ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 10
10
ꠢꠎꠞꠔ ꠁꠍꠣ ꠀꠟ-ꠝꠍꠤꠃ ꠖꠥꠀꠞ
1ꠢꠎꠞꠔ ꠁꠍꠣꠄ ꠀꠞꠅ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠘꠤꠌ꠆ꠌꠤꠔ ꠢꠣꠍꠣ ꠇꠕꠣ ꠇꠁꠞꠣꠝ, ꠎꠦ ꠝꠣꠘꠥꠡ ꠝꠦꠠꠣꠞ ꠉꠥꠀꠟ-ꠊꠞꠞ ꠖꠥꠀꠞꠦꠖꠤ ꠘꠣ ꠢꠣꠝꠣꠁꠀ, ꠅꠁꠘ꠆ꠘ ꠙꠕꠦ ꠢꠣꠝꠣꠄ, ꠢꠦ ꠔ ꠌꠥꠞ-ꠒꠣꠇꠣꠁꠔ। 2ꠅꠁꠟꠦ ꠎꠦ ꠎꠘ ꠖꠥꠀꠞꠦꠖꠤ ꠢꠣꠝꠣꠄ, ꠢꠦ-ꠃ ꠝꠦꠠꠣꠞ ꠞꠣꠈꠣꠟ। 3ꠉꠥꠀꠟ-ꠊꠞꠞ ꠌꠇꠤꠖꠣꠞꠦ ꠞꠣꠈꠣꠟꠞꠦ ꠖꠥꠀꠞ ꠈꠥꠟꠤꠀ ꠖꠦꠄ। ꠝꠦꠠꠣꠁꠘ꠆ꠔꠦꠅ ꠞꠣꠈꠣꠟꠞ ꠒꠣꠇ ꠢꠥꠘꠂꠘ ꠀꠞ ꠞꠣꠈꠣꠟꠦ ꠔꠣꠞꠣꠞ ꠘꠣꠝ ꠗꠞꠤ ꠒꠣꠇꠤ ꠒꠣꠇꠤ ꠛꠣꠞ ꠇꠞꠤ ꠘꠦꠄ। 4ꠊꠞ ꠕꠣꠇꠤ ꠘꠤꠎꠞ ꠝꠦꠠꠣꠁꠘ꠆ꠔꠞꠦ ꠛꠣꠞ ꠇꠞꠤꠀ ꠢꠣꠞꠟꠦ, ꠞꠣꠈꠣꠟ ꠔꠣꠞꠣꠞ ꠀꠉꠦ ꠀꠉꠦ ꠎꠣꠄ, ꠀꠞ ꠔꠣꠞ ꠝꠦꠠꠣꠁꠘ ꠎꠣꠄ ꠈꠞꠦ ꠈꠞꠦ, ꠇꠣꠞꠘ ꠔꠣꠞ ꠉꠟꠣꠞ ꠀꠅꠀꠎ ꠔꠣꠞꠣ ꠌꠤꠘꠦ। 5ꠔꠣꠞꠣ ꠇꠥꠘꠥꠛꠣꠟꠣ ꠅꠌꠤꠘꠣ ꠇꠥꠘꠥ ꠞꠣꠈꠣꠟꠞ ꠟꠉꠦ ꠎꠣꠁꠔ ꠘꠣꠄ ꠛꠞꠋ ꠔꠣꠞ ꠉꠦꠍ ꠕꠣꠇꠤ ꠜꠣꠉꠤꠛ, ꠇꠣꠞꠘ ꠅꠌꠤꠘꠣ ꠇꠥꠘꠥ ꠞꠣꠈꠣꠟꠞ ꠉꠟꠣꠞ ꠀꠅꠀꠎ ꠔꠣꠞꠣ ꠌꠤꠘꠦ ꠘꠣ।” 6ꠁꠍꠣꠄ ꠚꠞꠤꠡꠤ ꠅꠇꠟꠞꠦ ꠢꠤꠇꠣꠘꠤꠞ ꠟꠣꠉꠤ ꠅꠃ ꠃꠖꠣꠢꠞꠘ ꠖꠤꠟꠣ, ꠅꠁꠟꠦ ꠔꠣꠁꠘ ꠇꠤꠔꠣ ꠛꠥꠎꠣꠁꠞꠣ, ꠔꠣꠞꠣ ꠡꠝꠎꠤꠔꠣ ꠙꠣꠞꠟꠣ ꠘꠣ।
