ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 11

ꠢꠎꠞꠔ ꠁꠍꠣꠄ ꠝꠥꠞ꠆ꠖꠣ ꠟꠣꠍꠣꠞꠞꠦ ꠎꠤꠘ꠆ꠖꠣ ꠇꠞꠟꠣ

1ꠟꠣꠍꠣꠞ ꠘꠣꠝꠦ ꠄꠇꠎꠘ ꠝꠣꠘꠥꠡ ꠛꠦꠝꠣꠞ ꠀꠍꠟꠣ। ꠔꠣꠘ ꠛꠣꠠꠤ ꠛꠣꠄꠔ-ꠀꠘꠤꠀ ꠉꠣꠃꠔ, ꠝꠞꠤꠅꠝ ꠀꠞ ꠝꠣꠞꠕꠣ ꠘꠣꠝꠞ ꠔꠣꠘ ꠖꠥꠁ ꠛꠁꠘꠅ ꠅꠃ ꠉꠣꠃꠔ ꠞꠁꠔꠣ। 2ꠇꠄꠖꠤꠘ ꠛꠣꠖꠦ ꠅꠃ ꠝꠞꠤꠅꠝꠦꠃ ꠁꠍꠣꠞ ꠙꠣꠅ-ꠅ ꠈꠥꠡꠛꠄ ꠀꠟꠣ ꠀꠔꠞ ꠝꠣꠈꠣꠁꠀ, ꠘꠤꠎꠞ ꠝꠣꠕꠣꠞ ꠌꠥꠟꠖꠤ ꠙꠣꠅ ꠚꠥꠍꠣꠁ ꠖꠤꠛꠣ। ꠅꠃ ꠝꠞꠤꠅꠝꠞ ꠜꠣꠁ ꠅꠁꠟꠣ ꠛꠦꠝꠣꠞꠤ ꠟꠣꠍꠣꠞ। 3ꠄꠞꠟꠣꠉꠤ ꠔꠣꠘ ꠛꠁꠘꠣꠁꠘ꠆ꠔꠦ ꠅꠈꠣꠘ ꠇꠁꠀ ꠢꠎꠞꠔ ꠁꠍꠣꠞ ꠉꠦꠍꠦ ꠈꠛꠞ ꠙꠣꠑꠣꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠝꠣꠄꠀꠞ ꠝꠣꠘꠥꠡ ꠈꠥꠛ ꠛꠦꠝꠣꠞ।” 4ꠈꠛꠞ ꠙꠣꠁꠀ ꠁꠍꠣꠄ ꠇꠁꠟꠣ, “ꠁ ꠛꠦꠝꠣꠞ ꠔ ꠔꠣꠞ ꠝꠃꠔꠞ ꠟꠣꠉꠤ ꠅꠁꠍꠦ ꠘꠣ, ꠛꠞꠋ ꠀꠟ꠆ꠟꠣꠞ ꠝꠢꠤꠝꠣ ꠎꠣꠁꠞꠞ ꠟꠣꠉꠤꠃ ꠅꠁꠍꠦ, ꠎꠣꠔꠦ ꠄꠞ ꠝꠣꠎꠖꠤ ꠀꠝꠤ ꠁꠛꠘꠥꠟ꠆ꠟꠣꠞ ꠝꠢꠤꠝꠣꠅ ꠎꠣꠁꠞ ꠅꠄ।”

5ꠢꠎꠞꠔ ꠁꠍꠣꠄ ꠛꠤꠛꠤ ꠝꠣꠞꠕꠣ, ꠔꠣꠘ ꠛꠁꠘ ꠀꠞ ꠟꠣꠍꠣꠞꠞꠦ ꠈꠥꠛ ꠝꠣꠄꠀ ꠇꠞꠔꠣ। 6ꠟꠣꠍꠣꠞꠞ ꠛꠦꠝꠣꠞꠞ ꠇꠕꠣ ꠢꠥꠘꠣꠞ ꠛꠣꠖꠦꠅ ꠁꠍꠣ ꠎꠦ ꠎꠣꠉꠣꠔ ꠀꠍꠟꠣ, ꠢꠘꠅ ꠀꠞꠅ ꠖꠥꠁꠖꠤꠘ ꠞꠁꠟꠣ।

