ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 4

ꠡꠝꠞꠤꠀꠞ ꠛꠦꠐꠤꠞ ꠁꠝꠣꠘ

1ꠚꠞꠤꠡꠤ ꠅꠇꠟꠦ ꠢꠥꠘꠟꠣ, ꠢꠎꠞꠔ ꠁꠍꠣꠄ ꠄꠢꠤꠀ ꠘꠛꠤ ꠕꠣꠇꠤ ꠛꠦꠡꠤ ꠝꠣꠘꠡꠞꠦ ꠔꠣꠘ ꠃꠝ꠆ꠝꠔ ꠛꠣꠘꠣꠁꠍꠂꠘ, ꠀꠞ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣ। 2ꠅꠁꠟꠦ ꠁꠍꠣꠄ ꠘꠤꠎꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠞꠣ ꠘꠣ, ꠔꠣꠘ ꠃꠝ꠆ꠝꠔ ꠅꠇꠟꠦꠃ ꠇꠞꠣꠁꠞꠣ। 3ꠢꠎꠞꠔ ꠁꠍꠣꠄ ꠁ ꠈꠛꠞ ꠙꠣꠁꠀ, ꠄꠢꠥꠖꠤꠀ ꠎꠤꠟꠣ ꠍꠣꠠꠤꠀ ꠢꠤꠞꠛꠣꠞ ꠉꠣꠟꠤꠟ ꠎꠤꠟꠣꠔ ꠎꠣꠅꠀꠞ ꠟꠣꠉꠤ ꠞꠅꠀꠘꠣ ꠅꠁꠟꠣ। 4ꠎꠣꠅꠀꠞ ꠇꠣꠟꠅ ꠔꠣꠘꠞꠦ ꠡꠝꠞꠤꠀꠞ ꠝꠣꠎꠖꠤ ꠎꠣꠅꠀ ꠟꠣꠉꠍꠤꠟ। 5ꠙꠕꠅ ꠔꠣꠁꠘ ꠡꠝꠞꠤꠀꠞ ꠡꠥꠈꠣꠞ ꠘꠣꠝꠞ ꠄꠇ ꠉꠣꠃꠞ ꠗꠣꠞꠅ ꠀꠁꠟꠣ। ꠢꠎꠞꠔ ꠁꠀꠇꠥꠛꠦ ꠔꠣꠘ ꠙꠥꠀ ꠁꠃꠍꠥꠚꠞꠦ ꠎꠦ ꠎꠝꠤꠘ ꠖꠣꠘ ꠇꠞꠍꠟꠣ, ꠅꠃ ꠎꠝꠤꠘꠈꠣꠘ ꠀꠍꠤꠟ ꠢꠃ ꠉꠣꠃꠞ ꠗꠣꠞꠅ। 6ꠁ ꠎꠝꠤꠘꠅ ꠢꠎꠞꠔ ꠁꠀꠇꠥꠛꠞ ꠇꠥꠀ ꠀꠍꠤꠟ। ꠁꠍꠣ ꠀꠐꠔꠦ ꠀꠐꠔꠦ ꠢꠦꠞꠣꠘ ꠅꠁꠀ ꠅꠃ ꠇꠥꠀꠞ ꠇꠣꠍꠣꠔ ꠎꠤꠞꠣꠁꠟꠣ। ꠅꠃ ꠡꠝꠄ ꠅꠘꠥꠝꠣꠘ ꠖꠥꠁꠚꠞ ꠅꠁꠉꠦꠍꠦ।

