ꠁꠘ꠆ꠎꠤꠟ ৩: ꠟꠥꠇ 9

ꠛꠣꠞꠅꠎꠘ ꠍꠣꠢꠣꠛꠤꠞꠦ ꠔꠛꠟꠤꠉꠅ ꠙꠣꠑꠣꠁꠟꠣ

1ꠛꠣꠖꠦ ꠁꠍꠣꠄ ꠢꠃ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠄꠇꠈꠣꠘꠅ ꠖꠟꠣ ꠇꠞꠟꠣ, ꠔꠣꠞꠣꠞꠦ ꠢꠇꠟ ꠎꠣꠔꠞ ꠎꠤꠘ-ꠜꠥꠔ ꠍꠣꠠꠣꠘꠤ, ꠛꠦꠝꠣꠞꠤꠞꠦ ꠜꠣꠟꠣ ꠇꠞꠣꠞ ꠁꠎꠣꠎꠔ ꠀꠞ ꠈꠦꠝꠔꠣ ꠖꠤꠟꠣ। 2ꠛꠣꠖꠦ ꠔꠣꠁꠘ ꠀꠟ꠆ꠟꠣꠞ ꠛꠣꠖꠡꠣꠁꠞ ꠔꠛꠟꠤꠉ ꠀꠞ ꠛꠦꠝꠣꠞꠤꠘ꠆ꠔꠞꠦ ꠡꠤꠚꠣ ꠇꠞꠣꠔ ꠄꠞꠣꠞꠦ ꠙꠣꠑꠣꠁꠟꠣ। 3ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠙꠕꠞ ꠟꠣꠉꠤ ꠟꠣꠑꠤ, ꠉꠣꠁꠐ-ꠛꠥꠍꠇꠤ, ꠈꠣꠘꠤ-ꠈꠥꠞꠣꠇꠤ, ꠐꠦꠇꠣ-ꠙꠄꠡꠣ, ꠛꠣ ꠖꠥꠁꠐꠣ ꠇꠥꠞ꠆ꠔꠣꠅ ꠟꠉꠦ ꠘꠤꠅ ꠘꠣ। 4ꠇꠥꠘꠥ ꠉꠣꠃꠔ ꠉꠦꠟꠦ ꠔꠥꠝꠞꠣ ꠎꠦ ꠛꠣꠠꠤꠔ ꠢꠣꠝꠣꠁꠛꠣꠄ, ꠅꠃ ꠛꠣꠠꠤꠔꠃ ꠞꠁꠅ, ꠀꠞ ꠅꠘ ꠕꠣꠇꠤ ꠢꠤꠞꠛꠣꠞ ꠛꠤꠖꠣꠄ ꠅꠁꠅ। 5ꠝꠣꠘꠡꠦ ꠎꠥꠖꠤ ꠔꠥꠝꠞꠣꠞꠦ ꠎꠣꠉꠣ ꠘꠣ ꠖꠦꠁꠘ, ꠔꠦ ꠢꠘ ꠕꠣꠇꠤ ꠛꠣꠞ ꠅꠁꠛꠣꠞ ꠀꠉꠦ ꠔꠥꠝꠞꠣꠞ ꠙꠣꠅꠞ ꠗꠥꠁꠟ ꠚꠥꠍꠤꠀ ꠚꠣꠟꠣꠁꠅ, ꠅꠃ ꠗꠥꠁꠟꠦꠃ ꠔꠣꠞꠣꠞ ꠛꠤꠙꠇ꠆ꠇꠦ ꠡꠣꠇ꠆ꠇꠤ ꠖꠤꠛ।” 6ꠍꠣꠢꠣꠛꠤ ꠅꠇꠟ ꠞꠅꠀꠘꠣ ꠅꠁꠀ ꠉꠣꠃꠄ ꠉꠣꠃꠄ ꠉꠤꠀ, ꠀꠟ꠆ꠟꠣꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠀꠞ ꠛꠦꠝꠣꠞꠤꠘ꠆ꠔꠞꠦ ꠡꠤꠚꠣ ꠇꠞꠣꠔ ꠟꠣꠉꠟꠣ।

7ꠞꠣꠎꠣ ꠢꠦꠞꠥꠖꠦ ꠁꠍꠣꠞ ꠅꠃ ꠇꠣꠝ-ꠇꠣꠎꠞ ꠈꠛꠞ ꠢꠥꠘꠤꠀ ꠈꠥꠛ ꠊꠣꠛꠠꠤ ꠉꠦꠟꠣ। ꠇꠥꠘꠥ ꠇꠥꠘꠥ ꠝꠣꠘꠡꠦ ꠔꠣꠘꠞꠦ ꠇꠁꠟꠣ, ꠄꠢꠤꠀ ꠘꠛꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠤ ꠉꠦꠍꠂꠘ। 8ꠀꠞ ꠇꠥꠘꠥ ꠇꠥꠘꠥ ꠎꠘꠦ ꠇꠁꠟꠣ, ꠁꠟꠤꠀꠍ ꠘꠛꠤꠄ ꠖꠞꠡꠘ ꠖꠤꠍꠂꠘ। ꠢꠤꠞꠛꠣꠞ ꠇꠦꠃ ꠇꠦꠃ ꠇꠁꠟ, ꠙꠥꠞꠣꠘꠣ ꠎꠝꠣꠘꠣꠞ ꠇꠥꠘꠥ ꠘꠛꠤ ꠎꠤꠘ꠆ꠖꠣ ꠅꠁꠀ ꠀꠁꠍꠂꠘ। 9ꠔꠦꠃ ꠢꠦꠞꠥꠖꠦ ꠇꠁꠟꠣ, “ꠀꠝꠤ ꠘꠤꠎꠦꠃ ꠔ ꠄꠢꠤꠀꠞ ꠝꠣꠕꠣ ꠇꠣꠐꠣꠁꠍꠤ, ꠔꠦ ꠅꠃ ꠎꠦꠔꠣ ꠢꠥꠘꠞꠣꠝ, ꠄꠁꠘ ꠀꠍꠟꠦ ꠇꠦ?” ꠄꠞꠖꠣꠄ ꠢꠦꠞꠥꠖꠦ ꠁꠍꠣꠞꠦ ꠖꠦꠈꠣꠞ ꠈꠤꠀꠟ ꠅꠁꠟ।

