ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 9

ꠎꠣꠟꠤꠝ ꠡꠃꠟꠞ ꠖꠤꠟ ꠛꠖꠟꠣꠘꠤ

1-2ꠁ ꠡꠝꠄꠅ ꠡꠃꠟꠦ ꠀꠟ-ꠝꠍꠤꠞ ꠃꠝ꠆ꠝꠔ ꠅꠇꠟꠞꠦ ꠎꠣꠘꠦ ꠝꠣꠞꠔꠣ ꠇꠞꠤ ꠒꠞ ꠖꠦꠈꠣꠘꠤꠔ ꠞꠁꠍꠂꠘ। ꠀꠞ ꠖꠣꠝꠦꠡ꠆ꠇ ꠡꠢꠞꠞ ꠁꠢꠥꠖꠤꠞ ꠝꠍꠤꠖꠣꠁꠘ꠆ꠔꠅ ꠖꠦꠅꠀꠞ ꠟꠣꠉꠤ ꠔꠣꠁꠘ ꠙꠞꠗꠣꠘ ꠁꠝꠣꠝꠞ ꠉꠦꠍ ꠕꠣꠇꠤ ꠌꠤꠑꠤ ꠌꠣꠁꠟꠣ, ꠎꠔ ꠛꠦꠐꠣꠁꠘ-ꠛꠦꠐꠤꠘ ꠁꠍꠣꠞ ꠙꠕꠦ ꠌꠟꠂꠘ, ꠔꠣꠞꠣꠞꠦ ꠛꠣꠘ꠆ꠖꠤꠀ ꠎꠦꠞꠥꠎꠣꠟꠦꠝꠅ ꠀꠘꠔꠣ ꠅꠃ ꠈꠦꠝꠔꠣ ꠙꠣꠅꠀꠞ ꠟꠣꠉꠤ ꠌꠤꠑꠤ ꠌꠣꠁꠟꠣ। 3ꠙꠕꠅ ꠎꠣꠁꠔꠦ ꠎꠣꠁꠔꠦ ꠎꠦꠛꠟꠣ ꠖꠣꠝꠦꠡ꠆ꠇ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠟꠣ, ꠔꠦꠃ ꠀꠈꠔꠣꠃ ꠀꠍꠝꠣꠘ ꠕꠣꠇꠤ ꠔꠣꠘ ꠌꠣꠁꠞꠅ ꠉꠣꠟꠣꠛꠣꠄ ꠚꠞ ꠅꠁꠀ ꠌꠝꠇꠣꠁꠀ ꠃꠑꠟ। 4ꠅꠃ ꠔꠣꠁꠘ ꠝꠣꠐꠤꠔ ꠙꠠꠤꠉꠦꠟꠣ ꠀꠞ ꠉꠣꠁꠛꠤ ꠀꠅꠀꠎ ꠢꠥꠘꠟꠣ, ꠇꠦ ꠎꠣꠘꠥ ꠔꠣꠘꠞꠦ ꠇꠞ, “ꠡꠃꠟ, ꠡꠃꠟ, ꠇꠦꠘꠦ ꠀꠝꠣꠞꠦ ꠎꠥꠟꠥꠝ ꠇꠞꠞꠣꠄ?” 5ꠡꠃꠟꠦ ꠎꠤꠇꠣꠁꠟꠣ, “ꠝꠣꠟꠤꠇ, ꠀꠙꠘꠦ ꠇꠦ?” ꠔꠣꠁꠘ ꠇꠁꠟꠣ, “ꠀꠝꠤ ꠁꠍꠣ, ꠎꠦꠘꠞꠦ ꠔꠥꠝꠤ ꠎꠥꠟꠥꠝ ꠇꠞꠞꠣꠄ। 