ꠔꠃꠞꠣꠔ ১: ꠙꠄꠖꠣ ꠘꠣꠝꠣ 49
49
ꠢꠎꠞꠔ ꠁꠀꠇꠥꠛ (ꠀ꠩) ꠅꠞ ꠅꠍꠤꠅꠔ
1ꠛꠣꠖꠦ ꠁꠀꠇꠥꠛꠦ ꠔꠣꠘ ꠙꠥꠀꠂꠘ꠆ꠔꠞꠦ ꠀꠘꠣꠁꠀ ꠇꠁꠟꠣ, “ꠔꠥꠝꠞꠣ ꠢꠇ꠆ꠇꠟ ꠄꠇꠈꠣꠘꠅ ꠅꠅ। ꠜꠛꠤꠡꠔꠦ ꠔꠥꠝꠞꠣꠞ ꠎꠤꠘ꠆ꠖꠦꠉꠤ ꠇꠤꠟꠣ ꠎꠣꠁꠛ, ꠁꠔꠣ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ।
2ꠁꠀꠇꠥꠛꠞ ꠙꠥꠀꠂꠘ, ꠔꠥꠝꠞꠣ ꠄꠇꠈꠣꠘꠅ ꠀꠅ;
ꠔꠥꠝꠞꠣꠞ ꠛꠣꠚ ꠁꠍꠞꠣꠁꠟꠞ ꠛꠥꠟꠤ ꠢꠥꠘꠅ।
3ꠞꠥꠛꠦꠘ ꠔꠥꠝꠤ ꠀꠝꠣꠞ ꠛꠠ ꠙꠥꠀ,
ꠔꠥꠝꠤ ꠀꠝꠣꠞ ꠛꠟ, ꠀꠝꠣꠞ ꠎꠥꠀꠘꠇꠤꠞ ꠙꠄꠟꠣ ꠚꠟ;
ꠔꠥꠝꠤ ꠢꠇꠟ ꠕꠣꠇꠤ ꠔꠦꠎꠤ ꠀꠞ ꠢꠤꠝ꠆ꠝꠔꠤ।
4ꠔꠥꠝꠤ ꠃꠔꠞꠣꠁꠟ ꠉꠞꠝ ꠙꠣꠘꠤꠞ ꠟꠣꠈꠣꠘ,
ꠔꠥꠝꠣꠞ ꠛꠠꠣꠁ ꠞꠁꠔ ꠘꠣꠄ;
ꠔꠥꠝꠤ ꠀꠙꠘ ꠛꠣꠚꠞ ꠛꠤꠍꠘꠣꠔ ꠉꠦꠍ,
ꠢꠣꠔꠘ ꠝꠣʼꠞ ꠟꠉꠦ ꠘꠣꠙꠣꠇꠤ ꠇꠣꠝ ꠇꠞꠍ।
5ꠡꠤꠝꠤꠅꠘ ꠀꠞ ꠟꠦꠛꠤ ꠖꠥꠁ ꠜꠣꠁ;
ꠔꠣꠞꠣꠞ ꠔꠟꠥꠀꠞ ꠎꠣꠟꠤꠝꠞ ꠀꠔꠤꠀꠞ।
