ꠔꠃꠞꠣꠔ ১: ꠙꠄꠖꠣ ꠘꠣꠝꠣ 47

1ꠁꠃꠍꠥꠚꠦ ꠚꠦꠞꠣꠃꠘꠞ ꠉꠦꠍꠦ ꠉꠤꠀ ꠇꠁꠟꠣ, “ꠀꠝꠣꠞ ꠛꠣꠛꠣ ꠀꠞ ꠜꠣꠁꠀꠁꠘ꠆ꠔꠦ, ꠔꠣꠞꠣꠞ ꠉꠞꠥ-ꠍꠣꠉꠟ ꠀꠞ ꠔꠣꠞꠣꠞ ꠢꠇ꠆ꠇꠟꠔꠣ ꠟꠁꠀ, ꠇꠦꠘꠣꠘ ꠖꠦꠡ ꠍꠣꠠꠤꠀ ꠀꠁꠍꠂꠘ। ꠔꠣꠞꠣ ꠀꠁꠀ ꠉꠥꠡꠘꠅ ꠙꠃꠍꠤ ꠉꠦꠍꠂꠘ।” 2ꠜꠣꠁꠀꠁꠘ꠆ꠔꠞ ꠝꠣꠎꠦ ꠙꠣꠌ ꠎꠘꠞꠦ ꠘꠤꠀ ꠔꠣꠁꠘ ꠚꠦꠞꠣꠃꠘꠞ ꠍꠣꠝꠘꠦ ꠀꠎꠤꠞ ꠇꠞꠟꠣ। 3ꠚꠦꠞꠣꠃꠘꠦ ꠔꠣꠞꠣꠞꠦ ꠎꠤꠇꠣꠁꠟꠣ, “ꠔꠥꠝꠞꠣ ꠇꠤꠔꠣ ꠇꠣꠝ ꠇꠞꠅ?” ꠔꠣꠞꠣ ꠇꠁꠟꠣ, “ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠦ ꠛꠣꠚ-ꠖꠣꠖꠣꠞ ꠀꠝꠟ ꠕꠣꠇꠤꠃ ꠙꠡꠥ ꠙꠣꠟꠤ।” 4ꠔꠣꠞꠣ ꠢꠤꠞꠛꠣꠞ ꠇꠁꠟꠣ, “ꠀꠝꠞꠣ ꠁ ꠖꠦꠡꠅ ꠝꠥꠍꠣꠚꠤꠞ ꠅꠁꠀ ꠕꠣꠇꠣꠞ ꠟꠣꠉꠤ ꠀꠁꠍꠤ। ꠇꠦꠘꠣꠘ ꠖꠦꠡꠅ ꠅꠈꠘ ꠛꠦꠎꠥꠁꠔꠣ ꠘꠤꠖꠣꠘ ꠌꠟꠦꠞ ꠇꠞꠤ, ꠢꠤꠘꠅ ꠀꠝꠞꠣꠞ ꠙꠡꠥꠞ ꠙꠣꠟꠞ ꠈꠥꠞꠣꠇꠤ ꠘꠣꠄ। ꠄꠞꠟꠣꠉꠤ ꠖꠄꠀ ꠇꠞꠤ ꠀꠙꠘꠣꠞ ꠁ ꠉꠥꠟꠣꠝ ꠅꠇꠟꠞꠦ, ꠉꠥꠡꠘꠅ ꠞꠁꠛꠣꠞ ꠡꠥꠎꠥꠉ ꠖꠦꠃꠇ꠆ꠇꠣ।” 