7-8ꠄꠞꠝꠣꠎꠦ ꠡꠝꠞꠤꠀ ꠎꠣꠔꠤꠞ ꠄꠇ ꠛꠦꠐꠤꠄ ꠙꠣꠘꠤ ꠔꠥꠟꠣꠔ ꠀꠁꠟ, ꠀꠞ ꠇꠥꠀꠞ ꠇꠣꠍꠣꠔ ꠁꠍꠣ ꠄꠇꠟꠣ ꠀꠍꠟꠣ, ꠇꠣꠞꠘ ꠔꠣꠘ ꠍꠣꠢꠣꠛꠤ ꠅꠇꠟ ꠈꠣꠘꠤ-ꠙꠣꠘꠤ ꠟꠅꠀꠞ ꠟꠣꠉꠤ ꠛꠣꠎꠣꠞꠅ ꠉꠦꠍꠟꠣꠉꠤ। ꠁꠍꠣꠄ ꠔꠣꠁꠞꠦ ꠇꠁꠟꠣ, “ꠅ ꠝꠣꠁ, ꠀꠝꠣꠞꠦ ꠕꠥꠠꠣ ꠙꠣꠘꠤ ꠈꠣꠅꠀꠃꠇ꠆ꠇꠣ।” 9ꠛꠦꠐꠤꠄ ꠇꠁꠟ, “ꠀꠝꠤ ꠔ ꠡꠝꠞꠤꠀ ꠎꠣꠔꠤꠞ ꠝꠣꠘꠥꠡ। ꠀꠙꠘꠦ ꠄꠇꠎꠘ ꠁꠢꠥꠖꠤ ꠅꠁꠀ ꠀꠝꠣꠞ ꠉꠦꠍꠦ ꠙꠣꠘꠤ ꠌꠣꠁꠞꠣ ꠇꠤꠟꠣ?” ꠛꠦꠐꠤꠄ ꠁꠈꠣꠘ ꠇꠁꠟ, ꠇꠣꠞꠘ ꠡꠝꠞꠤꠀ ꠎꠣꠔꠤꠞ ꠟꠉꠦ ꠁꠢꠥꠖꠤ ꠝꠣꠘꠡꠞ ꠇꠥꠘꠥꠎꠣꠔ ꠝꠤꠟ-ꠝꠤꠡ ꠛꠣ ꠌꠟꠣ-ꠚꠤꠞꠣ ꠀꠍꠤꠟ ꠘꠣ। 10ꠁꠍꠣꠄ ꠔꠣꠁꠞꠦ ꠇꠁꠟꠣ, “ꠔꠥꠝꠤ ꠎꠥꠖꠤ ꠎꠣꠘꠔꠣꠄ ꠀꠟ꠆ꠟꠣꠞ ꠖꠣꠘ ꠇꠤꠔꠣ, ꠀꠞ ꠇꠦ ꠔꠥꠝꠣꠞ ꠉꠦꠍꠦ ꠙꠣꠘꠤ ꠌꠣꠁꠞꠣ, ꠔꠦ ꠔꠥꠝꠤ ꠘꠤꠎꠦꠃ ꠔꠣꠘ ꠉꠦꠍꠦ ꠙꠣꠘꠤ ꠌꠣꠁꠟꠣꠄ ꠅꠘꠦ, ꠀꠞ ꠔꠣꠁꠘ ꠔꠥꠝꠣꠞꠦ ꠎꠤꠘ꠆ꠖꠣ ꠙꠣꠘꠤ ꠖꠤꠟꠣ ꠅꠘꠦ।” 11ꠛꠦꠐꠤꠄ ꠇꠁꠟ, “ꠍꠣꠛ, ꠀꠙꠘꠣꠞ ꠉꠦꠍꠦ ꠔ ꠙꠣꠘꠤ ꠔꠥꠟꠣꠞ ꠇꠥꠘ꠆ꠔꠣ ꠘꠣꠁ, ꠀꠞ ꠁ ꠇꠥꠀꠅ ꠉꠁꠘ। ꠔꠦ ꠎꠤꠘ꠆ꠖꠣ ꠙꠣꠘꠤ ꠇꠥꠀꠁ ꠕꠣꠇꠤ ꠙꠣꠁꠟꠣ? 12ꠀꠙꠘꠦ ꠇꠥꠘꠥ ꠀꠝꠞꠣꠞ ꠝꠥꠟ ꠝꠥꠞꠛ꠆ꠛꠤ ꠁꠀꠇꠥꠛ ꠘꠛꠤ ꠕꠣꠇꠤ ꠛꠠ ꠘꠤ? ꠔꠣꠁꠘꠃ ꠀꠝꠞꠣꠞ ꠟꠣꠉꠤ ꠁ ꠇꠥꠀ ꠈꠥꠖꠤꠍꠟꠣ। ꠔꠣꠁꠘ ꠀꠞ ꠔꠣꠘ ꠙꠥꠀꠂꠘ꠆ꠔꠦꠅ ꠅꠃ ꠇꠥꠀꠞ ꠙꠣꠘꠤ ꠈꠣꠁꠔꠣ, ꠀꠞ ꠔꠣꠘ ꠙꠡꠥꠞ ꠙꠣꠟꠞꠦꠅ ꠈꠣꠅꠀꠁꠔꠣ।”

