ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 3
3
ꠘꠄꠀ ꠎꠘꠝ ꠀꠞ ꠄꠇꠤꠘꠞ ꠛꠦꠙꠣꠞꠦ ꠔꠣꠟꠤꠝ
1ꠚꠞꠤꠡꠤ ꠅꠇꠟꠞ ꠝꠣꠎꠦ ꠘꠤꠇꠖꠤꠝ ꠘꠣꠝꠦ ꠁꠢꠥꠖꠤ ꠅꠇꠟꠞ ꠄꠇꠎꠘ ꠘꠦꠔꠣ ꠀꠍꠟꠣ। 2ꠄꠇꠖꠤꠘ ꠞꠣꠁꠔ ꠔꠣꠁꠘ ꠀꠁꠀ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠎꠣꠘꠤ, ꠀꠙꠘꠦ ꠄꠇꠎꠘ ꠃꠡ꠆ꠔꠣꠖ ꠢꠤꠡꠣꠛꠦ ꠀꠟ꠆ꠟꠣꠞ ꠉꠦꠍ ꠕꠣꠇꠤ ꠀꠁꠍꠂꠘ। ꠀꠙꠘꠦ ꠎꠦꠔꠣ ꠇꠦꠞꠣꠝꠔꠤ ꠇꠣꠝ ꠇꠞꠞꠣ, ꠀꠟ꠆ꠟꠣ ꠟꠉꠦ ꠘꠣ ꠕꠣꠇꠟꠦ ꠇꠦꠃ ꠁꠔꠣ ꠇꠞꠔ ꠙꠣꠞꠦ ꠘꠣ।” 3ꠔꠣꠁꠘ ꠘꠤꠇꠖꠤꠝꠞꠦ ꠇꠁꠟꠣ, “ꠀꠝꠤ ꠀꠙꠘꠣꠞꠦ ꠢꠣꠍꠣꠃ ꠇꠁꠞꠣꠝ, ꠘꠄꠀ ꠇꠞꠤ ꠎꠘꠝ ꠘꠣ ꠟꠁꠟꠦ ꠇꠦꠃ ꠀꠟ꠆ꠟꠣꠞ ꠛꠣꠖꠡꠣꠁ ꠖꠦꠈꠦ ꠘꠣ।” 4ꠔꠦꠃ ꠘꠤꠇꠖꠤꠝꠦ ꠔꠣꠘꠞꠦ ꠇꠁꠟꠣ, “ꠝꠣꠘꠥꠡ ꠛꠥꠠꠣ ꠅꠁꠉꠦꠟꠦ ꠢꠤꠞꠛꠣꠞ ꠎꠘꠝ ꠟꠄ ꠇꠤꠟꠣ? ꠖꠥꠍꠞꠣꠛꠣꠞ ꠝꠣʼꠞ ꠙꠦꠐꠅ ꠢꠣꠝꠣꠁꠀ ꠎꠘꠝ ꠟꠄ ꠘꠤ?” 5ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠀꠙꠘꠣꠞꠦ ꠢꠣꠍꠣꠃ ꠇꠁꠞꠣꠝ, ꠙꠣꠘꠤ ꠀꠞ ꠙꠣꠇ ꠞꠥꠢꠥ ꠕꠣꠇꠤ ꠎꠘꠝ ꠘꠣ ꠅꠁꠟꠦ ꠇꠦꠃ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠔ ꠙꠣꠞꠦ ꠘꠣ। 