6ꠔꠥꠝꠤ ꠅꠈꠘ ꠃꠑꠤꠀ ꠡꠢꠞꠅ ꠎꠣꠅ, ꠔꠥꠝꠤ ꠇꠤꠔꠣ ꠇꠞꠔꠣꠄ ꠔꠥꠝꠣꠞꠦ ꠎꠣꠘꠣꠁꠟ ꠅꠁꠛ।” 7ꠅꠁꠟꠦ ꠎꠦꠞꠣ ꠡꠃꠟꠞ ꠟꠉꠦ ꠎꠣꠅꠀꠔ ꠀꠍꠟꠣ ꠔꠣꠞꠣ ꠌꠝꠇꠤ ꠉꠦꠟꠣ, ꠔꠣꠞꠣ ꠁ ꠀꠅꠀꠎ ꠑꠤꠇꠃ ꠢꠥꠘꠍꠤꠟꠣ, ꠅꠁꠟꠦ ꠇꠦꠃꠞꠞꠦ ꠖꠦꠈꠟꠣ ꠘꠣ। 8ꠛꠣꠖꠦ ꠡꠃꠟ ꠝꠣꠐꠤ ꠕꠣꠇꠤ ꠃꠑꠟꠣ, ꠀꠞ ꠌꠃꠈ ꠝꠦꠟꠤꠀ ꠢꠣꠞꠟꠦ ꠇꠥꠘ꠆ꠔꠣꠃ ꠖꠦꠈꠟꠣ ꠘꠣ; ꠔꠣꠘ ꠟꠉꠞ ꠝꠣꠘꠡꠦ ꠔꠣꠘꠞꠦ ꠀꠔꠅ ꠗꠞꠤꠀ ꠖꠣꠝꠦꠡ꠆ꠇꠅ ꠟꠁꠀ ꠉꠦꠟꠣ। 9ꠡꠃꠟꠦ ꠔꠤꠘ ꠖꠤꠘ ꠗꠞꠤ ꠌꠃꠈꠦ ꠇꠥꠘ꠆ꠔꠣꠃ ꠖꠦꠈꠟꠣ ꠘꠣ ꠀꠞ ꠇꠥꠘꠥꠎꠣꠔ ꠈꠣꠘꠣ-ꠙꠤꠘꠣꠅ ꠈꠣꠁꠟꠣ ꠘꠣ।

10ꠖꠣꠝꠦꠡ꠆ꠇ ꠡꠢꠞꠅ ꠅꠘꠘꠤꠅ ꠘꠣꠝꠦ ꠄꠇꠎꠘ ꠝꠥꠝꠤꠘ ꠀꠍꠟꠣ, 11ꠝꠣꠛꠥꠖꠦ ꠔꠣꠘꠞꠦ ꠖꠞꠡꠘ ꠖꠤꠀ ꠇꠁꠟꠣ, “ꠅꠘꠘꠤꠅ!” ꠔꠣꠁꠘ ꠎꠥꠀꠙ ꠖꠤꠟꠣ, “ꠝꠣꠟꠤꠇ, ꠅꠃꠘꠥ ꠀꠝꠤ।” ꠝꠣꠛꠥꠖꠦ ꠔꠣꠘꠞꠦ ꠇꠁꠟꠣ, “ꠡꠥꠎꠣ ꠘꠣꠝꠞ ꠎꠦ ꠡꠠꠇ ꠀꠍꠦ, ꠔꠥꠝꠤ ꠢꠃ ꠡꠠꠇꠦ ꠎꠣꠅ, ꠉꠤꠀ ꠢꠘꠞ ꠄꠢꠥꠖꠣꠞ ꠛꠣꠠꠤꠔ ꠔꠣꠞ꠆ꠡ ꠡꠢꠞꠞ ꠡꠃꠟ ꠘꠣꠝꠞ ꠄꠇꠎꠘ ꠝꠣꠘꠡꠞ ꠔꠣꠟ꠆ꠟꠣꠡ ꠇꠞꠅ। 12ꠢꠘꠅ ꠢꠦ ꠖꠥꠀ ꠇꠞꠦꠞ, ꠀꠞ ꠢꠦ ꠖꠞꠡꠘ ꠙꠣꠁꠍꠦ, ꠅꠘꠘꠤꠅ ꠘꠣꠝꠞ ꠄꠇꠎꠘ ꠝꠣꠘꠥꠡ ꠀꠁꠀ ꠔꠣꠞ ꠡꠞꠤꠟ ꠀꠔꠣꠁꠀ ꠖꠤꠛ, ꠔꠦꠃ ꠢꠦ ꠢꠤꠞꠛꠣꠞ ꠌꠃꠈꠦ ꠖꠦꠈꠛ।” 