5ꠚꠦꠞꠣꠃꠘꠦ ꠁꠃꠍꠥꠚꠞꠦ ꠇꠁꠟꠣ, “ꠔꠥꠝꠣꠞ ꠛꠣꠚ-ꠜꠣꠁꠀꠁꠘ ꠔꠥꠝꠣꠞ ꠉꠦꠍꠦ ꠀꠁꠍꠂꠘ; 6ꠀꠡ꠆ꠔꠣ ꠝꠤꠡꠞ ꠖꠦꠡꠃ ꠔ ꠔꠥꠝꠣꠞ ꠍꠣꠝꠘꠦ ꠙꠠꠤ ꠞꠁꠍꠦ। ꠖꠦꠡꠞ ꠢꠇꠟ ꠕꠣꠇꠤ ꠜꠣꠟꠣ ꠎꠣꠉꠣꠔ ꠔꠣꠞꠣꠞꠦ ꠞꠁꠔꠦ ꠖꠦꠅ, ꠔꠣꠞꠣ ꠉꠥꠡꠘꠅꠃ ꠕꠣꠇꠃꠇ ꠀꠞ ꠄꠞꠣꠞ ꠝꠣꠎꠦ ꠎꠁꠉ꠆ꠉ ꠝꠣꠘꠥꠡ ꠙꠣꠁꠟꠦ, ꠔꠣꠞꠣꠞꠦ ꠀꠝꠣꠞ ꠙꠡꠥꠞ ꠙꠣꠟꠞ ꠌꠣꠟꠇꠖꠣꠞ ꠛꠣꠘꠣꠁꠟꠣꠅ।”

7ꠛꠣꠖꠦ ꠁꠃꠍꠥꠚꠦ ꠔꠣꠘ ꠛꠣꠚ ꠁꠀꠇꠥꠛꠞꠦ ꠚꠦꠞꠣꠃꠘꠞ ꠍꠣꠝꠘꠦ ꠀꠘꠣꠁꠟꠣ ꠀꠞ ꠁꠀꠇꠥꠛꠦ ꠚꠦꠞꠣꠃꠘꠞꠦ ꠖꠥꠀ ꠖꠤꠟꠣ। 8ꠚꠦꠞꠣꠃꠘꠦ ꠁꠀꠇꠥꠛꠞꠦ ꠎꠤꠇꠣꠁꠟꠣ, “ꠀꠙꠘꠣꠞ ꠛꠄꠅꠡ ꠇꠔ ꠅꠁꠍꠦ?” 9ꠁꠀꠇꠥꠛꠦ ꠇꠁꠟꠣ, “ꠖꠥꠘꠤꠀꠁꠔ ꠀꠝꠣꠞ ꠝꠥꠍꠣꠚꠤꠞꠤꠞ ꠀꠄꠃ ꠄꠇ-ꠡ ꠔꠤꠡ ꠛꠞꠍ ꠅꠁꠍꠦ, ꠁꠔꠣ ꠔ ꠛꠦꠡꠤ ꠘꠣꠄ, ꠀꠞ ꠈꠥꠛ ꠔꠇꠟꠤꠚꠦꠃ ꠁ ꠖꠤꠘ ꠇꠣꠐꠍꠦ; ꠀꠝꠣꠞ ꠛꠣꠚ-ꠖꠣꠖꠣꠞ ꠝꠥꠍꠣꠚꠤꠞꠤꠞ ꠀꠄꠃꠞ ꠢꠝꠣꠘ ꠅꠈꠘꠅ ꠅꠁꠍꠦ ꠘꠣ।” 10ꠢꠦꠡꠦ ꠁꠀꠇꠥꠛꠦ ꠚꠦꠞꠣꠃꠘꠞꠦ ꠖꠥꠀ ꠇꠞꠤꠀ ꠛꠤꠖꠣꠄ ꠟꠁꠟꠣ। 11ꠔꠦꠃ ꠁꠃꠍꠥꠚꠦ ꠚꠦꠞꠣꠃꠘꠞ ꠢꠥꠇꠥꠝ ꠝꠔ, ꠔꠣꠘ ꠛꠣꠚ-ꠜꠣꠁꠀꠁꠘꠞꠦ ꠝꠤꠡꠞ ꠖꠦꠡꠞ ꠢꠇꠟ ꠕꠣꠇꠤ ꠜꠣꠟꠣ ꠎꠣꠉꠣ, ꠞꠣꠝꠣꠡꠦꠡ ꠄꠟꠣꠇꠣꠔ ꠞꠁꠔꠣ ꠖꠤꠟꠣ। 