6ꠞꠇ꠆ꠔ-ꠝꠣꠋꠡ ꠕꠣꠇꠤ ꠎꠦꠔꠣꠞ ꠎꠘꠝ ꠅꠄ, ꠁꠔꠣ ꠔ ꠈꠣꠟꠤ ꠞꠇ꠆ꠔ-ꠝꠣꠋꠡ। ꠀꠞ ꠙꠣꠇ ꠞꠥꠢꠥ ꠕꠣꠇꠤ ꠎꠦꠔꠣꠞ ꠎꠘꠝ, ꠁꠔꠣ ꠞꠥꠢꠥ। 7ꠀꠝꠤ ꠎꠦ ꠀꠙꠘꠣꠞꠦ ꠇꠁꠟꠣꠝ, ꠘꠄꠀ ꠇꠞꠤ ꠎꠘꠝ ꠟꠅꠀ ꠎꠞꠥꠞ, ꠄꠔꠦ ꠔꠣꠁꠎ꠆ꠎꠥꠛ ꠅꠁꠛꠣ ꠘꠣ। 8ꠛꠣꠔꠣꠡ ꠔꠣꠞ ꠎꠦꠛꠣꠄ ꠁꠌ꠆ꠍꠣ ꠅꠛꠣꠄ ꠎꠣꠄ, ꠀꠞ ꠀꠙꠘꠦ ꠔꠣꠞ ꠀꠅꠀꠎ ꠢꠥꠘꠂꠘ, ꠅꠁꠟꠦ ꠇꠁ ꠕꠣꠇꠤ ꠀꠄ ꠀꠞ ꠇꠁ ꠎꠣꠄ, ꠁꠈꠣꠘ ꠎꠣꠘꠂꠘ ꠘꠣ। ꠔꠦ ꠙꠣꠇ ꠞꠥꠢꠥ ꠕꠣꠇꠤ ꠎꠦꠞꠣꠞ ꠎꠘꠝ ꠅꠁꠍꠦ, ꠔꠣꠞꠣꠞ ꠛꠦꠟꠣꠄꠅ ꠅꠟꠣꠈꠣꠘ ꠅꠄ।”
9ꠘꠤꠇꠖꠤꠝꠦ ꠁꠍꠣꠞꠦ ꠎꠤꠇꠣꠁꠟꠣ, “ꠁꠇꠐꠣ ꠇꠤꠟꠣ ꠅꠁꠔ ꠙꠣꠞꠦ?” 10ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠙꠘꠦ ꠛꠘꠤ ꠁꠍꠞꠣꠁꠟꠞ ꠃꠡ꠆ꠔꠣꠖ ꠅꠁꠀꠅ ꠁꠔꠣ ꠛꠥꠎꠂꠘ ꠘꠣ ꠘꠤ? 11ꠀꠙꠘꠣꠞꠦ ꠢꠣꠍꠣꠃ ꠇꠁꠞꠣꠝ, ꠀꠝꠞꠣ ꠎꠦꠔꠣ ꠎꠣꠘꠤ ꠅꠈꠣꠘꠃ ꠇꠁ, ꠀꠞ ꠎꠦꠔꠣ ꠖꠦꠈꠍꠤ ꠅꠃ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠁ। ꠅꠁꠟꠦ ꠀꠙꠘꠣꠞꠣ ꠀꠝꠞꠣꠞ ꠡꠣꠇ꠆ꠇꠤ ꠝꠣꠘꠂꠘ ꠘꠣ। 12ꠀꠝꠤ ꠀꠙꠘꠣꠞꠣꠞꠦ ꠖꠥꠘꠤꠀꠛꠤ ꠛꠦꠙꠣꠞꠦ ꠇꠁꠟꠦ ꠎꠦꠛꠟꠣ ꠄꠇꠤꠘ ꠇꠞꠂꠘ ꠘꠣ, ꠔꠦ ꠛꠦꠢꠦꠡ꠆ꠔꠤ ꠛꠦꠙꠣꠞ ꠇꠁꠟꠦ ꠇꠤꠟꠣ ꠄꠇꠤꠘ ꠇꠞꠛꠣ? 13ꠎꠦꠁꠘ ꠛꠦꠢꠦꠡ꠆ꠔꠅ ꠕꠣꠇꠂꠘ ꠀꠞ ꠛꠦꠢꠦꠡ꠆ꠔ ꠕꠣꠇꠤ ꠀꠁꠍꠂꠘ, ꠢꠃ ꠛꠤꠘ-ꠀꠖꠝ ꠍꠣꠠꠣ ꠀꠞ ꠇꠦꠃ ꠛꠦꠢꠦꠡ꠆ꠔꠅ ꠃꠑꠍꠂꠘ ꠘꠣ।