13ꠅꠘꠘꠤꠅꠄ ꠇꠁꠟꠣ, “ꠝꠣꠟꠤꠇ, ꠀꠝꠤ ꠛꠃꠔ ꠝꠣꠘꠡꠞ ꠉꠦꠍꠦ ꠁ ꠝꠣꠘꠥꠡꠉꠥꠞ ꠈꠣꠁꠍꠟꠔ ꠢꠥꠘꠍꠤ, ꠢꠦ ꠎꠦꠞꠥꠎꠣꠟꠦꠝꠅ ꠔꠥꠝꠣꠞ ꠙꠣꠇ ꠛꠘ꠆ꠖꠣ ꠅꠇꠟꠞ ꠃꠙꠞꠦ ꠛꠃꠔ ꠎꠥꠟꠥꠝ ꠇꠞꠍꠦ। 14ꠀꠞ ꠅꠃ ꠎꠣꠉꠣꠔꠅ ꠎꠔ ꠝꠣꠘꠡꠦ ꠔꠥꠝꠣꠞ ꠙꠕꠦ ꠌꠟꠦ, ꠄꠞꠣꠞꠦ ꠛꠣꠘ꠆ꠖꠤꠀ ꠘꠦꠅꠀꠞ ꠈꠦꠝꠔꠣ ꠢꠦ ꠛꠠ ꠁꠝꠣꠝ ꠅꠇꠟꠞ ꠉꠦꠍ ꠕꠣꠇꠤ ꠙꠣꠁꠍꠦ।” 15ꠅꠁꠟꠦ ꠝꠣꠟꠤꠇꠦ ꠔꠣꠘꠞꠦ ꠇꠁꠟꠣ, “ꠔꠥꠝꠤ ꠎꠣꠅ, ꠇꠣꠞꠘ ꠅ-ꠁꠢꠥꠖꠤ ꠅꠇꠟ, ꠔꠣꠞꠣꠞ ꠞꠣꠎꠣ ꠅꠇꠟ, ꠀꠞ ꠛꠘꠤ ꠁꠍꠞꠣꠁꠟꠞ ꠉꠦꠍꠦ ꠀꠝꠣꠞ ꠘꠣꠝ ꠔꠛꠟꠤꠉꠞ ꠟꠣꠉꠤ ꠀꠝꠤ ꠔꠣꠞꠦ ꠙꠍꠘ꠆ꠖ ꠇꠞꠍꠤ। 16ꠀꠝꠤ ꠔꠣꠞꠦ ꠖꠦꠈꠣꠁꠝꠥ, ꠀꠝꠣꠞ ꠘꠣꠝꠞ ꠟꠣꠉꠤ ꠔꠣꠞꠦ ꠇꠔ ꠎꠣꠟꠣ-ꠎꠘꠔ꠆ꠞꠘꠣ ꠡꠁꠎ꠆ꠎ ꠇꠞꠣ ꠟꠣꠉꠛ।” 17ꠔꠦꠃ ꠅꠘꠘꠤꠅ ꠛꠣꠞ ꠅꠁꠀ ꠢꠃ ꠛꠣꠠꠤꠔ ꠉꠤꠀ ꠢꠣꠝꠣꠁꠟꠣ, ꠀꠞ ꠡꠃꠟꠞ ꠉꠔꠞꠅ ꠀꠔ ꠖꠤꠀ ꠇꠁꠟꠣ, “ꠜꠣꠁ ꠡꠃꠟ, ꠅꠘꠅ ꠀꠅꠀꠞ ꠙꠕꠅ ꠎꠦꠁꠘ ꠔꠥꠝꠣꠞꠦ ꠖꠞꠡꠘ ꠖꠤꠍꠂꠘ ꠔꠣꠁꠘ ꠢꠎꠞꠔ ꠁꠍꠣ, ꠔꠣꠁꠘ ꠀꠝꠣꠞꠦ ꠙꠣꠑꠣꠁꠍꠂꠘ, ꠎꠣꠔꠦ ꠔꠥꠝꠤ ꠢꠤꠞꠛꠣꠞ ꠌꠃꠈꠦ ꠖꠦꠈꠔꠣꠄ ꠙꠣꠅ ꠀꠞ ꠙꠣꠇ ꠞꠥꠢꠦ ꠇꠣꠝꠤꠟ ꠅꠅ।” 