13ꠔꠦꠃ ꠁꠍꠣꠄ ꠇꠁꠟꠣ, “ꠎꠦ ꠎꠘꠦ ꠁ ꠇꠥꠀꠞ ꠙꠣꠘꠤ ꠈꠣꠁꠛ, ꠔꠣꠞ ꠢꠤꠞꠛꠣꠞ ꠙꠤꠀꠍ ꠟꠣꠉꠛ। 14ꠅꠁꠟꠦ ꠀꠝꠣꠞ ꠖꠦꠅꠀ ꠙꠣꠘꠤ ꠎꠦ ꠈꠣꠁꠛ, ꠔꠣꠞ ꠇꠥꠘꠥ ꠡꠝꠄꠃ ꠙꠤꠀꠍ ꠟꠣꠉꠔ ꠘꠣꠄ। ꠛꠞꠋ ꠁ ꠙꠣꠘꠤ ꠔꠣꠞ ꠖꠤꠟꠞ ꠝꠣꠎꠦ ꠏꠞꠘꠣꠞ ꠟꠣꠈꠣꠘ ꠃꠕꠟꠤꠀ ꠃꠑꠛ ꠀꠞ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠛ।” 15ꠔꠦꠃ ꠛꠦꠐꠤꠄ ꠁꠍꠣꠞꠦ ꠇꠁꠟ, “ꠢꠥꠎꠥꠞ, ꠔꠦ ꠀꠝꠣꠞꠦꠅ ꠢꠃ ꠙꠣꠘꠤ ꠖꠦꠃꠇ꠆ꠇꠣ, ꠎꠣꠔꠦ ꠀꠝꠣꠞ ꠙꠤꠀꠍ ꠘꠣ ꠟꠣꠉꠦ, ꠀꠞ ꠙꠣꠘꠤꠞ ꠟꠣꠉꠤ ꠁꠘꠅ ꠀꠅꠀ ꠘꠣ ꠟꠣꠉꠦ।”

16ꠁꠍꠣꠄ ꠛꠦꠐꠤꠞꠦ ꠇꠁꠟꠣ, “ꠔꠦ ꠎꠣꠅ, ꠔꠥꠝꠣꠞ ꠎꠣꠝꠣꠁꠞꠦ ꠅꠘꠅ ꠟꠁꠀ ꠀꠅ।” 17ꠛꠦꠐꠤꠄ ꠇꠁꠟ, “ꠍꠣꠛ, ꠀꠝꠣꠞ ꠔ ꠇꠥꠘꠥ ꠎꠣꠝꠣꠁ ꠘꠣꠁ।” ꠁꠍꠣꠄ ꠇꠁꠟꠣ, “ꠔꠥꠝꠤ ꠑꠤꠇꠃ ꠇꠁꠍ, ꠔꠥꠝꠣꠞ ꠎꠣꠝꠣꠁ ꠘꠣꠁ। 18ꠇꠣꠞꠘ ꠄꠞ ꠀꠉꠦ ꠔ ꠔꠥꠝꠣꠞ ꠙꠣꠌ ꠎꠘ ꠎꠣꠝꠣꠁ ꠅꠁꠉꠦꠍꠂꠘ, ꠀꠞ ꠅꠈꠘ ꠎꠦ ꠔꠥꠝꠣꠞ ꠟꠉꠦ ꠀꠍꠦ, ꠢꠦ ꠔꠥꠝꠣꠞ ꠎꠣꠝꠣꠁ ꠘꠣꠄ। ꠔꠥꠝꠤ ꠢꠣꠍꠣ ꠇꠕꠣꠃ ꠇꠁꠟꠣꠄ।” 19ꠁꠈꠣꠘ ꠢꠥꠘꠤꠀ ꠛꠦꠐꠤꠄ ꠁꠍꠣꠞꠦ ꠇꠁꠟ, “ꠢꠥꠎꠥꠞ, ꠅꠈꠘ ꠀꠝꠤ ꠛꠥꠎꠟꠣꠝ, ꠀꠙꠘꠦ ꠄꠇꠎꠘ ꠘꠛꠤ। 20ꠀꠝꠞꠣꠞ ꠛꠣꠚ-ꠖꠣꠖꠣꠁꠘ꠆ꠔꠦ ꠅꠃ ꠙꠣꠠꠞ ꠃꠙꠞꠦꠃ ꠄꠛꠣꠖꠔ ꠇꠞꠔꠣ, ꠅꠁꠟꠦ ꠀꠙꠘꠣꠞꠣ ꠇꠂꠘ, ꠎꠦꠞꠥꠎꠣꠟꠦꠝꠅꠃ ꠝꠣꠘꠡꠞ ꠄꠛꠣꠖꠔ ꠇꠞꠣ ꠃꠌꠤꠔ।”

21ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠢꠥꠘꠅ, ꠀꠝꠣꠞ ꠝꠣꠔꠈꠣꠘ ꠄꠇꠤꠘ ꠇꠞꠅ। ꠖꠦꠈꠤꠅ, ꠅꠃꠟꠣ ꠡꠝꠄ ꠀꠁꠛ ꠎꠦꠛꠟꠣ ꠔꠥꠝꠞꠣ ꠁ ꠙꠣꠠꠞ ꠃꠙꠞꠦ, ꠛꠣ ꠎꠦꠞꠥꠎꠣꠟꠦꠝꠞ ꠇꠥꠘꠥꠈꠣꠘꠅ, ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠄꠛꠣꠖꠔ ꠇꠞꠔꠣꠄ ꠘꠣꠄ। 22ꠔꠥꠝꠞꠣ ꠎꠣꠞꠦ ꠌꠤꠘꠅ ꠘꠣ, ꠔꠣꠞ ꠄꠛꠣꠖꠔ ꠇꠞꠅ, ꠅꠁꠟꠦ ꠀꠝꠞꠣ ꠎꠣꠘ ꠄꠛꠣꠖꠔ ꠇꠞꠤ, ꠔꠣꠘꠞꠦ ꠀꠝꠞꠣ ꠌꠤꠘꠤ। ꠎꠣꠘ ꠘꠤ, ꠘꠣꠎꠣꠔꠞ ꠙꠕ ꠔ ꠁꠢꠥꠖꠤ ꠅꠇꠟꠞ ꠝꠣꠎꠖꠤꠃ ꠀꠁꠍꠦ। 23ꠢꠥꠘꠅ, ꠅꠟꠣ ꠡꠝꠄ ꠀꠁꠛ, ꠛꠞꠋ ꠅꠈꠘꠃ ꠀꠁꠌ꠆ꠍꠦ, ꠎꠦꠛꠟꠣ ꠀꠍꠟ ꠄꠛꠣꠖꠔꠇꠣꠞꠤ ꠅꠇꠟꠦ ꠢꠇ꠆ꠇꠣꠘꠤ ꠞꠥꠢꠦ ꠉꠣꠁꠛꠤ ꠛꠣꠚ ꠀꠟ꠆ꠟꠣꠞ ꠄꠛꠣꠖꠔ ꠇꠞꠛꠣ। ꠉꠣꠁꠛꠤ ꠛꠣꠚꠦꠅ ꠅꠟꠣꠈꠣꠘ ꠄꠛꠣꠖꠔꠇꠣꠞꠤꠞ ꠔꠣꠟ꠆ꠟꠣꠡ ꠇꠞꠂꠘ। 24ꠀꠟ꠆ꠟꠣꠔꠣꠟꠣ ꠅꠁꠟꠣꠉꠤ ꠞꠥꠢꠥ, ꠄꠞꠟꠣꠉꠤ ꠎꠣꠞꠣ ꠔꠣꠘ ꠄꠛꠣꠖꠔ ꠇꠞꠛꠣ, ꠔꠣꠞꠣ ꠢꠇ꠆ꠇꠣꠘꠤ ꠞꠥꠢꠦ ꠔꠣꠘ ꠄꠛꠣꠖꠔ ꠇꠞꠣ ꠟꠣꠉꠛ।”

25ꠛꠣꠖꠦ ꠅꠃ ꠛꠦꠐꠤꠄ ꠇꠁꠟ, “ꠀꠝꠤ ꠎꠣꠘꠤ, ꠀꠟ-ꠝꠍꠤ ꠀꠁꠞꠣ। ꠔꠣꠁꠘ ꠀꠁꠀ ꠢꠇꠟꠔꠣ ꠀꠝꠞꠣꠞꠦ ꠎꠣꠘꠣꠁꠛꠣ।” 26ꠁꠍꠣꠄ ꠅꠃ ꠛꠦꠐꠤꠞꠦ ꠇꠁꠟꠣ, “ꠀꠝꠤꠃ ꠢꠦꠁꠘ, ꠎꠦꠁꠘ ꠅꠈꠘ ꠔꠥꠝꠣꠞ ꠟꠉꠦ ꠝꠣꠔꠤꠞꠣ।”