12ꠁꠃꠍꠥꠚꠦ ꠔꠣꠘ ꠛꠣꠚ-ꠜꠣꠁꠀꠁꠘ ꠀꠞ ꠔꠣꠞꠣꠞ ꠙꠞꠤꠛꠣꠞꠞꠦ ꠎꠣꠞꠎꠤꠞ ꠖꠞꠇꠣꠞꠤ, ꠈꠣꠘꠤ-ꠈꠥꠞꠣꠇꠤ ꠢꠇꠟꠔꠣ ꠎꠥꠉꠣꠁ ꠖꠤꠟꠣ।

ꠝꠤꠡꠞ ꠖꠦꠡꠅ ꠘꠤꠖꠣꠘ ꠛꠣꠠꠍꠦ

13ꠛꠣꠖꠦ ꠀꠇꠣꠟ ꠀꠞꠅ ꠛꠦꠕꠣꠄꠀ ꠅꠁꠟ, ꠖꠦꠡꠞ ꠇꠥꠘꠥ ꠎꠣꠉꠣꠔ ꠈꠣꠘꠤꠞ ꠇꠥꠘ꠆ꠔꠣ ꠀꠍꠤꠟ ꠘꠣ। ꠔꠦꠃ ꠝꠤꠡꠞ ꠀꠞ ꠇꠦꠘꠣꠘ ꠖꠦꠡ ꠄꠇ꠆ꠇꠦꠛꠣꠞꠦ ꠇꠣꠢꠤꠟ ꠅꠁꠉꠦꠟ। 14ꠝꠤꠡꠞ ꠀꠞ ꠇꠦꠘꠣꠘ ꠖꠦꠡꠞ ꠝꠣꠘꠡꠞ ꠎꠔ ꠐꠦꠇꠣ-ꠙꠄꠡꠣ ꠡꠥꠘꠣ-ꠞꠥꠙꠣ ꠀꠍꠤꠟ, ꠁꠔꠣꠖꠤ ꠔꠣꠞꠣ ꠗꠣꠘ ꠈꠞꠤꠖ ꠇꠞꠣꠄ, ꠁꠃꠍꠥꠚꠦ ꠅꠔꠣ ꠖꠟꠣ ꠇꠞꠤꠀ ꠚꠦꠞꠣꠃꠘꠞ ꠜꠣꠘ꠆ꠒꠣꠞꠅ ꠎꠝꠣꠁꠟꠣ। 15ꠝꠤꠡꠞ ꠀꠞ ꠇꠦꠘꠣꠘ ꠖꠦꠡꠞ ꠢꠇꠟ ꠡꠥꠘꠣ-ꠞꠥꠙꠣ ꠎꠦꠛꠟꠣ ꠚꠥꠠꠣꠁ ꠉꠦꠟ, ꠔꠦꠃ ꠝꠤꠡꠞꠤ ꠅꠇꠟꠦ ꠀꠁꠀ ꠁꠃꠍꠥꠚꠞꠦ ꠇꠁꠟꠣ, “ꠀꠝꠞꠣꠞꠦ ꠈꠣꠘꠤꠞ ꠇꠥꠘ꠆ꠔꠣ ꠖꠦꠃꠇ꠆ꠇꠣ। ꠀꠝꠞꠣꠞ ꠡꠥꠘꠣ-ꠞꠥꠙꠣ ꠚꠥꠠꠣꠁ ꠉꠦꠍꠦ ꠇꠞꠤ ꠀꠙꠘꠣꠞ ꠌꠃꠈꠞ ꠍꠣꠝꠘꠦ ꠝꠞꠤꠎꠤꠔꠣꠝ ꠘꠤ?” 