18ꠀꠞ ꠟꠉꠦ ꠟꠉꠦꠃ ꠔꠣꠘ ꠌꠃꠈ ꠕꠣꠇꠤ ꠝꠣꠍꠞ-ꠚꠁꠞꠞ ꠟꠣꠈꠣꠘ ꠇꠤꠔꠣ ꠙꠠꠤꠉꠦꠟ, ꠔꠣꠁꠘ ꠖꠦꠈꠔꠣ ꠙꠣꠞꠟꠣ ꠀꠞ ꠃꠑꠤꠀ ꠙꠣꠘꠤꠔ ꠉꠤꠀ ꠔꠃꠛꠣꠞ ꠉꠥꠍꠟ ꠇꠞꠟꠣ; 19ꠈꠣꠅꠀ-ꠖꠣꠅꠀꠞ ꠛꠣꠖꠦ ꠡꠞꠤꠟꠅ ꠢꠤꠞꠛꠣꠞ ꠛꠟ ꠙꠣꠁꠟꠣ।

ꠀꠞ ꠔꠣꠁꠘ ꠇꠤꠍꠥꠖꠤꠘ ꠖꠣꠝꠦꠡ꠆ꠇꠞ ꠃꠝ꠆ꠝꠔ ꠅꠇꠟꠞ ꠟꠉꠦ ꠞꠁꠟꠣ। 20ꠡꠃꠟꠦ ꠀꠞ ꠖꠦꠞꠤ ꠇꠞꠟꠣ ꠘꠣ, ꠔꠣꠁꠘ ꠎꠣꠉꠣꠄ ꠎꠣꠉꠣꠄ ꠝꠍꠤꠖꠣꠁꠘ꠆ꠔꠅ ꠉꠤꠀ ꠔꠛꠟꠤꠉ ꠇꠞꠣꠔ ꠟꠣꠉꠟꠣ, ꠢꠎꠞꠔ ꠁꠍꠣꠃ ꠀꠟ꠆ꠟꠣꠞ ꠢꠃ ꠈꠣꠍ ꠝꠣꠄꠀꠞ ꠎꠘ, ꠁꠛꠘꠥꠟ꠆ꠟꠣ। 21ꠎꠦꠞꠣ ꠔꠣꠘ ꠛꠄꠀꠘ ꠢꠥꠘꠔ ꠔꠣꠞꠣ ꠢꠇꠟꠦꠃ ꠔꠣꠁꠎ꠆ꠎꠥꠛ ꠅꠁꠀ ꠝꠣꠔꠣ-ꠝꠣꠔꠤ ꠇꠞꠔ, “ꠄꠁꠘ ꠢꠃ ꠝꠣꠘꠥꠡ ꠘꠣꠄ ꠘꠤ ꠎꠦꠁꠘ ꠎꠦꠞꠥꠎꠣꠟꠦꠝꠅ ꠁꠍꠣꠞ ꠃꠝ꠆ꠝꠔ ꠅꠇꠟꠞꠦ ꠎꠥꠟꠥꠝ ꠇꠞꠔꠣ? ꠀꠞ ꠅꠘꠅ-ꠅ ꠔ ꠅꠔꠣꠞ ꠟꠣꠉꠤꠃ ꠀꠁꠍꠂꠘ, ꠎꠦꠞꠣ ꠁꠍꠣꠞ ꠙꠕꠦ ꠌꠟꠦ ꠔꠣꠞꠣꠞꠦ ꠛꠣꠘ꠆ꠖꠤꠀ ꠛꠠ ꠁꠝꠣꠝ ꠅꠇꠟꠞ ꠉꠦꠍꠦ ꠟꠁꠀ ꠎꠣꠁꠔꠣ?” 22ꠅꠁꠟꠦ ꠡꠃꠟ ꠖꠤꠘ ꠖꠤꠘ ꠀꠞꠅ ꠢꠤꠝ꠆ꠝꠔ ꠀꠟꠣ ꠅꠁꠟꠣ, ꠀꠞ ꠖꠣꠝꠦꠡ꠆ꠇꠞ ꠁꠢꠥꠖꠤ ꠅꠇꠟꠞꠦ ꠟꠣ-ꠎꠥꠀꠙ ꠛꠣꠘꠣꠁꠔꠣ ꠟꠣꠉꠟꠣ, ꠔꠣꠁꠘ ꠙꠞꠝꠣꠘ ꠖꠦꠈꠣꠁꠟꠣ, ꠅꠃ ꠁꠍꠣꠃ ꠢꠤ ꠀꠟ-ꠝꠍꠤ।