ꠙꠣꠌ ꠀꠎꠣꠞ ꠝꠣꠘꠡꠞ ꠉꠣꠁꠛꠤ ꠈꠣꠘꠤ

10ꠁꠍꠣꠄ ꠎꠦ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠔꠛꠟꠤꠉꠅ ꠙꠣꠑꠣꠁꠍꠟꠣ, ꠔꠣꠞꠣ ꠚꠤꠞꠤꠀ ꠀꠁꠟꠣ। ꠀꠁꠀ ꠔꠣꠘꠞꠦ ꠎꠣꠘꠣꠁꠟꠣ, ꠔꠛꠟꠤꠉꠤ ꠍꠚꠞꠅ ꠇꠤꠔꠣ ꠇꠤꠔꠣ ꠇꠞꠍꠂꠘ, ꠅꠃ ꠔꠣꠁꠘ ꠄꠞꠣꠞꠦ ꠟꠁꠀ ꠈꠥꠛ ꠘꠤꠞꠤꠛꠤꠟꠤ ꠢꠣꠟꠔꠦ ꠛꠣꠄꠔ-ꠍꠄꠖꠣ ꠘꠣꠝꠞ ꠄꠇ ꠉꠣꠃꠔ ꠉꠦꠟꠣ। 11ꠅꠁꠟꠦ ꠝꠣꠘꠡꠦ ꠁ ꠈꠛꠞ ꠢꠥꠘꠤꠀ ꠖꠟꠦ ꠖꠟꠦ ꠁꠍꠣꠞ ꠈꠞꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟꠣ। ꠔꠣꠁꠘ ꠄꠞꠣꠞꠦ ꠈꠥꠡꠤ ꠝꠘꠦ ꠇꠛꠥꠟ ꠇꠞꠟꠣ। ꠔꠣꠞꠣꠞ ꠉꠦꠍꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠛꠄꠀꠘꠤ ꠔꠛꠟꠤꠉ ꠇꠞꠟꠣ, ꠀꠞ ꠎꠦꠔꠣ ꠛꠦꠝꠣꠞꠤꠞ ꠛꠦꠝꠣꠞ ꠡꠤꠚꠣ ꠅꠀ ꠎꠞꠥꠞ ꠀꠍꠤꠟ, ꠔꠣꠁꠘ ꠄꠞꠣꠞꠦ ꠡꠤꠚꠣ ꠇꠞꠟꠣ।

12ꠢꠣꠁꠘ꠆ꠎꠣ ꠛꠣꠟꠣ ꠢꠃ ꠛꠣꠞꠅꠎꠘ ꠍꠣꠢꠣꠛꠤ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠎꠦ ꠎꠣꠉꠣꠔ ꠀꠍꠤ, ꠁꠈꠣꠘ ꠈꠥꠛ ꠘꠤꠞꠤꠛꠤꠟꠤ ꠎꠣꠉꠣ। ꠔꠦ ꠅꠔꠣ ꠝꠣꠘꠡꠞꠦ ꠛꠤꠖꠣꠄ ꠖꠤꠟꠣꠃꠇ꠆ꠇꠣ, ꠔꠣꠞꠣ ꠇꠣꠘ꠆ꠖꠣ-ꠇꠣꠍꠣꠞ ꠉꠣꠃꠔ ꠉꠤꠀ ꠞꠣꠁꠔꠇꠥꠞ ꠕꠣꠇꠣ-ꠈꠣꠅꠀꠞ ꠛꠦꠛꠡ꠆ꠔꠣ ꠇꠞꠃꠇ।” 13ꠁꠍꠣꠄ ꠎꠥꠀꠙ ꠖꠤꠟꠣ, “ꠔꠥꠝꠞꠣ ꠔꠣꠞꠣꠞꠦ ꠈꠣꠘꠣ ꠈꠣꠅꠀꠅ।” ꠔꠣꠞꠣ ꠇꠁꠟꠣ, “ꠀꠝꠞꠣꠞ ꠉꠦꠍꠦ ꠔ ꠈꠣꠟꠤ ꠙꠣꠌꠈꠣꠘ ꠞꠥꠐꠤ, ꠖꠥꠁꠐꠣ ꠛꠤꠞꠣꠘ ꠝꠣꠍ ꠀꠍꠦ, ꠀꠞ ꠇꠥꠘ꠆ꠔꠣ ꠘꠣꠁ। ꠔꠦ ꠀꠝꠞꠣ ꠛꠣꠎꠣꠞꠅ ꠉꠤꠀ ꠄꠞꠣꠞ ꠟꠣꠉꠤ ꠈꠣꠘꠣ ꠟꠁꠀ ꠀꠘꠔꠣꠝ ꠘꠤ?” 14ꠁꠍꠣꠄ ꠇꠁꠟꠣ, “ꠄꠞꠣꠞꠦ ꠙꠁꠘ꠆ꠌꠣꠡ-ꠎꠘ, ꠙꠁꠘ꠆ꠌꠣꠡ-ꠎꠘ ꠇꠞꠤ ꠛꠅꠀꠁ ꠖꠦꠅ।” ꠁꠘꠅ ꠈꠣꠟꠤ ꠛꠦꠐꠣ ꠝꠣꠘꠥꠡꠃ ꠀꠍꠟꠣ ꠙꠣꠌ ꠀꠎꠣꠞꠞ ꠟꠣꠈꠣꠘ। 15ꠔꠦꠃ ꠍꠣꠢꠣꠛꠤ ꠅꠇꠟꠦ ꠔꠣꠞꠣꠞꠦ ꠛꠅꠀꠁꠟꠣ। 16ꠁꠍꠣꠄ ꠅꠃ ꠙꠣꠌꠅꠈꠣꠘ ꠞꠥꠐꠤ ꠀꠞ ꠖꠥꠁꠅ ꠝꠣꠍ ꠟꠁꠀ ꠀꠍꠝꠣꠘꠞ ꠛꠣꠄ ꠌꠣꠁꠀ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠟꠣ। ꠛꠣꠖꠦ ꠞꠥꠐꠤ ꠀꠞ ꠝꠣꠍ ꠐꠥꠇꠞꠣ ꠐꠥꠇꠞꠣ ꠇꠞꠤ ꠜꠣꠋꠉꠤꠀ, ꠍꠣꠢꠣꠛꠤ ꠅꠇꠟꠞ ꠀꠔꠅ ꠖꠤꠀ ꠇꠁꠟꠣ ꠛꠣꠐꠤꠀ ꠖꠤꠟꠣꠁꠔꠣ। 17ꠅꠃ ꠈꠣꠘꠣꠄ ꠢꠇꠟ ꠝꠣꠘꠡꠦ ꠙꠦꠐ ꠜꠞꠤꠀ ꠈꠣꠁꠟꠣ। ꠈꠣꠁꠀ ꠢꠣꠞꠟꠦ ꠎꠦꠔꠣ ꠉꠥꠠꠣ-ꠉꠣꠠꠣ ꠞꠁꠍꠤꠟ ꠅꠔꠣ ꠖꠟꠣ ꠇꠞꠟꠦ ꠛꠣꠞꠅ ꠐꠥꠇꠞꠤ ꠜꠞꠤꠉꠦꠟ।