6ꠅ ꠀꠝꠣꠞ ꠎꠣꠘ, ꠔꠣꠞꠣꠞ ꠝꠎꠟꠤꠍꠅ ꠢꠣꠝꠣꠁꠅ ꠘꠣ;
ꠅ ꠀꠝꠣꠞ ꠡꠣꠘ, ꠔꠣꠞꠣꠞ ꠡꠝꠣꠎꠅ ꠎꠣꠁꠅ ꠘꠣ।
ꠔꠣꠞꠣ ꠉꠥꠍꠣ ꠇꠞꠤ ꠈꠥꠘ ꠇꠞꠟ;
ꠀꠠꠥꠀꠝꠤ ꠇꠞꠤ ꠛꠤꠍꠣꠟꠞ ꠞꠉ ꠇꠣꠐꠟ।
7ꠔꠣꠞꠣꠞ ꠉꠥꠍꠣ ꠔ ꠟꠣꠘ꠆ꠘꠔꠤ, ꠁꠔꠣ ꠛꠠ ꠛꠦꠎꠥꠁꠔꠣ;
ꠟꠣꠘ꠆ꠘꠔꠤ ꠔꠣꠞꠣꠞ ꠎꠥꠟꠥꠝ, ꠁꠔꠣ ꠔ ꠙꠣꠡꠣꠘ।
ꠀꠝꠤ ꠔꠣꠞꠣꠞꠦ ꠁꠀꠇꠥꠛꠞ ꠝꠣꠎꠦ ꠛꠣꠐꠤꠝꠥ;
ꠛꠘꠤ ꠁꠍꠞꠣꠁꠟꠞ ꠝꠣꠎꠦ ꠍꠤꠔ꠆ꠞꠣꠁ ꠖꠤꠝꠥ।
8ꠄꠢꠥꠖꠣ, ꠔꠥꠝꠣꠞ ꠜꠣꠁꠀꠁꠘ꠆ꠔꠦ ꠔꠥꠝꠣꠞ ꠔꠣꠞꠤꠚ ꠇꠞꠛꠣ;
ꠔꠥꠝꠤ ꠖꠥꠡꠝꠘꠞ ꠉꠞ꠆ꠖꠘꠣꠔ ꠗꠞꠛꠣꠄ;
ꠔꠥꠝꠣꠞ ꠛꠣꠚꠞ ꠅꠀꠞꠤꠡ ꠅꠇꠟꠦ,
ꠔꠥꠝꠣꠞ ꠉꠦꠍꠦ ꠝꠣꠕꠣ ꠘꠥꠀꠁꠛꠣ।
9ꠔꠥꠝꠤ ꠔ ꠡꠤꠋꠢꠞ ꠛꠣꠁꠌ꠆ꠌꠣ ꠄꠢꠥꠖꠣ।
ꠔꠥꠝꠤ ꠡꠤꠇꠣꠞꠞ ꠉꠥꠡ꠆ꠔ ꠈꠣꠁꠀ ꠢꠞꠤꠀ ꠀꠁꠟꠣꠄ;
ꠢꠦ ꠡꠤꠋꠢꠞ ꠟꠣꠈꠣꠘ ꠟꠦꠐꠤꠀ ꠢꠥꠔꠤꠀ ꠉꠠꠤꠀꠁꠟ;
ꠡꠤꠋꠢꠤꠞꠦ ꠇꠦꠉꠥꠄ ꠊꠥꠝ ꠜꠣꠋꠉꠣꠁꠔ?