23ꠄꠞ ꠛꠃꠔ ꠛꠣꠖꠦ ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠝꠣꠞꠣꠞ ꠟꠣꠉꠤ ꠍꠟ꠆ꠟꠣ-ꠙꠞꠣꠝꠤꠡ ꠇꠞꠟꠣ, 24ꠀꠞ ꠡꠃꠟꠦ ꠁ ꠈꠛꠞ ꠙꠣꠁꠟꠣ। ꠔꠣꠞꠣ ꠔꠣꠘꠞꠦ ꠝꠣꠞꠣꠞ ꠟꠣꠉꠤ ꠡꠢꠞꠅ ꠢꠣꠝꠣꠘꠤ ꠛꠣꠞꠘꠤꠞ ꠢꠇ꠆ꠇꠟ ꠖꠥꠀꠞꠅ ꠖꠤꠘꠦ-ꠞꠣꠁꠔꠦ ꠌꠇꠤꠖꠣꠞ ꠛꠅꠀꠁꠟꠣ। 25ꠄꠇꠖꠤꠘ ꠞꠣꠁꠔ ꠃꠝ꠆ꠝꠔ ꠅꠇꠟꠦ ꠡꠃꠟꠞꠦ ꠄꠇ ꠐꠥꠇꠞꠤꠞ ꠜꠤꠔꠞꠦ ꠢꠣꠞꠣꠁꠀ, ꠛꠣꠃꠘ꠆ꠒꠞꠤ ꠅꠀꠟꠞ ꠈꠤꠠꠇꠤꠛꠣꠄ ꠙꠣꠞ ꠇꠞꠤ ꠛꠣꠞꠦ ꠟꠣꠝꠣꠁꠀ ꠖꠤꠟꠣ।

ꠢꠎꠞꠔ ꠡꠃꠟ ꠎꠦꠞꠥꠎꠣꠟꠦꠝꠅ ꠀꠁꠟꠣ

26ꠛꠣꠖꠦ ꠔꠣꠁꠘ ꠎꠦꠞꠥꠎꠣꠟꠦꠝꠅ ꠀꠁꠀ ꠃꠝ꠆ꠝꠔ ꠅꠇꠟꠞ ꠟꠉꠦ ꠡꠞꠤꠇ ꠅꠁꠔꠣ ꠌꠣꠁꠟꠣ; ꠅꠁꠟꠦ ꠢꠇ꠆ꠇꠟꠦ ꠔꠣꠘꠞꠦ ꠒꠞꠣꠁꠟ, ꠔꠣꠁꠘ ꠎꠦꠘ ꠢꠣꠍꠣꠃ ꠁꠝꠣꠘ ꠀꠘꠍꠂꠘ ꠔꠣꠞꠣ ꠛꠤꠡ꠆ꠛꠣꠡ ꠇꠞꠟꠣ ꠘꠣ। 27ꠔꠦꠃ ꠛꠣꠞ꠆ꠘꠣꠛꠣꠍꠦ ꠔꠣꠘꠞꠦ ꠀꠔꠅ ꠗꠞꠤꠀ ꠍꠣꠢꠣꠛꠤ ꠅꠇꠟꠞ ꠉꠦꠍꠦ ꠟꠁꠀ ꠉꠦꠟꠣ, ꠀꠞ ꠖꠣꠝꠦꠡ꠆ꠇ ꠎꠣꠅꠀꠞ ꠙꠕꠅ ꠇꠤꠟꠣ ꠔꠣꠁꠘ ꠀꠟ-ꠝꠍꠤꠞ ꠖꠤꠖꠣꠞ ꠙꠣꠁꠟꠣ, ꠀꠞ ꠇꠤꠟꠣ ꠝꠣꠟꠤꠇꠦ ꠔꠣꠘ ꠟꠉꠦ ꠛꠣꠔꠌꠤꠔ ꠇꠞꠟꠣ, ꠖꠣꠝꠦꠡ꠆ꠇꠅ ꠇꠤꠟꠣ ꠔꠣꠁꠘ ꠡꠣꠅꠡ ꠇꠞꠤ ꠁꠍꠣꠞ ꠘꠣꠝꠦ ꠔꠛꠟꠤꠉ ꠇꠞꠍꠂꠘ ꠢꠇꠟꠔꠣ ꠄꠞꠣꠞꠦ ꠎꠣꠘꠣꠁꠟꠣ। 