14“ꠝꠞꠥꠜꠥꠝꠤꠞ ꠝꠣꠎꠦ ꠝꠥꠍꠣ ꠘꠛꠤꠄ ꠎꠦꠟꠣ ꠢꠣꠚꠞꠦ ꠃꠌꠣꠔ ꠔꠥꠟꠍꠤꠟꠣ, ꠅꠟꠣ ꠀꠝꠤ ꠛꠤꠘ-ꠀꠖꠝꠞꠦꠅ ꠃꠌꠣꠔ ꠔꠥꠟꠣ ꠅꠁꠛ। 15ꠎꠣꠔꠦ ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠦ। 16ꠀꠟ꠆ꠟꠣ ꠙꠣꠇꠦ ꠖꠥꠘꠤꠀꠞ ꠝꠣꠘꠡꠞꠦ ꠅꠔ ꠛꠦꠡꠤ ꠝꠣꠄꠀ ꠇꠞꠟꠣ, ꠁ ꠝꠣꠄꠀꠞ ꠈꠣꠔꠤꠞꠦ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞꠦ ꠖꠣꠘ ꠇꠞꠟꠣ। ꠎꠦ ꠝꠣꠘꠡꠦ ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠛꠤꠘꠣꠡ ꠅꠄ ꠘꠣ, ꠛꠞꠋ ꠀꠈꠦꠞꠤ ꠎꠤꠘ꠆ꠖꠦꠉꠤ ꠢꠣꠍꠤꠟ ꠇꠞꠦ।
17“ꠀꠟ꠆ꠟꠣꠄ ꠝꠣꠘꠡꠞꠦ ꠖꠥꠡꠤ ꠙꠞꠝꠣꠘ ꠇꠞꠣꠞ ꠟꠣꠉꠤ ꠔꠣꠘ ꠝꠣꠄꠀꠞ ꠎꠘꠞꠦ ꠖꠥꠘꠤꠀꠔ ꠙꠣꠑꠣꠁꠍꠂꠘ ꠘꠣ। ꠅꠃ ꠝꠣꠄꠀꠞ ꠎꠘꠞ ꠈꠣꠔꠤꠞꠦ ꠝꠣꠘꠡꠦ ꠎꠣꠔꠦ ꠘꠣꠎꠣꠔ ꠙꠣꠄ, ꠄꠞꠟꠣꠉꠤꠃ ꠙꠣꠑꠣꠁꠍꠂꠘ। 18ꠎꠦ ꠎꠘꠦ ꠅꠃ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠦ, ꠔꠣꠞ ꠇꠥꠘꠥ ꠛꠤꠌꠣꠞ ꠅꠄ ꠘꠣ, ꠅꠁꠟꠦ ꠎꠦ ꠁꠝꠣꠘ ꠀꠘꠦ ꠘꠣ, ꠔꠣꠞꠦ ꠀꠉꠦꠃ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠉꠦꠍꠦ। ꠇꠣꠞꠘ ꠀꠟ꠆ꠟꠣꠞ ꠄꠇꠝꠣꠔ꠆ꠞ ꠝꠣꠄꠀꠞ ꠎꠘ ꠁꠛꠘꠥꠟ꠆ꠟꠣꠞ ꠃꠙꠞꠦ ꠢꠦ ꠁꠝꠣꠘ ꠀꠘꠍꠦ ꠘꠣ। 