7ꠄꠞꠟꠣꠉꠤ ꠔꠣꠁꠘ ꠢꠤꠞꠛꠣꠞ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠘꠤꠌ꠆ꠌꠤꠔ ꠢꠇ ꠇꠕꠣ ꠇꠁꠞꠣꠝ, ꠝꠦꠠꠣꠞ ꠙꠣꠟꠞ ꠟꠣꠉꠤ ꠀꠝꠤꠃ ꠖꠥꠀꠞ। 8ꠀꠝꠣꠞ ꠀꠉꠦ ꠞꠣꠈꠣꠟꠞ ꠜꠣꠛ ꠗꠞꠤꠀ ꠎꠦꠔꠣ ꠀꠁꠍꠟꠣ, ꠁꠉꠥꠁꠘ ꠔ ꠌꠥꠞ-ꠒꠣꠇꠣꠁꠔ ꠀꠍꠟꠣ, ꠝꠦꠠꠣꠁꠘ꠆ꠔꠦꠅ ꠔꠣꠞꠣꠞ ꠇꠕꠣ ꠢꠥꠘꠍꠂꠘ ꠘꠣ। 9ꠀꠝꠤꠃ ꠖꠥꠀꠞ। ꠀꠝꠣꠞ ꠝꠣꠎꠖꠤ ꠎꠦ ꠢꠣꠝꠣꠁꠛ, ꠢꠦ ꠔꠣꠞ ꠎꠣꠘ ꠛꠣꠌꠣꠁꠛ। ꠢꠦ ꠜꠤꠔꠞꠦ ꠀꠅꠀ-ꠎꠣꠅꠀ ꠇꠞꠛ ꠀꠞ ꠀꠐꠤꠀ-ꠌꠞꠤꠀ ꠈꠣꠁꠛ। 10ꠌꠥꠞꠦ ꠔ ꠈꠣꠟꠤ ꠌꠥꠞꠤ, ꠈꠥꠘ-ꠈꠣꠞꠣꠙꠤ ꠀꠞ ꠛꠤꠘꠣꠡ ꠇꠞꠣꠞ ꠘꠤꠅꠔꠦꠃ ꠀꠄ। ꠅꠁꠟꠦ ꠀꠝꠤ ꠀꠁꠍꠤ ꠎꠣꠔꠦ ꠔꠣꠞꠣ ꠎꠤꠘ꠆ꠖꠦꠉꠤ ꠙꠣꠄ, ꠀꠞ ꠅꠃ ꠎꠤꠘ꠆ꠖꠦꠉꠤ ꠙꠥꠞꠣꠙꠥꠞ ꠜꠥꠉ ꠇꠞꠦ।
11“ꠀꠝꠤꠃ ꠀꠍꠟ ꠞꠣꠈꠣꠟ। ꠀꠍꠟ ꠞꠣꠈꠣꠟꠦ ꠔꠣꠞ ꠝꠦꠠꠣꠞ ꠟꠣꠉꠤ ꠘꠤꠎꠞ ꠎꠣꠘ ꠛꠤꠟꠣꠁ ꠖꠦꠄ। 12ꠈꠣꠟꠤ ꠛꠦꠔꠘꠞ ꠟꠣꠉꠤ ꠎꠦ ꠎꠘꠦ ꠞꠣꠈꠣꠟꠤ ꠇꠞꠦ, ꠢꠦ ꠈꠣꠐꠤ ꠞꠣꠈꠣꠟ ꠘꠣꠄ ꠀꠞ ꠁ ꠝꠦꠠꠣꠁꠘꠅ ꠔꠣꠞ ꠘꠤꠎꠞ ꠘꠣꠄ। ꠛꠣꠊ ꠀꠅꠀꠔ ꠖꠦꠈꠟꠦꠃ ꠢꠦ ꠝꠦꠠꠣꠁꠘ ꠚꠣꠟꠣꠁꠀ ꠘꠤꠎꠞ ꠎꠣꠘ ꠛꠣꠌꠣꠄ। 