28ꠛꠣꠖꠦ ꠡꠃꠟ ꠎꠦꠞꠥꠎꠣꠟꠦꠝꠅ ꠄꠞꠣꠞ ꠟꠉꠦ ꠟꠉꠦ ꠞꠁꠔꠣ, ꠔꠣꠁꠘ ꠎꠦꠞꠥꠎꠣꠟꠦꠝꠞ ꠢꠇꠟ ꠎꠣꠉꠣꠔ ꠊꠥꠞꠤꠀ ꠚꠤꠞꠤꠀ ꠡꠣꠅꠡ ꠇꠞꠤ ꠁꠍꠣꠞ ꠘꠣꠝꠦ ꠔꠛꠟꠤꠉ ꠇꠞꠔꠣ। 29ꠔꠣꠁꠘ ꠁꠃꠘꠣꠘꠤ ꠜꠣꠡꠣꠄ ꠝꠣꠔꠞꠣ ꠁꠢꠥꠖꠤ ꠅꠇꠟꠞ ꠟꠉꠦ ꠖꠤꠘꠤ ꠛꠣꠔꠌꠤꠔ ꠀꠞ ꠔꠞ꠆ꠇ ꠇꠞꠔꠣ; ꠁꠢꠥꠖꠤ ꠅꠇꠟꠦ ꠔꠣꠘꠞꠦ ꠎꠣꠘꠦ ꠝꠣꠞꠤꠟꠔꠣ ꠌꠣꠁꠟꠣ। 30ꠝꠥꠝꠤꠘ ꠅꠇꠟꠦ ꠁ ꠈꠛꠞ ꠢꠥꠘꠤꠀ ꠔꠣꠘꠞꠦ ꠇꠂꠍꠞꠤꠀ ꠡꠢꠞꠅ ꠟꠁꠀ ꠉꠦꠟꠣ, ꠢꠘ ꠕꠣꠇꠤ ꠔꠣꠘꠞꠦ ꠔꠣꠞ꠆ꠡ ꠡꠢꠞꠅ ꠙꠣꠑꠣꠁ ꠖꠤꠟꠣ। 31ꠢꠤ ꠡꠝꠄ ꠄꠢꠥꠖꠤꠀ, ꠉꠣꠟꠤꠟ ꠀꠞ ꠡꠝꠞꠤꠀ ꠄꠟꠣꠇꠣꠞ ꠎꠝꠣꠔ ꠅꠇꠟ ꠡꠣꠘ꠆ꠔꠤꠞ ꠝꠣꠎꠦ ꠔꠂꠀꠞ ꠅꠁꠟ, ꠁ ꠎꠝꠣꠔ ꠅꠇꠟ ꠝꠣꠛꠥꠖꠞ ꠒꠞꠦ ꠀꠞ ꠙꠣꠇ ꠞꠥꠢꠥꠞ ꠁꠡꠣꠞꠣꠄ ꠌꠟꠤ ꠌꠟꠤ ꠛꠃꠔ ꠙꠞꠤꠝꠣꠘꠦ ꠛꠣꠠꠟ।

ꠢꠎꠞꠔ ꠙꠤꠔꠞꠞ ꠍꠚꠞ ꠀꠞ ꠇꠦꠞꠣꠝꠔꠤ

32ꠙꠤꠔꠞꠦ ꠢꠇ꠆ꠇꠟ ꠎꠣꠉꠣꠔ ꠊꠥꠞꠔꠦ ꠊꠥꠞꠔꠦ ꠟꠥꠖ꠆ꠖꠣ ꠉꠣꠃꠞ ꠝꠥꠝꠤꠘ ꠅꠇꠟꠞ ꠉꠦꠍꠦ ꠀꠁꠀ ꠀꠎꠤꠟꠣ। 