7ꠛꠣꠖꠦ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ, ꠀꠝꠞꠣ ꠢꠤꠞꠛꠣꠞ ꠄꠢꠥꠖꠤꠀ ꠎꠤꠟꠣꠔ ꠎꠣꠁ।” 8ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠅꠃ ꠇꠄꠖꠤꠘ ꠀꠉꠦ ꠢꠘꠞ ꠝꠣꠘꠡꠦ ꠀꠙꠘꠣꠞꠦ ꠙꠣꠔ꠆ꠔꠞ ꠝꠣꠞꠔꠣ ꠌꠣꠁꠟꠣ, ꠅꠈꠘ ꠀꠙꠘꠦ ꠢꠤꠞꠛꠣꠞ ꠢꠘꠅ ꠎꠣꠁꠔꠣ ꠘꠤ?” 9ꠔꠣꠁꠘ ꠇꠁꠟꠣ, “ꠖꠤꠘꠞ ꠛꠦꠟꠣ ꠔ ꠛꠣꠞꠅ ꠊꠘ꠆ꠐꠣ ꠀꠍꠦ, ꠇꠦꠃ ꠎꠥꠖꠤ ꠖꠤꠘꠞ ꠛꠦꠟꠣ ꠌꠟꠣ-ꠚꠤꠞꠣ ꠇꠞꠦ, ꠢꠦ ꠃꠡ꠆ꠐꠣ ꠈꠣꠄ ꠘꠣ, ꠇꠣꠞꠘ ꠢꠦ ꠅꠃ ꠖꠥꠘꠤꠀꠞ ꠚꠞ ꠖꠦꠈꠦ। 10ꠀꠞ ꠇꠦꠃ ꠎꠥꠖꠤ ꠞꠣꠁꠔꠞ ꠛꠦꠟꠣ ꠌꠟꠣ-ꠚꠤꠞꠣ ꠇꠞꠦ, ꠢꠦ ꠃꠡ꠆ꠐꠣ ꠈꠣꠄ, ꠇꠣꠞꠘ ꠔꠣꠞ ꠝꠣꠎꠦ ꠇꠥꠘꠥ ꠚꠞ ꠘꠣꠁ।”

11ꠅꠈꠣꠘ ꠇꠁꠀ ꠢꠣꠞꠤ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠢꠥꠘꠅ, ꠀꠝꠞꠣꠞ ꠖꠥꠡ꠆ꠔ ꠟꠣꠍꠣꠞ ꠊꠥꠝꠣꠁ ꠉꠦꠍꠦꠉꠤ, ꠀꠝꠤ ꠔꠣꠞꠦ ꠢꠎꠣꠉ ꠇꠞꠣꠔ ꠎꠣꠁꠀꠞ।” 12ꠁꠈꠣꠘ ꠢꠥꠘꠤꠀ ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠢꠦ ꠎꠥꠖꠤ ꠊꠥꠝꠅ ꠕꠣꠇꠦ, ꠔꠦ ꠔ ꠜꠣꠟꠣ ꠅꠁꠎꠤꠛ।” 13ꠁꠍꠣꠄ ꠟꠣꠍꠣꠞꠞ ꠝꠃꠔꠞ ꠇꠕꠣ ꠇꠁꠍꠟꠣ, ꠅꠁꠟꠦ ꠔꠣꠞꠣ ꠝꠘꠅ ꠇꠞꠟꠣ, ꠔꠣꠁꠘ ꠄꠝꠘꠦ ꠊꠥꠝꠞ ꠇꠕꠣ ꠇꠁꠍꠂꠘ। 14ꠔꠦꠃ ꠁꠍꠣꠄ ꠙꠞꠤꠡ꠆ꠇꠣꠞ ꠇꠞꠤ ꠇꠁꠟꠣ, “ꠟꠣꠍꠣꠞ ꠝꠣꠞꠣ ꠉꠦꠍꠦ। 15ꠅꠁꠟꠦ ꠀꠝꠤ ꠔꠥꠝꠞꠣꠞ ꠇꠕꠣ ꠝꠘꠅ ꠇꠞꠤꠀ ꠈꠥꠡꠤ ꠅꠁꠍꠤ, ꠀꠝꠤ ꠢꠤꠘꠅ ꠀꠍꠟꠣꠝ ꠘꠣ, ꠎꠣꠔꠦ ꠔꠥꠝꠞꠣ ꠄꠇꠤꠘ ꠇꠞꠔꠣꠄ ꠙꠣꠞ। ꠅꠈꠘ ꠀꠅ, ꠀꠝꠞꠣ ꠟꠣꠍꠣꠞꠞ ꠉꠦꠍꠦ ꠎꠣꠁ।” 16ꠔꠦꠃ ꠔꠣꠘ ꠍꠣꠢꠣꠛꠤ ꠕꠥꠝꠣꠍꠦ ꠟꠉꠞ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠅ ꠘꠣ, ꠀꠝꠞꠣꠅ ꠎꠣꠁ, ꠎꠣꠔꠦ ꠔꠣꠘ ꠟꠉꠦ ꠝꠞꠔꠣꠝ ꠙꠣꠞꠤ।” ꠅꠃ ꠕꠥꠝꠣꠍꠞꠦ ꠎꠝꠎ ꠇꠁꠀ ꠒꠣꠇꠣ ꠅꠄ।