13ꠇꠣꠞꠘ ꠢꠦ ꠈꠣꠟꠤ ꠛꠦꠔꠘꠞ ꠀꠡꠣꠄ ꠞꠣꠈꠣꠟꠤ ꠇꠞꠦ, ꠝꠦꠠꠣꠁꠘ꠆ꠔꠞ ꠇꠕꠣ ꠌꠤꠘ꠆ꠔꠣꠅ ꠇꠞꠦ ꠘꠣ। ꠜꠣꠉꠦ ꠀꠁꠀ ꠝꠦꠠꠣꠁꠘ ꠗꠞꠤꠀ ꠘꠦꠄꠉꠤ, ꠔꠦꠃ ꠔꠣꠞꠣ ꠙꠣꠟ ꠜꠣꠋꠉꠤꠀ ꠍꠤꠔ꠆ꠞꠤ ꠎꠣꠄ। 14-15ꠔꠦ ꠀꠝꠤꠃ ꠜꠣꠟꠣ ꠞꠣꠈꠣꠟ। ꠀꠝꠣꠞ ꠉꠣꠁꠛꠤ ꠛꠣꠚꠦ ꠀꠝꠣꠞꠦ ꠌꠤꠘꠂꠘ, ꠀꠞ ꠀꠝꠤꠅ ꠀꠝꠣꠞ ꠛꠣꠚꠞꠦ ꠌꠤꠘꠤ। ꠑꠤꠇ ꠅꠃꠟꠣ, ꠀꠝꠤ ꠀꠝꠣꠞ ꠝꠦꠠꠣꠁꠘ꠆ꠔꠞꠦꠅ ꠌꠤꠘꠤ, ꠀꠞ ꠀꠝꠣꠞ ꠝꠦꠠꠣꠁꠘ꠆ꠔꠦꠅ ꠀꠝꠣꠞꠦ ꠌꠤꠘꠂꠘ। ꠀꠝꠤ ꠀꠝꠣꠞ ꠝꠦꠠꠣ ꠙꠣꠟꠞ ꠟꠣꠉꠤ ꠘꠤꠎꠞ ꠎꠣꠘ ꠖꠤꠟꠣꠁꠞꠣꠝ। 16ꠀꠝꠣꠞ ꠔ ꠀꠞꠅ ꠝꠦꠠꠣꠁꠘ ꠀꠍꠂꠘ, ꠎꠦꠔꠣ ꠁ ꠉꠥꠀꠟ-ꠊꠞꠅ ꠘꠣꠁ, ꠔꠣꠞꠣꠞꠦꠅ ꠀꠝꠤ ꠀꠘꠔꠦ ꠅꠁꠛ। ꠔꠣꠞꠣ ꠘꠤꠌ꠆ꠌꠄ ꠀꠝꠣꠞ ꠒꠣꠇ ꠢꠥꠘꠛꠣ, ꠔꠦꠃ ꠈꠣꠟꠤ ꠄꠇꠎꠘ ꠞꠣꠈꠣꠟ ꠀꠞ ꠄꠇꠐꠣ ꠙꠣꠟ ꠅꠁꠛ।
17“ꠛꠣꠚꠦ ꠀꠝꠣꠞꠦ ꠝꠣꠄꠀ ꠇꠞꠂꠘ, ꠇꠣꠞꠘ ꠀꠝꠤ ꠀꠝꠣꠞ ꠎꠣꠘ ꠛꠤꠟꠣꠁꠝꠥ ꠎꠣꠔꠦ ꠢꠤꠞꠛꠣꠞ ꠚꠤꠞꠔ ꠘꠦꠁ। 