ꠢꠎꠞꠔ ꠁꠍꠣꠞ ꠝꠃꠔꠞ ꠀꠉꠣꠝ ꠈꠛꠞ

18ꠄꠇꠖꠤꠘ ꠁꠍꠣ ꠄꠇ ꠘꠤꠞꠣꠁ ꠎꠣꠉꠣꠔ ꠖꠥꠀ ꠇꠞꠣꠔ ꠛꠁꠞꠣ, ꠈꠣꠟꠤ ꠍꠣꠢꠣꠛꠤ ꠅꠇꠟ ꠔꠣꠘ ꠟꠉꠦ ꠀꠍꠟꠣ। ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠇꠅ ꠌꠣꠁꠘ, ꠝꠣꠘꠡꠦ ꠇꠤꠔꠣ ꠝꠘꠅ ꠇꠞꠂꠘ, ꠀꠝꠤ ꠇꠦ?” 19ꠔꠣꠞꠣ ꠎꠥꠀꠙ ꠖꠤꠟꠣ, “ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠂꠘ, ꠀꠙꠘꠦ ꠄꠢꠤꠀ ꠘꠛꠤ। ꠇꠥꠘꠥ ꠎꠘꠦ ꠇꠂꠘ ꠁꠟꠤꠀꠍ ꠘꠛꠤ, ꠀꠞ ꠇꠦꠃ ꠇꠦꠃ ꠇꠄ ꠛꠃꠔ ꠀꠉꠞ ꠎꠝꠣꠘꠣꠞ ꠇꠥꠘꠥ ꠘꠛꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠤꠍꠂꠘ।” 20ꠁꠍꠣꠄ ꠄꠞꠣꠞꠦ ꠎꠤꠇꠣꠁꠟꠣ, “ꠅꠁꠟꠦ ꠔꠥꠝꠞꠣ ꠇꠤꠔꠣ ꠝꠘꠅ ꠇꠞ, ꠀꠝꠤ ꠇꠦ?” ꠍꠣꠢꠣꠛꠤ ꠙꠤꠔꠞꠦ ꠇꠁꠟꠣ, “ꠀꠙꠘꠦꠃ ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠢꠃ ꠀꠟ-ꠝꠍꠤ।” 21ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠈꠛꠞꠖꠣꠞ! ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।”

22ꠛꠣꠖꠦ ꠔꠣꠁꠘ ꠇꠁꠟꠣ, “ꠀꠝꠤ ꠛꠤꠘ-ꠀꠖꠝꠦ ꠛꠃꠔ ꠇꠡ꠆ꠐ ꠡꠁꠎ꠆ꠎ ꠇꠞꠣ ꠟꠣꠉꠛ। ꠡꠝꠣꠎꠞ ꠝꠥꠞꠛ꠆ꠛꠤ ꠅꠇꠟꠦ, ꠛꠠ ꠁꠝꠣꠝ, ꠀꠞ ꠝꠃꠟꠣꠘꠣ ꠅꠇꠟꠦ ꠀꠝꠣꠞꠦ ꠄꠟꠣ ꠇꠞꠛꠣ। ꠀꠝꠣꠞꠦ ꠎꠣꠘꠦ ꠝꠣꠞꠣ ꠅꠁꠛ, ꠅꠁꠟꠦ ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠀꠝꠣꠞ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠣ ꠎꠞꠥꠞ।”