17ꠢꠘꠅ ꠉꠤꠀ ꠢꠣꠞꠟꠦ ꠢꠎꠞꠔ ꠁꠍꠣꠄ ꠢꠥꠘꠟꠣ, ꠔꠣꠁꠘ ꠎꠣꠅꠀꠞ ꠌꠣꠁꠞ ꠖꠤꠘ ꠀꠉꠦꠃ ꠟꠣꠍꠣꠞꠞꠦ ꠖꠣꠚꠘ ꠇꠞꠣ ꠅꠁꠉꠦꠍꠦ। 18ꠎꠦꠞꠥꠎꠣꠟꠦꠝ ꠐꠣꠃꠘ ꠕꠣꠇꠤ ꠅꠃ ꠛꠣꠄꠔ-ꠀꠘꠤꠀ ꠉꠣꠃ ꠅꠘꠥꠝꠣꠘ ꠖꠥꠁ ꠝꠣꠁꠟ ꠖꠥꠞꠁ ꠀꠍꠤꠟ। 19ꠟꠣꠍꠣꠞꠞ ꠝꠃꠔꠞ ꠛꠣꠖꠦ ꠔꠣꠘ ꠛꠁꠘ ꠛꠤꠛꠤ ꠝꠣꠞꠕꠣ ꠀꠞ ꠝꠞꠤꠅꠝꠞꠦ ꠛꠥꠎ ꠖꠦꠅꠀꠞ ꠟꠣꠉꠤ ꠁꠢꠥꠖꠤ ꠡꠝꠣꠎꠞ ꠛꠃꠔ ꠝꠣꠘꠥꠡ ꠀꠁꠟꠣ। 20ꠄꠞꠝꠣꠎꠦ ꠢꠎꠞꠔ ꠁꠍꠣꠄ ꠔꠡꠞꠤꠚ ꠀꠘꠞꠣ ꠢꠥꠘꠤꠀ ꠛꠤꠛꠤ ꠝꠣꠞꠕꠣ ꠔꠣꠘ ꠟꠉꠦ ꠖꠦꠈꠣ ꠇꠞꠣꠔ ꠉꠦꠟꠣ, ꠅꠁꠟꠦ ꠝꠞꠤꠅꠝ ꠊꠞꠅ ꠛꠁ ꠞꠁꠟꠣ। 21ꠛꠤꠛꠤ ꠝꠣꠞꠕꠣꠄ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠎꠥꠖꠤ ꠅꠘꠅ ꠞꠁꠔꠣ, ꠔꠦ ꠀꠝꠣꠞ ꠜꠣꠁꠉꠥ ꠝꠞꠟ ꠘꠣ ꠅꠘꠦ। 22ꠅꠁꠟꠦ ꠄꠞꠛꠣꠖꠦꠅ ꠀꠝꠤ ꠎꠣꠘꠤ, ꠀꠙꠘꠦ ꠀꠟ꠆ꠟꠣꠞ ꠉꠦꠍꠦ ꠎꠦꠔꠣ ꠌꠣꠁꠛꠣ, ꠔꠣꠁꠘ ꠀꠙꠘꠣꠞꠦ ꠅꠔꠣ ꠖꠤꠛꠣ।”