18ꠀꠝꠣꠞ ꠎꠣꠘ ꠇꠦꠃ ꠀꠝꠣꠞ ꠉꠦꠍ ꠕꠣꠇꠤ ꠇꠣꠠꠤꠀ ꠘꠤꠔ ꠘꠣꠄ, ꠅꠁꠟꠦ ꠀꠝꠤ ꠘꠤꠎꠦꠃ ꠎꠣꠘ ꠛꠤꠟꠣꠁꠝꠥ। ꠝꠘꠅ ꠞꠣꠈꠤꠅ, ꠎꠣꠘ ꠖꠦꠅꠀꠞ ꠈꠦꠝꠔꠣ ꠎꠦꠟꠣ ꠀꠝꠣꠞ ꠀꠍꠦ, ꠅꠃꠟꠣ ꠚꠤꠞꠔ ꠘꠦꠅꠀꠞ ꠈꠦꠝꠔꠣꠅ ꠀꠍꠦ। ꠁ ꠖꠣꠄꠁꠔ꠆ꠔ ꠀꠝꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠉꠦꠍ ꠕꠣꠇꠤ ꠙꠣꠁꠍꠤ।”
19ꠢꠎꠞꠔ ꠁꠍꠣꠞ ꠁꠔꠣ ꠝꠣꠔ-ꠇꠕꠣ ꠢꠥꠘꠤꠀ ꠁꠢꠥꠖꠤ ꠘꠦꠔꠣ ꠅꠇꠟꠞ ꠝꠣꠎꠦ ꠢꠤꠞꠛꠣꠞ ꠖꠟꠣꠖꠟꠤ ꠟꠣꠉꠤꠉꠦꠟ। 20ꠔꠣꠞꠣꠞ ꠝꠣꠎꠞ ꠛꠃꠔꠦ ꠇꠁꠟ, “ꠅꠉꠥꠞꠦ ꠜꠥꠔꠦ ꠗꠞꠍꠦ, ꠢꠦ ꠙꠣꠉꠟ, ꠔꠥꠝꠞꠣ ꠅꠉꠥꠞ ꠝꠣꠔ ꠢꠥꠘꠞꠣꠄ ꠇꠦꠘꠦ?” 21ꠀꠞ ꠛꠃꠔꠦ ꠇꠁꠟ, “ꠜꠥꠔꠦ ꠗꠞꠣ ꠝꠣꠘꠡꠞ ꠝꠣꠔ ꠔ ꠁꠟꠣ ꠘꠣꠄ। ꠜꠥꠔꠦ ꠇꠥꠘꠥ ꠀꠘ꠆ꠖꠣꠞ ꠌꠃꠈ ꠜꠣꠟꠣ ꠇꠞꠦ ꠘꠤ?”
ꠢꠎꠞꠔ ꠁꠍꠣ ꠀꠟ-ꠝꠍꠤꠞ ꠖꠣꠛꠤ
22ꠛꠣꠖꠦ ꠎꠦꠞꠥꠎꠣꠟꠦꠝ ꠇꠣꠛꠣ ꠊꠞꠞ ꠖꠈꠟ ꠙꠣꠅꠀꠞ ꠁꠖꠞ ꠡꠝꠄ ꠀꠁꠀ ꠀꠎꠤꠟ। ꠅꠃ ꠡꠝꠄ ꠀꠍꠤꠟ ꠡꠤꠔꠞ ꠖꠤꠘ। 23ꠢꠎꠞꠔ ꠁꠍꠣ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠞ ꠛꠣꠖꠡꠣ ꠍꠥꠟꠣꠁꠝꠣꠘꠞ ꠛꠣꠞꠤꠘ꠆ꠖꠣꠔ ꠀꠐꠣ-ꠃꠐꠤ ꠇꠞꠞꠣ। 24ꠄꠞꠝꠣꠎꠦ ꠁꠢꠥꠖꠤ ꠘꠦꠔꠣ ꠅꠇꠟ ꠁꠍꠣꠞ ꠌꠣꠁꠞꠅꠛꠣꠄ ꠖꠟꠣ ꠅꠁꠀ ꠇꠁꠟꠣ, “ꠀꠞ ꠇꠔꠖꠤꠘ ꠔꠥꠝꠤ ꠀꠝꠞꠣꠞꠦ ꠟꠐꠇꠣꠁꠀ ꠞꠣꠈꠔꠣꠄ? ꠔꠥꠝꠤ ꠎꠥꠖꠤ ꠢꠣꠍꠣꠞꠞ ꠀꠟ-ꠝꠍꠤ ꠅꠅ, ꠔꠦ ꠙꠞꠤꠡ꠆ꠇꠣꠞ ꠇꠞꠤ ꠀꠝꠞꠣꠞꠦ ꠇꠅ।”