27ꠅꠃ ꠡꠝꠄ ꠍꠣꠢꠣꠛꠤ ꠅꠇꠟꠦ ꠀꠁꠀ ꠖꠦꠈꠟꠣ, ꠁꠍꠣꠄ ꠄꠇ ꠛꠦꠐꠤꠞ ꠟꠉꠦ ꠝꠣꠔꠤꠞꠣ, ꠖꠦꠈꠤꠀ ꠔꠣꠞꠣ ꠔꠣꠁꠎ꠆ꠎꠥꠛ ꠅꠁꠉꠦꠟꠣ। ꠔꠣ-ꠅ ꠔꠣꠞꠣ ꠇꠦꠃ ꠎꠤꠇꠣꠁꠟꠣ ꠘꠣ, ꠀꠙꠘꠦ ꠇꠤꠔꠣ ꠌꠣꠁꠞꠣ ꠛꠣ ꠄꠘ ꠟꠉꠦ ꠝꠣꠔꠤꠞꠣ ꠇꠦꠘꠦ। 28ꠛꠣꠖꠦ ꠛꠦꠐꠤꠄ ꠔꠣꠁꠞ ꠙꠣꠘꠤꠞ ꠈꠂꠟꠣ ꠕꠁꠀ ꠉꠣꠃꠞ ꠝꠣꠘꠡꠞꠦ ꠉꠤꠀ ꠇꠁꠟ, 29“ꠔꠥꠝꠞꠣ ꠀꠁꠀ ꠄꠇꠎꠘꠞꠦ ꠖꠦꠈꠤ ꠎꠣꠅ। ꠀꠝꠣꠞ ꠎꠤꠘ꠆ꠖꠦꠉꠤꠔ ꠎꠦꠔꠣ ꠇꠞꠍꠤ, ꠁꠔꠣ ꠢꠇꠟꠔꠣꠃ ꠔꠣꠁꠘ ꠇꠁꠟꠤꠍꠂꠘ। ꠔꠦ ꠔꠣꠁꠘꠃ ꠇꠤꠔꠣ ꠢꠃ ꠀꠟ-ꠝꠍꠤ ꠘꠤ?” 30ꠁꠔꠣ ꠢꠥꠘꠤꠀ ꠉꠣꠃꠞ ꠝꠣꠘꠥꠡ ꠛꠣꠞ ꠅꠁꠀ ꠁꠍꠣꠞ ꠉꠦꠍꠦ ꠀꠅꠀ ꠗꠞꠟꠣ।

31ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠦ ꠔꠣꠘꠞꠦ ꠅꠘꠥꠞꠥꠗ ꠇꠞꠤ ꠇꠁꠟꠣ, “ꠢꠥꠎꠥꠞ, ꠇꠥꠘ꠆ꠔꠣ ꠈꠣꠃꠇ꠆ꠇꠣ।” 32ꠔꠣꠁꠘ ꠇꠁꠟꠣ, “ꠀꠝꠣꠞ ꠉꠦꠍꠦ ꠁꠟꠣ ꠈꠣꠘꠤ ꠀꠍꠦ, ꠎꠦ ꠈꠣꠘꠤꠞ ꠛꠦꠙꠣꠞꠦ ꠔꠥꠝꠞꠣ ꠎꠣꠘ ꠘꠣ।” 33ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠔꠦ ꠔꠣꠘꠞꠦ ꠇꠦꠃ ꠇꠥꠘꠥ ꠈꠣꠘꠤ ꠀꠘꠤꠀ ꠖꠤꠍꠦ ꠘꠣ ꠇꠤꠔꠣ?” 34ꠔꠦꠃ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠎꠦꠁꠘ ꠀꠝꠣꠞꠦ ꠛꠦꠎꠤꠍꠂꠘ, ꠔꠣꠘ ꠝꠞ꠆ꠎꠤ ꠝꠣꠚꠤꠇ ꠔꠣꠘ ꠇꠣꠝ ꠙꠥꠞꠣ ꠇꠞꠣꠃ ꠀꠝꠣꠞ ꠈꠣꠘꠤ।