23ꠁꠍꠣꠄ ꠇꠁꠟꠣ, “ꠢꠥꠘꠅ, ꠔꠥꠝꠣꠞ ꠜꠣꠁ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠛ।” 24ꠔꠦꠃ ꠝꠣꠞꠕꠣꠄ ꠇꠁꠟꠣ, “ꠎꠤꠅꠄ, ꠀꠝꠤ ꠎꠣꠘꠤ ꠇꠤꠀꠝꠔꠞ ꠖꠤꠘ ꠎꠦꠛꠟꠣ ꠝꠥꠞ꠆ꠖꠣ ꠅꠇꠟ ꠎꠤꠘ꠆ꠖꠣ ꠅꠁꠛꠣ, ꠅꠃ ꠡꠝꠄ ꠢꠦ-ꠅ ꠎꠤꠘ꠆ꠖꠣ ꠅꠁꠀ ꠃꠑꠛ।” 25ꠁꠍꠣꠄ ꠝꠣꠞꠕꠣꠞꠦ ꠇꠁꠟꠣ, “ꠀꠝꠤꠃ ꠔ ꠇꠤꠀꠝꠔ ꠀꠞ ꠎꠤꠘ꠆ꠖꠦꠉꠤ। ꠎꠦ ꠎꠘꠦ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ ꠢꠦ ꠝꠞꠟꠦꠅ ꠎꠤꠘ꠆ꠖꠣ ꠅꠁꠛ। 26ꠀꠞ ꠎꠦ ꠎꠘꠦ ꠀꠍꠟ ꠎꠤꠘ꠆ꠖꠣ ꠅꠁꠀ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠦ, ꠢꠦ ꠇꠥꠘꠥꠖꠤꠘꠅ ꠝꠞꠔ ꠘꠣꠄ। ꠔꠥꠝꠤ ꠁꠈꠣꠘ ꠄꠇꠤꠘ ꠇꠞ ꠘꠤ?” 27ꠝꠣꠞꠕꠣꠄ ꠇꠁꠟꠣ, “ꠎꠤꠅꠄ ꠢꠥꠎꠥꠞ, ꠀꠝꠤ ꠁꠝꠣꠘ ꠀꠘꠍꠤ, ꠀꠟ꠆ꠟꠣꠞ ꠅꠀꠖꠣ ꠇꠞꠣ ꠎꠦ ꠎꠘꠦ ꠖꠥꠘꠤꠀꠔ ꠔꠡꠞꠤꠚ ꠀꠘꠣꠞ ꠇꠕꠣ, ꠀꠙꠘꠦꠃ ꠢꠃ ꠀꠟ-ꠝꠍꠤ ꠁꠛꠘꠥꠟ꠆ꠟꠣ, ꠀꠟ꠆ꠟꠣꠞ ꠈꠣꠍ ꠝꠣꠄꠀꠞ ꠎꠘ।”

28ꠅꠈꠣꠘ ꠇꠁꠀ ꠝꠣꠞꠕꠣꠄ ꠉꠤꠀ ꠔꠣꠘ ꠛꠁꠘ ꠝꠞꠤꠅꠝꠞꠦ ꠌꠥꠙꠔꠦ ꠒꠣꠇꠤꠀ ꠘꠤꠀ ꠇꠁꠟꠣ, “ꠢꠥꠘꠅ, ꠢꠥꠎꠥꠞ ꠅꠘꠅ ꠀꠍꠂꠘ, ꠔꠣꠁꠘ ꠔꠥꠝꠣꠞꠦ ꠒꠣꠇꠤꠞꠣ।” 29ꠔꠦꠃ ꠝꠞꠤꠅꠝ ꠎꠟꠖꠤ ꠇꠞꠤ ꠁꠍꠣꠞ ꠇꠣꠘ꠆ꠖꠣꠔ ꠉꠦꠟꠣ। 30ꠁꠍꠣ ꠅꠃ ꠡꠝꠄꠅ ꠉꠣꠃꠞ ꠜꠤꠔꠞꠦ ꠢꠣꠝꠣꠁꠍꠂꠘ ꠘꠣ, ꠝꠣꠞꠕꠣꠄ ꠔꠣꠘ ꠟꠉꠦ ꠎꠦꠘꠅ ꠖꠦꠈꠣ ꠇꠞꠍꠟꠣ, ꠔꠣꠁꠘ ꠢꠘꠅꠃ ꠃꠛꠣꠁ ꠞꠁꠍꠟꠣ। 31ꠀꠞ ꠊꠞꠞ ꠜꠤꠔꠞꠦ ꠎꠦꠔꠣ ꠁꠢꠥꠖꠤ ꠅꠇꠟꠦ ꠝꠞꠤꠅꠝꠞꠦ ꠛꠥꠎ ꠖꠦꠅꠀꠔ ꠀꠍꠟꠣ, ꠝꠞꠤꠅꠝꠦ ꠀꠈꠔꠣꠃ ꠛꠣꠞꠦ ꠎꠣꠅꠀꠔ ꠖꠦꠈꠤꠀ ꠔꠣꠞꠣ ꠔꠣꠘ ꠈꠞꠦ ꠈꠞꠦ ꠉꠦꠟꠣ। ꠔꠣꠞꠣ ꠝꠘꠅ ꠇꠞꠟ, ꠝꠞꠤꠅꠝ ꠇꠄꠛꠞꠞ ꠉꠦꠍꠦ ꠇꠣꠘ꠆ꠖꠣ-ꠇꠣꠐꠤ ꠇꠞꠣꠔ ꠎꠣꠁꠞꠣ। 32ꠁꠍꠣ ꠎꠦ ꠎꠣꠉꠣꠔ ꠀꠍꠟꠣ, ꠝꠞꠤꠅꠝꠅ ꠢꠘꠅ ꠉꠦꠟꠣ ꠀꠞ ꠁꠍꠣꠞꠦ ꠖꠦꠈꠤꠀ ꠔꠣꠘ ꠙꠣꠅ-ꠅ ꠙꠠꠤꠀ ꠇꠁꠟꠣ, “ꠢꠥꠎꠥꠞ, ꠀꠙꠘꠦ ꠎꠥꠖꠤ ꠅꠘꠅ ꠕꠣꠇꠔꠣ, ꠔꠦ ꠀꠝꠣꠞ ꠜꠣꠁꠉꠥ ꠝꠞꠟ ꠘꠣ ꠅꠘꠦ।”