10ꠄꠢꠥꠖꠣꠞ ꠀꠔ ꠕꠘꠦ ꠔ
ꠞꠣꠎ-ꠟꠣꠑꠤ ꠢꠞꠔ ꠘꠣꠄ;
ꠔꠣꠞ ꠖꠥꠁꠅ ꠙꠣꠅꠞ ꠝꠣꠎ ꠕꠘꠦ
ꠛꠤꠌꠣꠞꠞ ꠉꠖꠣ ꠎꠣꠁꠔ ꠘꠣꠄ;
ꠎꠔꠖꠤꠘ ꠡꠤꠟꠅ ꠘꠣ ꠀꠁꠛꠣ,
ꠀꠞ ꠢꠇꠟ ꠎꠣꠔꠤ ꠔꠣꠘ ꠢꠥꠇꠥꠝꠦ ꠌꠟꠛꠣ।
11ꠢꠦ ꠀꠋꠉꠥꠞ ꠉꠣꠍꠅ ꠛꠣꠘꠛ ꠔꠣꠞ ꠉꠣꠗꠣ;
ꠀꠋꠉꠥꠞꠞ ꠡꠥꠘ꠆ꠖꠞ ꠒꠣꠟꠅ ꠛꠣꠘꠛ ꠉꠣꠗꠣꠞ ꠛꠣꠁꠌ꠆ꠌꠣ;
ꠟꠣꠟ ꠀꠋꠉꠥꠞꠞ ꠞꠡꠖꠤ ꠗꠥꠁꠛ ꠔꠣꠞ ꠎꠥꠛ꠆ꠛꠣ,
ꠀꠋꠉꠥꠞꠞ ꠟꠃꠖꠤ ꠇꠞꠛ ꠟꠦꠛꠣꠍ ꠍꠚꠣ।
12ꠔꠣꠞ ꠌꠃꠈ ꠀꠋꠉꠥꠞꠞ ꠞꠡꠦ ꠟꠣꠟ ꠐꠇꠐꠇꠣ,
ꠀꠞ ꠔꠣꠞ ꠖꠣꠔ ꠖꠥꠗꠞ ꠟꠣꠈꠣꠘ ꠗꠟꠣ।
13ꠍꠛꠥꠟꠘ ꠖꠞꠤꠀꠞ ꠙꠣꠞꠅ ꠛꠡꠔ ꠇꠞꠤꠛ,
ꠢꠦ ꠎꠣꠎ ꠜꠤꠠꠣꠘꠤꠞ ꠊꠣꠐ ꠅꠁꠛ,
ꠍꠤꠖꠘ ꠙꠞ꠆ꠎꠘ꠆ꠔ ꠔꠣꠞ ꠡꠤꠝꠣꠘꠣ ꠅꠁꠛ।
14ꠁꠍꠣꠈꠞ ꠄꠉꠥ ꠛꠟꠀꠟꠣ ꠉꠣꠗꠣ,
ꠢꠦ ꠈꠥꠅꠠꠞ ꠜꠤꠔꠞꠦ ꠢꠥꠔꠦ।
15ꠢꠦ ꠖꠦꠈꠟ ꠎꠤꠞꠣꠘꠤꠞ ꠎꠣꠉꠣꠈꠣꠘ ꠜꠣꠟꠣ,
ꠖꠦꠡꠈꠣꠘ ꠡꠥꠘ꠆ꠖꠞ;
ꠔꠦꠃ ꠉꠣꠁꠐ ꠛꠁꠛꠣꠞ ꠟꠣꠉꠤ ꠇꠣꠘ꠆ꠖ ꠟꠣꠝꠣꠁꠟ,
ꠀꠞ ꠎꠥꠞꠞ ꠉꠥꠟꠣꠝ ꠅꠁꠟ।
16ꠖꠣꠘꠦ ꠔꠣꠞ ꠘꠤꠎꠞ ꠙ꠆ꠞꠎꠣ ꠅꠇꠟꠞ ꠛꠤꠌꠣꠞ ꠇꠞꠛ,
ꠁꠍꠞꠣꠁꠟꠞ ꠄꠇ ꠉꠥꠡ꠆ꠐꠤꠞ ꠟꠣꠈꠣꠘ।
17ꠢꠦ ꠅꠁꠛ ꠡꠠꠇꠞ ꠗꠣꠞꠞ ꠢꠣꠚ,