16ꠁꠃꠍꠥꠚꠦ ꠇꠁꠟꠣ, “ꠔꠣꠁꠟꠦ ꠔꠥꠝꠞꠣꠞ ꠙꠡꠥ ꠅꠇꠟ ꠀꠘꠤꠀ ꠖꠦꠅ, ꠡꠥꠘꠣ-ꠞꠥꠙꠣ ꠚꠥꠠꠣꠁ ꠉꠦꠟꠦꠅ ꠙꠡꠥ ꠅꠇꠟꠞ ꠛꠖꠟꠣ ꠀꠝꠤ ꠔꠥꠝꠞꠣꠞꠦ ꠈꠣꠘꠤ-ꠈꠥꠞꠣꠇꠤ ꠖꠤꠝꠥ।” 17ꠔꠦꠃ ꠔꠣꠞꠣ ꠎꠣꠞꠎꠤꠞ ꠉꠞꠥ-ꠍꠣꠉꠟ, ꠊꠥꠠꠣ-ꠝꠦꠠꠣ, ꠉꠣꠗꠣ-ꠉꠣꠗꠤ ꠁꠃꠍꠥꠚꠞ ꠉꠦꠍꠦ ꠀꠘꠟꠣ ꠀꠞ ꠁꠃꠍꠥꠚꠦ ꠄꠞ ꠛꠖꠟꠣ ꠔꠣꠞꠣꠞꠦ ꠗꠣꠘ ꠖꠤꠟꠣ। ꠅꠃ ꠟꠣꠈꠣꠘ ꠔꠣꠞꠣꠞ ꠢꠇ꠆ꠇꠟ ꠙꠡꠥꠞ ꠛꠖꠟꠣ, ꠢꠤ ꠛꠍꠞꠞ ꠈꠥꠞꠣꠇꠤ ꠌꠣꠟꠣꠁꠟꠣ।

18ꠀꠞ ꠢꠤ ꠛꠞꠍ ꠉꠦꠟ, ꠄꠞ ꠛꠣꠖꠞ ꠛꠞꠍ ꠝꠣꠘꠡꠦ ꠀꠁꠀ ꠁꠃꠍꠥꠚꠞꠦ ꠇꠁꠟꠣ, “ꠢꠥꠎꠥꠞꠞ ꠉꠦꠍꠦ ꠀꠝꠞꠣ ꠇꠥꠘ꠆ꠔꠣꠃ ꠟꠥꠇꠣꠁꠀꠞ ꠘꠣ, ꠀꠝꠞꠣꠞ ꠢꠇꠟ ꠡꠥꠘꠣ-ꠞꠥꠙꠣ ꠡꠦꠡ ꠅꠁꠉꠦꠍꠦ ꠀꠞ ꠙꠡꠥ ꠅꠇꠟꠅ ꠀꠙꠘꠣꠞꠦ ꠖꠤꠟꠣꠁꠍꠤ। ꠅꠈꠘ ꠀꠝꠞꠣꠞ ꠀꠞ ꠇꠥꠘ꠆ꠔꠣꠃ ꠞꠁꠍꠦ ꠘꠣ, ꠈꠣꠟꠤ ꠅꠃ ꠡꠞꠤꠟ ꠀꠞ ꠎꠣꠉꠣ-ꠎꠝꠤꠘ ꠍꠣꠠꠣ। 19ꠄꠞꠟꠣꠉꠤ ꠀꠙꠘꠣꠞ ꠌꠃꠈꠞ ꠍꠣꠝꠘꠦ ꠎꠝꠤ-ꠎꠝꠣ ꠡꠢ ꠀꠝꠞꠣ ꠇꠤꠟꠣ ꠝꠞꠤꠎꠤꠔꠣꠝ? ꠔꠦ ꠀꠙꠘꠦ ꠀꠝꠞꠣꠞꠦꠅ ꠀꠞ ꠀꠝꠞꠣꠞ ꠢꠇꠟ ꠎꠝꠤ-ꠎꠝꠣꠅ ꠟꠁꠟꠣꠃꠇ꠆ꠇꠣ, ꠀꠝꠞꠣ ꠚꠦꠞꠣꠃꠘꠞ ꠉꠥꠟꠣꠝꠤ ꠇꠞꠝꠥ, ꠔꠣ-ꠅ ꠀꠝꠞꠣꠞꠦ ꠈꠣꠘꠤ ꠖꠦꠃꠇ꠆ꠇꠣ ꠀꠞ ꠛꠤꠌ ꠖꠦꠃꠇ꠆ꠇꠣ, ꠔꠦꠃ ꠀꠝꠞꠣꠅ ꠝꠞꠣ ꠕꠘꠦ ꠛꠣꠌꠝꠥ ꠀꠞ ꠎꠝꠤꠘ ꠈꠣꠘꠣꠁꠘꠅ ꠛꠞꠛꠣꠖ ꠅꠁꠔ ꠘꠣꠄ।” 20ꠅꠃ ꠁꠃꠍꠥꠚꠦ ꠝꠤꠡꠞ ꠖꠦꠡꠞ ꠢꠇ꠆ꠇꠟ ꠎꠝꠤꠘ ꠚꠦꠞꠣꠃꠘꠞ ꠘꠣꠝꠦ ꠟꠁꠟꠤꠟꠣ, ꠇꠣꠞꠘ ꠁ ꠀꠇꠣꠟ ꠅꠃꠟꠣ ꠛꠦꠎꠥꠁꠔꠣ ꠅꠁꠍꠤꠟ ꠎꠦꠘ, ꠝꠤꠡꠞꠞ ꠢꠇꠟꠦꠃ ꠔꠣꠞꠣꠞ ꠎꠣꠉꠣ-ꠎꠝꠤꠘ ꠛꠦꠌꠤꠟꠣꠁꠟꠣ। ꠔꠦꠃ ꠖꠦꠡꠞ ꠢꠇꠟ ꠎꠝꠤꠘ ꠚꠦꠞꠣꠃꠘꠞ ꠀꠔꠅ ꠀꠁꠟ꠆ꠟ। 21ꠀꠞ ꠁꠃꠍꠥꠚꠦ ꠝꠤꠡꠞ ꠖꠦꠡꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣꠞ ꠢꠇꠟ ꠝꠣꠘꠡꠞꠦ ꠐꠣꠃꠘꠅ ꠙꠣꠞ ꠇꠞꠤꠟꠤꠟꠣ। 22ꠈꠣꠟꠤ ꠛꠣꠛꠘ ꠅꠇꠟꠞ ꠎꠣꠉꠣ-ꠎꠝꠤꠘ ꠔꠣꠁꠘ ꠟꠁꠟꠣ ꠘꠣ, ꠇꠣꠞꠘ ꠄꠞꠣꠞꠦ ꠚꠦꠞꠣꠃꠘꠦ ꠛꠦꠔꠘ ꠖꠤꠔꠣ, ꠀꠞ ꠅꠔꠣ ꠖꠤꠀꠃ ꠔꠣꠞꠣ ꠌꠟꠔꠣ। 23ꠢꠦꠡꠦ ꠁꠃꠍꠥꠚꠦ ꠝꠣꠘꠡꠞꠦ ꠇꠁꠟꠣ, “ꠢꠥꠘꠅ, ꠚꠦꠞꠣꠃꠘꠞ ꠘꠣꠝꠦ ꠀꠝꠤ ꠔꠥꠝꠞꠣꠞꠦ ꠀꠞ ꠔꠥꠝꠞꠣꠞ ꠢꠇꠟ ꠎꠣꠉꠣ-ꠎꠝꠤꠘꠅ ꠟꠁꠟꠤꠟꠣꠝ। ꠅꠈꠘ ꠔꠥꠝꠞꠣ ꠅꠃ ꠛꠤꠌ ꠅꠇꠟ ꠘꠦꠅ ꠀꠞ ꠎꠝꠤꠘꠅ ꠛꠣꠁꠘ ꠇꠞꠅ। 