19ꠔꠣꠞꠦ ꠖꠥꠡꠤ ꠡꠣꠁꠛꠡ꠆ꠔ ꠇꠞꠣ ꠅꠁꠍꠦ, ꠇꠣꠞꠘ ꠖꠥꠘꠤꠀꠔ ꠘꠥꠞ ꠎꠣꠁꠞ ꠅꠁꠍꠦ। ꠅꠁꠟꠦ ꠝꠣꠘꠡꠞ ꠛꠖ ꠇꠣꠝꠞ ꠟꠣꠉꠤ ꠘꠥꠞ ꠕꠣꠇꠤ ꠀꠘ꠆ꠖꠣꠁꠞꠞꠦ ꠛꠦꠡꠤ ꠜꠣꠟꠣ ꠙꠣꠁꠍꠦ। 20ꠎꠦ ꠝꠣꠘꠡꠦ ꠛꠖ ꠇꠣꠝ ꠇꠞꠦ, ꠢꠦ ꠘꠥꠞꠞꠦ ꠊꠤꠘ꠆ꠘꠣꠄ, ꠔꠣꠞ ꠛꠖ ꠇꠣꠝ ꠅꠇꠟ ꠎꠣꠁꠞ ꠅꠁꠎꠤꠛ ꠇꠞꠤ ꠢꠦ ꠘꠥꠞꠞ ꠉꠦꠍꠦ ꠀꠄ ꠘꠣ। 21ꠅꠁꠟꠦ ꠎꠦ ꠎꠘ ꠢꠇ-ꠢꠣꠟꠣꠟꠤꠞ ꠙꠕꠦ ꠌꠟꠦ, ꠢꠦ ꠘꠥꠞꠞ ꠉꠦꠍꠦ ꠀꠄ, ꠎꠣꠔꠦ ꠔꠣꠞ ꠢꠇꠟ ꠇꠣꠝ ꠀꠟ꠆ꠟꠣꠞ ꠝꠥꠘꠡꠣ ꠝꠣꠚꠤꠇ ꠅꠁꠍꠦ ꠇꠞꠤ ꠙꠞꠝꠣꠘ ꠅꠄ।”
ꠄꠢꠤꠀ ꠘꠛꠤꠄ ꠁꠍꠣꠞ ꠛꠦꠙꠣꠞꠦ ꠇꠁꠞꠣ
22ꠄꠞꠛꠣꠖꠦ ꠢꠎꠞꠔ ꠁꠍꠣ ꠀꠞ ꠍꠣꠢꠣꠛꠤ ꠅꠇꠟ ꠄꠢꠥꠖꠤꠀ ꠄꠟꠣꠇꠣꠔ ꠀꠁꠟꠣ। ꠢꠤꠘꠅ ꠔꠣꠁꠘ ꠍꠣꠢꠣꠛꠤ ꠅꠇꠟꠞ ꠟꠉꠦ ꠇꠤꠍꠥ ꠖꠤꠘ ꠇꠣꠐꠣꠁꠟꠣ ꠀꠞ ꠝꠣꠘꠡꠞꠦ ꠔꠃꠛꠣꠞ ꠉꠥꠍꠟ ꠇꠞꠣꠁꠟꠣ। 23ꠅꠃ ꠡꠝꠄ ꠍꠣꠟꠤꠝ ꠘꠣꠝꠞ ꠄꠇ ꠉꠣꠃꠞ ꠇꠣꠘ꠆ꠖꠣꠔ ꠅꠂꠘꠥꠘ ꠘꠣꠝꠞ ꠄꠇ ꠎꠣꠉꠣꠔ ꠄꠢꠤꠀꠄꠅ ꠔꠃꠛꠣꠞ ꠉꠥꠍꠟ ꠇꠞꠣꠘꠤꠔ ꠀꠍꠟꠣ। ꠢꠃ ꠎꠣꠉꠣꠔ ꠛꠃꠔ ꠙꠣꠘꠤ ꠕꠣꠇꠣꠄ ꠖꠟꠦ ꠖꠟꠦ ꠝꠣꠘꠥꠡ ꠀꠁꠀ ꠔꠃꠛꠣꠞ ꠉꠥꠍꠟ ꠟꠁꠟꠣ। 24ꠄꠢꠤꠀ ꠘꠛꠤꠞꠦ ꠅꠃ ꠡꠝꠄꠅ ꠎꠦꠟꠅ ꠛꠘ꠆ꠖꠤ ꠇꠞꠣ ꠅꠁꠍꠦ ꠘꠣ।