ꠙꠕꠞ ꠛꠤꠡꠀꠟꠣ ꠀꠟꠖ;
ꠎꠦꠉꠤꠄ ꠊꠥꠠꠣꠞ ꠙꠣꠅꠔ ꠇꠣꠝꠠ ꠝꠣꠞꠦ,
ꠊꠥꠠ-ꠍꠅꠀꠞ ꠈꠞꠦꠖꠤ ꠃꠟꠐꠤꠀ ꠙꠠꠦ।
18ꠅ ꠝꠣꠛꠥꠖ, ꠀꠝꠤ ꠔꠥꠝꠣꠞ ꠘꠣꠎꠣꠔꠞ ꠝꠥꠈꠣ ꠌꠣꠁ ꠞꠁꠍꠤ।
19ꠍꠣꠖꠥꠞꠦ ꠟꠥꠐꠞꠣ ꠖꠟꠦ ꠢꠣꠝꠟꠣ ꠇꠞꠛ,
ꠛꠣꠖꠦ ꠢꠦ-ꠅ ꠔꠣꠞꠣꠞ ꠈꠞꠦꠖꠤ ꠟꠥꠐꠤꠛ।
20ꠀꠡꠤꠞꠞ ꠈꠥꠛ ꠜꠣꠟꠣ ꠚꠡꠟ ꠚꠟꠤꠛ,
ꠢꠦ ꠛꠣꠖꠡꠣꠞ ꠎꠥꠇꠣ ꠈꠣꠘꠤ ꠎꠥꠉꠣꠁꠛ।
21ꠘꠙ꠆ꠔꠣꠟꠤ ꠅꠁꠟ ꠍꠣꠠꠣ ꠢꠞꠤꠘꠤ,
ꠔꠣꠞ ꠝꠥꠈꠅ ꠀꠍꠦ ꠝꠤꠑꠣ ꠝꠤꠑꠣ ꠝꠣꠔ।
22ꠁꠃꠍꠥꠚ ꠚꠟꠀꠟꠣ ꠉꠣꠍꠞ ꠒꠣꠟ,
ꠁꠘ꠆ꠖꠣꠞꠣꠞ ꠗꠣꠞꠞ ꠚꠟꠀꠟꠣ ꠉꠣꠍꠞ ꠒꠣꠟ;
ꠔꠣꠞ ꠒꠣꠟꠣꠁꠘ ꠛꠦꠠ ꠙꠣꠞ ꠅꠁꠎꠣꠄ।
23ꠔꠤꠞ-ꠗꠘꠥꠇ ꠀꠟꠣꠁꠘ꠆ꠔꠦ ꠔꠣꠞꠦ ꠛꠦꠎꠥꠁꠔꠣ ꠔꠇꠟꠤꠚ ꠖꠤꠍꠟꠣ,
ꠔꠤꠞ ꠝꠣꠞꠤꠀ ꠔꠣꠞꠦ ꠛꠦꠇꠣꠄꠖꠣꠔ ꠚꠣꠟꠣꠁꠍꠟꠣ;
24ꠅꠁꠟꠦ ꠔꠣꠞ ꠗꠘꠥꠇ ꠝꠎꠛꠥꠔ ꠞꠁꠟ,
ꠔꠣꠞ ꠀꠔꠞ ꠢꠘꠣꠔ ꠛꠟ ꠞꠁꠟ;
ꠁꠀꠇꠥꠛꠞ ꠢꠃ ꠝꠢꠣꠘ ꠡꠇ꠆ꠔꠤꠀꠟꠣꠞ ꠀꠔ ꠖꠤꠀ,
ꠎꠦꠁꠘ ꠁꠍꠞꠣꠁꠟꠞ ꠀꠡꠞꠄ ꠐꠤꠟ꠆ꠟꠣ, ꠔꠣꠘꠞꠦ ꠖꠤꠀ।
25ꠔꠥꠝꠣꠞ ꠛꠣꠚꠞ ꠢꠃ ꠀꠟ꠆ꠟꠣꠞꠦ ꠖꠤꠀ,
ꠎꠦꠁꠘ ꠔꠥꠝꠣꠞꠦ ꠡꠣꠁꠎ꠆ꠎ ꠇꠞꠛꠣ;
ꠢꠃ ꠡꠞ꠆ꠛ-ꠡꠇ꠆ꠔꠤꠝꠣꠘꠞꠦ ꠖꠤꠀ,
ꠎꠦꠁꠘ ꠔꠥꠝꠣꠞꠦ ꠛꠞꠇꠔ ꠘꠣꠎꠤꠟ ꠇꠞꠛꠣ;
ꠃꠙꠞꠦ ꠕꠅꠀ ꠀꠍꠝꠣꠘ ꠕꠣꠇꠤ ꠟꠣꠝꠞꠣ ꠛꠞꠇꠔꠦ,
ꠔꠟꠦ ꠛꠤꠍꠣꠁꠟ ꠙꠣꠘꠤ ꠕꠣꠇꠤ ꠛꠣꠞ ꠅꠀ ꠏꠞꠘꠣꠞ ꠛꠞꠇꠔꠦ,
ꠛꠥꠇꠥꠞ ꠖꠥꠗ ꠀꠞ ꠙꠦꠐ ꠕꠣꠇꠤ ꠛꠣꠞ ꠅꠀ ꠛꠞꠇꠔꠦ।
26ꠀꠝꠣꠞ ꠛꠣꠚ-ꠖꠣꠖꠣꠞ ꠖꠥꠀ ꠕꠣꠇꠤ,
ꠔꠥꠝꠣꠞ ꠛꠣꠚꠞ ꠖꠦꠅꠀ ꠖꠥꠀ ꠛꠃꠔ ꠜꠣꠟꠣ ꠅꠃꠇ;
ꠁꠔꠣ ꠢꠣꠝꠦꠡꠣꠇꠥꠞ ꠈꠣꠠꠣ ꠢꠣꠎꠣꠁꠟ ꠙꠣꠠ-ꠙꠞꠛꠔ ꠕꠣꠇꠤ ꠟꠣꠝꠃꠇ।
ꠢꠃ ꠖꠥꠀ ꠁꠃꠍꠥꠚꠞ ꠝꠣꠕꠣꠔ ꠙꠠꠃꠇ;
ꠜꠣꠁꠀꠁꠘ ꠕꠣꠇꠤ ꠀꠟꠉꠞ ꠝꠣꠕꠣꠞ ꠔꠣꠟꠥꠔ ꠙꠠꠃꠇ।
27ꠛꠤꠘ-ꠁꠀꠝꠤꠘ ꠅꠁꠟ ꠛꠠ-ꠛꠣꠊꠞ ꠟꠣꠈꠣꠘ,
ꠢꠦ ꠛꠤꠀꠘꠦ ꠈꠣꠄ ꠡꠤꠇꠣꠞꠞ ꠉꠥꠡ꠆ꠔ,
ꠀꠞ ꠢꠣꠁꠘ꠆ꠎꠣꠄ ꠛꠤꠟꠣꠄ ꠟꠥꠐꠞ ꠝꠣꠟ।”
28ꠄꠞꠣ ꠅꠁꠟꠣ ꠁꠍꠞꠣꠁꠟꠞ ꠛꠣꠞꠅ ꠉꠥꠡ꠆ꠐꠤ, ꠔꠣꠞꠣꠞ ꠛꠣꠚꠦ ꠔꠣꠞꠣꠞ ꠟꠣꠉꠤ ꠖꠥꠀꠞ ꠡꠝꠄ ꠅꠃꠟꠣ ꠇꠁꠟꠣ। ꠔꠣꠁꠘ ꠄꠞꠣ ꠢꠇ꠆ꠇꠟꠞꠦ ꠎꠣꠞꠎꠤꠞ ꠙꠣꠅꠘꠣ ꠖꠥꠀ ꠖꠤꠟꠣ।
ꠢꠎꠞꠔ ꠁꠀꠇꠥꠛ (ꠀ꠩) ꠅꠞ ꠁꠘ꠆ꠔꠦꠇꠣꠟ ꠀꠞ ꠖꠣꠚꠘ