24ꠔꠦꠃ ꠎꠝꠤꠘꠅ ꠎꠦꠔꠣ ꠚꠡꠟ ꠚꠟꠤꠛ, ꠄꠞ ꠙꠣꠌ ꠛꠣꠐꠞ ꠄꠇ ꠛꠣꠐ ꠚꠦꠞꠣꠃꠘꠞꠦ ꠖꠤꠅ ꠀꠞ ꠛꠣꠇꠤ ꠌꠣꠁꠞ ꠛꠣꠐ, ꠎꠝꠤꠘꠞ ꠛꠤꠌ, ꠔꠥꠝꠞꠣ ꠀꠞ ꠔꠥꠝꠞꠣꠞ ꠙꠞꠤꠛꠣꠞ ꠀꠞ ꠢꠥꠞꠥꠔ꠆ꠔꠣꠁꠘ꠆ꠔꠞ ꠈꠣꠘꠤꠞ ꠟꠣꠉꠤ ꠘꠤꠅꠉꠤ।” 25ꠔꠦꠃ ꠝꠣꠘꠡꠦ ꠇꠁꠟꠣ, “ꠀꠙꠘꠦ ꠀꠝꠞꠣꠞ ꠎꠣꠘ ꠛꠣꠌꠣꠁꠟꠣ। ꠢꠥꠎꠥꠞꠦ ꠀꠝꠞꠣꠞꠦ ꠖꠄꠀ ꠇꠞꠟꠦ, ꠀꠝꠞꠣ ꠚꠦꠞꠣꠃꠘꠞ ꠉꠥꠟꠣꠝꠤ ꠇꠞꠝꠥ।” 26ꠛꠣꠖꠦ ꠁꠃꠍꠥꠚꠦ ꠝꠤꠡꠞ ꠖꠦꠡꠞ ꠎꠣꠉꠣ-ꠎꠝꠤꠘꠞ ꠟꠣꠉꠤ ꠅꠃ ꠀꠁꠘ ꠎꠣꠞꠤ ꠇꠞꠟꠣ, ꠢꠇꠟ ꠚꠡꠟꠞ ꠙꠣꠌ ꠛꠣꠐꠞ ꠄꠇ ꠛꠣꠐ ꠚꠦꠞꠣꠃꠘꠦ ꠙꠣꠁꠛꠣ, ꠈꠣꠟꠤ ꠛꠣꠛꠘ ꠅꠇꠟꠞ ꠎꠝꠤꠘ ꠛꠣꠖꠦ। ꠅꠃ ꠀꠁꠘ ꠅꠈꠘꠅ ꠌꠟꠦꠞ।

ꠢꠎꠞꠔ ꠁꠀꠇꠥꠛ (ꠀ꠩) ꠞꠦ ꠖꠣꠚꠘꠞ ꠟꠣꠉꠤ ꠅꠍꠤꠅꠔ

27ꠛꠘꠤ ꠁꠍꠞꠣꠁꠟꠦ ꠝꠤꠡꠞ ꠖꠦꠡꠞ ꠉꠥꠡꠘꠅ ꠛꠡꠔ ꠇꠞꠟꠣ। ꠔꠣꠞꠣ ꠢꠘꠞ ꠖꠈꠟꠖꠣꠞꠤ ꠙꠣꠁꠀ, ꠈꠥꠛ ꠚꠟꠀꠟꠣ ꠅꠁꠟꠣ ꠀꠞ ꠔꠣꠞꠣꠞ ꠛꠃꠔ ꠀꠅꠟꠣꠖ ꠅꠁꠟꠣ। 28ꠝꠤꠡꠞ ꠖꠦꠡꠅ ꠀꠁꠀ ꠁꠀꠇꠥꠛ ꠡꠔꠞ ꠛꠞꠍ ꠎꠤꠘ꠆ꠖꠣ ꠞꠁꠟꠣ। ꠔꠦꠃ ꠔꠣꠁꠘ ꠢꠇꠟꠔꠣꠄ ꠄꠇ-ꠡ ꠡꠣꠔꠌꠣꠟ꠆ꠟꠤꠡ ꠛꠞꠍ ꠛꠣꠌꠤꠟꠣ। 