25ꠅꠃ ꠡꠝꠄ ꠡꠞꠤꠅꠔ ꠝꠣꠚꠤꠇ ꠙꠣꠇ-ꠍꠣꠚ ꠅꠀꠞ ꠛꠦꠙꠣꠞ ꠟꠁꠀ, ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠅꠇꠟꠦ ꠁꠢꠥꠖꠤꠞ ꠄꠇ ꠀꠟꠤꠝꠞ ꠟꠉꠦ ꠔꠞ꠆ꠇ ꠟꠣꠉꠣꠁ ꠖꠤꠟꠣ। 26ꠛꠣꠖꠦ ꠔꠣꠁꠘ-ꠔꠣꠁꠘ ꠢꠎꠞꠔ ꠄꠢꠤꠀꠞ ꠉꠦꠍꠦ ꠀꠁꠀ ꠇꠁꠟꠣ, “ꠢꠥꠎꠥꠞ, ꠎꠦꠁꠘ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠀꠙꠘꠣꠞ ꠟꠉꠦ ꠀꠍꠟꠣ, ꠀꠞ ꠎꠣꠞ ꠛꠦꠙꠣꠞꠦ ꠀꠙꠘꠦ ꠡꠣꠇ꠆ꠇꠤ ꠖꠤꠍꠟꠣ, ꠖꠦꠈꠞꠣ ꠘꠤ, ꠢꠇꠟ ꠝꠣꠘꠥꠡ ꠔꠣꠘ ꠉꠦꠍꠦ ꠎꠣꠁꠞꠣꠉꠤ ꠀꠞ ꠔꠣꠁꠘ ꠄꠞꠣꠞꠦ ꠔꠃꠛꠣꠞ ꠉꠥꠍꠟ ꠖꠤꠞꠣ।” 27ꠁꠈꠣꠘ ꠢꠥꠘꠤꠀ ꠄꠢꠤꠀꠄ ꠇꠁꠟꠣ, “ꠛꠦꠢꠦꠡ꠆ꠔ ꠕꠣꠇꠤ ꠖꠦꠅꠀ ꠘꠣ ꠅꠁꠟꠦ ꠇꠦꠃ ꠇꠥꠘ꠆ꠔꠣ ꠙꠣꠄ ꠘꠣ। 28ꠔꠥꠝꠞꠣꠃ ꠔ ꠢꠥꠘꠍ, ꠀꠝꠤ ꠇꠁꠍꠤ, ꠀꠝꠤ ꠀꠟ-ꠝꠍꠤ ꠘꠣꠄ, ꠅꠁꠟꠦ ꠔꠣꠘ ꠀꠉꠦ ꠀꠝꠣꠞꠦ ꠙꠣꠑꠣꠘꠤ ꠅꠁꠍꠦ। 29ꠎꠣꠞ ꠉꠦꠍꠦ ꠇꠁꠘꠣꠞꠦ ꠛꠤꠀ ꠖꠦꠅꠀ ꠅꠄ, ꠄꠁꠘꠃ ꠘꠡꠣ। ꠘꠡꠣꠞ ꠖꠥꠡ꠆ꠔꠦ ꠈꠣꠟꠤ ꠃꠛꠣꠁꠀ ꠘꠡꠣꠞ ꠝꠣꠔ ꠢꠥꠘꠂꠘ ꠀꠞ ꠔꠣꠘ ꠉꠟꠣꠞ ꠀꠅꠀꠎ ꠢꠥꠘꠤꠀ ꠈꠥꠡꠤ ꠅꠁꠘ। ꠅꠃ ꠟꠣꠈꠣꠘ ꠀꠝꠣꠞ ꠈꠥꠡꠤꠅ ꠀꠁꠎ ꠙꠥꠞꠣ ꠅꠁꠟ। 30ꠔꠣꠘꠞꠦ ꠛꠠ ꠅꠁꠔꠦ ꠅꠁꠛ ꠀꠞ ꠀꠝꠤ ꠢꠞꠤ ꠎꠣꠁꠔꠣꠝ ꠅꠁꠛ।”
ꠛꠦꠢꠦꠡ꠆ꠔ ꠕꠣꠇꠤ ꠎꠦꠁꠘ ꠀꠁꠍꠂꠘ