23ꠔꠣꠁꠘ ꠄꠞꠣ ꠢꠇꠟꠞꠦ ꠇꠁꠟꠣ, “ꠀꠝꠣꠞ ꠔꠞꠤꠇꠣꠄ ꠇꠦꠃ ꠎꠤꠘ꠆ꠖꠦꠉꠤ ꠇꠣꠐꠣꠁꠔꠦ ꠌꠣꠁꠟꠦ, ꠢꠦ ꠔꠣꠞ ꠘꠤꠎꠞ ꠈꠥꠡꠤꠄ ꠌꠟꠣ ꠛꠣꠖ ꠖꠦꠃꠇ। ꠔꠣꠞ ꠀꠙꠘ ꠖꠥꠈ-ꠇꠡ꠆ꠐꠞ ꠍꠟꠤꠛ ꠙꠞꠔꠦꠇ ꠖꠤꠘ ꠛꠁꠀ ꠟꠁꠀ ꠀꠝꠣꠞ ꠈꠞꠦ ꠈꠞꠦ ꠀꠃꠇ। 24ꠎꠦ ꠝꠣꠘꠡꠦ ꠘꠤꠎꠞ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠈꠥꠀꠁꠛ। ꠅꠁꠟꠦ ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠘꠤꠎꠞ ꠎꠣꠘ ꠇꠥꠞꠛꠣꠘꠤ ꠖꠦꠄ, ꠢꠦ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠙꠣꠁꠛ। 25ꠇꠥꠘꠥ ꠝꠣꠘꠥꠡ ꠎꠥꠖꠤ ꠀꠡ꠆ꠔꠣ ꠖꠥꠘꠤꠀꠞ ꠝꠣꠟꠤꠇ ꠛꠘꠤꠀꠅ ꠔꠣꠞ ꠢꠣꠍꠣꠞꠞ ꠎꠤꠘ꠆ꠖꠦꠉꠤ ꠝꠣꠘꠤ ꠀꠈꠦꠞ ꠈꠥꠀꠁꠟꠣꠄ, ꠔꠦ ꠔꠣꠞ ꠇꠥꠘꠥ ꠚꠣꠄꠖꠣ ꠅꠁꠟ ꠘꠤ? 26ꠢꠥꠘꠃꠇ꠆ꠇꠣ, ꠇꠦꠃ ꠎꠥꠖꠤ ꠀꠝꠣꠞ ꠟꠣꠉꠤ ꠛꠣ ꠀꠝꠣꠞ ꠔꠣꠟꠤꠝꠞ ꠟꠣꠉꠤꠀ ꠝꠥꠈ ꠟꠥꠇꠣꠄ, ꠔꠦ ꠀꠝꠤ ꠛꠤꠘ-ꠀꠖꠝ ꠎꠦꠛꠟꠣ ꠀꠝꠣꠞ ꠘꠤꠎꠞ, ꠀꠞ ꠙꠛꠤꠔ꠆ꠞ ꠚꠤꠞꠤꠡ꠆ꠔꠣ ꠅꠇꠟꠞ, ꠀꠞ ꠉꠣꠁꠛꠤ ꠛꠣꠚꠞ ꠡꠣꠘ-ꠔꠎꠟ꠆ꠟꠤꠄ ꠖꠥꠘꠤꠀꠔ ꠢꠤꠞꠛꠣꠞ ꠀꠁꠝꠥ, ꠅꠃ ꠡꠝꠄ ꠀꠝꠤꠅ ꠄꠞꠣꠞꠦ ꠖꠦꠈꠟꠦ ꠝꠥꠈ ꠟꠥꠇꠣꠁꠝꠥ। 27ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠅꠃ ꠝꠎꠟꠤꠍꠅ ꠅꠃꠟꠣ ꠇꠄꠎꠘ ꠝꠣꠘꠥꠡ ꠀꠎꠤꠞ ꠀꠍꠂꠘ, ꠀꠟ꠆ꠟꠣꠞ ꠛꠣꠖꠡꠣꠁ ꠘꠣ ꠖꠦꠈꠤꠀ ꠄꠞꠣꠞ ꠝꠃꠔ ꠅꠁꠔ ꠘꠣꠄ।”

ꠢꠎꠞꠔ ꠁꠍꠣꠞ ꠘꠥꠞꠣꠘꠤ ꠍꠥꠞꠔ

28ꠅꠃ ꠔꠣꠟꠤꠝꠞ ꠄꠇꠖ ꠢꠣꠙ꠆ꠔꠣ ꠛꠣꠖꠦ, ꠁꠍꠣ ꠖꠥꠀ ꠇꠞꠣꠞ ꠟꠣꠉꠤ ꠔꠣꠘ ꠍꠣꠢꠣꠛꠤ ꠙꠤꠔꠞ, ꠢꠣꠘ꠆ꠘꠣꠘ, ꠀꠞ ꠁꠀꠇꠥꠛꠞꠦ ꠟꠁꠀ ꠄꠇ ꠐꠤꠟ꠆ꠟꠣꠞ ꠃꠙꠞꠦ ꠃꠑꠟꠣ। 29ꠔꠣꠁꠘ ꠖꠥꠀ ꠇꠞꠞꠣ, ꠅꠝꠘ ꠡꠝꠄ ꠀꠈꠔꠣꠃ ꠔꠣꠘ ꠝꠥꠈꠞ ꠞꠋꠉ ꠛꠖꠟꠤꠉꠦꠟ, ꠔꠣꠘ ꠚꠤꠘ꠆ꠘꠞ ꠇꠣꠙꠠ-ꠌꠥꠙꠠ ꠗꠟꠣ ꠌꠇꠌꠇꠣ ꠅꠁꠉꠦꠟ। 30ꠅꠃ ꠡꠝꠄ ꠖꠦꠈꠣ ꠉꠦꠟ, ꠖꠥꠁꠎꠘ ꠝꠣꠘꠡꠦ ꠀꠁꠀ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠞꠣ, ꠄꠞꠣꠞ ꠄꠇꠎꠘ ꠅꠁꠟꠣ ꠝꠥꠍꠣ ꠘꠛꠤ, ꠖꠥꠍꠞꠣ ꠎꠘ ꠁꠟꠤꠀꠍ ꠘꠛꠤ। 31ꠔꠣꠞꠣ ꠀꠟ꠆ꠟꠣꠁ ꠎꠣꠟꠣꠟ ꠀꠞ ꠡꠣꠘꠦ ꠖꠦꠈꠣ ꠖꠤꠟꠣ। ꠎꠦꠞꠥꠎꠣꠟꠦꠝ ꠍꠚꠞꠞ ꠇꠣꠟꠅ ꠁꠍꠣ ꠎꠦꠘ ꠀꠟ꠆ꠟꠣꠞ ꠝꠞ꠆ꠎꠤ ꠝꠣꠚꠤꠇ ꠝꠃꠔꠞ ꠝꠥꠈꠣꠝꠥꠈꠤ ꠅꠁꠞꠣ, ꠅꠃ ꠛꠦꠙꠣꠞꠦꠃ ꠔꠣꠞꠣ ꠛꠣꠔꠌꠤꠔ ꠇꠞꠟꠣ।