29ꠁꠍꠞꠣꠁꠟꠞ ꠝꠃꠔꠞ ꠖꠤꠘ ꠇꠣꠍꠣꠁꠀ ꠀꠁꠟꠦ ꠔꠣꠘ ꠙꠥꠀ ꠁꠃꠍꠥꠚꠞꠦ ꠈꠛꠞ ꠖꠤ ꠀꠘꠣꠁꠀ ꠇꠁꠟꠣ, “ꠀꠝꠣꠞ ꠛꠣꠄ ꠔꠥꠝꠣꠞ ꠝꠦꠢꠦꠞꠛꠣꠘꠤ ꠅꠁꠟꠦ ꠄꠇꠈꠣꠘ ꠅꠍꠤꠅꠔ ꠇꠞꠣꠁꠔꠣꠝ, ꠔꠥꠝꠤ ꠀꠝꠣꠞ ꠃꠞꠣꠔꠞ ꠔꠟꠦ ꠔꠥꠝꠣꠞ ꠀꠔꠈꠣꠘ ꠢꠣꠞꠣꠅ, ꠔꠥꠝꠤ ꠀꠝꠣꠞ ꠛꠣꠄ ꠖꠄꠀ ꠀꠞ ꠢꠣꠟꠣꠟꠤ ꠖꠦꠈꠣꠁꠅ, ꠀꠝꠣꠞꠦ ꠝꠤꠡꠞꠅ ꠖꠣꠚꠘ ꠇꠞꠤꠅ ꠘꠣ। 30ꠀꠝꠤ ꠎꠦꠛꠟꠣ ꠀꠝꠣꠞ ꠛꠣꠚ-ꠖꠣꠖꠣꠞ ꠉꠦꠍꠦ ꠎꠣꠁꠝꠥꠉꠤ, ꠅꠃ ꠡꠝꠄ ꠔꠥꠝꠤ ꠀꠝꠣꠞꠦ ꠝꠤꠡꠞ ꠖꠦꠡ ꠕꠣꠇꠤ ꠘꠤꠀ, ꠀꠝꠣꠞ ꠛꠣꠚ-ꠖꠣꠖꠣꠞ ꠇꠛꠞꠡ꠆ꠕꠣꠘꠅ ꠖꠣꠚꠘ ꠇꠞꠤꠅ।” ꠁꠃꠍꠥꠚꠦ ꠇꠁꠟꠣ, “ꠀꠙꠘꠦ ꠎꠦꠟꠣ ꠇꠁꠟꠣ, ꠅꠃꠟꠣꠃ ꠇꠞꠝꠥ।” 31ꠔꠦꠃ ꠁꠀꠇꠥꠛꠦ ꠇꠁꠟꠣ, “ꠔꠦ ꠔꠥꠝꠤ ꠀꠝꠣꠞ ꠉꠦꠍꠦ ꠇꠍꠝ ꠇꠞꠅ।” ꠁꠃꠍꠥꠚꠦ ꠇꠍꠝ ꠇꠞꠟꠣ। ꠅꠃ ꠁꠍꠞꠣꠁꠟꠦ ꠔꠣꠘ ꠛꠤꠍꠘꠣꠞ ꠢꠤꠔꠣꠘ ꠛꠣꠄ ꠇꠣꠁꠔ ꠅꠁꠟꠣ।

Currently Selected:

ꠔꠃꠞꠣꠔ ১: ꠙꠄꠖꠣ ꠘꠣꠝꠣ 47: sylN

Highlight

Copy