31ꠎꠦꠁꠘ ꠃꠙꠞ ꠕꠣꠇꠤ ꠀꠁꠘ, ꠄꠁꠘ ꠢꠇꠟꠞ ꠃꠙꠞꠦ। ꠅꠁꠟꠦ ꠎꠦ ꠖꠥꠘꠤꠀ ꠕꠣꠇꠤ ꠀꠄ, ꠢꠦ ꠔ ꠖꠥꠘꠤꠀꠞ, ꠢꠦ ꠖꠥꠘꠤꠀꠛꠤ ꠝꠣꠔꠃ ꠝꠣꠔꠦ। ꠎꠦꠁꠘ ꠛꠦꠢꠦꠡ꠆ꠔ ꠕꠣꠇꠤ ꠀꠁꠘ, ꠔꠣꠘ ꠀꠡꠘ ꠢꠇꠟꠞ ꠃꠙꠞꠦ। 32ꠔꠣꠁꠘ ꠢꠘꠅ ꠎꠦꠔꠣ ꠖꠦꠈꠍꠂꠘ ꠀꠞ ꠢꠥꠘꠍꠂꠘ, ꠅꠔꠣꠞ ꠡꠣꠇ꠆ꠇꠤꠃ ꠖꠦꠁꠘ। ꠇꠦꠃ ꠔꠣꠘ ꠡꠣꠇ꠆ꠇꠤ ꠝꠣꠘꠦ ꠘꠣ। 33ꠅꠁꠟꠦ ꠎꠦ ꠎꠘꠦ ꠔꠣꠘ ꠡꠣꠇ꠆ꠇꠤ ꠇꠛꠥꠟ ꠇꠞꠍꠦ, ꠢꠦ ꠅꠈꠣꠘ ꠖꠤꠀꠃ ꠙꠞꠝꠣꠘ ꠇꠞꠦ, ꠀꠟ꠆ꠟꠣꠞ ꠇꠣꠟꠣꠝꠃ ꠢꠣꠍꠣ। 34ꠀꠟ꠆ꠟꠣꠄ ꠎꠦꠘꠞꠦ ꠙꠣꠑꠣꠁꠍꠂꠘ, ꠔꠣꠁꠘ ꠀꠟ꠆ꠟꠣꠞ ꠇꠣꠟꠣꠝꠃ ꠛꠣꠔꠣꠁꠘ, ꠇꠣꠞꠘ ꠀꠟ꠆ꠟꠣꠄ ꠔꠣꠘꠞꠦ ꠙꠥꠞꠣꠙꠥꠞ ꠇꠞꠤꠀ ꠙꠣꠇ ꠞꠥꠢꠥ ꠖꠣꠘ ꠇꠞꠂꠘ। 35ꠛꠣꠚꠦ ꠔꠣꠘ ꠙꠥꠔꠞꠦ, ꠝꠣꠘꠤ ꠔꠣꠘ ꠈꠣꠍ ꠝꠣꠄꠀꠞ ꠎꠘꠞꠦ ꠝꠣꠄꠀ ꠇꠞꠂꠘ ꠀꠞ ꠔꠣꠘ ꠀꠔꠅꠃ ꠢꠇꠟꠔꠣ ꠖꠤꠍꠂꠘ। 36ꠎꠦ ꠝꠣꠘꠡꠦ ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘꠞ ꠃꠙꠞꠦ ꠁꠝꠣꠘ ꠀꠘꠍꠦ, ꠢꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠙꠣꠁꠟꠤꠍꠦ। ꠅꠁꠟꠦ ꠎꠦ ꠔꠣꠘꠞꠦ ꠝꠣꠘꠦ ꠘꠣ, ꠢꠦ ꠇꠥꠘꠥꠝꠘ꠆ꠔꠦꠃ ꠀꠈꠦꠞ ꠙꠣꠁꠔ ꠘꠣꠄ ꠛꠞꠋ ꠔꠣꠞ ꠃꠙꠞꠦ ꠀꠟ꠆ꠟꠣꠞ ꠉꠎꠛ ꠙꠠꠛ।
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 3: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