35“ꠔꠥꠝꠞꠣ ꠇꠅ ꠘꠣ ꠘꠤ, ‘ꠀꠞ ꠌꠣꠁꠞ ꠝꠣꠡ ꠛꠣꠖꠦꠃ ꠚꠡꠟ ꠇꠣꠐꠣꠞ ꠡꠝꠄ ꠀꠁꠛ’? ꠅꠁꠟꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠜꠣꠟꠣ ꠇꠞꠤ ꠄꠇꠛꠣꠞ ꠈꠦꠔꠦꠖꠤ ꠌꠣꠁꠀ ꠖꠦꠈꠅ, ꠚꠡꠟ ꠙꠣꠇꠤꠀ ꠇꠣꠐꠣꠞ ꠎꠥꠇꠣ ꠅꠁꠉꠦꠍꠦ। 36ꠚꠡꠟ ꠇꠣꠐꠞꠣꠄ ꠅꠈꠘꠃ ꠛꠦꠔꠘ ꠙꠣꠁꠞꠣ ꠀꠞ ꠀꠈꠦꠞꠞ ꠟꠣꠉꠤ ꠚꠡꠟ ꠖꠟꠣ ꠇꠞꠞꠣ। ꠄꠞꠟꠣꠉꠤ ꠎꠦꠁꠘ ꠎꠣꠟꠣ ꠛꠣꠁꠘ ꠖꠦꠁꠘ ꠀꠞ ꠎꠦꠁꠘ ꠚꠡꠟ ꠇꠣꠐꠂꠘ, ꠖꠥꠁꠅꠎꠘꠃ ꠢꠝꠣꠘ ꠈꠥꠡꠤ ꠅꠁꠘ। 37ꠄꠔꠦ ꠅꠃ ꠍꠤꠟ꠆ꠟꠦꠈꠞ ꠙꠞꠝꠣꠘ ꠅꠄ, ‘ꠄꠇꠎꠘꠦ ꠛꠣꠁꠘ ꠖꠦꠁꠘ, ꠀꠞꠇ ꠎꠘꠦ ꠇꠣꠐꠂꠘ।’ 38ꠀꠝꠤꠅ ꠔꠥꠝꠞꠣꠞꠦ ꠅꠟꠣ ꠚꠡꠟ ꠇꠣꠐꠣꠔ ꠙꠣꠑꠣꠁꠍꠤ, ꠎꠦ ꠚꠡꠟꠞ ꠟꠣꠉꠤ ꠔꠥꠝꠞꠣ ꠝꠦꠘꠔ ꠇꠞꠍ ꠘꠣ। ꠅꠁꠘ꠆ꠘ ꠝꠣꠘꠡꠦ ꠝꠦꠘꠔ ꠇꠞꠍꠦ ꠀꠞ ꠔꠥꠝꠞꠣ ꠅꠃ ꠝꠦꠘꠔꠞ ꠚꠡꠟ ꠇꠣꠐꠤꠍ।”

39ꠎꠦ ꠛꠦꠐꠤꠞ ꠎꠤꠘ꠆ꠖꠦꠉꠤꠞ ꠢꠇꠟꠔꠣ ꠁꠍꠣꠄ ꠇꠁꠟꠤꠍꠂꠘ, ꠅꠃ ꠛꠦꠐꠤꠞ ꠡꠣꠇ꠆ꠇꠤ ꠢꠥꠘꠤꠀ ꠢꠃ ꠉꠣꠃꠞ ꠛꠃꠔ ꠡꠝꠞꠤꠀ ꠝꠣꠘꠡꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ। 40ꠔꠣꠞꠣ ꠁꠍꠣꠞꠦ ꠉꠤꠀ ꠝꠤꠘꠔ ꠇꠞꠤ ꠇꠁꠟꠣ, ꠔꠣꠞꠣꠞ ꠅꠈꠣꠘꠅ ꠞꠁꠛꠣꠞ ꠟꠣꠉꠤ। ꠄꠞꠖꠣꠄ ꠔꠣꠁꠘ ꠖꠥꠁ ꠖꠤꠘ ꠢꠘꠅ ꠞꠁꠟꠣ। 41ꠅꠃ ꠡꠝꠄ ꠔꠣꠘ ꠔꠣꠟꠤꠝ ꠢꠥꠘꠤꠀ ꠀꠞꠅ ꠛꠃꠔ ꠝꠣꠘꠡꠦ ꠁꠝꠣꠘ ꠀꠘꠟꠣ। 42ꠀꠞ ꠉꠣꠃꠞ ꠝꠣꠘꠡꠦ ꠅꠃ ꠛꠦꠐꠤꠞꠦ ꠇꠁꠟꠣ, “ꠔꠥꠝꠣꠞ ꠇꠕꠣꠄ ꠀꠝꠞꠣ ꠁꠝꠣꠘ ꠀꠘꠍꠤ ꠘꠣ, ꠀꠝꠞꠣ ꠘꠤꠎꠦꠃ ꠔꠣꠘ ꠝꠣꠔ ꠢꠥꠘꠤꠀ ꠛꠥꠎꠔꠣꠝ ꠙꠣꠞꠍꠤ, ꠄꠁꠘꠃ ꠎꠉꠔꠞ ꠀꠍꠟ ꠔꠞꠣꠘꠦꠀꠟꠣ।”