25ꠔꠦꠃ ꠁꠍꠣꠄ ꠎꠥꠀꠙ ꠖꠤꠟꠣ, “ꠀꠝꠤ ꠔ ꠇꠁꠟꠣꠝ, ꠅꠁꠟꠦ ꠀꠙꠘꠣꠞꠣ ꠄꠇꠤꠘ ꠇꠞꠞꠣ ꠘꠣ, ꠀꠞ ꠀꠝꠣꠞ ꠉꠣꠁꠛꠤ ꠛꠣꠚꠞ ꠘꠣꠝꠦ ꠀꠝꠤ ꠎꠦ ꠇꠣꠝ ꠇꠞꠤ, ꠁꠔꠣꠄꠅ ꠀꠝꠣꠞ ꠛꠦꠙꠣꠞꠦ ꠡꠣꠇ꠆ꠇꠤ ꠖꠦꠞ, 26ꠔꠣ-ꠅ ꠀꠙꠘꠣꠞꠣ ꠄꠇꠤꠘ ꠇꠞꠞꠣ ꠘꠣ, ꠇꠣꠞꠘ ꠀꠙꠘꠣꠞꠣ ꠀꠝꠣꠞ ꠙꠣꠟꠞ ꠝꠦꠠꠣ ꠘꠣꠄ। 27ꠀꠝꠣꠞ ꠝꠦꠠꠣꠁꠘ꠆ꠔꠦ ꠀꠝꠣꠞ ꠒꠣꠇ ꠢꠥꠘꠂꠘ। ꠀꠝꠤ ꠔ ꠔꠣꠞꠣꠞꠦ ꠌꠤꠘꠤ ꠀꠞ ꠔꠣꠞꠣꠅ ꠀꠝꠣꠞ ꠈꠞꠦ ꠈꠞꠦ ꠞꠂꠘ। 28ꠀꠝꠤ ꠔꠣꠞꠣꠞꠦ ꠀꠈꠦꠞꠤ ꠎꠤꠘ꠆ꠖꠦꠉꠤ ꠖꠣꠘ ꠇꠞꠤ, ꠔꠣꠞꠣ ꠇꠥꠘꠥ ꠡꠝꠄ ꠛꠤꠘꠣꠡ ꠅꠁꠔꠣ ꠘꠣꠄ। ꠇꠦꠃ ꠀꠝꠣꠞ ꠉꠦꠍ ꠕꠘꠦ ꠔꠣꠞꠣꠞꠦ ꠇꠣꠠꠤꠀ ꠘꠤꠔ ꠘꠣꠄ। 29ꠀꠝꠣꠞ ꠎꠦ ꠉꠣꠁꠛꠤ ꠛꠣꠚꠦ ꠔꠣꠞꠣꠞꠦ ꠀꠝꠣꠞ ꠀꠔꠅ ꠖꠤꠍꠂꠘ, ꠔꠣꠁꠘ ꠢꠇꠟ ꠕꠣꠇꠤ ꠝꠢꠣꠘ। ꠔꠣꠘ ꠀꠔ ꠕꠣꠇꠤ ꠇꠦꠃ ꠇꠥꠘ꠆ꠔꠣ ꠇꠣꠠꠤꠀ ꠘꠤꠔ ꠙꠣꠞꠦ ꠘꠣ। 30ꠀꠝꠤ ꠀꠞ ꠛꠣꠛꠣ, ꠀꠝꠞꠣ ꠄꠇ।”