29ꠛꠣꠖꠦ ꠁꠀꠇꠥꠛꠦ ꠔꠣꠘ ꠙꠥꠀꠂꠘ꠆ꠔꠞꠦ ꠅꠍꠤꠅꠔ ꠇꠞꠣꠁꠟꠣ ꠎꠦꠘ, “ꠀꠝꠣꠞ ꠔ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠅꠀꠞ ꠡꠝꠄ ꠅꠁꠉꠦꠍꠦ, ꠔꠦ ꠢꠤꠐ꠆ꠐꠤ ꠁꠚ꠆ꠞꠥꠘꠞ ꠎꠝꠤꠘꠞ ꠉꠥꠢꠣꠔ, ꠀꠝꠣꠞ ꠛꠣꠚ-ꠖꠣꠖꠣꠞ ꠇꠣꠘ꠆ꠖꠣꠔ ꠀꠝꠣꠞꠦ ꠖꠣꠚꠘ ꠇꠞꠤꠅ। 30ꠁ ꠉꠥꠢꠣ ꠇꠦꠘꠣꠘ ꠖꠦꠡꠞ, ꠝꠝ꠆ꠞꠤꠞ ꠗꠣꠞꠅ ꠝꠇꠙꠦꠟꠣꠞ ꠎꠝꠤꠔ। ꠁꠛ꠆ꠞꠣꠢꠤꠝꠦ ꠢꠤꠐ꠆ꠐꠤ ꠁꠚ꠆ꠞꠥꠘꠞ ꠉꠦꠍ ꠕꠘꠦ ꠅꠃ ꠎꠝꠤꠘ ꠟꠁꠍꠟꠣ ꠇꠛꠞꠡ꠆ꠕꠣꠘ ꠛꠣꠘꠣꠘꠤꠞ ꠟꠣꠉꠤ। 31ꠅꠘꠅꠃ ꠁꠛ꠆ꠞꠣꠢꠤꠝ ꠀꠞ ꠔꠣꠘ ꠛꠤꠛꠤ ꠍꠣꠄꠞꠣꠞꠦ ꠖꠣꠚꠘ ꠇꠞꠣ ꠅꠁꠍꠦ, ꠁꠍꠢꠣꠇ ꠀꠞ ꠔꠣꠘ ꠛꠤꠛꠤ ꠞꠦꠛꠦꠇꠣꠞꠦꠅ ꠅꠘꠅ ꠖꠣꠚꠘ ꠇꠞꠣ ꠅꠁꠍꠦ, ꠀꠞ ꠀꠝꠤ ꠟꠦꠀꠞꠦꠅ ꠅꠘꠅ ꠖꠣꠚꠘ ꠇꠞꠍꠤ। 32ꠁ ꠎꠝꠤꠘ ꠀꠞ ꠄꠞ ꠝꠣꠎꠞ ꠉꠥꠢꠣ ꠢꠤꠐ꠆ꠐꠤ ꠅꠇꠟꠞ ꠉꠦꠍ ꠕꠘꠦ ꠟꠁꠍꠟꠣ।”
33ꠁꠀꠇꠥꠛꠦ ꠔꠣꠘ ꠙꠥꠀꠂꠘ꠆ꠔꠞꠦ ꠅꠍꠤꠅꠔ ꠇꠞꠣ ꠡꠦꠡ ꠅꠁꠟꠦ, ꠛꠤꠍꠘꠣꠞ ꠃꠙꠞꠦ ꠔꠣꠘ ꠖꠥꠁꠅ ꠙꠣꠅ ꠄꠇꠈꠣꠘꠅ ꠇꠞꠟꠣ ꠀꠞ ꠀꠈꠦꠞꠤ ꠖꠝ ꠍꠣꠠꠤꠀ ꠔꠣꠘ ꠛꠣꠚ-ꠖꠣꠖꠣꠞ ꠉꠦꠍꠦ ꠉꠦꠟꠣꠉꠤ।
Currently Selected:
ꠔꠃꠞꠣꠔ ১: ꠙꠄꠖꠣ ꠘꠣꠝꠣ 49: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.