32ꠍꠣꠢꠣꠛꠤ ꠙꠤꠔꠞ ꠀꠞ ꠔꠣꠘ ꠟꠉꠞ ꠅꠇꠟ ꠛꠦꠝꠣꠟꠥꠝ ꠊꠥꠝꠅ ꠀꠍꠟꠣ। ꠀꠈꠔꠣꠃ ꠊꠥꠝ ꠜꠣꠋꠉꠤ ꠎꠣꠅꠀꠄ ꠔꠣꠞꠣ ꠁꠍꠣꠞ ꠎꠣꠟꠣꠟ-ꠡꠣꠘ ꠖꠦꠈꠟꠣ, ꠀꠞ ꠔꠣꠘ ꠇꠣꠘ꠆ꠖꠣꠔ ꠃꠛꠣ ꠅꠃ ꠖꠥꠁꠅ ꠎꠘꠞꠦꠅ ꠖꠦꠈꠟꠣ। 33ꠢꠃ ꠖꠥꠁꠅꠎꠘ ꠎꠦꠛꠟꠣ ꠁꠍꠣꠞ ꠉꠦꠍ ꠕꠣꠇꠤ ꠞꠅꠀꠘꠣ ꠖꠤꠟꠣꠁꠞꠣ, ꠅꠃ ꠡꠝꠄ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣꠅ ꠔ ꠅꠘꠅ ꠀꠍꠤ, ꠈꠥꠛ ꠜꠣꠟꠣ ꠅꠁꠍꠦ, ꠔꠦ ꠄꠇ ꠇꠣꠝ ꠇꠞꠤꠟꠣꠁ, ꠀꠝꠞꠣ ꠅꠘꠅ ꠔꠤꠘꠈꠣꠘ ꠒꠦꠞꠣ-ꠊꠞ ꠛꠣꠘꠣꠁꠟꠣꠁ, ꠄꠇꠈꠣꠘ ꠀꠙꠘꠣꠞ, ꠄꠇꠈꠣꠘ ꠁꠟꠤꠀꠍ ꠘꠛꠤ, ꠀꠞ ꠄꠇꠈꠣꠘ ꠝꠥꠍꠣ ꠘꠛꠤꠞ ꠟꠣꠉꠤ।” ꠙꠤꠔꠞꠦ ꠎꠦꠘ ꠇꠤꠔꠣ ꠇꠁꠞꠣ, ꠁꠔꠣ ꠔꠣꠁꠘ ꠘꠤꠎꠦꠃ ꠛꠥꠎꠟꠣ ꠘꠣ।

34ꠙꠤꠔꠞꠦ ꠅꠔꠣ ꠝꠣꠔꠤꠞꠣ, ꠅꠃ ꠡꠝꠄ ꠀꠈꠔꠣꠃ ꠝꠦꠊꠞ ꠇꠣꠟꠘꠤ ꠀꠁꠀ ꠔꠣꠞꠣꠞꠦ ꠉꠥꠞꠤꠟꠤꠟ। ꠔꠣꠞꠣ ꠇꠣꠟꠘꠤꠞ ꠀꠅꠠꠦ ꠢꠣꠝꠣꠘꠤꠞ ꠛꠣꠖꠦ ꠍꠣꠢꠣꠛꠤ ꠅꠇꠟ ꠒꠞꠣꠁꠉꠦꠟꠣ। 35ꠀꠞ ꠇꠣꠟꠘꠤꠞ ꠜꠤꠔꠞ ꠕꠣꠇꠤ ꠅꠃ ꠀꠅꠀꠎ ꠀꠁꠟ, “ꠄꠁꠘꠃ ꠀꠝꠣꠞ ꠈꠣꠍ ꠝꠣꠄꠀꠞ ꠎꠘ, ꠔꠥꠝꠞꠣ ꠄꠘ ꠇꠕꠣ ꠝꠣꠘꠅ।”

36ꠁ ꠀꠅꠀꠎꠞ ꠛꠣꠖꠦꠃ ꠖꠦꠈꠣ ꠉꠦꠟ, ꠁꠍꠣ ꠢꠘꠅ ꠄꠇꠟꠣ ꠃꠛꠣꠁ ꠞꠁꠍꠂꠘ। ꠍꠣꠢꠣꠛꠤ ꠅꠇꠟ ꠘꠤꠞꠣꠁ ꠅꠁꠉꠦꠟꠣ, ꠔꠣꠞꠣ ꠎꠦꠔꠣ ꠖꠦꠈꠍꠤꠟꠣ ꠅꠃ ꠡꠝꠄ ꠁꠔꠣ ꠀꠞ ꠇꠦꠃꠞꠞꠦ ꠢꠥꠘꠣꠁꠟꠣ ꠘꠣ।

ꠎꠤꠘꠞ ꠀꠍꠞ ꠀꠟꠣ ꠙꠥꠀ

37ꠛꠣꠖꠞ ꠖꠤꠘ ꠁꠍꠣ ꠀꠞ ꠍꠣꠢꠣꠛꠤ ꠅꠇꠟ ꠙꠣꠠꠞ ꠐꠤꠟ꠆ꠟꠣ ꠕꠣꠇꠤ ꠟꠣꠝꠤꠀ ꠀꠁꠟꠦ, ꠛꠃꠔ ꠝꠣꠘꠥꠡ ꠔꠣꠘ ꠟꠉꠦ ꠖꠦꠈꠣ ꠇꠞꠣꠔ ꠀꠁꠀ ꠜꠤꠠ ꠛꠣꠘ꠆ꠖꠤꠟ꠆ꠟꠣ। 38ꠅꠃ ꠜꠤꠠꠞ ꠝꠣꠎꠞ ꠄꠇꠎꠘꠦ ꠌꠤꠟ꠆ꠟꠣꠁꠀ ꠇꠁꠟ, “ꠢꠥꠎꠥꠞ, ꠀꠝꠣꠞ ꠙꠥꠀꠉꠥꠞ ꠛꠣꠄ ꠈꠤꠀꠟ ꠇꠞꠃꠇ꠆ꠇꠣ, ꠅꠉꠥ ꠀꠝꠣꠞ ꠄꠇꠝꠣꠔ꠆ꠞ ꠀꠅꠟꠣꠖ। 39ꠔꠣꠞꠦ ꠄꠇꠐꠣ ꠎꠤꠘꠦ ꠗꠞꠦ, ꠁꠉꠤꠄ ꠔꠣꠞꠦ ꠍꠣꠠꠔ ꠌꠣꠄ ꠘꠣ, ꠢꠦ ꠀꠈꠔꠣꠃ ꠌꠤꠇ ꠖꠤꠀ ꠃꠑꠦ ꠀꠞ ꠝꠣꠐꠤꠔ ꠙꠠꠤꠀ ꠍꠣꠐꠤꠀꠄ। ꠔꠣꠞ ꠝꠥꠈꠦꠖꠤ ꠚꠦꠘꠣ ꠛꠣꠞꠅꠄ, ꠢꠦꠡꠦ ꠔꠣꠞꠦ ꠀꠍꠣꠠꠤꠀ ꠀꠗ-ꠝꠞꠣ ꠇꠞꠤ ꠚꠣꠟꠣꠁ ꠕꠁꠀ ꠎꠣꠄ। 40ꠀꠝꠤ ꠀꠙꠘꠣꠞ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠝꠤꠘꠔ-ꠇꠣꠎ꠆ꠎꠤ ꠇꠞꠍꠟꠣꠝ ꠅꠉꠥꠔꠣꠞꠦ ꠈꠦꠖꠣꠁꠛꠣꠞ ꠟꠣꠉꠤ, ꠅꠁꠟꠦ ꠔꠣꠞꠣ ꠙꠣꠞꠍꠂꠘ ꠘꠣ।”