31ꠔꠦꠃ ꠁꠢꠥꠖꠤ ꠘꠦꠔꠣ ꠅꠇꠟꠦ ꠢꠤꠞꠛꠣꠞ ꠙꠣꠔ꠆ꠔꠞ ꠟꠁꠟꠣ ꠔꠣꠘꠞꠦ ꠝꠣꠞꠣꠞ ꠟꠣꠉꠤ। 32ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠉꠣꠁꠛꠤ ꠛꠣꠚꠞ ꠢꠥꠇꠥꠝ ꠝꠣꠚꠤꠇ ꠛꠃꠔ ꠜꠣꠟꠣ ꠜꠣꠟꠣ ꠇꠣꠝ ꠀꠝꠤ ꠀꠙꠘꠣꠁꠘ꠆ꠔꠞꠦ ꠖꠦꠈꠣꠁꠍꠤ। ꠁꠔꠣꠞ ꠝꠣꠎꠦ ꠇꠥꠘ ꠇꠣꠝꠞ ꠟꠣꠉꠤ ꠀꠙꠘꠣꠞꠣ ꠀꠝꠣꠞꠦ ꠙꠣꠔ꠆ꠔꠞ ꠝꠣꠞꠔꠣ ꠌꠣꠁꠞꠣ?” 33ꠔꠣꠞꠣ ꠇꠁꠟꠣ, “ꠜꠣꠟꠣ ꠇꠥꠘꠥ ꠇꠣꠝꠞ ꠟꠣꠉꠤ ꠀꠝꠞꠣ ꠔꠞꠦ ꠙꠣꠔ꠆ꠔꠞ ꠝꠣꠞꠤꠀꠞ ꠘꠣ, ꠔꠥꠁ ꠔ ꠡꠤꠞꠤꠇꠤ ꠇꠞꠞꠦ, ꠄꠞꠟꠣꠉꠤꠃ ꠙꠣꠔ꠆ꠔꠞ ꠝꠣꠞꠝꠥ। ꠝꠣꠘꠥꠡ ꠅꠁꠀ ꠔꠥꠁ ꠘꠤꠎꠞꠦ ꠀꠟ꠆ꠟꠣ ꠢꠤꠡꠣꠛꠦ ꠖꠣꠛꠤ ꠇꠞꠞꠦ।” 34ꠔꠣꠁꠘ ꠇꠁꠟꠣ, “ꠀꠙꠘꠣꠞꠣꠞ ꠡꠞꠤꠅꠔꠅ ꠟꠦꠈꠣ ꠀꠍꠦ ꠘꠣ ꠘꠤ, ‘ꠀꠝꠤ ꠇꠁꠟꠣꠝ, ꠔꠥꠝꠞꠣꠃ ꠄꠟꠣꠢꠤ’? 35ꠔꠦ ꠀꠟ꠆ꠟꠣꠞ ꠇꠣꠟꠣꠝ ꠎꠦꠞꠣꠞ ꠉꠦꠍꠦ ꠘꠣꠎꠤꠟ ꠅꠁꠍꠤꠟ, ꠄꠞꠣꠞꠦ ꠔ ꠔꠣꠁꠘ ꠘꠤꠎꠦꠃ ꠀꠟ꠆ꠟꠣꠞ ꠟꠣꠈꠣꠘ ꠇꠁꠀ ꠒꠣꠇꠤꠍꠂꠘ। ꠀꠞ ꠙꠣꠇ ꠇꠤꠔꠣꠛꠞ ꠇꠕꠣ ꠔ ꠛꠣꠖ ꠖꠦꠅꠀ ꠎꠣꠄ ꠘꠣ। 36ꠔꠦ ꠉꠣꠁꠛꠤ ꠛꠣꠚꠦ ꠎꠣꠘꠞꠦ ꠘꠤꠎꠞ ꠟꠣꠉꠤ ꠛꠣꠍꠤꠀ ꠙꠍꠘ꠆ꠖ ꠇꠞꠟꠣ ꠀꠞ ꠖꠥꠘꠤꠀꠔ ꠙꠣꠑꠣꠁꠟꠣ, ꠅꠃ ꠀꠝꠤ ꠎꠦꠛꠟꠣ ꠇꠁꠟꠣꠝ, ꠀꠝꠤ ꠁꠛꠘꠥꠟ꠆ꠟꠣ, ꠔꠦ ꠀꠙꠘꠣꠞꠣ ꠇꠤꠟꠣ ꠇꠁꠞꠣ, ꠔꠥꠁ ꠡꠤꠞꠤꠇꠤ ꠇꠞꠞꠦ? 37ꠀꠝꠤ ꠎꠥꠖꠤ ꠀꠝꠣꠞ ꠉꠣꠁꠛꠤ ꠛꠣꠚꠞ ꠇꠣꠝ ꠘꠣ ꠇꠞꠤ, ꠔꠦ ꠀꠙꠘꠣꠞꠣ ꠀꠝꠣꠞ ꠃꠙꠞꠦ ꠁꠝꠣꠘ ꠀꠘꠛꠣ ꠘꠣ। 