33ꠢꠃ ꠉꠣꠃꠔ ꠅꠂꠘꠤꠅ ꠘꠣꠝꠦ ꠄꠇꠎꠘ ꠝꠣꠘꠥꠡ ꠀꠍꠤꠟ; ꠢꠦ ꠅꠞ꠆ꠖꠋ ꠛꠦꠝꠣꠞꠦ ꠀꠐ ꠛꠞꠍ ꠗꠞꠤ ꠛꠤꠍꠘꠣꠔ ꠙꠠꠘꠅ ꠀꠍꠤꠟ। 34ꠙꠤꠔꠞꠦ ꠔꠣꠞꠦ ꠖꠦꠈꠤꠀ ꠇꠁꠟꠣ, “ꠅꠂꠘꠤꠅ, ꠁꠍꠣ ꠀꠟ-ꠝꠍꠤ ꠔꠥꠝꠣꠞꠦ ꠜꠣꠟꠣ ꠇꠞꠟꠣ, ꠃꠑꠅ, ꠔꠥꠝꠣꠞ ꠛꠤꠍꠘꠣ ꠔꠥꠟꠤꠟꠣꠅ।” ꠀꠞ ꠟꠉꠦ ꠟꠉꠦꠃ ꠅꠂꠘꠤꠅ ꠃꠑꠤꠀ ꠃꠛꠣꠁ ꠉꠦꠟ। 35ꠔꠦꠃ ꠟꠥꠖ꠆ꠖꠣ ꠉꠣꠃ ꠀꠞ ꠡꠣꠞꠥꠘ ꠄꠟꠣꠇꠣꠞ ꠢꠇꠟ ꠝꠣꠘꠡꠦ ꠅꠂꠘꠤꠅꠞ ꠢꠣꠟꠔ ꠖꠦꠈꠤꠀ ꠀꠟ꠆ꠟꠣꠞ ꠛꠣꠄ ꠚꠤꠞꠟꠣ।

36ꠎꠣꠚꠣ ꠡꠢꠞꠅ ꠐꠣꠛꠤꠕꠣ ꠘꠣꠝꠦ ꠄꠇꠎꠘ ꠝꠥꠝꠤꠘ ꠛꠦꠐꠤ ꠀꠍꠟꠣ, ꠁꠃꠘꠣꠘꠤ ꠜꠣꠡꠣꠄ ꠐꠣꠛꠤꠕꠣ ꠘꠣꠝꠞ ꠅꠞ꠆ꠕ ꠖꠞ꠆ꠇꠣ, ꠝꠣꠘꠤ ꠢꠞꠤꠘꠤ, ꠔꠣꠁꠘ ꠢꠇꠟ ꠡꠝꠄ ꠜꠣꠟꠣ ꠇꠣꠝ ꠇꠞꠔꠣ ꠀꠞ ꠉꠞꠤꠛꠞꠦ ꠡꠣꠁꠎ꠆ꠎ ꠇꠞꠔꠣ। 37ꠔꠣꠁꠘ ꠛꠦꠝꠣꠞ ꠙꠠꠤꠀ ꠝꠣꠞꠣ ꠉꠦꠟꠣ, ꠀꠞ ꠝꠣꠘꠡꠦ ꠔꠣꠘꠞꠦ ꠉꠥꠍꠟ ꠖꠦꠅꠀꠁꠀ ꠃꠙꠞꠞ ꠇꠥꠑꠣꠔ ꠘꠤꠀ ꠕꠁꠟꠣ। 38ꠎꠣꠚꠣ ꠡꠢꠞ ꠟꠥꠖ꠆ꠖꠣꠞ ꠇꠣꠍꠣꠔ ꠀꠍꠤꠟ ꠉꠔꠤꠇꠦ, ꠃꠝ꠆ꠝꠔ ꠅꠇꠟꠦ ꠎꠦꠛꠟꠣ ꠢꠥꠘꠟꠣ, ꠙꠤꠔꠞ ꠟꠥꠖ꠆ꠖꠣꠔ ꠀꠍꠂꠘ, ꠅꠃ ꠔꠣꠞꠣ ꠖꠥꠁꠎꠘ ꠝꠣꠘꠡꠞꠦ ꠔꠣꠘ ꠉꠦꠍꠦ ꠙꠣꠑꠣꠁꠀ ꠝꠤꠘꠔ ꠇꠞꠟꠣ, “ꠀꠙꠘꠦ ꠎꠟꠖꠤ ꠇꠞꠤ ꠀꠝꠞꠣꠞ ꠉꠦꠍꠦ ꠀꠃꠇ꠆ꠇꠣ।” 