33ꠝꠞꠤꠅꠝ ꠀꠞ ꠔꠣꠘ ꠟꠉꠞ ꠁꠢꠥꠖꠤ ꠅꠇꠟꠞ ꠇꠣꠘ꠆ꠖꠘ-ꠀꠢꠣꠎꠣꠞꠤ ꠖꠦꠈꠤꠀ ꠢꠎꠞꠔ ꠁꠍꠣꠞ ꠖꠤꠟꠞ ꠞꠥꠢꠥ ꠉꠞꠝ ꠅꠁꠉꠦꠟ, ꠔꠣꠁꠘ ꠇꠣꠔꠞ ꠅꠁꠉꠦꠟꠣ। 34ꠔꠣꠁꠘ ꠄꠞꠣꠞꠦ ꠎꠤꠇꠣꠁꠟꠣ, “ꠟꠣꠍꠣꠞꠞꠦ ꠇꠥꠀꠁ ꠖꠣꠚꠘ ꠇꠞꠍ?” ꠔꠣꠞꠣ ꠇꠁꠟꠣ, “ꠢꠥꠎꠥꠞ ꠀꠃꠇ꠆ꠇꠣ, ꠖꠦꠈꠤ ꠎꠣꠃꠇ꠆ꠇꠣ।” 35ꠅꠃ ꠡꠝꠄ ꠁꠍꠣꠄ ꠇꠣꠘ꠆ꠖꠤ ꠖꠤꠟꠣ। 36ꠔꠣꠘ ꠇꠣꠘ꠆ꠖꠘ ꠖꠦꠈꠤꠀ ꠢꠘꠞ ꠄꠞꠣ ꠇꠁꠟꠣ, “ꠖꠦꠈꠞꠣꠄ ꠘꠤ, ꠔꠣꠁꠘ ꠟꠣꠍꠣꠞꠞꠦ ꠇꠔ ꠝꠣꠄꠀ ꠇꠞꠔꠣ!” 37ꠅꠁꠟꠦ ꠇꠥꠘꠥ ꠇꠥꠘꠥ ꠎꠘꠦ ꠇꠁꠟꠣ, “ꠎꠦꠁꠘ ꠀꠘ꠆ꠖꠣꠞ ꠌꠃꠈ ꠜꠣꠟꠣ ꠇꠞꠍꠂꠘ, ꠔꠣꠁꠘ ꠁꠟꠣ ꠇꠥꠘ꠆ꠔꠣ ꠇꠞꠔꠣ ꠙꠣꠞꠟꠣ ꠅꠘꠦ ꠘꠣ ꠘꠤ, ꠎꠣꠔꠦ ꠟꠣꠍꠣꠞꠉꠥ ꠘꠣ ꠝꠞꠦ?”

38ꠁꠔꠣ ꠢꠥꠘꠤꠀ ꠢꠎꠞꠔ ꠁꠍꠣꠞ ꠖꠤꠟꠞ ꠞꠥꠢꠥ ꠢꠤꠞꠛꠣꠞ ꠉꠞꠝ ꠅꠁꠉꠦꠟ, ꠔꠣꠁꠘ ꠟꠣꠍꠣꠞꠞ ꠇꠄꠛꠞꠞ ꠗꠣꠞꠅ ꠉꠦꠟꠣ। ꠁ ꠇꠄꠛꠞ ꠀꠍꠤꠟ ꠉꠥꠢꠣꠞ ꠟꠣꠈꠣꠘ ꠄꠇ ꠉꠣꠔꠅ ꠀꠞ ꠇꠄꠛꠞꠞ ꠝꠥꠈꠅ ꠄꠇ ꠙꠣꠔ꠆ꠔꠞ ꠖꠦꠅꠀ ꠀꠍꠤꠟ। 39ꠔꠣꠁꠘ ꠝꠣꠘꠡꠞꠦ ꠇꠁꠟꠣ, “ꠙꠣꠔ꠆ꠔꠞꠐꠣ ꠢꠞꠣꠅ।” ꠟꠣꠍꠣꠞꠞ ꠛꠁꠘ ꠝꠣꠞꠕꠣꠄ ꠇꠁꠟꠣ, “ꠢꠥꠎꠥꠞ, ꠅꠈꠘ ꠔ ꠟꠣꠡ ꠙꠌꠤꠀ ꠉꠘ꠆ꠖ ꠛꠣꠞ ꠅꠁꠉꠦꠍꠦ, ꠔꠣꠁꠘ ꠌꠣꠁꠞ ꠖꠤꠘ ꠀꠉꠦ ꠝꠣꠞꠣ ꠉꠦꠍꠂꠘ।” 40ꠁꠍꠣꠄ ꠄꠘꠞꠦ ꠇꠁꠟꠣ, “ꠀꠝꠤ ꠔ ꠔꠥꠝꠣꠞꠦ ꠇꠁꠍꠤ, ꠔꠥꠝꠤ ꠎꠥꠖꠤ ꠄꠇꠤꠘ ꠇꠞ, ꠔꠦ ꠀꠟ꠆ꠟꠣꠞ ꠇꠥꠖꠞꠔꠤ ꠝꠢꠤꠝꠣ ꠖꠦꠈꠛꠣꠄ।” 41ꠔꠦꠃ ꠝꠣꠘꠡꠦ ꠇꠄꠛꠞꠞ ꠝꠥꠈꠞ ꠙꠣꠔ꠆ꠔꠞꠐꠣ ꠢꠞꠣꠁꠟꠣ।