38ꠅꠁꠟꠦ ꠀꠝꠤ ꠎꠥꠖꠤ ꠀꠝꠣꠞ ꠛꠣꠚꠞ ꠢꠇꠟ ꠇꠣꠝ ꠇꠞꠤꠀ ꠕꠣꠇꠤ, ꠔꠦ ꠀꠝꠣꠞ ꠃꠙꠞꠦ ꠁꠝꠣꠘ ꠘꠣ ꠀꠘꠟꠦꠅ ꠁꠔꠣ ꠄꠇꠤꠘ ꠇꠞꠃꠇ꠆ꠇꠣ। ꠔꠦꠃ ꠀꠙꠘꠣꠞꠣ ꠎꠣꠘꠛꠣ, ꠉꠣꠁꠛꠤ ꠛꠣꠚ ꠀꠝꠣꠞ ꠝꠣꠎꠦꠃ ꠀꠍꠂꠘ, ꠀꠞ ꠀꠝꠤꠅ ꠔꠣꠘ ꠝꠣꠎꠦ ꠀꠍꠤ।” 39ꠅꠃ ꠡꠝꠄ ꠢꠤꠞꠛꠣꠞ ꠔꠣꠞꠣ ꠁꠍꠣꠞꠦ ꠗꠞꠣꠞ ꠌꠦꠡ꠆ꠐꠣ ꠇꠞꠟꠣ, ꠅꠁꠟꠦ ꠔꠣꠁꠘ ꠁꠘ ꠕꠘꠦ ꠉꠣꠁꠛ ꠅꠁꠉꠦꠟꠣ।
40ꠛꠣꠖꠦ ꠔꠣꠁꠘ ꠢꠤꠞꠛꠣꠞ ꠎꠞ꠆ꠖꠣꠘ ꠉꠣꠋꠉꠞ ꠢꠙꠣꠞꠅ ꠉꠤꠀ ꠞꠁꠟꠣ। ꠀꠉꠦ ꠅꠃ ꠎꠣꠉꠣꠔ ꠢꠎꠞꠔ ꠄꠢꠤꠀꠄ ꠝꠣꠘꠡꠞꠦ ꠔꠃꠛꠣꠞ ꠉꠥꠍꠟ ꠖꠤꠔꠣ। 41ꠢꠘꠅ ꠛꠃꠔ ꠝꠣꠘꠥꠡ ꠔꠣꠘ ꠉꠦꠍꠦ ꠀꠁꠟ ꠀꠞ ꠝꠣꠔꠣ-ꠝꠣꠔꠤ ꠇꠞꠟ, “ꠄꠢꠤꠀ ꠘꠛꠤꠄ ꠔ ꠇꠥꠘꠥ ꠇꠦꠞꠣꠝꠔꠤ ꠘꠤꠡꠣꠘꠣ ꠖꠦꠈꠣꠁꠍꠂꠘ ꠘꠣ, ꠅꠁꠟꠦ ꠔꠣꠁꠘ ꠢꠎꠞꠔ ꠁꠍꠣꠞ ꠛꠦꠙꠣꠞꠦ ꠎꠔꠔꠣ ꠇꠁꠍꠟꠣ, ꠁꠔꠣ ꠙꠥꠞꠣꠙꠥꠞ ꠢꠣꠍꠣ।” 42ꠅꠈꠣꠘ ꠛꠥꠎꠤꠀ ꠢꠘꠞ ꠛꠃꠔ ꠝꠣꠘꠡꠦ ꠢꠎꠞꠔ ꠁꠍꠣꠞ ꠃꠙꠞꠦ ꠁꠝꠣꠘ ꠀꠘꠟꠣ।
Currently Selected:
ꠁꠘ꠆ꠎꠤꠟ ৪: ꠢꠣꠘ꠆ꠘꠣꠘ 10: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
