ustad oilo. 21He Faran morubumit taḳto. Tar maʼe Mishoror eḳ fuṛire ania tare bia ḳoraila.

Ber-Shebat Geraror bashshar loge chukti

22Hou shomoy Abimalik ar tan shenapoti Fikule Ibrahimre ḳoila, “Afne zeta-u ḳoroin, otat-u Allae afnar loge taḳoin. 23Erlagi Allar name afne oḳon ono amar gese ḳosom ḳoroukka, amar ba amar aolad oḳlor loge, afne kunu beimani korta nae. Ar ami zela afnare doya deḳaisi, afne-o amar loge ar afnar musafirir zaga, i deshor loge oula doyar nozor raḳba.” 24Ibrahime ḳoila, “Ji oy, ḳosom ḳorlam.”

25Ar Abimalikor gulam oḳole eḳṭa fanir kua zure nisilgi kori, tain nalish dila. 26Abimalike zuaf dila, “Ita ḳam ḳe ḳorse ami to zani na. Afne-o amare ita ḳoisoin na, aiz-u ami ikṭa hunlam.” 27Bade Ibrahime kisu meṛa ar goru ania Abimalikre dila ar duiozone chukti korla. 28Ar Ibrahime fal tone shatgu meṛi-baichcha algaila. 29Abimalike tane zikaila, “I meṛi-baichcha shatgu alga ḳorar mani kita?” 30Ibrahime ḳoila, “Afne oguintore neukka. I kuaṭa ze ami kudsi ikṭa oilo tar forman.” 31Erlagi ou zagar nam oilo Ber-Sheba [mani, ḳosmor kua], ono-u tara duio zone ḳosom ḳorsla. 32Tara Ber-Shebat ou chukti korar bade, Abimalik ar tan shenapoti Fikul uṭia Filistini oḳlor desho firia gelagi. 33Bade Ibrahime Ber-Shebat eḳṭa zau gas ruila, ar ze Mabudor shuru-o nae shesh-o nae, tan ebadot ḳorla. 34Ar Ibrahime Filistini oḳlor desho bout din ḳaṭaila.

Currently Selected:

Tourat 1: Foeda Nama 21: sylL

Highlight

Copy