ꠁꠍꠣꠄ ꠀꠍꠝꠣꠘꠞ ꠛꠣꠄ ꠌꠣꠁꠀ ꠖꠥꠀ ꠇꠞꠟꠣ, “ꠅ ꠉꠣꠁꠛꠤ ꠛꠣꠛꠣ, ꠔꠥꠝꠤ ꠀꠝꠣꠞ ꠇꠕꠣ ꠢꠥꠘꠍ, ꠄꠞꠟꠣꠉꠤ ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ। 42ꠀꠝꠤ ꠎꠣꠘꠤ, ꠔꠥꠝꠤ ꠢꠣꠝꠦꠡꠣ ꠀꠝꠣꠞ ꠇꠕꠣ ꠢꠥꠘ। ꠅꠁꠟꠦ ꠀꠝꠣꠞ ꠌꠣꠁꠞꠅꠛꠣꠄ ꠎꠦꠔꠣ ꠝꠣꠘꠥꠡ ꠀꠍꠂꠘ, ꠔꠣꠞꠣ ꠎꠣꠔꠦ ꠄꠇꠤꠘ ꠇꠞꠂꠘ, ꠔꠥꠝꠤ ꠀꠝꠣꠞꠦ ꠙꠣꠑꠣꠁꠍ, ꠄꠞꠖꠣꠄꠃ ꠅꠈꠣꠘ ꠇꠁꠟꠣꠝ।” 43ꠅꠈꠣꠘ ꠇꠁꠀ ꠔꠣꠁꠘ ꠎꠥꠞꠦ ꠒꠣꠇ ꠖꠤꠀ ꠇꠁꠟꠣ, “ꠟꠣꠍꠣꠞ, ꠛꠣꠞ ꠅꠁꠀ ꠀꠅ।” 44ꠔꠦꠃ ꠝꠥꠞ꠆ꠖꠣ ꠟꠣꠍꠣꠞ ꠇꠄꠛꠞ ꠕꠣꠇꠤ ꠛꠣꠞ ꠅꠁꠀ ꠀꠁꠟꠣ। ꠔꠣꠘ ꠀꠔ-ꠙꠣꠅ ꠇꠣꠚꠘꠖꠤ ꠙꠦꠌꠣꠁꠟ ꠀꠍꠤꠟ, ꠀꠞ ꠝꠥꠈ ꠀꠍꠤꠟ ꠞꠥꠝꠣꠟ ꠖꠤꠀ ꠛꠣꠘ꠆ꠖꠣ। ꠁꠍꠣꠄ ꠝꠣꠘꠡꠞꠦ ꠇꠁꠟꠣ, “ꠔꠣꠞ ꠛꠣꠘ꠆ꠖ ꠈꠥꠟꠅ ꠀꠞ ꠔꠣꠞꠦ ꠎꠣꠁꠔꠦ ꠖꠦꠅ।”