ꠢꠎꠞꠔ ꠁꠍꠣꠞ ꠖꠥꠍꠞꠣ ꠇꠦꠞꠣꠝꠔꠤ

43ꠡꠝꠞꠤꠀꠔ ꠖꠥꠁꠖꠤꠘ ꠞꠁꠀ ꠢꠣꠞꠤ ꠢꠎꠞꠔ ꠁꠍꠣ ꠘꠤꠎꠞ ꠛꠣꠠꠤ ꠉꠣꠟꠤꠟ ꠎꠤꠟꠣꠔ ꠉꠦꠟꠣꠉꠤ। 44ꠎꠥꠖꠤꠅ ꠔꠣꠁꠘ ꠀꠉꠦ ꠇꠁꠍꠟꠣ, ꠇꠥꠘꠥ ꠘꠛꠤꠞꠦꠃ ꠘꠤꠎꠞ ꠖꠦꠡꠅ ꠖꠣꠝ ꠖꠦꠅꠀ ꠅꠄ ꠘꠣ, 45ꠔꠦꠛꠃ ꠅꠃ ꠡꠝꠄ ꠔꠣꠞꠣ ꠔꠣꠘꠞꠦ ꠇꠛꠥꠟ ꠇꠞꠟꠣ। ꠇꠣꠞꠘ ꠁꠖꠞ ꠡꠝꠄ ꠁꠍꠣꠄ ꠎꠦꠞꠥꠎꠣꠟꠦꠝꠅ ꠎꠦꠔꠣ ꠇꠦꠞꠣꠝꠔꠤ ꠖꠦꠈꠣꠁꠍꠟꠣ, ꠉꠣꠟꠤꠟꠞ ꠝꠣꠘꠥꠡ ꠢꠘꠅ ꠕꠣꠇꠣꠄ ꠔꠣꠞꠣ ꠁꠔꠣ ꠖꠦꠈꠍꠟꠣ ꠇꠞꠤ ꠔꠣꠁꠘ ꠉꠣꠟꠤꠟꠅ ꠀꠁꠟꠦ ꠔꠣꠞꠣ ꠇꠛꠥꠟ ꠇꠞꠟꠣ।

46ꠛꠣꠖꠦ ꠁꠍꠣ ꠢꠤꠞꠛꠣꠞ ꠉꠣꠟꠤꠟꠞ ꠇꠣꠘ꠆ꠘꠣ ꠉꠣꠃꠔ ꠉꠦꠟꠣ। ꠅꠘꠅꠃ ꠔꠣꠁꠘ ꠙꠣꠘꠤꠞꠦ ꠀꠋꠉꠥꠞꠞ ꠡꠞꠛꠔ ꠛꠣꠘꠣꠁꠍꠟꠣ। ꠇꠚꠞꠘꠣꠃꠝ ꠐꠣꠃꠘꠅ ꠄꠇ ꠡꠞꠇꠣꠞꠤ ꠅꠚꠤꠡꠣꠞꠞ ꠙꠥꠀ ꠈꠥꠛ ꠛꠦꠝꠣꠞ ꠀꠍꠤꠟ। 47ꠢꠎꠞꠔ ꠁꠍꠣ ꠄꠢꠥꠖꠤꠀ ꠕꠣꠇꠤ ꠉꠣꠟꠤꠟ ꠀꠁꠍꠂꠘ ꠢꠥꠘꠤꠀ, ꠅꠃ ꠅꠚꠤꠡꠣꠞ ꠔꠣꠘ ꠉꠦꠍꠦ ꠉꠤꠀ ꠝꠤꠘꠔ ꠇꠞꠟꠣ, ꠔꠣꠁꠘ ꠎꠣꠘꠥ ꠇꠚꠞꠘꠣꠃꠝ ꠉꠤꠀ ꠄꠘ ꠙꠥꠀꠉꠥꠞꠦ ꠜꠣꠟꠣ ꠇꠞꠂꠘ। ꠅꠃ ꠡꠝꠄ ꠔꠣꠘ ꠙꠥꠀ ꠝꠞꠣꠞ ꠙꠕꠤ ꠅꠁꠉꠦꠍꠤꠟ।