41ꠁꠍꠣꠄ ꠇꠁꠟꠣ, “ꠅ ꠛꠦꠁꠝꠣꠘ ꠀꠞ ꠘꠣꠚꠞꠝꠣꠘꠞ ꠎꠣꠔ, ꠀꠝꠤ ꠀꠞ ꠇꠔꠖꠤꠘ ꠔꠥꠝꠞꠣꠞ ꠟꠉꠦ ꠞꠁꠝꠥ, ꠔꠥꠝꠞꠣꠞ ꠍꠣꠔꠣꠘꠤ ꠡꠁꠎ꠆ꠎ ꠇꠞꠝꠥ? ꠖꠦꠈꠤ ꠌꠣꠁꠘ, ꠔꠥꠝꠣꠞ ꠙꠥꠀꠞꠦ ꠅꠘꠅ ꠀꠘꠅ।” 42ꠛꠦꠐꠣꠄ ꠙꠥꠀꠞꠦ ꠟꠁꠀ ꠀꠉꠥꠀꠞ, ꠅꠃ ꠡꠝꠄ ꠎꠤꠘ꠆ꠘꠣꠔꠦ ꠔꠣꠞꠦ ꠝꠣꠐꠤꠔ ꠚꠣꠟꠣꠁꠀ ꠎꠣꠔꠤꠀ ꠗꠞꠟ, ꠢꠦ ꠢꠥꠔꠤꠀ ꠍꠣꠐꠤꠀꠘꠤ ꠟꠣꠉꠣꠁꠟ। ꠔꠦꠃ ꠁꠍꠣꠄ ꠎꠤꠘ꠆ꠘꠣꠔꠞꠦ ꠗꠣꠝꠇꠤ ꠖꠤꠟꠣ, ꠔꠣꠁꠘ ꠅꠃ ꠙꠥꠀꠞꠦ ꠜꠣꠟꠣ ꠇꠞꠤꠀ ꠔꠣꠞ ꠛꠣꠚꠞ ꠀꠔꠅ ꠡꠝꠎꠣꠁ ꠖꠤꠟꠣ। 43ꠀꠟ꠆ꠟꠣꠞ ꠇꠥꠖꠞꠔꠤ ꠟꠤꠟꠣ-ꠈꠦꠟꠣ ꠖꠦꠈꠤꠀ ꠢꠇꠟ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠉꠦꠟꠣ।

ꠖꠥꠍꠞꠣꠛꠣꠞ ꠔꠣꠘ ꠝꠃꠔꠞ ꠀꠉꠣꠝ ꠈꠛꠞ

ꠁꠍꠣꠞ ꠇꠦꠞꠣꠝꠔꠤ ꠇꠣꠝ-ꠇꠣꠎ ꠖꠦꠈꠤꠀ ꠢꠇ꠆ꠇꠟꠦ ꠔꠣꠁꠎ꠆ꠎꠥꠛ ꠛꠘꠤꠀ ꠌꠤꠘ꠆ꠔꠣ ꠇꠞꠞꠣ, ꠅꠃ ꠡꠝꠄ ꠔꠣꠁꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, 44“ꠀꠝꠣꠞ ꠇꠕꠣ ꠈꠣꠘꠣꠁꠘ ꠔꠥꠝꠞꠣ ꠝꠘ ꠖꠤꠀ ꠢꠥꠘꠅ, ꠀꠝꠤ ꠛꠤꠘ-ꠀꠖꠝꠞꠦ ꠔ ꠝꠣꠘꠡꠞ ꠀꠔꠅ ꠗꠞꠣꠁ ꠖꠦꠅꠀ ꠅꠁꠛ।” 45ꠍꠣꠢꠣꠛꠤ ꠅꠇꠟꠦ ꠁ ꠝꠣꠔꠞ ꠇꠥꠘꠥ ꠝꠣꠘꠤ ꠛꠥꠎꠟꠣ ꠘꠣ। ꠀꠟ꠆ꠟꠣꠄ ꠔꠣꠞꠣꠞ ꠉꠦꠍꠦ ꠁꠈꠣꠘ ꠉꠣꠁꠛ ꠞꠣꠈꠟꠣ, ꠎꠣꠔꠦ ꠔꠣꠞꠣ ꠘꠣ ꠛꠥꠎꠂꠘ। ꠀꠞ ꠅꠃ ꠛꠦꠙꠣꠞꠦ ꠁꠍꠣꠞꠦꠅ ꠇꠥꠘ꠆ꠔꠣ ꠎꠤꠇꠣꠁꠔꠦ ꠔꠣꠞꠣꠞ ꠡꠣꠅꠡ ꠅꠁꠟ ꠘꠣ।

ꠛꠠ ꠇꠦ?