ꠢꠎꠞꠔ ꠁꠍꠣꠞꠦ ꠎꠣꠘꠦ ꠝꠣꠞꠣꠞ ꠡꠠꠎꠘꠔ꠆ꠞ

45ꠛꠤꠛꠤ ꠝꠞꠤꠅꠝꠞ ꠉꠦꠍꠦ ꠎꠦꠔꠣ ꠁꠢꠥꠖꠤ ꠝꠣꠘꠥꠡ ꠀꠁꠍꠟꠣ, ꠢꠎꠞꠔ ꠁꠍꠣꠞ ꠅꠃ ꠇꠦꠞꠣꠝꠔꠤ ꠇꠣꠝ ꠖꠦꠈꠤꠀ ꠄꠞꠣꠞ ꠝꠣꠎꠞ ꠛꠃꠔꠦ ꠔꠣꠘ ꠃꠙꠞꠦ ꠁꠝꠣꠘ ꠀꠘꠟꠣ। 46ꠅꠁꠟꠦ ꠇꠦꠃ ꠇꠦꠃ ꠚꠞꠤꠡꠤ ꠅꠇꠟꠞ ꠉꠦꠍꠦ ꠉꠤꠀ ꠁꠍꠣꠞ ꠅꠃ ꠇꠣꠝꠞ ꠇꠕꠣ ꠎꠣꠘꠣꠁꠟ। 47ꠁꠔꠣ ꠢꠥꠘꠤꠀ ꠛꠠ ꠁꠝꠣꠝ ꠅꠇꠟꠦ ꠀꠞ ꠚꠞꠤꠡꠤ ꠖꠟꠞ ꠝꠣꠘꠡꠦ ꠖꠦꠡꠞ ꠚꠔꠥꠀ ꠇꠝꠤꠐꠤꠞꠦ ꠟꠁꠀ ꠄꠇꠈꠣꠘꠅ ꠛꠁꠟꠣ, ꠛꠁꠀ ꠇꠁꠟꠣ, “ꠀꠝꠞꠣ ꠅꠈꠘ ꠇꠤꠔꠣ ꠇꠞꠔꠣꠝ? ꠁ ꠛꠦꠐꠣꠄ ꠔ ꠛꠃꠔ ꠇꠦꠞꠣꠝꠔꠤ ꠇꠣꠝ ꠖꠦꠈꠣꠞ। 48ꠀꠝꠞꠣ ꠎꠥꠖꠤ ꠔꠣꠞꠦ ꠄꠝꠘꠦ ꠌꠟꠔꠦ ꠖꠦꠁ, ꠔꠦ ꠢꠇꠟ ꠝꠣꠘꠡꠦ ꠔꠣꠞ ꠃꠙꠞꠦ ꠁꠝꠣꠘ ꠀꠘꠛ, ꠀꠞ ꠁꠔꠣ ꠢꠥꠘꠤꠀ ꠞꠥꠝꠣꠘ ꠡꠞꠇꠣꠞꠞ ꠝꠣꠘꠡꠦ ꠀꠝꠞꠣꠞ ꠑꠤꠇꠣꠘꠣ ꠀꠞ ꠀꠝꠞꠣꠞ ꠎꠣꠔꠤꠞꠦꠅ ꠛꠤꠘꠣꠡ ꠇꠞꠛꠣ।”