39ꠔꠦꠃ ꠙꠤꠔꠞ ꠔꠣꠞꠣꠞ ꠟꠉꠦ ꠞꠅꠀꠘꠣ ꠖꠤꠟꠣ, ꠔꠣꠁꠘ ꠢꠘꠅ ꠎꠣꠅꠀꠞ ꠛꠣꠖꠦ ꠔꠣꠞꠣ ꠔꠣꠘꠞꠦ ꠃꠙꠞꠞ ꠇꠥꠑꠣꠔ ꠟꠁꠀ ꠉꠦꠟ, ꠢꠇꠟ ꠠꠣꠠꠤ ꠛꠦꠐꠤꠘ꠆ꠔꠦ ꠙꠤꠔꠞꠞ ꠌꠣꠁꠞꠅꠛꠣꠄ ꠃꠛꠣꠁꠀ ꠇꠣꠘ꠆ꠖꠘ ꠡꠥꠞꠥ ꠇꠞꠟꠣ ꠀꠞ ꠖꠞ꠆ꠇꠣ ꠎꠤꠔꠣ ꠕꠣꠇꠔꠦ ꠎꠦꠔꠣ ꠇꠣꠙꠠ-ꠌꠥꠙꠠ ꠛꠣꠘꠣꠁꠍꠟꠣ, ꠅꠔꠣ ꠙꠤꠔꠞꠞꠦ ꠖꠦꠈꠣꠁꠟꠣ। 40ꠙꠤꠔꠞꠦ ꠔꠣꠞꠣ ꠢꠇ꠆ꠇꠟꠞꠦ ꠇꠥꠑꠣ ꠕꠣꠇꠤ ꠛꠣꠞ ꠇꠞꠤ ꠖꠤꠀ ꠎꠣꠘꠥ ꠙꠣꠠꠤꠀ ꠖꠥꠀ ꠇꠞꠟꠣ; ꠛꠣꠖꠦ ꠝꠞꠣ ꠛꠦꠐꠤꠞ ꠟꠣꠡꠞ ꠛꠣꠄ ꠚꠤꠞꠤꠀ ꠇꠁꠟꠣ, “ꠐꠣꠛꠤꠕꠣ, ꠃꠑꠅ।” ꠟꠉꠦ ꠟꠉꠦ ꠖꠞ꠆ꠇꠣꠄ ꠌꠃꠈ ꠈꠥꠟꠟꠣ, ꠀꠞ ꠙꠤꠔꠞꠞꠦ ꠖꠦꠈꠤꠀ ꠃꠑꠤꠀ ꠛꠁꠟꠣ। 41ꠙꠤꠔꠞꠦ ꠔꠣꠘ ꠀꠔꠅ ꠗꠞꠤꠀ ꠃꠛꠣ ꠇꠞꠟꠣ, ꠛꠣꠖꠦ ꠢꠤ ꠠꠣꠠꠤ ꠛꠦꠐꠤꠘ ꠀꠞ ꠝꠥꠝꠤꠘ ꠅꠇꠟꠞꠦ ꠒꠣꠇꠤꠀ ꠖꠦꠈꠣꠁꠟꠣ, ꠖꠞ꠆ꠇꠣ ꠎꠤꠔꠣ ꠅꠁꠍꠂꠘ। 42ꠁ ꠈꠛꠞ ꠎꠣꠚꠣ ꠡꠢꠞꠞ ꠢꠇꠟ ꠎꠣꠉꠣꠔ ꠃꠠꠤꠉꠦꠟ ꠀꠞ ꠛꠃꠔ ꠝꠣꠘꠡꠦ ꠀꠟ-ꠝꠍꠤꠞ ꠃꠙꠞꠦ ꠁꠝꠣꠘ ꠀꠘꠟꠣ। 43ꠙꠤꠔꠞ ꠛꠃꠔ ꠖꠤꠘ ꠎꠣꠚꠣ ꠡꠢꠞꠅ ꠍꠣꠁꠝꠘ ꠘꠣꠝꠞ ꠄꠇ ꠌꠣꠝꠣꠞꠞ ꠛꠣꠠꠤꠔ ꠞꠁꠟꠣ।

Currently Selected:

ꠁꠘ꠆ꠎꠤꠟ ৫: ꠍꠣꠢꠣꠛꠤ ꠘꠣꠝꠣ 9: sylN

Highlight

Copy