46ꠍꠣꠢꠣꠛꠤ ꠅꠇꠟꠞ ꠝꠣꠎꠦ ꠇꠦ ꠢꠇꠟ ꠕꠣꠇꠤ ꠛꠠ, ꠅꠔꠣ ꠟꠁꠀ ꠔꠣꠞꠣ ꠔꠞ꠆ꠇꠣ-ꠔꠞ꠆ꠇꠤ ꠇꠞꠞꠣ, 47ꠄꠞꠝꠣꠎꠦ ꠁꠍꠣꠄ ꠔꠣꠞꠣꠞ ꠖꠤꠟꠞ ꠜꠣꠛ ꠛꠥꠎꠤꠟꠤꠟꠣ। ꠔꠣꠁꠘ ꠄꠇ ꠘꠣꠛꠣꠟꠤꠇ ꠢꠥꠞꠥꠔ꠆ꠔꠣꠞꠦ ꠇꠣꠘ꠆ꠖꠣꠔ ꠀꠘꠤꠀ ꠇꠁꠟꠣ, 48“ꠎꠦ ꠎꠘꠦ ꠀꠝꠣꠞ ꠟꠣꠉꠤ ꠅꠃ ꠢꠥꠞꠥꠔ꠆ꠔꠣꠞ ꠟꠣꠈꠣꠘ ꠇꠥꠘꠥ ꠍꠣꠛꠣꠟꠞꠦ ꠇꠛꠥꠟ ꠇꠞꠦ, ꠢꠦ ꠀꠝꠣꠞꠦꠃ ꠇꠛꠥꠟ ꠇꠞꠦ। ꠀꠞ ꠀꠝꠣꠞꠦ ꠎꠦ ꠇꠛꠥꠟ ꠇꠞꠦ, ꠢꠦ ꠈꠣꠟꠤ ꠀꠝꠣꠞꠦ ꠘꠣꠄ, ꠀꠝꠣꠞꠦ ꠎꠦꠁꠘ ꠛꠦꠎꠤꠍꠂꠘ ꠔꠣꠘꠞꠦꠅ ꠇꠛꠥꠟ ꠇꠞꠟ। ꠔꠥꠝꠞꠣꠞ ꠝꠣꠎꠦ ꠎꠦ ꠎꠘ ꠢꠇꠟ ꠕꠣꠇꠤ ꠢꠥꠞꠥ, ꠢꠦ-ꠃ ꠢꠇꠟ ꠕꠣꠇꠤ ꠛꠠ।”

49ꠛꠣꠖꠦ ꠍꠣꠢꠣꠛꠤ ꠢꠣꠘ꠆ꠘꠣꠘꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠖꠦꠈꠟꠣꠝ ꠀꠙꠘꠣꠞ ꠘꠣꠝ ꠟꠁꠀ ꠄꠇꠎꠘꠦ ꠜꠥꠔ ꠍꠣꠠꠣꠞ। ꠖꠦꠈꠤꠀ ꠀꠝꠞꠣ ꠔꠣꠞꠦ ꠝꠣꠘꠣ ꠇꠞꠍꠤ, ꠢꠦ ꠔ ꠀꠝꠞꠣꠞ ꠔꠞꠤꠇꠣꠞ ꠘꠣꠄ।” 50ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠞ ꠝꠣꠘꠣ ꠇꠞꠤꠅ ꠘꠣ, ꠎꠦ ꠔꠥꠝꠞꠣꠞ ꠛꠤꠙꠇ꠆ꠇꠦ ꠘꠣꠄ, ꠢꠦ ꠔ ꠙꠇ꠆ꠇꠦꠃ ꠀꠍꠦ।”

ꠎꠦꠞꠥꠎꠣꠟꠦꠝ ꠎꠣꠅꠀꠞ ꠙꠕꠦ ꠢꠎꠞꠔ ꠁꠍꠣ (৯:৫১-১৯:২৭)

ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝꠞ ꠛꠣꠄ ꠞꠅꠀꠘꠣ

51ꠁꠍꠣꠄ ꠛꠦꠢꠦꠡ꠆ꠔꠅ ꠔꠡꠞꠤꠚ ꠘꠤꠛꠣꠞ ꠖꠤꠘ ꠊꠘꠣꠁꠀ ꠀꠁꠟ, ꠅꠃ ꠔꠣꠁꠘ ꠎꠦꠞꠥꠎꠣꠟꠦꠝꠅ ꠎꠣꠁꠔꠣ ꠇꠞꠤ ꠘꠤꠅꠔ ꠇꠞꠟꠣ। 52ꠔꠣꠘ ꠀꠉꠦ ꠅꠁꠀ ꠈꠛꠞꠤꠀ ꠅꠇꠟ ꠙꠣꠑꠣꠁꠟꠣ। ꠔꠣꠞꠣ ꠀꠉꠦ ꠉꠤꠀ ꠢꠇꠟꠔꠣ ꠎꠥꠁꠔ-ꠎꠣꠁꠔ ꠇꠞꠣꠞ ꠈꠤꠀꠟꠦ ꠡꠝꠞꠤꠀ ꠎꠣꠔꠤꠞ ꠄꠇ ꠉꠣꠃꠔ ꠉꠤꠀ ꠢꠣꠝꠣꠁꠟꠣ। 53ꠅꠁꠟꠦ ꠢꠤ ꠉꠣꠃꠞ ꠝꠣꠘꠡꠦ ꠎꠦꠛꠟꠣ ꠢꠥꠘꠟꠣ, ꠁꠍꠣ ꠎꠦꠞꠥꠎꠣꠟꠦꠝ ꠎꠣꠁꠔꠣ, ꠢꠥꠘꠤꠀ ꠔꠣꠞꠣ ꠔꠣꠘꠞꠦ ꠀꠡꠞꠄ ꠖꠤꠟ ꠘꠣ। 54ꠄꠞꠖꠣꠄ ꠔꠣꠘ ꠍꠣꠢꠣꠛꠤ ꠁꠀꠇꠥꠛ ꠀꠞ ꠢꠣꠘ꠆ꠘꠣꠘꠦ ꠇꠁꠟꠣ, “ꠢꠥꠎꠥꠞ, ꠁꠟꠤꠀꠍ ꠘꠛꠤꠞ ꠟꠣꠈꠣꠘ ꠀꠝꠞꠣꠅ ꠅꠈꠘ ꠀꠞꠎ ꠇꠞꠔꠣꠝ ꠘꠤ, ꠀꠍꠝꠣꠘꠤ ꠀꠉꠥꠁꠘ ꠟꠣꠝꠤꠀ ꠅꠔꠣꠞꠦ ꠛꠤꠘꠣꠡ ꠇꠞꠤꠟꠣꠃꠇ?” 55ꠁꠍꠣꠄ ꠔꠣꠞꠣꠞ ꠛꠣꠄ ꠚꠤꠞꠤꠀ ꠗꠣꠝꠇꠤ ꠖꠤꠀ ꠇꠁꠟꠣ, “ꠔꠥꠝꠞꠣ ꠎꠣꠘ ꠘꠣ ꠘꠤ ꠔꠥꠝꠞꠣ ꠇꠥꠘ ꠟꠣꠈꠣꠘ ꠞꠥꠢꠥꠞ ꠉꠠꠣ? ꠀꠝꠣꠞꠦ ꠇꠥꠘꠥ ꠛꠦꠎꠣ ꠅꠁꠍꠦ ꠘꠤ ꠝꠣꠘꠡꠞ ꠛꠤꠘꠣꠡ ꠇꠞꠔꠣꠝ? ꠀꠝꠣꠞꠦ ꠔ ꠛꠦꠎꠣ ꠅꠁꠍꠦ ꠝꠣꠘꠡꠞ ꠎꠣꠘ ꠛꠣꠌꠣꠁꠔꠣꠝ।” 56ꠅꠈꠣꠘ ꠇꠁꠀ ꠄꠞꠣ ꠀꠞꠇ ꠉꠣꠃꠔ ꠉꠦꠟꠣꠉꠤ।

57ꠔꠣꠞꠣ ꠎꠦꠛꠟꠣ ꠙꠕꠦꠖꠤ ꠎꠣꠁꠞꠣ, ꠅꠃ ꠡꠝꠄ ꠄꠇ ꠛꠦꠐꠣ ꠀꠁꠀ ꠁꠍꠣꠞꠦ ꠇꠁꠟ, “ꠍꠣꠛ, ꠀꠙꠘꠦ ꠎꠦꠈꠣꠘꠅ ꠎꠣꠁꠛꠣ, ꠀꠝꠤꠅ ꠀꠙꠘꠣꠞ ꠟꠉꠦ ꠢꠘꠅ ꠎꠣꠁꠝꠥ।” 58ꠁꠍꠣꠄ ꠔꠣꠞꠦ ꠇꠁꠟꠣ, “ꠛꠣꠛꠣꠞꠦ, ꠢꠤꠀꠟꠞ ꠉꠣꠔ ꠀꠍꠦ, ꠙꠣꠈꠤꠘ꠆ꠔꠞ ꠛꠣꠖꠣ ꠀꠍꠦ, ꠅꠁꠟꠦ ꠀꠝꠤ ꠛꠤꠘ-ꠀꠖꠝꠞ ꠝꠣꠕꠣ ꠉꠥꠎꠣꠞ ꠇꠥꠘꠥ ꠑꠣꠁ ꠘꠣꠁ।” 59ꠛꠣꠖꠦ ꠁꠍꠣꠄ ꠀꠞꠇ ꠎꠘꠞꠦ ꠖꠦꠈꠟꠣ, ꠖꠦꠈꠤꠀ ꠔꠣꠞꠦ ꠇꠁꠟꠣ, “ꠅꠛꠣ, ꠀꠝꠣꠞ ꠟꠉꠦ ꠌꠟꠅ।” ꠢꠦ ꠎꠥꠀꠙ ꠖꠤꠟ, “ꠢꠥꠎꠥꠞ, ꠀꠝꠣꠞ ꠛꠣꠚꠞ ꠝꠃꠔꠞ ꠛꠣꠖꠦ ꠔꠣꠘꠞꠦ ꠝꠣꠐꠤ ꠖꠤꠀ ꠢꠣꠞꠟꠦ ꠀꠝꠤ ꠀꠁꠝꠥ।” 60ꠁꠍꠣꠄ ꠔꠣꠞꠦ ꠇꠁꠟꠣ, “ꠝꠞꠣ ꠅꠇꠟꠦ ꠔꠣꠞꠣꠞ ꠝꠞꠣꠞꠦ ꠝꠣꠐꠤ ꠖꠦꠃꠇ, ꠔꠥꠝꠤ ꠀꠁꠀ ꠀꠟ꠆ꠟꠣꠞ ꠛꠣꠖꠡꠣꠁꠞ ꠖꠣꠅꠔ ꠖꠦꠅ।” 61ꠀꠞꠅ ꠄꠇꠎꠘꠦ ꠇꠁꠟ, “ꠢꠥꠎꠥꠞ, ꠀꠝꠤ ꠀꠙꠘꠣꠞ ꠟꠉꠦ ꠎꠣꠁꠝꠥ, ꠔꠦ ꠀꠝꠣꠞ ꠛꠣꠠꠤꠔ ꠉꠤꠀ ꠛꠤꠖꠣꠄ ꠟꠁꠀ ꠀꠁ।” 62ꠁꠍꠣꠄ ꠔꠣꠞꠦ ꠇꠁꠟꠣ, “ꠟꠣꠋꠉꠟꠞ ꠈꠥꠐꠤꠔ ꠗꠞꠤꠀ ꠎꠦꠉꠥꠄ ꠈꠞꠦꠖꠤ ꠚꠤꠞꠤꠀ ꠌꠣꠄ, ꠢꠦ ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠈ ꠘꠣꠄ।”

Currently Selected:

ꠁꠘ꠆ꠎꠤꠟ ৩: ꠟꠥꠇ 9: sylN

Highlight

Copy