49ꠅꠃ ꠝꠎꠟꠤꠍꠞ ꠝꠣꠎꠦ ꠅꠃ ꠛꠍꠞꠞ ꠙꠞꠗꠣꠘ ꠁꠝꠣꠝ, ꠇꠣꠄꠀꠚꠣ ꠘꠣꠝꠞ ꠄꠇꠎꠘ ꠀꠍꠟꠣ। ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠔꠥꠝꠞꠣ ꠔ ꠇꠥꠘ꠆ꠔꠣꠃ ꠎꠣꠘ ꠘꠣ। 50ꠛꠥꠎ ꠘꠣ ꠘꠤ, ꠀꠡ꠆ꠔꠣ ꠎꠣꠔꠤ ꠛꠤꠘꠣꠡ ꠅꠀꠞ ꠌꠣꠁꠔꠦ, ꠢꠇꠟꠞ ꠛꠖꠟꠣ ꠄꠇꠎꠘꠞ ꠝꠞꠘ ꠀꠞꠅ ꠜꠣꠟꠣ।” 51ꠁꠝꠣꠝ ꠇꠣꠄꠀꠚꠣꠄ ꠀꠍꠟꠦ ꠘꠤꠎꠞ ꠝꠘ ꠕꠣꠇꠤ ꠅꠃ ꠇꠕꠣ ꠇꠁꠍꠂꠘ ꠘꠣ, ꠔꠣꠁꠘ ꠅꠃ ꠛꠍꠞꠞ ꠙꠞꠗꠣꠘ ꠁꠝꠣꠝ ꠅꠀꠄ ꠉꠣꠁꠛꠤ ꠛꠥꠟꠤ ꠔꠣꠘ ꠝꠥꠈ ꠕꠣꠇꠤ ꠛꠣꠞ ꠅꠁꠍꠦ ꠎꠦ, ꠁꠢꠥꠖꠤ ꠎꠣꠔꠤꠞꠦ ꠛꠣꠌꠣꠘꠤꠞ ꠟꠣꠉꠤ ꠁꠍꠣꠞ ꠝꠞꠘ ꠅꠁꠛ। 52ꠈꠣꠟꠤ ꠁꠢꠥꠖꠤ ꠎꠣꠔꠤꠞ ꠟꠣꠉꠤ ꠘꠣꠄ, ꠀꠟ꠆ꠟꠣꠞ ꠎꠔ ꠛꠘ꠆ꠖꠣꠁꠘ ꠌꠣꠁꠞꠅꠛꠣꠄ ꠍꠤꠔ꠆ꠞꠤꠀ ꠀꠍꠂꠘ, ꠔꠣꠞꠣꠞꠦ ꠖꠟꠣ ꠇꠞꠤꠀ ꠄꠇꠈꠣꠘꠅ ꠇꠞꠣꠞ ꠟꠣꠉꠤꠅ ꠔꠣꠁꠘ ꠎꠣꠘ ꠛꠤꠟꠣꠁ ꠖꠤꠛꠣ। 53ꠢꠃ ꠖꠤꠘ ꠕꠣꠇꠤ ꠔꠣꠞꠣ ꠁꠍꠣꠞꠦ ꠝꠣꠞꠣꠞ ꠙꠣꠄꠔꠣꠞꠣ ꠇꠞꠣꠔ ꠟꠣꠉꠟꠣ। 54ꠄꠞꠟꠣꠉꠤ ꠁꠍꠣꠄ ꠔꠣꠞꠣꠞ ꠝꠣꠎꠦ ꠈꠥꠟꠣ-ꠝꠦꠟꠣ ꠌꠟꠣ-ꠚꠤꠞꠣ ꠛꠣꠖ ꠖꠤꠟꠣꠁꠟꠣ, ꠀꠞ ꠅꠃ ꠎꠣꠉꠣ ꠍꠣꠠꠤꠀ ꠝꠞꠥꠜꠥꠝꠤꠞ ꠇꠣꠘ꠆ꠖꠣꠔ ꠀꠚꠞꠣꠁꠝ ꠘꠣꠝꠞ ꠄꠇ ꠉꠣꠃꠔ ꠉꠤꠀ ꠔꠣꠘ ꠍꠣꠢꠣꠛꠤ ꠅꠇꠟꠞꠦ ꠟꠁꠀ ꠞꠁꠟꠣ।

55ꠅꠃ ꠡꠝꠄ ꠁꠢꠥꠖꠤ ꠅꠇꠟꠞ ꠀꠎꠣꠖꠤ ꠁꠖ ꠊꠘꠣꠁ ꠀꠁꠍꠤꠟ। ꠁꠖꠞ ꠀꠉꠦ ꠘꠤꠎꠞꠦ ꠙꠣꠇ-ꠍꠣꠚ ꠇꠞꠣꠞ ꠟꠣꠉꠤ ꠛꠃꠔ ꠝꠣꠘꠥꠡ ꠉꠣꠃ ꠕꠣꠇꠤ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠉꠦꠟꠣ। 56ꠢꠤꠘꠅ ꠉꠤꠀ ꠔꠣꠞꠣ ꠢꠎꠞꠔ ꠁꠍꠣꠞꠦ ꠔꠥꠇꠣꠁꠟꠣ। ꠔꠣꠞꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠃꠛꠣꠁꠀ ꠄꠇꠦ-ꠅꠁꠘ꠆ꠘꠦ ꠎꠤꠇꠣꠁꠟꠣ, “ꠇꠤꠔꠣ ꠝꠘꠅ ꠇꠞꠂꠘ, ꠔꠣꠁꠘ ꠁ ꠁꠖꠅ ꠀꠁꠔꠣ ꠘꠣꠄ ꠘꠤ?” 57ꠛꠠ ꠁꠝꠣꠝ ꠀꠞ ꠚꠞꠤꠡꠤ ꠅꠇꠟꠦ ꠢꠥꠇꠥꠝ ꠖꠤꠍꠟꠣ, ꠇꠦꠃ ꠎꠥꠖꠤ ꠁꠍꠣꠞ ꠈꠥꠎ ꠙꠣꠄ, ꠔꠦ ꠔꠣꠞꠣꠞꠦ ꠎꠣꠘꠣꠘꠤꠞ ꠟꠣꠉꠤ, ꠎꠣꠔꠦ ꠔꠣꠞꠣ ꠁꠍꠣꠞꠦ ꠗꠞꠔꠣ ꠙꠣꠞꠂꠘ।

Currently Selected:

ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 11: sylN

Highlight

Copy