48ꠁꠍꠣꠄ ꠅꠃ ꠅꠚꠤꠡꠣꠞꠞꠦ ꠇꠁꠟꠣ, “ꠇꠥꠘꠥ ꠘꠤꠡꠣꠘꠣ ꠛꠣ ꠇꠦꠞꠣꠝꠔꠤ ꠇꠣꠝ ꠘꠣ ꠖꠦꠈꠟꠦ ꠀꠙꠘꠣꠞꠣ ꠇꠥꠘꠥꠝꠘ꠆ꠔꠦꠃ ꠁꠝꠣꠘ ꠀꠘꠔꠣ ꠘꠣꠄ।” 49ꠔꠦꠃ ꠅꠚꠤꠡꠣꠞꠦ ꠇꠁꠟꠣ, “ꠢꠥꠎꠥꠞ, ꠖꠄꠀ ꠇꠞꠤ ꠎꠟꠖꠤ ꠀꠃꠇ꠆ꠇꠣ, ꠙꠥꠀꠉꠥꠞ ꠎꠣꠘ ꠕꠣꠇꠔꠦ ꠀꠃꠇ꠆ꠇꠣ।” 50ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠀꠙꠘꠦ ꠎꠣꠃꠇ꠆ꠇꠣꠉꠤ, ꠀꠙꠘꠣꠞ ꠙꠥꠀ ꠜꠣꠟꠣ ꠅꠁꠉꠦꠍꠦ।” ꠁꠍꠣꠞ ꠇꠕꠣ ꠄꠇꠤꠘ ꠇꠞꠤꠀ ꠄꠁꠘ ꠉꠦꠟꠣꠉꠤ।

51ꠢꠣꠍꠣꠃ, ꠢꠃ ꠅꠚꠤꠡꠣꠞ ꠛꠣꠠꠤꠔ ꠎꠣꠅꠀꠞ ꠙꠕꠦ ꠔꠣꠘ ꠉꠥꠟꠣꠝ ꠅꠇꠟꠦ ꠀꠁꠀ ꠈꠛꠞ ꠇꠁꠟ, “ꠍꠣꠛ, ꠀꠙꠘꠣꠞ ꠙꠥꠀꠞ ꠛꠦꠝꠣꠞ ꠇꠝꠤꠉꠦꠍꠦ।” 52ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠢꠦ ꠇꠥꠘ ꠡꠝꠄ ꠜꠣꠟꠣ ꠅꠁꠍꠦ?” ꠔꠣꠞꠣ ꠇꠁꠟꠣ, “ꠇꠣꠁꠟ ꠖꠥꠁꠚꠞ ꠕꠣꠇꠤ ꠔꠣꠘ ꠔꠣꠙ ꠍꠣꠠꠤ ꠖꠤꠍꠦ।” 53ꠔꠦꠃ ꠅꠚꠤꠡꠣꠞꠞ ꠝꠘꠅ ꠅꠁꠟ, ꠑꠤꠇ ꠖꠥꠁꠚꠞꠤ ꠛꠣꠟꠣ ꠁꠍꠣꠄ ꠔꠣꠘꠞꠦ ꠇꠁꠍꠟꠣ, “ꠀꠙꠘꠦ ꠎꠣꠃꠇ꠆ꠇꠣꠉꠤ, ꠀꠙꠘꠣꠞ ꠙꠥꠀ ꠜꠣꠟꠣ ꠅꠁꠉꠦꠍꠦ।” ꠄꠞꠟꠣꠉꠤ ꠅꠃ ꠅꠚꠤꠡꠣꠞ ꠀꠞ ꠔꠣꠘ ꠙꠞꠤꠛꠣꠞꠞ ꠢꠇꠟꠦ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ। 54ꠢꠎꠞꠔ ꠁꠍꠣ ꠄꠢꠥꠖꠤꠀ ꠕꠘꠦ ꠉꠣꠟꠤꠟꠅ ꠀꠅꠀꠞ ꠛꠣꠖꠦ ꠅꠃ ꠖꠥꠍꠞꠣ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠟꠣ।

Currently Selected:

ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 4: sylN

Highlight

Copy